Tao Teh King/Bab 54

LIV.

ITOE AKAR DENGEN TJABANG-TJABANG.

1. Orang jang taoe bagimana moesti menanem poehoen, itoe tetaneman tida bisa kena ditjaboet.
2. Orang jang taoe bagimana moesti memegang saroepa barang dengen bener, tida nanti bisa bikin terlepas kombali.
3. lapoenja toeroenan aken hormatken padanja teroes-meneroes.
4. Siapa sadja bisa sampoernaken Tao dalem dirinja, aken beräkar di dalem kabedjikan.
5. Siapa sadja bisa sampoernaken Tao dalem familienja, aken menjebabken kabedjikannja djadi mendjalar.
6. Siapa sadja bisa sampoernaken Tao dalem kampoengnja, aken menambahken kamamoeran.
7. Siapa sadja bisa sampoernaken Tao dalem karadja'an, aken bikin nasif baek djadi tersiar loeas.
8. Siapa sadja bisa sampoernaken Tao dalem doenia, aken bikin pri kabedjikan mendjadi oemoem.
9. Akoe taro perhatian (dengen menggoenaken Tao) pada dirikoe sendiri, dan tjara begitoe akoe bisa kenal laen-laen orang.
10. Akoe taro perhatian pada akoe poenja familie, dan lantes laen laen orang poen akoe bisa kenal lebih rapet.
11. Akoe fahamken ka'ada'an ini doenia, dan laen-laen soeal laloe dateng ka dalem akoe poenja pengataoean.
12. Tida ada laen djalan aken akoe mengenal itoe wet-wet jang memerentah atas segala benda, katjoeali tjara begitoe, jaitoe akoe perhatiken itoe samoea di dalem dirikoe sendiri.

⁂

Kakaloetan doenia, seperti djoega karoewetannja kahidoepan jang menjangsaraken manoesia dan melinjapken katentremannja, sabagian besar ada dari lantaran kabanjakan orang tjoemah pikirin, riboetin dan retjokin sadja soeal-soeal tjabang, sedeng pokonja koerang, atawa tida pernah, diperhatiken. Oepama, kabanjakan orang bergoelet mati-matian boeat terlolos dari kamis. kinan dan mentjari kakaja'an, sedeng pokonja, boeat tindes kaserakahan dan ketjilken kainginan soepaja bisa merasa poeas aken hidoep saderhana, telah di-sia-siaken. Dan dengen tjara be­gitoe maskipoen ia bagimana pande, giat dan nekat aken mentjari kakaja'an, ia tida bisa dapetken itoe katentreman, sebab dimana ada kaserakahan dan kasombongan, disitoe tida bisa ada kapoeasan. Maka itoe ada perloe orang mengenal lebih doeloe pokok atawa akar dari ini kahidoepan, sebab dengen poenjaken itoe, ia bisa dapet pegang samoea. Jang dinamaken pokok atawa akar, jaitoelah Tao.

Sabagi tjonto Lao Tze ada oendjoek, kapan orang hendak tanem kabaekan atawa menjiarken kabedjikan antara manoesia, banjak jang djadi menjesel dan kadoehoeng lantaran perboeatan atawa peladjarannja jang baek tida dihargaken, atawa orang tida maoe toeroet dan perhatiken ; banjak orang jang lepas boedi boekan sadja tida dibales, malah terkadang dibajar dengen kadjahatan, hingga ia merasa sanget gêmês pada manoesia poenja bo-tjeng atawa koerang trima. Inilah ada sama djoega orang menanem poehoen dengen kliroe atawa koerang pande. Kapan ia singkirken kainginan boeat dapet pembalesan, pengharga'an atawa poedjian; kapan ia tida perna tondjolin diri ka moeka boeat minta orang taro perhatian; kapan segala pakerdja'an dan perboeatannja jang baek ia lakoeken dengen semboeni dan diam-diam; kapan ia tida mendesek aken adjar pada orang, hanja merasa poeas dengen mengadjar zonder bergerak dan bitjara banjak, hanja oetamaken sadja toeladan baek; — kapan berlakoe demikian orang poen tida bisa alamken apa-apa jang getir dan tida enak; inilah ada satoe dari beberapa artiannja itoe oedjar : menanem poehoen tida bisa tertjaboet lagi. (Ajat 1).

Dalem soeal memegang. oepama pegang orang poenja katjinta'an, atawa pegang prentah atas satoe negri, banjak orang soedah berlakoe kliroe dengen tida perhatiken poko atawa akar. Ampir samoea perhoeboengan antara manoesia satoe pada laen ada didasarken atas kapentingan, kaoentoengan, lantaran ingin menarik kafaedahan, boekan atas tjinta kasih dengen tida kandoeng maksoed apa-apa; maka perhoeboengan atawa tali persobatan dengen gampang mendjadi poetoes kombali kapan kadoea fihak soedah tida poenja kapentingan lagi, dan malah bisa berbalik djadi moesoeh kapan jang satoe merasa diroegiken atawa kena ditjoerangin oleh jang laen. Maka tjoemah dengen kadjoedjoeran jang tida kouwkati dan tida ingin apa-apa baroelah satoe orang bisa „pegang" pada jang laen de­ngen „tida terlepas," sebab itoe orang soedah „tertjangtjang" oleh boedi dan katjinta'an jang sasoenggoehnja, jang bersih betoel.

Begitoe poen dalem pamerentahan negri. Ada banjak radja-radja pegang prentah dengen kakerasan dan kakedjetnan soepaja rahajat, lantaran merasa takoet, nanti toeroet betoel segala titah dan kainginannja. Memerentah dengen ini tjara selamanja tida bisa kekel, kerna kapan dateng koetika baek itoe rahajat nanti brontak dan lepasken diri dari kakoeasa'annja itoe radja jang kedjem. Sabaliknja kapan ia pegang betoel kaadilan dan menjinta rahajat dengen djoedjoer boekan sadja salagi hidoep, hanja sasoedahnja' itoe radja meninggal poen orang masih teroes inget dan djoengdjoeng padanja, dan malah orang-orang jang belakangan poen tida bisa loepaken pada kabidjaksana'annja, hingga sasoedah berselang riboean taon ia masih tinggal „bertachta" di dalem manoesia poenja hati, (Ajat 2, 3).

Maka itoe ada perloe orang sampoernaken itoe Tao di dalem dirinja, sebab dengen ini djalan ia sama djoega memegang akar dari kabedjikan, jang seperti satoe poehoen bisa, mendjalar pada iapoenja familie, iapoenja kampoeng dan negri, dan achirnja ka seloeroeh doenia. Hatsil dari ini pertjoba'an, aken pelihara Tao dalem diri sendiri, nanti bikin itoe pri kabedjikan djadi semingkin tersiar, dalem kampoengnja timboel kamamoeran, di seloeroeh negri orang hadepken nasif baek, dan pri kabedjikan mendjadi oemoem di seloeroeh doenia. Maka dalem ini hal Lao Tze poenja toedjoean ada banjak mirip seperti Khong Tjoe poenja pengadjaran di dalem Thay Hak — atawa lebih betoel Khong Tjoe poenja tjara ada seperti Lao Tze — jaitoe jang berhoeboeng aken tentremkeh doenia. (Ajat 4-8).

Kapan pegang Tao sabagi pokok, orang tida bisa berboeat kakliroean, kerna dengen taro per­hatian — jaitoe mengenal segala tjatjat dan kakoerangannja — pada diri sendiri lebih doeloe, ia poen bisa kenal djoega sifatnja laen-laen orang, dan dengen perhatiken sadja ka'ada'an dalem roemah tangga sendiri ia nanti bisa kenal baek penghidoepan dari orang banjak, sedeng kapan ia bisa perhatiken ka'ada'an doenia sampe faham betoel, laen-laen pengataoean bisa dimengarti zonder koedoe dipeladjarin lagi. Inilah ada apa jang Lao Tze bilang dalem fatsal XLVII, bahoea orang bisa dapet pengataoean loeas zonder koe­doe kaloear dari roemahnja, kaloe sadja ia pe­rhatiken pokok atawa akarnja sasoeatoe oeroesan, jaitoe mengenal Tao.

Kaliatannja ini katerangan ada gelap dan tida masoek di akal; tetapi dalem wetenschap soedah diakkoe, saorang berilmoe dengen perhatiken salembar ramboet ada jang bisa seboet kabangsaannja orang jang poenja itoe ramboet; dengen perhatiken sapotong toelang bisa dikenalin bagimana matjemnja badan binatang jang poenja itoe toelang, dan dengen preksa satoe tètès aer bisa kataoean adanja laoetan. Dan saorang jang soe­ dah bisa bersatoe dengen Tao, iapoenja pengar­tian, pemandangan dan pendengeran djadi begitoe aloes dan loeas, hingga dengen kakoeatannja tenaga rohani ia bisa taoe segala apa jang soedah lama terdjadi atawa jang masih lama aken dateng. Dan oleh kaoem Buddhist malah dipastiken, kapan saorang soedah bisa sampe di tingkatan Arhat, ia aken mempoenjai itoe lima matjem Kakoeasa'an Gaib (Abhinja), jaitoe bisa meliat apa jang ada di doenia aloes (Clairvoyance, Tjian Lie Gan, Dibbacakkhu), bisa mendenger soeara aloes jang manoesia-biasa tida dapet taoe (Clairaudience, Soen Hong Nji, Dibbasota), bisa inget apa jang kadjadian dalem kahidoepan-kahidoepan jang laloe (Pabbeniwasanussati Nana), bisa batja dan bade pikiran laen orang jang tersemboeni (Paracitta Widjanana) dan berbagi-bagi kakoeasa'an aloes (Psychic Powers. Iddhiwidha). Inilah ada hatsil jang didapet oleh orang jang soedah bisa bersatoe dengen Dharma.

Maski oleh Lao Tze tida dioendjoek terang satoe per satoe, bisa dimengarti bahoea saorang jang soedah bisa tergaboeng dengen Tao tida nan­ti berbeda ka'ada'annja seperti jang soedah bersatoe sama Dharma, hingga terdapetnja itoe segala matjem pengataoean oleh orang jang peladjarin Tao boekan ada satoe hal moestail.

Dan sabagi djoega boeat mengenal Dharma orang koedoe berichtiar dan bergoelet sendiri, begitoe poen aken mengenal Tao orang moesti perhatiken lebih doeloe ka'ada'an dalem dirinja jang nanti membikin ia bisa kenal itoe wet-wet jang memerentah segala benda (Ajat 9-12).

Tao Teh King (page 249 crop)