Pembalesannja Kawanan Liangsan/Bagian katiga/Bab 16
XVI
Lagi-lagi katemoe bahaja, tapi saban ter-
desak, Bok Tjoen salaloe oendjoek
kagagahan dirinja.
Bok Tjoen mengawasi itoe kawan dengen sorot mata jang menjataken rasa kapingin taoe, kerna sampe itoe waktoe Tjio Keng poen belon seboet, ka tempat mana jang marika haroes pergiken.
„Tapi ka tempat manatah jang kaoe bilang ada baek boeat kita toempangken diri?” tanja ia, sasoedanja mengawasi sakoetika lama.
„Boekan laen dari pada di Tenghoensan,“ saoet Tjio Keng: „bagimana, apa kaoe satoedjoe?“
„Oh, itoelah tentoe sekali!“ treak Bok Tjoen jang menjataken rasa girangnja: „soeda lama memang akoe ada denger, jang kita poenja Hengte telah berdiam di itoe goenoeng, maka kaloe sekarang kita dateng ka sana, tentoe marika nanti trima dengen sagala senang hati.“
„Djoestroe akoe djoega ada pikir begitoe,“ kata Tjio keng dengen girang, kerna maksoednja poen ada disatoedjoe oleh ini sobat. Kamoedian Tjio Keng tjeritaken lebi djaoe, bagimana ia telah denger dari Te Tjong, jang Wie Siauw-tjhit dan sadereknja soeda kasi moendoer tentara negri, waktoe balatentara itoe dateng menjerang Tenghoensan Sekarang keadahannja goenoeng soeda boleh dibilang tegoe djoega, kerna satiap hari ada dibikin bermoefakatan bo eat memperbaeki tempat-tempat di sakiternja sitoe.
Waktoe Bok Tjoen tanja: bagimana Tee Tjong boleh tapet taoe itoe perkara, Tjio Keng djawab bahoewa Tee Tjong telah de nger itoe dari An To-Tjwan, jang soeda pernah liwati itoe goenoeng waktoe baroe poelang dari Kolekok.
Satoe persatoe Tjio Keng tjeritaken apa jang Tee Tjong doeloean telah tjerita padanja.
Bok Tjoen djadi amat girang, dan begitoelah di sapandjang djanlan iaorang beromong-omong, hingga dengen tida dirasa, perdjalanan itoe soeda melaloei kira-kira limapoeloe li djaoenja.
Koenjoeng-koenjoeng Tjio Keng rasaken badannja tida enak, kapalanja merasa poesing dan kakinja berat boeat bertindak lebi djaoe.
„Kaoe poenja moeka poetjet?" tanja Bok Tjoen, waktoe meliat pada itoe kawan.
„Ja, akoe merasa badankoe panas," saoet Tjio Keng jang lantas kasi taoe, bahoewa dirinja terserang penjakit.
„Boleh djadi lantaran hawa panas, ditamba dengen katjapean," kata itoe kawan: „lantaran begitoe memang bisa terbitken penjakit.“
Tjio Keng kapingin boeat brenti sadja doeloe Tapi Bok Tjoen kata: di tempat begini maoe brenti di mana, tida ada roema dan waroeng, dimana ia orang bisa dapetken tempat tidoer dan aer panas. Maka baeklah djalan lagi sedikit, nanti kaloe katemoe roema orang boleh noempang brenti.
Maoe atawa tida, terpaksa Tjio Keng teroesken djoega tindakannja. Begitoelah dengen badan limboeng ia paksa berdjalan sampe liwat lagilima li.
„Nah, di sana ada kaliatan roema,“ kata Bok Tjoen sambil menoendjoek ka sebla depan: „hajoelah djalan lagi sedikit, soepaja lekas-lekas sampe dan dapet satoe tempat boeat baringken diri.“
Itoe waktoe Tjio Keng soeda merasa tida tahan, tapi lantaran soeda deket, djadi apa-boleh-boeat ia djalan lagi dengen terpimpin oleh itoe kawan jang baek. Gentengnja itoe roema jang kaliatan, njatalah ada satoe gredja.
Waktoe sampe, kadoeanja itoe laloe masoek dan satoe padri jang liat ada tetamoe dateng, lantas bangoen dari tempatnja doedoek sambil rangkepi tangan.
Bok Tjoen menghamperi dengen hormat sambil kasi taoe, bahoewa ia ada orang pelantongan dan lantaran temennja jang berdjalan sama-sama dapet sakit, ia dateng ka mari boeat noempang brenti.
Itoe hweshio ketjil lantas boeroe-boeroe ka dalem dan kasi taoe pada kapala padri jang berkoeasa di itoe gredja.
Waktoe itoe kapala padri kaloear, kombali Bok Tjoen oelangken permintahanuja. Padri itoe memanggoet dan prenta moeridnja anter ini tetamoe ka kamar samping.
Satelah sampe, Bok Tjoen djadi bengong, kerna di itoe kamar tida ada sapotong perabot jang boleh digoenaken. Tegesnja kamar kosong sadja. Tapi apa-boleh-boeat, kerna ada lebi baek berdiam di sini dari di djalanan atawa bawah poehoen.
Dengen mengelah napas Bok Tjoen lantas ambil sapotong daon pintoe dan taro itoe di atas djoebin boeat Tjio Keng baringken diri, sedeng boengkoesan pakeannja didjadiken bantal.
Soepaja bisa dapet pertoeloengannja ini padri, maka Bok Tjoen laloe kaloearken sapotong pеrak jang beratnja kira-kira doea tjhi dan briken itoe pada si hweshio, sambil minta diambilin samangkok aer djahe boeat orang jang sakit.
Itoe hweshio djadi girang dan sambil manggoet-manggoet ia berlaloe boeat ambilin itoe babarang jang diminta.
Kabetoelan aer panas ada sadia, maka si hiweshio laloe ambil sapotong djahe dan getjak itoe, kamoedian masak lagi sabedidian dengen tjampoerin sedikit goela. Tida lama ia bawaken barang itoe ka kamar samping, tempat orang jang lagi sakit.
Dengen terbantoe oleh Bok Tjoen, Tjio Keng paksaken doedoek dan minoem, sasoeda itoe lantas rebah kombali dengen badan goemeter.
Baek djoega dalem itoe boengkoesan ada selimoet, maka sahabisnja selimoeti itoe kawan Bok Tjoen laloe menanja: „di ini tempat di sebla mana ada orang djoeal obat.
Si hweshio laloe oendjoeki, kira-kira lima li dari sini ada satoe pasar jang terseboet Siang-hongtin, di sitoe ada bebrapa roema obat dan laen-laen barang jang bisa dapet dibeli. Djalannja dari sini lempang sadja menoedjoe ka Oetara.
„Baeklah, akoe nanti pergi ka itoe pasar boeat beli obat,“ kata Bok Tjoen: „tapi di waktoe akoe pergi, harep kaoe toeloeng djagaken akoe poenja soedara jang sakit, seande ia maoe apa-apa, toeloenglah. — Akoe tentoe tida loepaken kaoe poenja boedi.“
„Itoelah troesa diboeat salempang,“ kata si hweshio: „pergi sadja, akoe.nanti djaga padanja.“
Bok Tjoen lantas berlaloe, sedeng Tjio Keng itoe waktoe soeda poeles. Badannja ada mengaloearken kringet banjak sekali. Njatalah itoe thee djahe ada bergoena djoega.
Tapi baroe sadja Bok Tjoen kaloear dari pintoe bio, ia berpapasan pada saorang moeda jang djoega baroe käloear dari sitoe dengen berpimpinan tangan pada satoe prampoean moeda. Lelaki itoe djalannja limbang-limboeng, seperti orang jang poesing lantaran minoem arak. Bok Tjoen mengawasi dengen heran, kerna tida mengarti, apa itoe orang moeda telah bekerdja di dalem gredja.
Tapi itoe prampoean jang satelah liat padanja, lantas berkata:
„Siauw Long!......“
Pada waktoe si nona itoe memanggil, djoestroe Bok Tjoen soeda angkat kakinja bertindak lebi djaoe, kerna ia poen tida mempoenjai tempo boeat liat orang lama-lama. Apa jang itoe waktoe hatinja ada pikir, tida laen dari pada hoeat dapetken obat goena itoe kawan jang lagi sakit. Djadi manatah ia denger itoe soeara.
la berdjalan teroes dengen tjepet dengen Hati bingoeng.
Orang moeda jang diliat itoe ada bernama Tiok Tay-lip, pendoedoek diini tempat. Dalem ini kota Kangtjioe ia terkenal berkalakoean djahat, hingga orang-orang sopan dan berboedi tida soeka padanja. Maski roepanja amat djelek. tapi boekan sedikit orang-orang prampoean jang kapintjoek olehnja, kerna ia poen bisa sekali mengomong dan memboedjoek.
Orang-orang di ini tempat poenja anak bini boekan sedikit jang telah disesatken olehnja. Tapi sabegitoe djaoe belon katemoe orang jang kasi hadjaran, hingga ia bisa lakoeken itoe teroes meneroes dengen katoemannan.
Itoe prampoean moeda jang dipimpin olehnja ada gadisnaj Tie Tay-gan, pendoedoek di ini tempat djoega, jang baroe beroesia limabelas taon dan bernama Hong-ko.
Tay-gan ada boeka roema djoedi dan siang hari malem ada koempoelkan orang maen, jang dari poengoetannja ada djadi kahasilannja meliwati hari. Kerna Bok Tjoen djoega sering dateng maen top ka roema ajahnja, maka nona itoe lantas kenalin waktoe meliat padanja.
Soeda lama Tiok Tay-lip taro hati pada itoe nona, dan sekarang ia dapetken maksoednja
Kapala padri dari ini gredja Siang Hong Sian Sien, jang bernama Tjiauw Djiak-san, tjoema namanja sadja padri, tapi hati dan kalakoeannja ada amat kedji, dan pada Tay-lip ia ada baek betoel. Lantaran itoe djoega, maka itoe kapala padri kaparat tida merasa kaberatan boeat briken tempat boeat dilakoeken perdjinahan dalem ini gredja.
Salaennja itoe doea orang, ada lagi satoe jang bernama Wan Ay-tjoan, dan marika bertiga ada satoe kambrat. Banjak kadjahatan dan kakedjian telah dilakoeken oleh ini tiga orang, dan boekan djarang marika lakoeken iloe pakerdjahan boesoek dalem ini Siang Sien Bio. Sedeng ini hari itoe Tiok Tay-lip ada bikin makan-makan dan minoem di roewangan sebla dalem, dengen ditemeni oleh Tie Hong-ko.
Begitoelah sasoedanja minoem ampir satenga poesing, Tay-lip kapingin boewang aer ketjil dan lantas minta si nona jang anteri, sabagimana di sebla atas pembatja telah liat.
Sasampenja di loear orang moeda itoe djadi koerang senang jang tertjampoer dengen rasa tjemboeroean. waktoe denger Hong-ko memanggil laen lelaki jang olehnja tida dikenal.
„He, siapatah itoe kaoe panggil ?“ tanja ia.
„Siauw Long,“ saoet si nona.
„Siapa itoe Siauw Long, kaoe poenja apa?“
„Ah, boekannja apa-apa, hanja kenal sadja.“
„Di mana kaoe kenal padanja?„
„la poen sering dateng berdjoedi ka roemakoe, dan pada ajahkoe ia ada kenal. Lantaran begitoe maka akoe djadi kenal djoega padanja. Sataoe ia dari mana sekarang, maka boleh ada di sini.“
Mendenger ini perkatahan, Tay-lip jang tadi kaliatan poesing lantas djadi lebi seger. Maka sambil memandang moekanja itoe gadis ia berpikir: „Siauw Long?, apatah boekan itoe orang jang Ouw Pit-koh seboet baroe ini? — Ah, brangkali bener dia, sebab ini Siauw Long poen ada satoe pentopan, maka itoe pemboenoehan di roemanja Liok Siang tentoelah dilakoeken olehnja.
Tentang itoe pemboenoehan di Lioe tongwan, dimana Liok Siang dan prampoean jang djadi piarahannja telah binasa, soeda djato ka tangan politie. Orang banjak soeda denger itoe kadjadian ngeri dan banjak djoega pendoedoek jang dibikin sakit hati oleh itoe toekang praoe, waktoe denger ini kabar djadi amat girang.
Maka dalem itoe sapandjang hari jang laloe, di sana sini ada rame ditjeritaken dan Tiok Tay-lip waktoe katemoe Ouw Pit-koh, soeda menanjaken apa-apa jang berhoeboeng dengen itoe perkara.
Si kolot jang memang dojan omong, lantas sadja tjeritaken, bahoewa itoe hari salagi matjoelin tana di kebon, ia liat Bok Siauw Long bersama saorang moeda laen jang tida dikenal, ada pergi ka roemanja Liok Siang sedeng si toekang praoe tatkala itoe djoestroe lagi pergi belandja Maka dalem itoe roema tentoelah tjoema ada istrinja Thio Tek sadja, jang soeda djadi katjintahannja Liok Siang.
Sasoedanja Liok Siang jang pergi belandja itoe poelang dengen bawa barang-barang belanjahannja, tida lama kamoedian ia liat itoe doea orang jang tadi liwat didepannja, telah kombali dengen panggoel apa-apa. Maski ia ada tanja: barang apa itoe jang dibawa, tapi Siauw Long tjoema membri sadja penjaoetan, bahoewa tida ada tempo boeat bitjara banjak dan kamoedian bersama-sama itoe kawan, Siauw Long telah berdjalan teroes, dengen tida kataoean ka mana
Esoknja lantas ada kabar, jang Liok Siang dengen saorang prampoean dalem roemanja soeda diboenoe pendjahat. Maka menoeroet Pit-koh poenja doegahan, jang memboenoe itoe tentoe boekan laen dari orang jang bersakit hati.
Demikianlah tjerita jang Tiok Lay-tip denger dari itoe orang toea toekang kebon.
Sekarang, satelah denger Hong-ko poenja tjerita, bahoewa Siauw Long itoe soeka dateng maen ka roema ajahnja, maka ia doega pasti: orang jang telah memboenoe Liok Siang tentoe itoe orang moeda jang baroesan liwat.
„Tapi, menoeroet katanja Ouw Pit-koh, Siauw Long itoe ada mempoenja kawan, kata Tay-lip dalem hati sendiri: „mengapa sekarang tjoema dia saorang dan ka mana kawannja?“
Sabelon bisa mendoega-doega lebi djaoe, ia djalan boeroe-boeroe ka tempat kentjing jang berada di sebla loear. Dan boeat sampe ka sitoe moesti liwati itoe kamar kasong, dimana sekarang Tjio Keng ada rebah.
Satelah liat itoe orang sakit jang lagi tidoer di atas papan, dengen kapala ditataki boengkoesan, doegahannja jang tadi lantas djadi tetep, bahoewa benerlah orang ini ada kawannja Siauw Long jang melakoeken itoe pemboenoehan dan soeda merampas djoega oewang kapoenjahannja Liok Siang.
„Djadi dalem itoe boengkoesan tentoe ada banjak oewang,“ kata Tay-lip dalem hati: „hm: apa ini boekan satoe perkara jang kabetoelan? Dan bodo sekali kaloe 'akoe tida maoe rampas itoe barang rampasan dari tangannja.“
Sasoedanja lepas aer ketjil, Tay-lip itoe balik poela ka dalem dan waktoe meliwati kamarnja Tjio Keng, kombali ia menoleh, dan liat orang itoe masi tidoer, roepanja njenjak betoel.
Sasampenja di tempatnja itoe kapala padri, Tay-lip laloe berkata sambil bersenjoem:
„Perkara djoeal beli soeda ada di dalem tangan, maka bodo sekali kaloe tida maoe lantas dilakoeken."
„Djoeal beli dalem perkara apatah?“ tanja itoe kapala padri dengen roepa jang sasoenggoenja orang tida mengarti.
Tentoelah pendjoealän dan pembeliän jang membawa oentoeng,“ djawab Tiok Tay-lip sambil tertawa. Tjiauw Tosoe masi djoega tida mengarti.
Kapala padri itoe memandang dengen heran, Tapi sabelonnja ia sempet menanja, dari loear ada mendatengi tiga orang. jang sasampenja di itoe roewangan, lantas berdoedoek sambil berkata:
„Hola, akoe poenja doegahan tida sala, bener sadja ia ada di sini.“
Sambil kata begitoe orang itoe memandang pada Tie Hong-ko sambil bersenjoem.“
Tiga orang itoe boekan Isen dari Wan An-tjoan bersama doea kawannja, jang dateng menjoesoelin Tiok Tay-lip boeat njari käsenangan hati.
„Ah, kabeneran amat!“ kata Tay-lip pada itoe orang jang baroesan berkata: „kaloe kaoe tida dateng, tentoe akoe soeroe orang panggil.“
„Begitoe? Hahahaha!“ saoet Wan An-tjoan sambil tertawa, dengen roepa girang: „tentoe ada banjak kagirangan hati jang boeat dibagiken padakoe, tidakah bener begitoe?“
„Boekan sadja kasenangan, tapi djoega jang boleh mendatengken hasil besar.“
„Ah, apa bener?“
„He, siapatah taoe omong djoesta.“
„Baek, baeklah akoe trima itoe,“ kata An-tjoan dengen roepa girang, kerna kira itoe perkatahan tjoema dimaksoedken boeat makan minoem sadja, sabagimana memang ka biasahannja. Sedeng apa maksoednja Tiok Tay-lip jang bener, sedikit poen ia belon bisa doega.
„Tapi ini doea sobat, siapatah ?” tanja Tay-lip pada itoe doea orang jang ia belon kenal.
Wan An-tjoan laloe kasi taoe dan perkenalken kadoea sobatnja itoe pada Tay-lip dan marika ini boekan laen dari oppasnja pembesar di sini.
Tiok Tay-lip djadi amat girang satelah denger jang kadoeanja ini ada orang politie. Lebi djaoe An-tjoan kasi taoe, bahoewa ia diminta bantoeannja boeat sarepin di mana larinja doea pemboenoe jang melakoeken pemboenoehan di Lioetongwan. Pada siapa jang bisa membri katerangan dalem ini perkara, ada didjandjiken persenan sariboe tail perak.
Begitoelah An-tjoan toetoerken tjeritanja.
Menoeroet tjerita jang Tiok Tay-lip denger dari Ouw Pit-koh, njatalah pemboenoe itoe ada Bok Siauw-long bersama kawannja; dan ia denger dari moeloetnja Hong-ko, bahoewa lelaki jang baroesan liwat ada bernama Siauw Long. Lebi poela di kamar samping itoe jang tidoer ada Siauw Long poenja kawan, hingga doegahannja djadi tetep, bahoewa benerlah itoe doea orang ada pemboenoenja Liok Siang.
Mendenger itoe tarohan didjandjiken Tiok Tay-lip lantas njataken pikirannja dan kata; itoe orang sakit jang sekarang lagi tidoer di kamar samping, tentoelah ada sala satoe dari itoe pemboenoe.
Wan An-tjoan dan doea sobatnja jang denger itoe tjerita, djadi amat girang. Dan boeat dapetken kapastiannja lebi djaoe, itoe doea oppas menanja: tjara bagimana Tay-lip bisa doega begitoe.
„Kerna tadi waktoe akoe maoe lepasken aer ketjil,“ kata Tiok Tay-lip: „djantoeng hatikoe ada panggil kawannja itoe orang jang sakit poenja nama Siauw Long, dan sapandjang katerangan lebi djaoe, njatalah Siauw Long itoe ada satoe pentopan besar dan tida sala lagi bahoewa itoe pemboenoean doea djiwa telah dilakoeken olehnja.“
„Kaloe begitoe, hajoela kita pergi preksa,“ kata Wan An-tjoan.
Sigra djoega itoe orang-orang pada pergi ka kamar samping bersama-sama itoe kapala padri. Dan waktoe sampe, Tay-lip laloe berkata:
„Ini dia pemboenoehnja jang lakoeken pemboenoehan di Lioetongwan, hajoe tangkep!“
Tjio Keng jang lagi tidoer djadi kaget. Waktoe denger itoe perkatahan, ia tinggal berdiam sadja, hingga itoe orang-orang politie dapet kanjatahan, bahoewa benerlah orang ini ada itoe pemboenoe jang lagi ditjari.
Dengen begitoe, penangkepan laloe dibikin. Tapi Tjio Keng tida melawan, sasoeda diborgol An-tjoan lantas iringken ka dalem dan barang barangnja laloe diambil oleh Tiok Tay-lip.
Wan An-tjoan dan itoe doea orang politie poen maoe dapet bagian dari barang-barangnja itoe pesakitan, tapi itoe kapala padri kata: hal pembagian barang boleh dilakoeken sabentar, kaloe Siauw Long djoega soeda ditangkep. Dan sekarang ini barang-barang baek ditaro sadja doeloe dan toenggoe sampe itoe orang gaga jang pergi membeli obat balik kombali.
Tay-lip dan jang laen-laen semoea merasa moefakat, maka sigra djoega iaorang doedoek di dalem aken menoenggoe. Sedeng di itoe kamar samping, tempat di mana tadi Tjio Keng rebah sambil merinti-rinti, Tjiauw Tosoe prenta moeridnja jang bernama To-djin doedoek menoenggoe, dengen dipesen: kaloe sabentar itoe Bok Siauw Long balik, bilang jang temennja dipindaken ka dalem, di kamar jang lebi baek. Kaloe kamoedian Siauw Long soeda masoek, djadi lebi gampang dilakoeken penangkepan.
Moeridnja si hweshio trima prenta, lantas ka loear.
Boeat liwatken tempo jang senggang, itoe kapala padri laloe prenta laen moeridnja sadiaken lagi arak dan oendang itoe tiga orang jang baroe dateng minoem bersama-sama.
„Ini hari akoe haroes mengatoerken slamat pada kaoe berame," kata Tjiauw Tosoe dengen roepa orang jang kagirangan, kerna dalem ini penangkepan jang dibikin, boekan sadja barangnja itoe tetamoe ia ada dapet bagian, malah persenan jang bakal ditrima dari pembesar negri poen, Wan An-tjoan kata maoe dibagi rata antara marika berame, lantaran itoe ia djadi girang dan tida merasa roegi kaloe kaloearken arak tiga-ampat goetji boeat disoegoeken pada itoe orang-orang.
„Benerlah! Baek kita minoem-minoem doeloe, boeat menoenggoe sampe kawannja itoe pemboenoe jang pergi ka pasar, balik kombali,“ kata Tiok Tay-lip.
An-tjoan dan kadoea sobatnja tida menampik, hanja lantas makan minoem dengen senang.
Tapi Hong-ko jang ada di sitoe, djadi amat kesal, kerna penangkepan ini boleh bilang ada dari lantaran soearanja jang memanggil pada Siauw Long, tjoba kaloe ia diam sadja, tentoe Tiok Tay-lip tida dapet taoe siapa adanja itoe orang gaga jang ada mendjadi djoega kenalan dari jaahnja.
Kerna tida sampe hati kaloe sobat ajahnja djoega nanti tertangkep, maka waktoe orang lagi minoem sambil mengomong-ngomong, nona ini bǝlaga maoe boewang aer dan teroes ka loear dan katemoeken itoe hweshio ketjil jang lagi doedoek di depan pintoe.
Ini hweshio jang tadi telah dapet djoega persenan dari Bok Tjoen, merasa tida tega kaloe itoe orang gaga nanti tertangkep, maka sambil menoenggoe, tapi hatinja ada berpikir, tjara bagimana boeat toeloeng itoe tetamoe jang sekarang lagi hadepken bahaja. Dan salagi kabingoengan begitoe, itoe nona moeda kaloear dan tanja padanja dari itoe tetamoe jang lagi ditoenggoe.
„Belon, ia belon balik,“ saoet To-djin: „tapi baekan ia tida balik.“
„Kenapa begitoe ?“ tanja Hong-ko, jang maoe taoe bagimana hatinja ini moerid padri.
„Boekantah kaoe taoe, bahoewa ia maoe ditangkep?“ saoetnja sambil memandang orang poenja moeka: „maka kaloe ia tida balik, itoelah ada lebi baek lagi.“
Dari perkatahannja itoe, Hong-ko dapet kanjatahan jang ini hweshio ketjil djoega ada kasian pada Bok Tjoen, maka dengen tida oesah takoet-takoet prampoean moeda ini laloe njataken pikirannja, bahoewa ia djoega niat hendak menoeloeng itoe orang gaga, soepaja terloepoet dari bahaja.
Kamoedian doea orang ini berdami, dan poetoesan jang diambil jalah: kaloe sabentar Bok Tjoen balik, marika maoe kasi taoe sadja teroes terang, jang kawannja telah ditangkep, sedeng Bok Tjoen djoega lagi ditoenggoe datengnja, jang kaloe ia masoek sadja tengoki itoe kawan, pasti dirinja nanti terdjebak.
Begitoelah waktoe Bok Tjoen balik, djaoe-djaoe To-djin berdoea Hong-ko laloe hamperi dan kasi taoe satoe persatoe apa jang baroesan telah terdjadi, kamoedian doea orang ini minta soepaja Bok Tjoen lekas lari, djangan sampe kaliatan oleh itoe orang-orang politie jang lagi menoenggoe datengnja.
Brapa besar kagetnja Bok Tjoen, waktoe denger ini warta. Sasoeda hatoerkee trima kasi pada itoe doea orang jang telah membri kisikan, ia lantas masoek ka dalem, kerna ia toch tida bisa boeat tinggalken itoe kawan jang lagi sakit tertangkep, kendati djiwa sendiri boleh binana, ia tida nanti maoe lari.
Pintoe pertengahan di mana itoe kapala padri lagi makan minoem bersama-sama Tay-lip dan sakaliannja, ada terpentang, maka dengen gampang Bok Tjoen bisa mengintip dan liat di atas medja ada tali dan laen-laen barang jang disadiaken boeat iket dirinja. Kamoedian ia kaloear kombali dan teroes pergi ka dapoer, dimana ia dapetken satoe kampak jang beratnja kira-kira sapoeloe kati, dengen sendjata mana ia rasa ada tjoekoep boeat bertanding pada itoe orang-orang.
Sambil pegang itoe sendjata ia balik kombali dan djalan pelahan-pelahan dari pingiran, dimana kadengeran soeara orang jang lagi mengomong, katanja:
„He, djangan - djangan itoe orang dia tida balik?“
„Lebi baek kita soesoel sadja,“ demikianlah kadengeran laen soeara jang berkata: „soepaja ia tida kaboeroe lari djaoe“
„Troesa disoesoel, akoe tanggoeng Siauw Long itoe moesti balik kombali, sebab ia toch tida taoe jang.......“
Itoe perkatahan jang dioetjapken oleh Tjiauw Tosoe soeda terpoetoes sampe di sini, kerna itoe waktoe lantas terdenger soeara orang jang berseroeh dengen keras:
„Akoe soeda dateng!.....“
Itoe kapala padri dan jang laen-laen laloe menengok dengen kaget. Tapi sabelonnja marika bisa berkata soeatoe apa, Bok Tjoen soeda menjerang dan hantem kapalanja Wan An-tjoan dengen kampak, hingga sakali kena lantas terbela
Itoe doea oppas lantas bangoen dari tempatnja doedoek dengen bingoeng, kerna tida ada sendjata boeat melawan dan ambil sadja korsi boeat menangkis, sedeng kawannja jang ada bergegaman golok, laloe membatjok dengen keras.
Salagi orang serang menjarang, Tiok Tay-lip boeroe-boeroe melinjapken diri. Tjiauw Tosoe maoe toeroet itoe toeladan dan baroe sadja kakinja bertindak, kampaknja Bok Tjoen telah sampe dan lehernja kapala padri itoe lantas poetoes
Kamoedian orang gaga itoe balikin badannja dan menjerang pada itoe oppas jang bersendjata golok, satoe pertempoeran jang sengit lantas terdjadi dalem itoe roewangan, hingga medja dan korsi lantas terbalik-balik.
Itoe oppas jang pegang korsi, lantaran sala indjak soeda djato kadjengkang di samping kawannja. Berbareng itoe Bok Tjoen ajoen kampaknja dan hantem di kapalanja itoe jang satoe, hingga petja di sitoe djoega dan jang terdjengkang lantas ketok dengen blakangnja kampak, sampe djadi antjoer dan kaloear otaknja.
Sasoeda semoea lawanannja pada menggletak, Bok Tjoen boeroe-boeroe pergi ka blakang dan di sitoe ia dapetken Hong-ko hersama To-djin lagi djongkok dengen badan goemeter lantaran katakoetan.
Bok Tjoen lantas tanja: di mana Tjio Keng soeda dipindaken. Tapi itoe hweshio ketjil tida bisa djawab ini pertanjahan, hanja toendjoek sadja pada satoe kamar sembari bangoen menganteri.
Tatkala itoe Tjio Keng lagi sedeng berkoetet-koetetan memboeka tali. Itoe penangkepan jang dibikin dengen terkoenjoeng-koenjoeng, soeda membikin hatinja djadi amat kaget dan keringet jang mengoetjoer poen boekan sedikit. Sasoeda ditaro dalem itoe kamar, karingetnja masi mengoetjoer teroes, hingga kapala dan badannja djadi enteng, sedeng sakitnja lantas djadi ilang saparo. Begitoelah lantaran kaget ia ampir djadi semboeh.
Tapi sabelonnja itoe tail terboeka, pintoenja kamar terboeka dan Bok Tjoen lantas berseroeh:
,„Soedara! kaoe ada banjak kaget, ja?“
Tjio Keng djadi amat girang satelah liat ini sobat abis mengamoek. Tentoe itoe orang-orang jang tangkep padanja soeda dikasi bagian.
Bok Tjoen berkata kombali sambil tertawa:
„Bagimana, kaoe roepanja soeda ampir djadi semboeh?“
„Ja, lantaran kaget, dememkoe poen djadi ilang dengen koenjoeng-koenjoeng,“ saoet Tjio Keng.
Kamoedian ia tjeritaken, bagimana salagi tidoer dirinja ditangkep dan dipindaken ka dalem ini kamar, hingga hatinja djadi amat koeatir memikiri ini sobat; sebab kaloe Bok Tjoen balik, tentoe ia djoega bakal terbelenggoe.
„Tapi soekoerlah tida djadi begitoe roepa,“ kata ia kamoedian.
Atas pertanjahannja Tjio Keng, jang masi belon taoe bagimana obatnja bisa terlolos dari ini bahaja, ― Bok Tjoen laloe tjeritaken, bahoewa To-djin bersama Hong-ko soeda bisikin padanja. Sasoeda dapet taoe ini perkara, dengen hati amat kaget ia pergi ka dapoer boeat tjari gagaman, jang dengen ini kampak kamoedian telah mengamoek kalangkaboet dan binasaken itoe semoea orang.
Satoe persatoe ia tjeritaken, hingga Tjio Keng djadi amat girang. sembari poedji kagagahannja ini kawan, ia hatoerken djoega trima kasi pada itoe hweshio ketjil dan nona moeda.
Bok Tjoen laloe minta To-djin tjariken, kerna ia kata: itoe kapala padri tentoe ada poenja banjak arak.
Hong-ko jang dari satadi ada di sitoe lantas berkata: boekan sadja arak, tapi makanan poen masi banjak Sebab tadi waktoe Tiok Tay-lip maoe ka mari, ada dibikin banjak makanan jang enak-enak.
Sahabisnja kata begitoe, nona itoe laloe pergi ka blakang dan sediaken makanan jang masi ada, sedeng itoe hweshio ketjil laloe bawa kaloear arak dan taro di roewangan jang bersi.
Bok Tjoen bersama Tjio Keng, pada waktoe itoe doea orang pergi ka blakang, marika pergi ka kamarnja Tjiauw Tosoe dan di sitoe ka dapetannja ia poenja boengkoesan oewang jang ada berisi djoega banjak barang-barang berharga. Koetika marika kaloear kombali, makanan bersama arak soeda sedia dan doea orang gaga ini lantas doedoek makan minoem, dimana Hong-ko bersama To-djin djoega diadjak bersama-sama.
Sembari minoem marika itoe tjerita-tjerita. Tjio Keng saban-saban hatoer trima kasi atas itoe prampoean dan hweshio poenja, boedi, telah begitoe baek hati tida maoe toeroet Tjiauw Tosoe poenja prenta.
Kamoedian, dari pembitjarahan lebi djaoe, njatalah lantaran tegorannja Hong-ko, hingga membikin Tiok Tay-lip dapet taoe, bahoewa Bok Tjoen ada bernama Siauw Long. Lebi djaoe nona itoe tjerita apa jang tadi itoe orang-orang telah perdamiken.
„Ah, njatalah itoe orang djahanam soenggoe!“ kata Bok Tjoen: „sataoe ka mana larinja itoe bantong hingga akoe tida dapet liat lagi. ― Ah, sajang sekali itoe orang boesoek, jang ampir sadja menerbitken kita poenja katjilakahan, bisa dapet lari.“
„Ja, sajang sekali, orang jang begitoe djahat bisa melarikan diri,“ begitoe Tjio Keng samboeng bitjara kawannja.
To-djin dan Hong-ko jang ditanja, bilang ia tida ada liat Tay-lip kaloear.
„Apa brangkali ia masi semboeni di sini,“ kata Bok Tjoen sambil memandang ka sana sini. Kamoedian ia bangoen dan tjari di koeliling tempat. Koetika ia boeka satoe kas, di sitoe ada kaliatan saorang lelaki jang lagi melingker. „Ha, ini dia itoe djahanam !“ kata Bok Tjoen sambil tarik orang poenja tangan. Dan betoel sadja orang itoe ada Tiok Tay-lip.
Sigra djoega ini orang doerhaka ditempiling dan ditendang, sembari dibawa ka tempat dimana iaorang lagi makan minoem. Tay-lip dengen laga seperti tjeroeroet laloe meminta-minta ampoen pada itoe doea orang gaga.
„Toeloenglah Taiya,“ ampoenilah djiwakoe, kata ia dengen soeara meratap.
„Kaoe ini satoe djahanam besar,“ kata Bok Tjoen: „boekantah kaoe pada akoe, tida ada bermoesoehan apa-apa, kenapa kaoe begitoe kedjem maoe tangkep, hingga kawankoe jang lagi sakit, sampe dapet rasa kaget jang begitoe besar ?“
Tay-lip tida bisa menjaoet apa-apa, tjoema berloetoet sambil terampoen-ampoen.
Bok Tjoen rasa orang jang begini tida goena dikasi idoep lebi lama, kerna menoeroet sapandjang tjeritanja itoe prampoean moeda, Tiok Tay-lip ini ada saorang djahat jang soeka sesatken orang poenja anak istri. Dan dirinja poen maka djadi ternoda, lantaran disesatken oleh ini lelaki kedji.
Sasoedanja dapet taoe sagala perboeatannja, Bok Tjoen laloe angkat kampaknja dan tabasken sendjata itoe di lehernja Tiok Tay-lip, hingga dalem tempo sabentaran sadja ini manoesia kedji telah binasa.
To-djin dan Hong-ko jang liat begitoe sampe goemeter sakoedjoer badan. Nona itoe toetoepi moekanja dengen badjoe, kerna tida brani liat dara jang berhamboeran di salebar tana.
Sasoeda mait jang pada terletak dikoempoelken djadi satoe, Bok Tjoen laloe tanja pada Hong-ko, apa ia tida maoe poelang lagi ka kampoeng sendiri. Orang jang ditanja itoe bilang maoe, tapi tida ada poenja ongkos dan djoega tida taoe djalannja.
„Kaloe kaoe tida taoe djalanaja dan tida ada jang anteri, akoe nanti toeloeng anteri,“ kata Bok Tjoen.
Itoe malem Tjio Keng mamereksa di sapoeternja gredja, dan pada kawannja ia kata: ini pemboenoehan jang dilakoeken, kaloe marika soeda berangkat, tentoe moeridnja itoe kapala padri boleh djadi tjilaka. Tapi hatinja amat tida tega kaloe sampe To-djin jang begitoe baek, tertoedoe dalem ini pemboenoehan.
„Troesa koeatir,“ kata Bok Tjoen: „akoe soeda pikir, kaloe besok kita soeda berangkat bersama-sama Hong-ko, itoe moerid hweshio moesti lantas lapoer ini perkara pada pembesar negri, dengen begitoe ia tida bisa tertoedoe lakoeken ini pemboenoehan. ― Bagimana kaoe pikir kaloe begitoe?“
„Itoe baek sekali,“ saoet Tjio Keng.
Kamoedian Bok Tjoen preksa kamarnja itoe padri toea jang soeda binasa, di dalem peti ada tersimpen oewang dan laen-laen barang. Ini semoea Bok Tjoen kasiken pada To djin, dengen dipesen bagimana besok moesti dibikin lapoeran.
Esoknja pagi-pagi Hong-ko berdoea To-djin soeda bangoen masak nasi. Sahabisnja santap Bok Tjoen gendong sendiri itoe boengkoesan, kamoedian kaloear dari itoe gredja bersama-sama Hong-ko.
Kerna djalanan pergi ka Tenghoensan, bakal meliwati kampoengnja itoe prampoean moeda, maka waktoe sampe di sitoe, Bok Tjoen prenta nona itoe lekas poelang dan dipesen: kablakangin moesti djaga diri dan djangan lagi berdjalan jang tida karoean
Hong-ko hatoerken trima kasi, lantas poelang ka roema ajahnja.
Siangnja dari itoe hari baroe To-djin hweshio pergi lapoer ini perkara pada pembesar di sitoe, jang lantas dateng preksa dan prenta orang koeboer itoe mait-mait Sedeng pemboenoenja hwe-shio itoe kata: ia tida kenalin siapa dan djoega tida taoe lantaran apa terbit itoe pemboenoehan.
Dengen melapoer begitoe, perkara di atas tida djadi pandjang. Tapi politie masi oesoet teroes. Sembari berdjalan doea orang gaga itoe bitjara teroes dengen goembira. Tjio Keng kata: ia heran sekali bagimana kamaren dengen mendadak-dadak dirinja boleh djadi sakit, dan sabelonnja diminoemken obat, penjakit itoe telah semboeh.
„Inilah tjoema kahendaknja. Toehan sadja,“ kata Bok Tjoen sambil tertawa: „kaloe soedara tida dapet sakit demem, masatah kita boleh mampir di itoe gredja? ― Roepa-roepanja itoe orang-orang djahat poenja kadosahan soeda loeber, maka Toehan prenta kita dateng mampir dan bikin abis djiwanja itoe semoea kaparat.“
Sahabisnja berkata-kata iaorang tertawa.
Liwat brapa hari kamoedian marika telah sampe di soeatoe tempat jang soeda tida djaoe lagi dari Tenghoensan. Sambil menoendjoek, Tjio Keng kata: itoelah dia goenoeng Tenghoensan.
Dari kadjaoean goenoeng itoe kaliatan angker. Bendera dan roepa-roepa sendjata ada berkibar-kibar. Pedang dan toembak ada seperti oetan sendjata, njatalah pendjagahan di itoe goenoeng ada teratoer baek.
Tangsinja itoe goenoeng poen ada kaliatan. Njatalah tida ada soeatoe apa jang koerang kerna segala kaperloean ada sadia.