Tao Teh King/Bab 1

I.

TANDA BOEAT MENGENALIN TAO.

1. Tao jang bisa dibitjaraken dengen perkataän boekan ada Tao sedjati jang bersifat kekel.
2. Nama dari saroepa sifat jang orang bisa seboet, boekan mengoendjoek sifat jang betoel dan kekel.
3. Apa jang soedah ada sablonnja tertjipta Langit dan Boemi itoelah dinamaken Kakosongan.
4. Sasoedahnja mendjadi Ada dan dibri nama, ia ada djadi Iboe dari segala benda.
5. Maka orang-orang jang soedah terbebas dari iketan doenia toedjoeken perhatiannja pada resia dari itoe Kakosongan, sedeng orang-orang jang masih teriket pada doenia tjoemah meliat koelit loearnja sadja.
6. Itoe Kosong dan Ada, tjoemah berbeda dalem nama sadja, sedeng atsalnja satoe roepa.
7. Ini persama'an atas apa jang kaliatan bertentangan, akoe namain satoe resia, ― resia jang sanget dalem sekalih, pintoenja boeat mengenal karohanian, jang membikin bingoeng dan kesima.

⁂

Katerangan:

Dibanding sama loeasnja ini alam dengen poenja riboean millioen planeet dan bintang-bintang, ini boemi tjoemah seperti saboetir pasir di goeroen Sahara, dan manoesia jang berdiam ini di doenia boekan tjoemah sabagi sakawanan kodok di dalem soemoer, hanya mirip seperti sakoempoelan tjatjing di dalem tanah. Maka soedah tentoe sadja ma­noesia biasa tida nanti bisa taoe sampe abis sifatnja Tao jang melipoeti seloeroeh djagad, hingga tida bisa dibitjaraken atawa dibri nama jang tetep, sebab sasoeatoe pertjoba'an aken roendingken atawa petjahken artinja Tao pastilah tjoemah berwates pada pengataoean manoesia jang sanget tjoepet. Salandjoetnja, Tao tida bisa diartiken nama dan sifatnja jang tentoe, sebab kapan soedah dibriken nama dan diterangin bagimana sifatnja, lantes moesti ada perwatesan, dan itoe perwatesan membikin linjap iapoenja kasampoerna'an dan kakekelan. Inilah sebabnja maka Tao poenja sifat atawa kwaliteit tida bisa diloekisken atawa ditjeritaken. (Ajat 1 dan 2).

Lantaran Tao, sabagi barang kosong, soedah ada lebih doeloe dari Langit dan Boemi, maka iapoenja Ada dan dikenal oleh manoesia tjoemah sabagi Iboe dari segala benda di langit dan boemi, sebab segala apa beratsal dari itoe Kakosongan dan achirnja aken kombali ka sitoe lagi. Inilah ada tjotjok dengen peladjaran philosofie Buddhist tentang Nirwana jang, dalem boekoe Katerangan Ringkes tentang Aga­ma Buddha, pagina 44, oleh Bhikkhu Narada ada diterangken begini;

„Nirwana ada satoe Dharma (Kabeneran) jang tida terlahir, tida mempoenjai atsal-oetsoel, tida tertjipta dan tida ada roepanja." Peladjaran Buddhist dan Hindoe (seperti bisa diliat dari Bhagawad Gita) mengandjoerin manoesia boeat lolosken diri dari iketan doenia soepaja terlepas, atawa tida ambil perdoeli, pada barang jang Ada, kerna itoe nanti memboeka djalan aken orang bisa sampe pada itoe Kakosongan jang bersifat kekel dan sampoerna. Siapa soedah berada dalem itoe Kakosongan, di dalem itoe Tao, ia aken merdika betoel-betoel, terbebas dari segala iketan, kasangsara'an, kasedihan, oesia toea (djompo), kasakitan dan kamatian, kerna tida oesah saban-saban moesti terlahir lagi ka doenia. (Ajat 4 dan 5).

Antara Kosong dan Ada, maski kaliatannja berlaenan djaoe, sabetoelnja tida ada perbedaan apa-apa. Ini persama'an poen soedah dikataoei djoega oleh kaoem Buddhist. Dalem Buddhism in Java (Agama Buddha di Java) Dr. Arthur Fitz ada koetip oedjar-oedjar dari kitab koeno Kamahayanikan (Peladjaran Buddhist Mahayana) jang kadapetan di Lombok, jang antara laen-laen ada membilang djoega begini:

„Peladjaran Adwaya-dhyana berarti pengataoean jang tida bersangsi atas soeal ,ada’ atawa ,tida ada’. ,Ada’ dianggep tjoemah sabagi doega-doega'an sadja; 'tida ada' djoega tjoemah sabagi doega-doega'an. Dengen begitoe kita bisa liat bahoea..... segala pemilihan jang membedaken baek dan djahat enz. soedah ditolak pada pengataoean tentang ,persatoean’ dan ,rombongan besar’, hingga disini tida ada perbeda'an antara ada-hidoep dan tida-ada-hidoep.”

Semoea barang jang ada, machloek jang hidoep atawa benda-benda jang tida bergerak, aken djadi moesna dan balik kombali ka dalem itoe tida-ada atawa kakosongan. Manoesia saban-saban moesti balik kombali ka doenia lan­taran mengandoeng kainginan aken dapet atawa poenjaken ini dan itoe jang bersifat doeniawi. Kapan ia lepasken segala kainginannja, djangan bergoelet atawa menggretjok pada perdjalanannja natuur, hingga maskipoen hidoep di doe­nia dirinja seperti kosong, pastilah ia aken dapetken katentreman jang sampoerna dan poenjaken itoe kakekelan jang baka. Inilah ada pengataoean resia paling besar dan dalem, jang Lao Tze telah boeka di fatsal pertama dari Tao Teh King, pengataoean mana kapan orang soedah mengarti dan bisa rasain sarinja, membikin ia djadi bingoeng dan kesima atawa kasemsem. (Ajat 6 dan 7).