Tao Teh King/Bab 37

XXXVII.

ILMOE MEMERENTAH NEGRI.

1. Tao selaloe berdiam, tapi tida satoe apa jang tida dikerdjaken.
2. Djikaloe satoe keizer atawa radja bisa pegang keras pada atoeran menoeroet tjaranja Tao, segala apa aken mendjadi beres sendirinja.
3. Djikaloe sasoedah terdapet kaberesan marika masih kandoeng kainginan boeat bekerdja, akoe lebih soeka tahan gerakannja dengen kasaderhana'annja Tao jang tida bisa diloekisken.
4. Kasaderhana'annja Tao jang tida bisa di­loekisken nanti membikin kainginan djadi menjingkir.
5. Menjingkirnja kainginan mengasih katentreman. Dengen begitoe seloeroeh negri nanti berobah mendjadi baek.

⁂

Bahoea Tao, maskipoen diam, telah kerdjaken segala apa dengen tida ada jang ditelantarken, itoelah orang bisa lantes mengarti kapan saksiken tjara bekerdjanja Natuur jang dengen diam-diam telah adaken dan pelihara segala apa dengen beres.

Tapi toch banjak orang tentoelah aken bersangsi atas kabenerannja itoe pengadjaran, bahoea kapan satoe keizer alawa radja berlakoe menoe­roet Tao , segala apa dengen sendirinja nanti mendjadi beres seperti jang di-ingin, Maskipoen betoel toeladan baek dari satoe keizer atawa radja bisa memberi pengaroeh pada rahajat aken berlakoe baek, tetapi dari sebab dalem doenia ada banjak sekalih manoesia djahat dan nakal jang tida bisa dipimpin dan dikasih mengarti, maka ada satoe hal jang sanget moestail, apalagi bagi satoe radja besar dari djeman sekarang, aken adaken perobahan boeat perbaeki rahajatnja tjoemah dengan doedoek diam dan kasih sadja toeladan baek.

Memang djoega peladjaran batin jang paling tinggi ada amat soesah didjalanken dalem ini doenia kasar, dan boekan sadja dari Lao Tze, hanja dari Buddha, Khong Tjoe dan Kristus poen banjak jang amat soesah atawa tida bisa didjalanken dengen betoel oleh manoesia biasa. Boeat bisa toeroet sapenoehnja peladjaran Bud­dha orang moesti lepasken segala iketan doenia dan masoek djadi Bhikkhu, seperti djoega halnja sabagian dari orang Kristen, teroetama kaoem Roomsch Katholiek, jang pendita penditanja tida boleh poenja anak istri dan milik.

Peladjaran batin memang banjak jang tida bisa didjalanken oleh sembarang orang, dan dalem hal ini Lao Tze kaliatan ada toedjoeken perhatiannja pada itoe Djeman Emas (Golden Age), koetika Tiongkok diprentah oleh Keizer-keizer Nabi atawa Manu, dimana rahajatnja jang saderhana ada hidoep beroentoeng dengen pertjajaken segala apa di bawah marika poenja pemimpin, jang tida perna menggretjok dengen adaken segala matjem atoeran jang bikin rahajat merasa bingoeng dan iboek, dan achirnja menimboelken marika poenja nafsoe serakah jang membikin linjapnja katentreman.

Pada djemannja Lao Tze itoe kasaderhana'an, soeka dami dan toeroet prentah, masih terdapet pada rahajat jang oemoem, kerna Khong Tjoe poen selaloe mendesek boeat adaken perbaekan dari sabelah atas, dari jang mendjadi radja dan pembesar-pembesar, kerna rahajat tida soeka banjak rewel kaloe sadja diperlakoeken dengen adil dan pantes. Ini sifat menoeroet dan soeka dami dari kaoem tani di Tiongkok, jang djadi golongan paling besar dari rahajat, masih ter­tampak sampe sekarang, dan kaloe terkadang marika brontak dan bikin riboet, itoelah boekan dari wateknja djahat, hanja terpaksa oleh ka'ada'an, oepama kelaparan lantaran tetaneman dapet karoesakan, dipêrês oleh pembesar-pembesar serakah, diserang oleh bahaja alam, dan sabaginja lagi. Jang banjak bikin kaloet dan timboelken kaonaran adalah kaoem terpeladjar baek pembesar-pembesar jang kedjem atawa hendak besarken kakwasa'annja, atawa poen pengasoet-pengasoet tjerdik, jang timboel­ken rasa koerang senang antara rahajat boeat sampeken maksoednja sendiri.

Tetapi djikaloe bisa tertjipta satoe pamerentah jang tida temaha, jang mendjaga soepaja rahajat tinggal hidoep saderhana dan djangan adjar marika boeat mendjadi pinter dan „sopan," tetapi tida menggretjok dengen adaken segala matjem atoeran dan kamoestian, hingga rahajat tida rasaken tindesan padjek berat, tida poenja pikiran boeat bereboet tjari kakaja'an atawa kahormatan, hanja masing-masing merasa poeas aken hidoep dalem katentreman, — kapan begitoe, siapatah bisa bilang peladjarannja Lao Tze tida bisa dipake? Boeat sekarang memang soesah didjalanken sebab, oepama poehoen, akarnja soedah roesak. Itoe karoesakan ada dari lantaran rahajat diandjoerin boeat djadi pinter, madjoe dan sopan, sifat mana menimboelken kaserakahan dan kepala besar, tida soeka mengalah maski sedikit, hanja masing-masing maoe goenaken hak aken toeroet pegang prentah dan kamoekaken kapentingan sendiri, menoeroet toeladan dari bangsa Barat, hingga maskipoen negri kaliatannja mamoer tetapi dalem batin manoesia tida ada katentreman lagi. Dan orang djangan loepa Lao Tze poenja toedjoean peladjaran sabagian besar ada boeat memberi katentreman batin. (Ajat 1,2).

Lebih djaoe Lao Tze ada djelasken ini pe­ladjaran dengen oendjoek, kapan itoe kaberesan soedah tertjapei tapi orang masih hendak bekerdja, ia hendak goenaken Tao poenja kasaderhana'an aken menjegah, sebab itoe kasaderhana'an (dari Tao) jang tida bisa diloekisken, aken melinjapken kainginan, dan linjapnja itoe kainginan nanti mengasih kombali katentreman, jang bikin seloeroeh negri djadi berobah baek.

Ini katerangan ada penting sekalih, sebab sabagi daja boeat dapetken itoe katentreman jang nanti membikin amannja negri, orang moesti diadjar boeat berlakoe saderhana, sebab itoe kasaderhana'an nanti membikin linjap atawa singkirken segala kainginan jang timboelken katemaha'an. Inilah ada peladjaran jang tjotjok dengen poko dasar dari semoea agama. Sasoeatoe orang bisa lantes dapetken itoe katentreman djikaloe bisa lepasken segala kainginannja jang berhoeboeng sama kasenangan doenia. Maka kaloe semoea orang berlakoe menoeroet recept di atas, siapatah bisa bilang itoe angen-angen aken dapetken katentreman doenia tida aken berwoedjoet? Kaloe peladjaran dari Nabi-nabi sampe sabegitoe djaoe tida berhatsil bagoes aken tjiptaken katentreman doenia, itoelah pokonja lantaran kabanjakan manoesia tida bisa tindes atawa kalahken kainginannja. (Ajat 3-5).

Tapi ini matjem kagagalan boekan terdjadi pada peladjarannja Lao Tze sendiri sadja.