Pembalesannja Kawanan Liangsan/Bagian katiga/Bab 8

by Tong Th. Fuctriorider

VIII

Lantaran kedjemnja Louw Soe-

wat, hingga An To-tjwan

moesti melariken diri.

Kerna itoe waktoe pakerdjahan jang moesti dioeroes ada banjak, maka sahabisnja pesen Louw Soe-wat ambil obat dan laen-laen, Tjoa Keng laloe pergi ka kantoornja, dan aken memereksa soerat-soerat jang terkirim dari koeliling tempat. Kerna begitoelah memang kawadjibannja mantri besar.

Sekali-kali ini Thaysoe tida doega, kaloe itoe Louw Soe-wat jang mendjadi orang kapertjajahannja dan bekerdjanja di itoe kamar obat poen ada atas pertoeloengannja, ada mempoenjai hati begitoe kedjem, hingga boeat dapetken kadoedoekan jang tinggi, tida segan boeat lakoeken kadjahatan pada goendiknja.

Lohor, waktoe Tjoa Thaysoe balik dari kantoran, ia tida lantas poelang ka roema, hanja lantas pergi ka kraton berhoeboeng dengen soewal paperangan jang bakal dimaloemken. Kerna sabagi ferdana mantri, kendati baginda soeda moendoer dari singgasana, tapi kaloe ada oeroesan jang penting, ia boleh mengadep boeat membitjarakan itoe. Begitoelah sasoedanja beres membitjaraken itoe, Tjoa keng laloe kaloear dari kraton, tapi tida lantas poelang ka roema sendiri, hanja pergi doeloe ka gedongnja Naynay jang sakit, kerna goendik ini poen memang amat ditjinta olehnja.

Satelah sampe di depan pintoe, hatinja djadi terkedjoet satelah liat banjak boedak kaliatan repot dan berlari-lari ka sana sini. Lebi lagi koetika liat roepanja itoe boedak seperti orang bingoeng.

„He, ada apa maka kaoe begitoe repot?“ tanja Thaysoe dengen hati bimbang.

„Oh, Naynay, Naynay sakit keras,“ saoet itoe boedak dengen goegoep: „tadi djoeroe l ajan jang mengrawati membri taoe, bahoewa Naynay sahabisnja makan obat tida antara lama, djadi menglisa dan mendjerit-djerit.“

Tjoa Keng tida menanja lebi djaoe, kerna ia poen djadi kaget denger ini kabar. Dengen tindakan pesat jang ampir separo maoe lari ini mantri besar masoek ka dalem kamar goendiknja. dimana ia liat, betoel sadja Naynay lagi mengoeloeng sambil tekan peroet sendiri jang kasakitan.

„Kenapa?.... kenapa?......“ tanja Thaysoe dengen bingoeng dan peloek badannja di goendik,

Tapi itoe goendik soeda tida bisa menjaoet, lantaran menggelisa dari satadian, maka sekarang badannja djadi lelah dan lantas kaklodjotan. Tjoa Keng djadi amat terkedjoet.

Ia awasi matanja itoe goendik jang tertjinta jang kaliatan satenga terboeka, tapi moeloetnja kaliatan rapet dan giginja terkantjing keras Napasnja tjoema sekali-sekali dan tida lama kamoedian badan itoe djadi kakoe dan napasnja brenti sama sekali.

Naynay itoe telah poetoes djiwa.

Tjoa Thaysoe menangis sabagi anak ketjil jang ditinggalkan iboe. Tapi sigra djoega ia membanting kaki, roepa-roepanja seperti dapet inget soeatoe apa. Dan sasoenggoenja djoega ini mantri besar dapet pikir: betoel goendik itoe ada sakit, tapi moestail amat baroe abis minoem obat djadi mati, kaloe obat itoe tida ditaroken ratjoen.

Itoe djoeroelajan laloe dipanggil dan pesen bahoewa mangkok bekas obat djangan ditjoetji doeloe. Djoega teko tempat masak obat, ampasnja obat itoe djangan diboewang, kerna maoe dipreksa, obat apa adanja itoe jang An To-tjwan telah kasi pada goendiknja.

Kamoedian panggil bebrapa oppas boeat pergi ka kamar Thay-ie-wan boeat serahken pada pengadilan Khayhonghoe, boeat dipreksa.

Itoe oppas trima prenta lantas berlaloe.

Tatkala itoe hari telah moelai malem.

Pada besok paginja, kira-kira djam lima oppas itoe mengadep pada Tjoa Thaysoe, membri taoe: bahoewa An To-tjwan sadari kamaren pergi ka loear kota, jang menoeroet kata orangnja, mengoendjoengi ia poenja sobat. Djadi orang jang ditangkep tjoema Louw Soe-wat sendiri. Tapi sebab pengadilan Khayhonghoe belon boeka, maka ini pembantoe sinshe jang disangka meratjoenin atawa tjampoer meratjoenin, dibawa sadja ka mari.

Sabentar kaloe pintoe kota soeda diboeka kata poela itoe oppas, ia nanti pergi soesoel itoe thabib besar jang kamaren telah toelisin soerat obat, hingga djadi kamatiannja Naynay.

„Baek, sekarang lekas bawa ka mari itoe Louw Soe-wat,“ kata Thaysoe dengen soeara mamarenta.

Waktoe itoe oppas berdjalan kaloear, Tjoa Keng berpikir, dalem ini perkara, maski An To-tjwan jang toelis itoe soerat obat, tapi kaloe maoe dipikir lebi djaoe, njatalah Louw Soe-wat jang bersala. Sebab seande kata bener An To-tjwan toelis itoe recept dengen ada taro tjampoeran ratjoen atawa barang-barang jang berbahaja, toch saharoesnja Soe-wat moesti kasi taoe, sebab ia toch ada djadi pembantoenja itoe thabib dan taoe betoel obat apa jang baek dan tida baek, masalah moesti toeroet sadja ambilin obat ratjoen boeat ditjampoerin? Djadi maski bagimana djoega, njata Louw Soe-wat jang bersala.

Sabelonnja abis berpikir, itoe oppas soeda dateng membawa ini orang tangkepan, jang kaliatannja ada poetjet sekali. Djaoe-djaoe satelah meliat padanja, Thaysoe mengawasi dengen mata mentjorot dan sentak dengen perkatahan-perkatahan keras, hingga ini djahannam lantas sadja berloetoet dengen tida brani angkat kapala.

„Ah, bangsat!, djahannam jang tida inget orang poenja boedi!“ kata Thaysoe dengen soeara keras: „apatah kasalahannja akoe poenja goendik, maka kaoe begitoe kedjem taroken ratjoen dalem obatnja, hingga djadi kamatiannja?“

„Harep Thaysoe tida goesar doeloe,“ kata Louw Soe-wat, jang tjoba maoe belaken kabenerannja, atawa lebi betoel dibilang hendak membanta atas itoe kasalahan: „moestail amat akoe ada mempoenjai hati begitoe kedjem, sedeng Thaysoe poenja boedi ada begitoe besar, jang sampe sekarang belon dapet dibales. Dari hal obat sasoenggoenja boekan salakoe, hanja itoe semoea ada dari An To-tjwan, kerna akoe tjoema ambil sadja itoe obat-obat sabagimana jang ada tertoelis di receiptnja.“

„Dan taro begitoe, moestail amat kaoe tida taoe kaloe itoe recept tertjampoer ratjoen?“ menjantak Tjoa Keng dengen amat gergetan: „itoelah tida boleh djadi! Sekali-kali tida boleh djadi!“

„Kerna sabegitoe lama, An To-tjwan belon taoe berlakoe kliroe,“ kata poela Louw Soe-wat, jang maoe timpaken itoe kadjahatan pada dirinja itoe thabib jang dibentji: „maka akoe tida brani kata apa-apa, tambahan ia memang ada lebi pande dari akoe sendiri.“

„Itoe tida bisa djadi! Tida bisa djadi jang kaoe ada begitoe goblok!“ menjentak Tjoa Keng dengen moerka, jang itoe waktoe soeda lantas berbangkit dan boleh djadi ia hendak memoekoel atawa menendang, kaloe itoe waktoe si djahanam tida lantas dapet inget perkara di perdjalanan.

Maka waktoe liat Thaysoe berbangkit, ia laloe berkata:

„Oh, oh, boleh djadi, boleh djadi ia ada bersakongkol, sekarang akoe inget, ja akoe inget betoel!“

Mendenger begitoe, Tjoa Thaysoe djadi oeroengken niatnja boeat menampar, hanja dengen sengit laloe berkata:

„Apa kaoe bilang, sakongkol? — Sakongkol sama siapa?“

„Inilah akoe nanti terangken,“ kata Soe-wat, jang sekarang moelai menapas legah, kerna liat itoe mantri besar maoe denger tjeritanja.

Tjoa Keng laloe doedoek kombali boeat dengeri bitjaranja si djahanam, jang lantas dapet pikir: sekarang sasoeda katelandjoeran dijalanken pitenahan, lebi baek pitenah teroes, Sebab kaloe tanggoeng-tanggoeng dan An To-tjwan bisa terlepas, dirinja tentoe boleh tjilaka. Tapi kaloe bisa kaniaja itoe thabib sampe terhoekoem, boekan sadja dirinja terbebas dari toedoehan, hanja kadoedoekannja itoe ieseng poen ia bisa dapetken.

Sasoedanja tetep pikir begitoe, ia lantas kata bahowa pada waktoe masi ada di negri Kole, An To-tjwan itoe ada beroending banjak pada Radja Kole, dimana antara laen-laen ia ada denger djoega dibitjaraken, kaloe Tiongkok moelai maloemken paperangan pada negri Liauw, negri Kole nanti siapken balatentara boeat dateng menjerang.

Hal ini, oleh Radja Kole ada dimoefakat betoel.

Sasoeda perdamian itoe selesih, marika lantas berangkat poelang ka mari. Tapi di tenga perdjalanan, betoel sampe di laoetan daerahnja Siamlo, kapal jang didoedoeki itoe petja, dan dalem itoe katjilakahan djiwanja telah ditoeloeng oleh Hoenkangliong Lie Tjhoen, jang doeloe ada djadi kawanan Liangsan dan sekarang telah doedoeki poelo Kimgo dan laen-laen poelo jang berdeketan dengen itoe tempat.

Sedeng negri Siamlo poen telah taloek padanja.

Dalem pertemoeannja itoe, kombali An To-tjwan tjeritaken kaboeroekannja Tiongkok di ini waktoe jang ia kata: kaloe Lie Tjhoen maoe siapken angkatan perang boeat menjerang Tionggoan, sakali bergebrak tentoe bisa lantas dapet.

Dalem itoe perdamian An To-tjwan ada berdjandji banjak dan kasiken katerangan-katerangan jang penting pada itoe orang gaga dari kawanan Liangsan.

Lebi djaoe An To-tjwan soeda preksa djoega tangannja Hoenkangliong, jang dikata besok noesa bakal trima kamoeliahan agoeng. Dan sekarang, dengen dapetnja poelo Kimgo, itoe Lie Tjhoen telah angkat diri djadi Peng Song Ong.

Lebi djaoe Louw Soe-wat tjeritaken, bahoewa Gak Ho djoega ada di sitoe bersama laen-laen orang gaga, jang djoemblanja ada teramat banjak. Dan pada waktoe An To-tjwan maoe berangkat dari Kimgo, Gak Ho ada kirim satoe soerat pada Soen Liep di goenoeng Tenghoensan, kerna Gak Ho roepanja taoe, bahoewa iaorang bakal mendarat di Tengtjioe, dan jang dari itoe kota kaloe maoe ka Tongking moesti liwat goenoeng terseboet.

Djoega ia toetoerken tentang pertemoeannja An To tjwan pada Thaunia-thaunia di itoe goenoeng, dan di ini tempat kawanan brandal poen To-tjwan ada djandjiken apa-apa pada Soen Liep dan laen-laen Hohan, jang berhoeboeng dengen pemberontakan.

Tegesnja banjak sekali tjerita-tjerita jang djahanam ini karang boeat metjilakai An To-tjwan.

Tentang dirinja telah dihinaken oleh Wie Siauw-tjhit, djoega ia toetoerken. Ia kata Wie Siauw-tjhit telah maki-maki dan mendamprat, lantaran ia tida djalanken kahormatan sabagi satoe liauwlo pada Thaunianja.

„Tentoe sadja akoe tida maoe djalanken kahormatan begitoe pada satoe begal dan brandal sabagi Wie Siauw-tjhit,“ kata poela Louw Soe-wat: „kerna menginget, jang dirikoe ketjil-ketjil poen ada mendjadi oetoesan jang diangkat oleh Thaysoe. ― Tapi apatah Thaysoe taoe bagimana lantaran itoe Siauw-tjit telah djadi goesar dan maoe poekoel padakoe, kerna ia kata: djangan poela jang sabagi akoe, jang baroe mendjabat pangkat di kamar obat Thay-ie-wan, hanja maski Tjoa Thaysoe sendiri, kaloe ketemoe padanja moesti berloetoet. Dan waktoe kata begitoe ia seboet Thaysoeya ampoenja nama jang moelia dan terhormat.“

Mendenger ini perkatahan Tjoa Keng djadi goesar betoel. Maka sembari banting-banting kaki ia berkata:

„Apa kaoe bitjara ini dengen soenggoe-soenggoe, atawakah tjerita karangan sadja boeat menjilakai pada An To-tjwan?“

„Kaloe Thaysoe tida pertjaja, baek panggil sadja itoe orang-orang jang ada toeroet mengikoet,“ saoet Louw Soe-wat: „dan sekarang Thaysoe boleh panggil dan tanja, apa betoel atawa tida jang di perdjalanan ada mampir-mampir di Kimgo dan Tenghoensan, dan kaloe tida bener begitoe roepa, boleh lantas djatoken hoekoeman dan koetoengin akoe poenja leher.“

„Dan sekarang akoe ada di hadepan Thaysoe,“ kata poela ini djahanam: „akoe tida katemoeken lebi doeloe pada itoe orang jang Thaysoe bakal tanja, maka sagala djawaban dan katerangannja, tidalah boleh dikata akoe ada bersakongkol, djika djawabannja ada bersamaan padakoe ini. Dan dari itoe katerangan djoega Thaysoe bisa dapet taoe, boleh djadi itoe ratjoen jang tertjampoer di obat, ada berhoeboeng dengen itoe sagala permmoefakatan jang telah dibitjaraken pada Lie Tjhoen dan begal-begal di Tenghoensan.“

Tjoa Keng lantas soeroe oppasnja pergi panggil itoe orang-orang jang kamaren baroe poelang dari pelajaran. Tida lama datenglah ampat lima orang jang ada toeroet sabagi pengikoet pergi ka Kole, dan atas pertanjahannja ini mantri besar, apa bener marika ada mampir di Kimgo dan goenoeng Tenghoensan, semoea menjaoet betoel dan malah telah tjeritaken djoega, bagimana waktoe toeroen dari goenoeng An Totjwan ada di anter oleh sakalian Thaunia-thaunia.

Sekarang, itoe pitenahan dipertjaja betoel oleh Tjoa Keng, jang lantas djadi goesar sekali pada An To-tjwan, kerna pertjaja itoe thabib soeda bersakongkol pada kawanan Liangsan boeat terbitken pemberontakan. Tapi kaloe lebi doeloe ia telah boenoe goendiknja, sakedar boeat bikin hatinja ini ferdana mantri djadi kaloet dan tida bisa oeroes perkara-perkara negri.

Louw Soe-wat, ini djahanam besar, djadi amat girang satelah dirinja dilepas dari iketan, maka sekarang tida perloe ia lari atawa takoet-takoet. Sedeng Tjoa Keng sasoedanja denger itoe semoea obrolan, lantas toelis soerat pada baginda Song membri taoe jang An To-tjwan ada bikin perhoeboengan pada laen-laen negri dan pada kawanan Liangsan di sakoeliling tempat, boeat terbitken pemberontakan menjerang Tongking.

Ia harep baginda lantas kaloearken firman dan prenta kantoor Khayhonghoe tangkep pada An To-tjwan, jang sekarang berada di loear kota, sebab kaloe tida lantas ditangkep, koeatir thabib itoe nanti kaboeroe lari.

Baginda jang memang pertjaja sadja pada Tjoa Keng, dengen tida tjari taoe bener tidanja itoe perkara, lantas menoeroet dan tida lama kamoedian pembesar di Khayhonghoe jang menerima itoe firman, lantas kaloearken prenta boeat djalanken penangkepan.

Bebrapa oppas laloe pergi ka roemanja itoe thabib besar. Tapi di itoe gedong tjoema ada Siauw Djian berdoea Kim Thay-kian, jang satelah meliat datengnja itoe oppas-oppas, laloe menanja: pembesar manatah jang sakit, maka ini oppas-oppas. begitoe repot dan terboeroe-boeros mengoendang An To-tjwan.

Itoe oppas tida menjaoet, hanja tjoema kata perloe An Sianseng dipanggil sekarang djoega, maka hareplah dikasi taoe.

„Ah, salang betoel jang An Sianseng tida ada di roema,“ kata Kim Thay-kian : „sadari kamaren ia kaloea kota aken pergi pada sobat-sobatnja, dan sampe sekarang poen belon poelang. Tapi akoe kira tida lama djoega tentoe poelang.“

Sahabisnja kata begitoe Thay-kian laloe silaken itoe sakalian hamba politie masoek ka dalem boeat menoenggoe.

Ini oppas-oppas waktoe diprenta ada diantjem djoega pada pembesarnja, kaloe marika tida lekas tangkep, marika bakal dapet hoekoeman. Tapi sasoedanja berdoedoek sakoetika lama, To-tjwan belon djoega kaliatan mata idoengnja, dengen berbisik itoe oppas laloe bangoen dan lantas sadja masoek ka dalem roema, jang teroes ka dalem kamarnja itoe thabib, kerna doega To-tjwan brangkali ada semboeni.

Ini kalakoean tentoe sadja membikin Siauw Djian dan Thay-kian, salakoe toean roema, merasa amat tida senang hati. Dengen perkatahan manis ia kasi inget soepaja. itoe oppas-oppas mengenal sedikit atoeran, djangan maen hantem kromo begitoe tjari orang, sebab kaloe An sianseng poelang dan liat marika poenja perboeatan jang begitoe roepa, pasti djadi koerang baek.

„Akoe harep kaoe bernanti sadja,“ dengen soeara jang ampir berbareng. Dan tjobalah kaloe itoe oppas-oppas. boekannja dari Kha honghoe, tentoe marika soeda oesir seperti andjing. Tapi lantaran maloe hati pada pembesar dari itoe pengadilan, maka Siauw Djian tahan rasa hatinja jang tida enak.

„Oh, kaloe begitoe sobat berdoea masi belom taoe,“ kata itoe oppas, jang sekarang bitjara dengen teroes terang: „kita-orang dateng ka mari sabetoelnja boekan mengoendang An Sianseng mengobatin orang sakit, hanja diprenta dateng menangkep. Begitoelah lantarannja, maka kita-orang soeda lantas sadja masoek ka dalem kamernja kerna doega ia ada di dalem.“

Mendenger ini parkatahan, Siauw Djian dan Thay-hian djadi memandang satoe pada laen. Ia tida mengarti, perkara apa jang mendjadi sebab hingga itoe thabib moesti ditangkep oleh Khayhonghoe.

Sasoeda ilang rasa kagetnja dan soepaja tida dikataken ada bersakongkol, maka doea orang ini lantas silaken itoe oppas-oppas masoek ka dalem boeat preksa lebi djaoe. Permintahan ini ditoeroet, tapi sasoedanja dipreksa sana sini tida djoega kadapetan orang jang ditjari, marika itoe maoe bawa sadja Siauw Djian bersama Kim Thay-kian.

Bermoela ini doea orang tida maoe toeroet. kerna ia kata: seande bener An To-tjwan, ada bersala, itoe thabib jang moesti tanggoeng sagala kasalahannja, dan boekanlah marika jang tida taoe satoe apa.

Tapi itoe oppeas memboedjoek dan kata:

„Begitoenja si betoel. Tapi sekarang sasoedanja An Sianseng tida ada, maka baek akoe bawa sadja kaoe pada pembesar di Khayhonghoe, soepaja kaloe ada pertanjahan apa-apa, ia boleh lantas menanja pada kaoe. Kaloe kaoe tida maoe toeroet, sabentar poen akoe disoeroe dateng lagi boeat panggil, toch achirnja kaoe moesti toeroet djoega, boekan?“

Dengen apa-boleh-boeat, doea orang itoe djadi mengikoet djoega.

Satelah sampe, dan itoe oppas lantas kasi taoe pada Hoe-in, bahoewa An To-tjwan sadari kamaren soeda merat kaloear kota, hingga di roemanja tjoema ada kawannja sadja jang bernama Giauw Djian dan Kim Thay-kian, tinggal dalem satoe roema dan sekarang telah dibawa ka mari. „Bawa ka mari,“ kata itoe pembesar.

Tida lama Siauw Djian lantas dihadepken berdoea Kim Thay-kian, dimana ia laloe ditanja tentang perginja An To-tjwan. Tapi satelah ini doea orang bilang, itoe thabib, sadari kamaren belon poelang, Hoe-ion toedoeh jang ini doea orang soeda lepas kasi lari, hingga marika sabegitoe lama To-tjwan belon dapet di tanpkep, ilang kamerdikahannja.

Mendenger ini perkatahan, Siauw Djian dan Thay-klan djadi amat kaget. Marika rasaken tana jang ada di bawah kakinja djadi ambles dengen koenjoeng-koenjoeng. Di sitoe marika laloe berkata:

„Tentang halnja An Sianseng, sekali-kali kita-orang tida dapet taoe. Betoel ada tinggal sama-sama dalem satoe roema tapi tida ada tjampoer oeroesan atawa perkaranja, maka bagimana Hoeya hendak toetoep kita berdoea?“

„Itoelah nanti di preksa, kaloe bener kaoe tida ada bersala, blakang kali boleh dilepas kombali,“ kata Hoe-ien dengen pendek: „Sekarang kaoe berdoea moesti diserahken pada pembesar Thaylisi jang haroes preksa.“

Siauw Djian lantaran amat kesel dan koeatir, sakoetika lama tinggal berdiri sadja. Tapi Kim Thay-kian jang merasa amat penasaran dan kapingin taoe apa salanja ia poenja sobat, lantas menanja: „Sabenernja An To-tjwan ada bersala dalem perkara apatah, Hoeya, moesti ditaangkep dengen atoeran begini keras?“

„Itoelah kaoe nanti dapet taoe, sekarang tida perloe menanja apa-apa,“ saoetnja itoe pembesar, jang kamoedian panggil oppasnja aken bawa ini doea persakitan.

Tida lama kamoedian doea orang itoe soeda dibawa berlaloe.

. . . . . . . . . . . . . .

Sekarang marilah kita liat pada An To-tjwan, ka mana thabib itoe telah pergi, maka sadari kamaren belon djoega poelang.

Sabagimana telah dibilang oleh Siauw Djian dan Thay-kian, bahoewa thabib itoe pergi, ka loear kota itoelah memang bener. kerna pada sasoeda serahken itoe soerat obat pada Tjoa Thaysoe, sigra djoega ia berdjalan kaloear dengen girang, menginget jang pakerdjahan telah beres dan sekarang datenglah itoe tempo jang sempet. Djoega ia ingei, bagimana pada waktoe maoe pergi ka Kole, banjak sobat-sobatnja telah anter sampe di pos Sipliteng, dan di sitoe itoe sakalian sobat-sobat soeda adaken perdjamoean aken membri slamat djalan.

Sekarang, sasoeda balik kombali, maka ia rasa wadhiblah pergi tjari itoe sobat-sobat boeat hatoerken trima kasi atas katjintahan jang telah dioendjoek. Djoega maoe toetoerken tentang perdjalanannja itoe, jang sasoenggoenja ada banjak sekali tjerita-tjerita jang haroes diomongken.

Dengen berpikir begitoe, sigra djoega ia poelang doeloe sabentaran boeat ambil bebrapa bidji kertas jang ia dapet beli di negri Kole; beroentoeng ini barang jang ditaro di peti tida djadi roesak atawa basa waktoe kapalnja kaleboe. Dan pada kadoea sobatnja itoe ia bilang maoe pergi ka loear kota boeat bertetamoe. Betoel sabagimana jang Siauw Djian dan Thay-kian telah kasi taoe pada pembesar di Khayhonghoe.

Dari roema To-tjwan adjak djongos ketjil jang biasa diprenta-prenta.

Tida lama kamoedian ini thabib soeda sampe di loear kota. Dari sini ia pergi ka roemanja Thio Siang-si, jang satelah denger kabar An To-tjwan dateng mengoendjoengi, djadi amat girang dan lantas boeroe-boeroe menjamboet.

Kamoedian Siang-si silahken minoem-minoem dan tanjaken sadari kapan sobat ini balik ka Tongking, dan laen-laen poela pertanjahan, sabagimana biasanja satoe sobat jang baroe katemoe lagi.

Sembari minoem To-tjwan tjeritaken banjak hal-hal jang dirasa boleh dan boekannja rasia. Kamoedian kasiken itoe kipas jang dibawa tadi. Sampe malem baroelah perdjamoean itoe ditoetoep dan ini thabib. pada itoe malem ada menginep di roemanja Thio Liang-si.

Esoknja pagi To-tjwan pamitan poelang dan balik kombalo ka dalem kota. Tapi ia tida lantas poelang ka roema sendiri, hanja pergi ka gedongnja Sioe Thay-wie, tapi itoe mantri besar jang pergi ka kraton baginda, belon poelang, hingga An To-tjwan djadi terpaksa doedoek menoenggoe.

Pada itoe hari djoestroe Tjoa Keng masoeki soerat pada baginda, boeat minta Keizer kaloearken firman aken menangkep An To-tjwan.

Tida lama kamoedian betoel sadja Thay-wie poelang dan To-tjwan jang memang ada menoenggoe, laloe bangoen membri hormat, sedeng itoe sobat djadi terperandjat jang tertjampoer girang.

„He, he, Anheng ada di sini?“ kata Sioe Thay-wie sambil memandang dengen heran dan kamoedian bertjelingoeken ka sana sini.

An To-tjwan jang tida taoe soeatoe apa dan kira ini sobat ada memaen, tjoema tertawa sadja dan oetjapken lagi bebrapa perkatahan.

Thay-wie lantas pimpin tangannja ini sobat aken diadjak masoek, dan sembari djalan ia berkata:

„Apa Anheng soeda denger satoe kabar djelek?“

„Kabar djelek?“ mengoelangkan To-tjwan: „kabar djelek dari oeroesan apa?“ „Goendiknja Tjoa Thaysioe telah meninggal doenia pada sasoedanja minoem obat.“

„Ah! . . . . .

„Akoe tida bitjara memaen. Apa jang akoe bilang ada dengen sabenernja.“

To-tjwan djadi terkedjoet. Dan sasoedanja tetepken hati sendiri, baroe ia berkata poela:

„Goendiknja Tjoa haysoe betoel ada sakit, dan akoe poen kamaren dipinta boeat preksa, penjakitnja, dimana sasoedanja dapet taoe itoe Naynay poenja sakit, akoe lantas toelisken satoe soerat obat.“

„Djoestroe lantaran itoelah!“

„Soenggoe heran_sekali.“

„Tapi, soedalah, denger akoe poenja tjerita tebi djaoe, “ kata Sioe-wie jang lantas silaken sobat itoe berdoedoek di dalem, dan kamoedian kasi taoe, bagimana baroesan salagi ia ada di kraton, ia denger jang Tjoa Keng soeda masoeki soerat pada baginda, minta dikaloearken firman boeat tangkep ini sobat. Kerna binasanja itoe Naynay, didoega ada perboeatannja An To-tjwan.

Ini thabib djadi amat kaget.

Sioe Thay-wie toetoerken lebi djaoe bagimana boenjinja Tjoa Keng poenja soerat, jang katanja: waktoe masi ada di negri Kole telah bersakongkol pada radja Kole, dan waktoe balik ka Tiongkok, soeda mampir di Kimgo dan Tenghoensan aken berdami pada orang-orang gaga bekas kawanan Liangsan, boeat menjerang Tionggoan.

Sabagimana jang telah dibilang oleh Louw Soe-wat, begitoelah Tjoa Keng toetoerken dalem Soeratnja boeat dibjadiken alesan aken menang kep An To-tjwan, dan sekarang ini Thay-wie j jang telah denger itoe, lantas tjeritaken satoe persatoe peda sobatnja, Benger tida dilebiken atawa di koerangin

„Lantaran tersangkoet dengen perkara politiek jang saiget besar," kata Thay-wie pada sasoe danja tjeritaken itoe: „maka akoe poen tida brani Mmadjoeken perkatahan apa-apa boeat tjoba me noeloeng pada kaoe. Kaloe tjoema perkara matinja Siauw Naynay, itoelah akoe brani langgoeng."

„Kaloe begitoe tjilakalah akoe ini sekali!“ treak An To-tjwan Gengen teramat katakoetan : „binasalah! . . ."

Lantaran takoetnja hati, moekanja ini thabib lantas mendjadi poetjet, sédeng kaki tangannja dirasaken lemas sekali.

„Ah, itoe semoea pitenahan belaka, “ kata ia achir-achir: nakoe taoe, tida ada laen orang dari Louw Soe-wat poenja perboeatan. Tentoe ia jang mengadoe begitoe.“

Thay-wie poen tida bisa pertjaja atas itoe pengadoean. Tapi ia tida bisa berboeat satoe apa, salaen dari pada memandang sadja. „Denit Allah jang soetji,”. kata poela An Tojwan dengen mengelah napas: „soenggoe akoe tida mengarti bagimana boleh djadi ada ini perkara. Akoe belon pernah ada mempoenjai hati begitoe. Soenggoe!.... soenggoe!.... akoe _ tida taeo bagimana Siauw Naynay boleh djadi mati dan terbitken ini perkara jang boekan-boekan. Dalem ini hal Louw Soe-wat ada taoe banjak, akoe kira ia sendiri dar g paling taoe atas itoe kamatian.“

Atas pertanahannja Sioe Thay-wie, An To-jwan tjeritaken dengen terang, bagimana sasoeda ttoelis recept obat, ia kasiken soerat obat itoe di tanganja Tjoa Thaysoe, dan boleh djadi itoe prdana mantri telah prenta Soewat boeat timbangin obat. Kerna sakaloearnja dari itoe gedong, ia poen tida balik lagi ka kamar obat.

Thay-wie memanggoet sambil berpikir,

„sekarang, sasoedanja perkara djadi begini, apa akoe bisa dapet Thay-wie poenja pertoeloengan ?" menanja An To-tjwan dengen hati bergontjang keras.

„Oh, itoelah tentoe sekali," saoet itoe. sobat: Kaloe akoe tida niat menoeloeng, tentoe djoega ini rasia akoe tida kasi taoe.“

To-tjwan hatoerken trima kasi dan kamoedian tanja:: dengen djalan bagimana jang paling baek boeat ia poenja diri n Sioe Thay-wie berdiam sabentaran, kamoedian berkata:

„Kaloe menoeroet akoe poenja rasa, kaoe moesti kaloear dari Tongking, itoe ada paling baek. Sebab kaloe semboeni di sini, didalem kota, lambat laoen pasti bakal kataoean djoega.“

„Ja, akoe poen kira begitoe.“

„Kaoe moesti berlakoe dengen tjepet, pada sabelonnja penangkepan didjalanken atas dirimoe, dan belon. banjak orang taoe ini. perkara.“

„Benerlah sobatkoe poenja nasehat,“ kata To tjwan jang lantas bangoen membri hormat dan slamat tinggal, kamoedian, berdjalan kaloear dengen tjepet, sedeng merasa limboeng.

Tapi baroe djalan, bebrapa tindak, Thay-wie lantas memboeroe dan kata:

„Tahan doeloe, tahan doeloe sobat!

„Ada apa lagi?“ tanja An To-tjwan sambil balik kombali.

Kaoe ini moesti pergi ka tempat jang djaoe,“ kata Thay-wie: „baroelah boleh slamat. Tapi boeat pergi ka laen tempat dengen tjara begini akoe kira boleh djadi tjilaka, sebab kaoe toch tida ada mempoenjai bekelan oewang. Maka toenggoelah sabentaran, akoe nanti bekelin kaoe, ongkos.“

An To-tjwan doedoek menoenggoe dengen hati, berdebar. Tida lama Thay-wie telah kaloear kombali dari kamar, dengen membawa tiga stel pakean, satoe selimoet dan limapoeloe tail oewang perak ketjil, jang gampang boeat dipake belandja. Doea stel dari itoe pakean diboengkoes bersama-sama oewang dan selimoet, dan sambil menoendjoek itoe, ia berkata:

„Sabetoelnja kaoe ada perloe.membawa banjak oewang dan pakean, tapi kaloe bawa terlaloe banjak poen djadi soesa lagi, maka akoe tjoema bekelin sabegini sadja.“

„Limapoeloe tail perak, itoelah sampe tjoekoep,“ kata To-tjwan, sambil mengawasi itoe satoe stel pakean boedak, jang ia tida mengarti maoe diboeat apa.

Thay-wie berkata poela:

„Akoe salempang itoe prenta soeda didjalanken, dan kaloe sampe terdjadi demikian, dirimoe tentoe tida bisa lolos. Maka sekarang pakelah boedakkoe poenja pakean boeat menjamar kaloear dari kota, soepaja orang tida kenalin. Bersama itoe akoe nanti prenta satoe boedak pergi menganterken.“

An To-tjwan rasa bitjara itoe bener sekali. Maka dengen tida menoenggoe dipreta kadoea kali, ia laloe toekar pakean dan sigra djoega soeda ada dalem penjamaran.

Sasoedanja berdandan selesih, Thay-wie laloe prenta satoe boedak boeat menganterken To tjwan sampe ka loear pintoe kota dan dipesen tjara bagimana haroes berlakoe. Sedeng ini thabib, pada sasoeda membri slamat tinggal, lantas kaloear dari itoe gedong dengen tida ada sa-orang jang kenalin. Boedak ketjilnja sadari tadi memang soeda disoeroe poelang. Maka waktoe ia kaloear, boedak itoe soeda tida ada.

Tida lama kamoedian doea orang ini telah sampe di pintoe kota, dan pendjaga pintoe, jang memang ada kenal Thay-wie poenja boedak, laloe menanja, ka mana marika maoe pergi.

Itoe boedak bilang: temennja ini lantaran ajahnja wafat, maka sekarang maoe poelang dan ia tjoema menganter sampe ka loear kota sadja. Dengen ini pengomongan, dengen gampang pendjaga kota dapet dikelaboeken.

Begitoelah dengen tida banjak soesa An To-tjwan soeda bisa terlolos, dan inilah lantarannja, maka berhari-hari orang toenggoeken, tapi ia tida djoega poelang, kerna itoe thabib poen soeda merat.

Sasampenja di loear kota, To-tjwan hatoerken trima kasi pada itoe boedak dan minta ia toeloeng sampeken hormatnja dan trima kasinja pada Thay wie, sedeng pada itoe boedak sendiri, beroelang oelang ada dioetjapken itoe.

Kamoedian marika berpisah dan boedak itoe balika kombali ka gedongnja Sioe Thay-wie.