Tao Teh King/Bab 10

X.

APA JANG BISA DIDAPETKEN.

1. Dengen memelihara dan persatoeken itoe watek aseli dan tenaga rohani orang bisa terlolos dari kamoesna'an.
2. Dengen kendaliken itoe hawa nafsoe cheiwani dan loeasken pengaroehnja priboedi jang lemah lemboet orang bisa bikin dirinja teroes meneroes mendjadi sabagi satoe anak ketjil.
3. Dengen bersihken pikiran dari segala apa jang kotor orang bisa bikin dirinja tinggal tida bernoda.
4. Dengen memerentah rahajat sama katjintaan orang bisa bikin dirinja tinggal tida terkenal.
5. Dengen goenaken tida brentinja itoe pintoe Sorga orang bisa djaga soepaja itoe pintoe-pintoe tida djadi karatan.
6. Dengen tinggal bening (kosong) di segala fihak orang bisa bikin dirinja tida kakenalan.
7. Mengadaken dan memelihara, melahirken zonder mempoenjai, bekerdja dengen tida harep gandjaran, dan mendjalar membesarin zonder memboeang tenaga sia sia, inilah ada kabedjikan jang paling sampoerna.

⁂

Menoeroet anggepan achli achli, dalem ini îatsal ada terdapet bebrapa dari Lao Tze poenja oedjar-oedjar jang paling samar. Gorn Old bilang, sajang sekalih itoe Goeroe Toea tida kasih pengoendjoekan dengen tjara bagimana orang haroes pelihara itoe watek aseli atawa tenaga natuur jang ada dalem dirinja soepaja terlolos dari kamoesna'an. Salandjoetnja, ia mendoega bahoea itoe tenaga rohani dan watek aseli bisa dipelihara dengen djalan mengatoer napas jang nanti membikin orang poenja tenaga badan dan pikiran bisa tinggal baek dan koeat dalem tempo jang amat lama. Apa Lao Tze ada poenja itoe kapandean, inilah orang tida taoe, tapi Gorn Old bilang bisa diboektiken dari hal badannja masih tinggal gagah dalem oesia 90 taon dan pikirannja ada begitoe roepa hingga saorang pande seperti Khong Tjoe menaro pengharga'an tinggi. Salandjoetnja, Gorn Old tjeritaken bagimana orang Hindoe poenja atoeran ilmoe Yoga boeat adaken persatoean antara sifat djasmani dengen rohani, bisa dipake boeat itoe maksoed, jaitoe dengen goenaken Hatha Yoga atawa ilmoe memperbaeki badan, dan Radja Yoga, boeat memperbaeki pikiran, jang ia pertjaja nanti bisa bikin orang djadi beroemoer pandjang sekalih.

Ini anggepan dari Mr. W. Gorn Old, seperti djoega anggepannja kaoem Taoist jang blakangan, djoestroe ada jang mendjadi sebab hingga Lao Tze poenja philosofie jang tinggi dipandang sabagi soember dari ilmoe adjaib, dan angen-angen dari penganoet-penganoetnja ditoedjoeken boeat mentjari daja oepaja aken tinggal hidoep selamanja atawa tida bisa mati, dan laen-laen kaga ban lagi.

Kita sendiri liat dalem boenjinja itoe ajat I di atas ini Lao Tze tida mengadjar apa-apa jang bersifat gaib. Jang ia maksoedken dengen itoe perkata'an „terlolos dari kamoesna'an” sabenernja tida berbeda dengen oetjapan dari Buddha jang menerangken, kapan orang soedah bisa persatoeken dirinja dengen kabeneran, ia terbebas dari kamatian, kasakitan atawa oesia toea.

Dalem Bhagawad Gita djilid II fatsal V pagina 107, Sri Krishna poen ada terangken djoega begini :

„Barang siapa soedah moesnaken kabodoan dengen goenaken priboedi jang ada dalem di­rinja, ialah nanti trima kagoemilangannja pe­nerangan sabagi matahari, jang membikin ia bisa liat poentjaknja kasoetjian.

„Kapan soedah bisa masoek, berdiam, memi­kir, bersoedjoet dan bergerak di dalem karohanian, orang nanti djadi bersih dari segala kadosa'an, hingga bisa terbebas dari kamatian, kerna ia pergi dengen traoesah balik kombali.“

Buddha poen ada kasih katerangan djoega kapan orang soedah bersatoe dengen kebeneran ia tida nanti bisa moesna, kerna kabeneran tinggal kekel selamanja, tida bisa linjap atawa berobah.

Oedjarnja Lao Tze dalem ajat 1 di atas ini poen ada menggenggem maksoed seperti katerangannja Buddha dan Sri Krishna. Itoe persatoean dari manoesia poenja watek aseli dengen tenaga rohani (natural and spiritual po­wers) djoestroe ada toedjoean jang paling pen­ting dari semoea orang jang hendak mentjari kasampoerna'an batin, jaitoe jang Sri Krishna bilang „terbebas dari kamatian”, tapi ini boekan berarti pelihara badan dan pikiran soepaja tinggal seger dan sehat, kerna maski dengen goenaken ilmoe Yoga orang bisa bikin oesianja lebih pandjang, tapi tida ada jang aken tinggal hidoep selamanja, hanja achirnja moesti mati djoega. Lao Tze poenja toedjoean ada terlaloe tinggi boeat mengadjar manoesia ilmoe soepaja bisa pandjang oemoer, kerna maski betoel dengen pertoeloengan salah-satoe ilmoe orang bisa hidoep doea afawa tiga lipet lebih lama dari biasa, tapi ada apatah kafaedahannja kapan tida mendapat kamadjoean batin ? Sabaliknja Khong Tjoe bilang, kaloe soedah mendenger (mengenal) Too di waktoe pagi, biar malemnja teroes mati masih tida oesah diboeat menjesel. Ini artinja mengenal kabeneran ada lebih penting dari pada beroemoer pandjang.

Soeal menahan nafsoe, berlakoe manis dan lemah-lemboet satjara anak-ketjil, inilah soedah sring dibitjaraken dalem ilmoe kabatinan. Jesus Kristus poen ada bilang : „Akoe bersoekoer padamoe, Oh Bapa, Jang diperfoean dari Langit dan Boemi, jang soedah semboeniken ini semoea dari orang-orang jang pande dan terpeladjar, hanja kaoe petjahken pada orang jang seperti anak ketjil ! Ja, Bapa, akoe bersoekoer padamoe jang soedah pandang ini pakerdja'an ada baek aken goenamoe.“ (Matt. 11:25,26).

Sikep atawa pikiran anak-anak dipandang soetji, sebab oemoemnja anak-anak ketjil batinnja bersih, blon poenjaken tetep itoe kaserakahan, ka'angkoean, kasombongan dan laen-laen sifat jang terdapet pada orang dewasa. Semingkin pande dan terpeladjar itoe orang, semingkin koekoeh, kepala batoe, keras dan angkoeh tabeatnja, hingga ia tida bisa mengarti dan menaro harga pada kabedjikan jang terdapet dari sifat lemah-lemboet, manis dan soeka mengalah. Maka boeat bisa berlakoe teroes-meneroes seperti satoe anak ketjil inilah boekan satoe pengartian jang gampang, kerna ada termasoek pada ngataoean batin jang paling tinggi. (Ajat 2).

Kagoena'annja membersihken pikiran semoea orang jang perhatiken agama soedah taoe, begitoe poen segala kafaedahan jang dateng dari itoe perboeatan. Tapi Lao Tze poenja maksoed boekan tjoemah singkirkan segala pikiran jang tida baek, hanja orang moesti tindes djoega itoe bagian dari pikiran jang biasa dinamaken katjerdikan dan kapinteran, sebab kapan satoe orang merasa dirinja „pinter,” iapoenja kasombongan lantes timboel, dan dengen mengandel pada itoe kapinteran ia brani lakoeken perboeatan jang nanti bikin dirinja terdjeroemoes dalem bahaja dan kasoekeran zonder ada perloenja. Maka boeat dapetken itoe sifat seperti anak ketjil, boekan tjoemah haroes disingkirkan ka'angkoean, kasombongan, kaserakahan dan sabaginja lagi, hanja apa jang dinamain katjerdikan dan kapinteran poen moesti dikasampingken atawa djangan digoenaken. Dengen begitoe orang nanti bisa bikin dirinja terbebas dari noda dan kasalahan. (Ajat 3).

Dengen oetjapan „memerentah rahajat,” boekan tjoemah dimaksoedken kawadjiban dari satoe radja atawa pembesar negri, hanja teritoeng djoega pakerdja'an goeroe-goeroe agama, pemimpin kong-ek dan sabaginja lagi jang mempoenjai sadjoemblah moerid atawa pengikoet, begitoe poen satoe kepala dari familie. Kaloe sadja itoe pemimpin-pemimpin — radja, pembesar, goeroe agama, kepala pakoempoelan, kepala familie enz — berlakoe pada rahajat, moerid atawa pengikoetnja dengen katjinta'an jang sadjoedjoer-djoedjoernja, ia bisa lakoeken banjak kabaekan zonder koedoe tondjolin dirinja dengen tjampoer-taoe atawa menggretjok di antara orang banjak. Pertjoba'an aken dorong rajat ka depan soepaja „madjoe” dengen adaken atoeran ini atawa itoe sringkaLih lebih banjak mendatengken kakaloetan dari-pada kabaekan. Sabaliknja, dengen pengaroehnja katjinta'an jang djoedjoer, orang bisa sampeken maksoednja zonder koedoe tondjolin diri ka depan, sebab itoe pikiran baek timboelken geteran di alam astraal jang bisa pengaroehken laen-laen orang, dan ini tenaga aloes ada lebih besar kakoeatannja daripada segala atoeran dan prentah di atas kertas jang boenjinja masih bisa dibantah atawa dipoeter-poeter (Ajat 4).

Apa jang Lao Tze maksoedken dengen perkata'an Pintoe Sorga atawa Pintoe Langit (Thian) inilah ada sedikit gelap. Brangkalih ada berhoeboeng dengen apa jang diterangken dalem ajat 4 di sablah atasan, jaitoe katjinta'an. Kapan orang selaloe berichtiar soepaja iapoenja watek aseli jang beroepa Djin atawa welasasih tinggal sampoerna dan tida brentinja digoenaken oentoek sesama manoesia, pastilah tambah lama aken djadi semingkin enak boeat dipake seperti djoega pintoe jang sring diboeka pergi dateng, èngsèl-èngselnja tida bisa karatan atawa djadi pêrêt, berbeda djaoe dari pintoepintoe jang tinggal tertoetoep dalem tempo lama. Orang jang soedah biasa mendjalanken pri dermawan, dengen gampang bisa menaro kasihan pada sesama machloek zonder koedoe diboedjoek atawa didongengin lagi, dan malah itoe pikiran dari katjinta'an jang ia siarken antara orang banjak tambah lama semingkin berpengaroeh. (Ajat 5).

Sasoeatoe actie jang orang lakoeken, biarpoen boeat maksoed jang bagimana baek dan moelja, selaloe moesti dibarengin dengen tondjolin diri ka depan, dan ini perboeatan tondjolin diri moesti timboelken reactie atawa gerakan jang bertentangan, sebab apa jang baek boeat satoe fihak atawa golongan sringkalih dipandang koerang baek oleh fihak jang laen. Maka saorang jang betoel-betoel hendak bekerdja goena kaslametan oemoem, la tida perloe koedoe tondjolin diri, hanja bekerdja diam-diam. Biarlah oleh segala fihak ia dianggep seperti satoe Nol, satoe orang jang tida berarti, jang tida penting dan tida goenanja dalem pergerakan. Dengen begitoe ia bikin dirinja tida terkenal, tapi berbareng dengen itoe ia bekerdja teroes dengen hatsilnja brangkalih ada lebih besar dari laen-laen orang dikoempoel mendjadi satoe.

Tapi pametjahan di atas tjoemah satoe dari bebrapa artian jang bisa dibriken dari itoe oedjar jang samar. Laen artian lagi ada begini:

Orang jang mengenal Tao, jang bisa bikin dirinja djadi seperti satoe anak-ketjil, tida perna ambil sikep melawan atawa menentangin pada laen orang poenja perboeatan. Djoega ia tida perna kasih oendjoek kamampoean atawa pengartian apa-apa jang membikin dirinja berbeda dari orang kabanjakan. Dengen sendirinja berlakoe bener zonder memboedjoek atawa mengandjoerin laen-laen orang boeat toeroet toeladannja, hanja antepin masing-masing bergerak sendiri satjara merdika, ia tida bisa terbentrok pada orang, hingga tida ada jang merasa diroegiken atawa direndahken oleh itoe kabedjikan jang ia djalanken. lapoenja kahidoepan dan pakerdja'an, dipandang dari fihak jang mana sadja, tinggal bening dan terang seperti katja, tida ada warna atawa tanda apa-apa jang menarik perhatian loear biasa. De­ngan begitoe ia bisa bikin dirinja tida terkenal, jaitoe terlolos dari orang banjak poenja perhatian. Dan siapa bisa berlakoe demikian, Lao Lze pandang batinnja soedah sampoerna, sebab saorang pande jang bisa bikin dirinja tida ter­kenal dan tida dikagoemin itoelah tandanja ia soedah bisa tjotjokin diri dengen Tao dalem sifat sabagi natuur jang bekerdja dengen diam-diam, hingga maskipoen pengaroeh dan kakwasa'annja melipoeti seloeroeh djagad, orang tida rasaken dan ampir tida taro perhatian. (Ajat 6)

Natuur telah tjiptaken semoea jang ada, dan sedia bahan boeat memelihara, soepaja masing-masing bisa hidoep, tapi maski begitoe, biarpoen antero machloek dan benda ia jang lahirken atawa adaken, natuur tida perna akoein sabagi kapoenja'annja, dan tida minta diakoe djasa-djasanja. Sedeng begitoe segala apa diatoer dengen beres, tida memboeang tenaga dengen pertjoemah. Sasoeatoe moesim dateng dengen tentoe, sasoeatoe tetoemboean ada waktoenja berpoetjoek, kembang-kembang ada temponja megar, beboeahan ada temponja mateng, dan sasoeatoe daon jang rontok tjoemah bikin itoe tanah djadi lebih gemoek boeat se­dia makanan bagi tempo jang aken dateng. Matahari dan remboelan bergerak teroes dengen atoeran tentoe, tida satoe minuut terlaloe tjepet atawa keiidor, hanja semoea diatoer precies dan tjotjok satoe sama laen. Kapan orang bisa beriakoe menoeroet pakerdja'annja Natuur (Tao) inilah tandanja ia soedah sampe dalem kabedjikan jang paling sampoerna. (Ajat 7).