Tao Teh King/Bab 15

XV.

TANDA DARI KABEDJIKAN.

1. Orang-orang boediman di djeman koeno ada pinter sekalih boeat bikin perhoeboengan pada segala apa jang dalem dan loeas.
2. Brapa dalemnja marika poenja pengataoean tida bisa dioekoer ; begitoe dalem dan loeas hingga akoe tida bisa tempatken dalem akoe poenja ingetan.
3. Marika selaloe bersikep hati-hati, seperti saorang jang menjebrangi soengei jang sedeng bandjir.
4. Marika tida gampang bertindak atawa bitjara sembarangan, seperti orang jang bertjoeriga pada kawan-kawannja.
5. Marika mendjaga diri dengen awas dan teliti, seperti saorang jang bikin perdjalanan ka negri asing
6. Marika oendoerin atawa ketjilin diri, seperti saldjoe jang lagi loemèr di bawah sinar matahari.
7. Marika berlakoe saderhana, seperti batang poehoen jang baroe diroeboehin dan blon dikerdjaken oleh toekang kajoe.
8. Marika berlakoe rendah, sabagi djoega tanah lembah
9. Marika bersifat samar dan gelap, seperti aer jang boetek.
10. Siapatah jang sanggoep beningken aer jang boetek? Tapi djikaloe ditinggal diam, lambat-laoen itoe aer mendjadi bening sendirinja. Siapatah sanggoep tjiptaken katentreman sampoerna?

Tapi tjobalah biarin sang tempo berdjalan teroes, dan itoe katentreman lambat laoen aken moentjoel sendiri.

11. Boekankah barang jang tida berdjiwa bisa dibikin hidoep dengen digontjangken teroes-meneroes ?
12. Marika jang mengikoeti Tao tida perloe dengen segala matjam perhiasan aken bikin dirinja kaliatan mentèrèng, dan lantaran tida mempoenjai segala matjem sifat-sifat, marika bisa sampeken oesia tinggi dengen tida perloe moesti beladjar apa-apa lagi.

⁂

Djeman pamerentahannja Sam Hong dan Ngo Te, oleh poedjonggo-poedjonggo dipandang sabagi Tiongkok poenja Djeman Emas (Golden Age) atawa djeman dari katentreman dan kamamoeran besar. Itoelah ada dari lantaran itoe Tiga Keizer Nabi dan Lima Keizer Boediman ada terdiri dari Manu (pemimpin dari satoe bangsa jang besar), Goeroe Soetji (Mahatma) dan Inwijden atawa orang jang soedah ditrima dalem kalangan soetji. Keizer Yu (le) pendiri dari dijnastie Hsia (He) jang menggantiken Keizer Shun, poen tertjatet sabagi satoe Inwijden dan mempoenjai perhoeboengan dengen machloek-machloek soetji di Thibet, dimana ada ting­gal „Goeroe-goeroe dari Sinar Terang",„Poetra-poetra dari Kaboedajan" dan „Soedara-soedara dari Matahari," jaitoe gelaran gelaran jang biasa dibriken pada machloek-machloek soetji jang agoeng. Lantaran mempoenjai ini perhoeboengan, maka itoe Radja-radja Boediman dan Keizer-keizer Nabi bisa memerentah doenia dengen satjara begitoe beres hingga selaloe diboeat seboetan dan digoenaken sabagi model oleh Lao Tze, Khong Tjoe dan laen-laen goeroe Kaboedajan jang blakangan. Maka djikaloe di­bilang itoe orang-orang boediman di djeman koeno ada „pinter sekalih boeat bikin perhoeboengan pada segala apa jang dalem dan loeas," itoelah boleh diartiken, lantaran marika poènja kasoetjian, maka itoe orang-orang boediman di djeman koeno bisa dapet perhoeboengan dengen machloek-machloek agoeng, jang peladjarannja tida bisa ditrima oleh sembarang orang jang blon soetji batinnja dan tjoekoep loeas pengataoeannja. (Ajat 1 dan 2).

Tetapi maskipoen itoe orang-orang boediman di djeman koeno poenja pengataoean ada amat soeker dioekoer atawa didjadjakin dalem, tinggi dan loeasnja, orang poen masih bisa kenalin adanja itoe sifat-sifat oetama dari 'marika poenja tjara berlakoe dalem penghidoepan dan pergaoelan, jaitoe dari marika poenja sikep hati-hati, tida brani berlakoe sembarangan, hanja awas dan terliti, soepaja tida kadjeblos dalem kakliroean ; tida soeka kamoekaken atawa oeta maken diri, saderhana dan tida perna oendjoek kagoemilangan, berlakoe rendah dan lebih soeka tinggal samar, serta tida ingin dikenal atawa reclamein diri soepaja dihormat dan dikagoemken oleh orang banjak. Maka kapan orang bisa tiroe itoe sifat-sifat, ia poen bisa mengikoeti tindakannja itoe orang-orang boe­diman di djeman koeno jang hidoep tjotjok dengen sifatnja Tao. (Ajat 3 sampe 9) .

Itoe orang-orang boediman di djeman koeno poenja tjara memerentah negri paling kentara dari marika poenja tida soeka menggretjok dan mengandjoerin boeat bikin madjoe pada rahajat soepaja mengenal kasopanan dan terpeladjar, enz. enz. Marika poenja tjara seialoe mengikoeti sifatnja natuur jang tida perna bekerdja terboeroeboeroe, hingga segala apa teratoer dengen beres. Aer jang boetek tida bisa djadi bening kapan diadoek-adoek, hanja haroes dibiarken, ditinggal diam, sampe achirnja djadi bening sendiri. Begitoe poen kakaloetan doenia tida aken linjap dengen bikin manoesia djadi pinter, kenal kasopanan dan sabaginja lagi, kapan marika poenja kamadjoean batin masih terblakang, kerna kasoedahannja itoe kasopanan digoenaken boeat poera-poera dan itoe peladjaran dan kapinteran dipake oentoek maksoed-maksoed djahat aken poeasken hawa nafsoenja jang serakah. Maka boekan kapandean atawa kapinteran manoesia, hanja djalannja sang tempo jang nanti bisa tjiptaken itoe katentreman. Kapan temponja blori sampe, atoeran atawa peladjaran jang bagimana baek, bener dan sampoerna, tida nanti bisa didjalanken lantaran manoesia tida bargain dan blon ada tjoekoep orang-orang pande boeat menjokong aken bikin itoe angen-angen berwoedjoet. Inilah djoestroe ada sifat dari natuur. Tida ada poehoen bisa berkembang atawa berboeah kapan blon moesimnja. (Ajat 10).

Doea potong kajoe ada barang jang mati atawa tida berdjiwa, tapi kapan digosok teroes meneroes bisa timboelken api jang hidoep. Begitoe poen dalem dirinja sasoeatoe manoesia soedah dibekelin bibit dari segala ilmoe dan pengataoean boeat bikin iadjadisampoerna, dan itoe bibit-bibit atawa bahan aken moentjoel sen­diri seperti benih jang tertanem di tanah nanti bersemi kapan soedah sampe temponja. Maka sebab soedah kenal itoe matjem sifat jang serba sampoerna maka orang-orang bóediman, jang insjaf ka'ada'an dirinja, tida merasa perloe aken kasih liat marika poenja kapandean soepaja orang banjak merasa kagoem pada itoe kamentèrèngan dan kagoemilangan, dan djoega marika tida oesah paksa diri boeat beladjar terlaloe banjak, kerna kapan soedah mengenal Taoiaorang memegang koentji boeat masoek ka dalem itoe pintoe kasampoerna'an. (Ajat 11 dan 12).

Tao Teh King (page 86 crop)