Tao Teh King/Bab 16

XVI.

POELANG KA ROEMAH SENDIRI.

1. Marika jang mengikoeti Tao tida soeka meliwat wates, dan lantaran tida soeka meliwat wates maka selamanja tida perna berobah.
2. Kapan soedah kosongin dirinja dari segala apa, iaorang tinggal tetep dimana marika berada.
3. Segala benda lakoeken pakerdja'annja de­ngen maoe sendiri, dan komoedian kita liat marika oendoerken diri kombali.
4. Kapan satoe poehoen soedah berkembang dan berboeah, marika balik kombali moelahnja.
5. Balik pada atsal-moelahnja berarti mengaso dalem katentreman atawa menjerah pada maoenja takdir
6. Ini penjerahan pada maoenja takdir dinamain satoe perlindoengan dari wet jang kekel.
7. Mengenal itoe wet jang kekel ada dinamain berpikiran terang.
8. Tida mengenal itoe wet ada berarti kasangsara'an dan katjilaka'an.
9. Siapa soeda mengenal itoe wet kekel aken djadi saorang jang bersoemanget agoeng.
10. Lantaran bersoemanget agoeng ia bisa goenaken pengaroeh dengen bener.
11. Adanja itoe pengaroeh jang bener ia berkwasa seperti satoe radja.
12. Itoe kakwasa'an seperti radja membikin ia djadi seperti Langit.
13. Adanja itoe sifat seperti Langit ia djadi bersatoe dengen Tao.
14. Dengen bersatoe sama Tao ia tinggal kekel selamanja, sebab maski toeboehnja binasa, ia sendiri tinggal slamet.

⁂

Dalem ini fatsal Lao Tze beber satoe dari iapoenja peladjaran-peladjaran jang paling besar, penting dan berharga tinggi.

Kasoekeran jang dialamken oleh manoesia selaloe lantaran hendak berlakoe meliwati wates, dengen bertentangan pada wetnja natuur.

Di dalem natuur segala benda timboel dan bekerdja sendiri zonder disoeroe atawa diandjoerin lagi. Di moesim semi semoea tetoemboean berpoetjoek dan berboenga. di moesim panas berboeah. di moesim rontok boeah-boeahnja mateng dan dedaonannja moelai koening dan djatoh, dan di moesim saldjoe mendjadi goendil sama sekalih sampe dateng moesim semi aken oelangken poelah pakerdja'annja jang baroe.

Kembang-kembang megar aken kasih liat kaindahan dan kaharoemannja zonder disoeroe atawa diminta, dan sasoedahnja lakoeken itoe kamoestian ia moelai lajoe, achirnja kering dan rontok zonder banjak riboet dan mengeloeh.

Tetapi manoesia tida pikir pada itoe tempo jang ia moesti rebah mengaso; kamatian — satoe kamoestian jang tida bisa dibantah atawa disingkirken oleh segala machloek jang hidoep— dipandang sabagi satoe katjilaka'an jang menakoetken, jang haroes didjengkelin dan sedihin. Sabaliknja dari-pada bersedia aken mengaso dengen girang, manoesia selaloe iboekin dan pikirin berbagi-bagi atoeran dan persedia'an seperti djoega ia bakal hidoep teroes selama lamanja di ini doenia, dan kapan kamatian dateng mengantjem ia merasa sanget menjesel lantaran masih banjak maksoed dan kainginannja jang blon kasampean dan terpaksa lepas atawa tinggalken apa jang ia anggep ada djadi kapoenja'annja.

Saorang jang bisa watesken kamaoean dan pakerdja'annja, dan kosongin dirinja dari segala maksoed dan kainginan seperti pepoehoenan di moesim rontok goendoelin tjabang-tjabangnja dari segala dedaonan boeat mengaso di moesim saldjoe, ialah tandanja soedah mengenal pada wet alam jang kekel; dengen begitoe ia bisa dapetken katentreman. Lantaran ia selaloe bersedia dan berdaja aken kosongin dirinja dari segala penarik doenia, maka kaädaännja tida bisa berobah, kerna tida ada apa-apa jang ia moesti pikirin atawa iboekin kapan berlaloe dari doe­nia. la pandang kamatian ada sebagi poelang ka roemah sendiri boeat mengaso. (Ajat 1-5).

Orang jang soedah kenal dan bisa tjotjokin diri pada itoe Natuur wet jang Kekel, ia poen selaloe menjerah pada maoenja takdir jang djadi sabagi iapoenja pelindoeng. Orang jang begitoe boleh dibilang soedah dapetken penerangan, sedeng siapa tida mengenal ini matjem wet dan tjoba bergoelet aken tentangin apa jang tida bisa dibantah, tida aken menampak laen dari kasoekeran dan katjilaka'an. Maka mengenal pada pada itoe kabeneran jang terdapet dalem wetnja natuur jang kekel ada paling perloe, kerna siapa soedah insjaf pada kapentingannja songin diri sendiri soepaja gampang bisa poelangka roemah aken mengaso — jaitoe balik kapada Tao dari mana segala apa ada beratsal — orang jang demikian tandanja bersoemanget agoeng, termasoek dalem golongan Koentjoe, mempoenjai kakwasa'an seperti satoe radja, hingga ia bisa djadi seperti Langit atawa Thian dan bersatoe sama Tao. Itoe persatoean sama Tao membikin ia selamanja alamken katentreman kekel, kerna maski toeboeh kasarnja binasa, ia sendiri tinggal slamet. (Ajat 6-14).