Tao Teh King/Bab 2

II.

KASAMPOERNA'ANNJA DIRI.

1. Kapan apa-apa jang indah soedah bisa dikenalin kaindahannja, ini tandanja manoesia soedah taoe pada sifat djelek.
2. Kapan perboeatan baek orang soedah bisa poedji kabaekannja, ini tandanja manoesia soe­dah kenalin apa jang dinamaken djahat.
3. Antara ada dan tida-ada selaloe terdjadi saling toeloeng-menoeloeng dan saling bantoe dalem pakerdja'an menjipta; antara soeker dan gampang, dalem pakerdja'an membikin; antara pandjang dan pendek, dalem hal woedjoet; antara tinggi dan rendah, dalem hal letaknja tempat atawa barang; antara soeara besar dan soeara ketjil, dalem lagoe muziek; antara doeloean dan blakangan, dalem soesoenan oemoer atawa deradjat.
4. Lantaran begitoe orang Boediman tjoemah perhatiken sadja apa jang tida mengandoeng sifat membentji.
5. Ia mengadjar zonder banjak omong, ia bekerdja tida dengen paksaken diri; ia mengasih zonder ingin mempoenjai; ia berboeat dengen tida perdoeli boeah hatsil dari itoe perboeatan, ia bikin pakerdja'annja djadi sampoerna zonder kapingin dapet poedjian; dan dari sebab tida maoe akoein apa-apa sabagi kapoenja'annja, maka selamanja ia tida bisa merasa kailangan.

⁂

Katerangan :

Sikepnja baji dan katjinta'annja iboe pada anak-anaknja jang masih ketjil, doea-doea ada dipandang paling bersih. Satoe baji tida perdoeliken barang bagoes dan djelek, dan bisa apèt atawa melèngkèt pada satoe baboeh jang toea dan djelek sabagi djoega pada iboenja sendiri jang tjantik seperti bidadari. Kapan ia soedah moelai besaran dan bisa kenalin apa jang bagoes dan apa jang djelek, pastilah itoe anak poenja perobahan tabeat, jang biasanja dipandang „tjerdik", soedah moelai kamasoekan sifat djahat. (Ajat 1).

Tida satoe orang nanti merasa kagoem dan poedji tinggi pada satoe iboe jang soesoein anaknja serta sring bergadang satiap malem, toekerin popok atawa rnendjaga segala kaperloean dan kasenangannja sang anak. Iboe jang tida maoe lakoeken pengorbanan boeat djaga baek pada bajinja sring ditjomel dan ditjelah. Orang tida hargaken tinggi pada pengorbanan dari sang iboe goena anaknja jang masih baji sebab dianggep itoe ada djadi kawadjibannja. Tetapi manoesia poenja kawadjiban boekan tjoemah berwates pada familienja sendiri sadja, hanja mendjalar djoega pada sesama manoesia dan sekalian machloek jang hidoep. Kapan saorang hartawan membri derma pada orang miskin atawa satoe thabib menoeloeng pertjoemah pada saorang sakit jang tida koeat membajar lantes dipoedji dan dipandang moelja, itoelah dari lantaran tabeatnja manoesia ada sänget kouwkati dan kabanjakan tjoemah pikir kapentingan diri sendiri dan familienja. Maka kapan manoesia moelai riboetin dan kagoemin kabaekan, ini tandanja kadjahatan soedah bermaradjalela dan bersarang dalem batinnja. (Ajat 2).

Tapi Lao Tze, jang pandang satoe roepa pada baek dan djahat, ada dan tida-ada, dan laen-laen pasangan jang saling bertentangan, boekan inginken soepaja semoea manoesia moesti djadi baek atawa djalanken kawadjiban dengen betoel, hanja sakedar ia maoe oendjoek, kaloe itoe doea sifat (bagoes dan baek) memang ada diampoenjai dengen oemoem dalem doenia, nistjaja orang tida bisa kenalin, kerna kadjelekan dan kadjahatan tida aken tertampak, hingga tida bisa didjadiken bahan perbandingan.

Antara kosong dan berisi, doea-doea ada menggenggem sifat kabaekan. Gendi jang tida poenja kakosongan di dalemnja, tida bisa dipake boeat tempat aer. Dalem hal membikin apa-apa, soeker dan gampang selaloe beräda sama-sama, begitoe poen pandjang dan pendek, deket dan djaoe, tinggi dan rendah, jang masing-masing mempoenjai kagoena'an sendiri. Kapan pekakas muziek tida mempoenjai soeara jang berbeda'an antara toon jang besar dan ketjil, bagimanatah bisa tertjipta lagoe jang merdoe? Begitoelah antara toea dan moeda, jang berdjalan di moeka dan di blakang, dan laen-laen pasangan bertentangan, masing-masing bekerdja sama-sama aken tjiptaken apa-apa jang berfaedah. Maka itoe orang boediman pandang ini semoea, seperti djoega djahat dan baek, bagoes dan djelek, dengen sikep jang sama-tengah dan tida berfihak, tida memoedji atawa menjelah, dan tida mengandoeng kabentjian atawa ingin mendjaoeken pada apa djoega jang kaliatan di hadepannja. (Ajat 3 dan 4). ini doea ajat di atas, dengen ajat 5 jang djadi berikoetnja, ada mirip sekalih dengen peladjaran dalem Bhagawad Gita, seperti bisa diliat dari perbandingan di bawah ini :

Bhagawad Gita salinan Melajoe djilid II pagina 103 :

„Itoe orang boediman jang tida harepin hatsil dari perboeatannja, nanti dapetken katentreman jang kekel, sedeng orang-orang bodo jang bekerdja aken sampeken kainginan atawa harep­ken hatsil, bikin dirinja terdjiret teroes-meneroes oleh kadjengkelan dan kasoesahan.

„Dengen ingetan tida hendak lakoeken apa-apa itoe orang boediman tinggal diam dengen sabar dan tentrem dalem iapoenja kota jang berpintoe sembilan (badannja sendiri, jang mempoenjai sembilan lobang atawa jang dalem bahasa Djawa diseboet Babahan howo Songo) dengen tida bergerak atawa menjebabken timboelnja pergerakan."

Pagina 108:

„Saorang boediman selaloe memandang sama rata pada satoe Brahman jang soetji atawa satoe boedak jang paling hina; satoe sampi, satoe gadja atawa satoe andjing. Kaoem Pariah jang paling didjidji, masih dipandang sama sadja seperti golongan jang berderadjat paling moelja.

„Dengen pikiran tetep, tida bergontjang lagi, ia tida bergirang kapan dapetken apa-apa jang menjenangken, tida berdoeka koetika ketemoeken apa jang koerang enak.”

Pagina 117 :

„Itoe Yogi jang soedah poenjaken priboedi dan pengataoean dengen tegoeh hingga tidabisa tergèsèr lagi, serta antero nafsoe dan perasa'annja soedah ditaloekin, ialah bisa tjotjokin diri atas segala ka'ada'an, hingga sagoempel tanah, batoe atawa emas, ia pandang saroepa sadja.

„Moeljalah itoe orang jang memandang dengen tida berfihak pada sobat atawa moesoeh, sanak atawa orang asing, baek dan djahat, tjinta atawa bentji."

Begitoelah orang bisa liat, poko dasar dari peladjaran dalem Bhagawad Gita ada sama dan tjotjok betoel dengen oedjar-oedjar dari Tao Teh King di atas ini, hingga achli-achli di Europa jang tida abis mengarti bagimana bisa moentjoel itoe katjotjokan jang begitoe njata, lantes menjangka Lao Tze soedah perna koendjoengin Hindustan boeat fahamken phifosofie Hindoe !