Pembalesannja Kawanan Liangsan/Bagian katiga/Bab 11
XI
Dengen tida terdoega, Tee Tjong trima
oendangan. Baginda merasa girang de-
nger Lim Leng-so membatja kitab.
Itoe Titjioe satelah meliat Tee Tjong dateng menjamboet, lantas boeroe-boeroe membales hormat sambil bongkokki badan, dengen soeara manis dan kalakoean merenda ia berkata:
„Tjoenkeh ada itoe orang jang telah berdjasa pada Tiauwteng dan pernah pangkoe djabatan Thotongtjhie, jang maski sekarang soeda tida pegang lagi itoe pangkat, toch ada teritoeng orang-orang dari golongan bangsawan. Dan lantaran itoe, masatah Poentjioe brani trima kahormatan jang Tjoenkeh oendjoek."
Tee Tjong poen bales itoe dengen brapa perkatahan jang merendaken diri. Kamoedian silaken pembesar itoe masoek ka dalem pertengahan Sigra djoega iaorang telah sampe di itoe roewangan dan sasoedanja djalanken poela kahormatan, masing-masing laloe pada berdoedoek, dan Tee Tjong lantas menanja tentang maksoed kadatengannja ini Titjioe.
„Poentjioe poenja kadatengan ka mari boekannja bermaksoed laen,“ kata itoe pembesar: „hanja ada berhoeboeng dengen ini paperangan besar jang bakal dimaloemken. Sabagimana jang Tjoenkeh brangkali ada denger, bahoewa masa ini Tong Djoebit ada siapken balatentara di Pak-king dengen bersarikat pada negri Kimkok boeat menjerang Liauwkok, dan dalem ini paperangan besar jang bakal dimaloemken, ada perloe dengen orang-orang pande. Tong Djoebit dapet taoe bahoewa Tjoenkeh ada mempoenjai kapandean gaib jang dalem satoe hari bisa berdjalan delapanratoes li, maka Djoebit laloe bertaoeken hal ini pada Sri Baginda dan minta diperkenanken boeat oendang pada Tjoekeh aken pangkoe poela djabatan jang lama, dan permoehoenan itoe oleh baginda telah ditrima baek, maka begitoelah Poentjioe dititahken dateng ka mari boeat mengoendang Tjoenkeh laken lantas berangkat,“
Sahabisnja kata begitoe, Titjioe laloe serahkén itoe soerat oendangan.
Satelah denger itoe perkatahan Tee Tjong djadi amat terkedjoet, kerna ia poen soeda tida ingin lagi tjampoer dalem oeroesan pamerentahan atawa paperangan dan sakean lama telah asingken diri di tempat soenji, dengen tida sekali ada ingetan boeat dapetken pangkat besar atawa kamoeliahan doenia. Maka alangken kagetnja denger itoe perkatahan-perkatahan, dan waktoe Titjioe serahken itoe soerat oendang, ia tida lantas trima, hanja berkata:
„Paperangan doeloe hari telah tjoekoep membikin Pintoe merasa lelah, sapoelangnja perang tenaga merasa abis betoel-betoel. papoela sekarang, diri soeda boekannja moeda lagi manatah ada itoe kamampoean aken memangkoe poela djabatan jang diwadjibken? Lantaran itoe, harep Thaytjine toeloeng kirim poelang sadja ini soerat oendangan."
„Ah, manatah oendangan ini bisa dikirim poelang kombali ?" kata Titjioe dengen tarik moeka manis: „ini oendangan poen boekannja soerat jang biasa, hanja oendangan dari baginda jang diseboet firman."
Tee Tjong djadi bengong sedeng itoe pembesar berkata lebi djaoe:
„Satoe kali firman dikaloearken, tida bisa ditarik poelang kombali, sabelonnja mendapet apa jang dimaksoed. Apapoela Tong Djoebit memang soeda lama ada menharep dapet Tjoenkeh poenja bantoean jang besar, maka djoega boeat mengoendang Tjoenkeh, dititahken Poentjioe sendiri jang dateng, sebab koeatir perkara jang penting ini nanti djadi kapiran. Sekarang menoeroet Poèntjioe poenja pikiran, tida ada laen djalan jang lebi baek, dari pada Tjoenkeh trima sadja ini oendangan dan lantas berangkat." Zonder menanti orang poenja djawaban, pembesar itoe lantas membri hormat dan lantas berlaloe.
Hatinja Tee Tjong itoe waktoe djadi kalang-kaboet betoel. Tida taoe bagimana moesti ambil poetoesan. Kenapatah perkara jang ia tida maoe mendadak boleh dateng? Lantaran kesal, ampir sadja ia maoe menangis.
Achir-achir ia ambil djoega itoe soerat dan bertindak ka dalem dengen pikiran tida karoean. Tatkala itoe An To-tjwan lagi menoenggoe dengen hati berdebar.
Sasampenja di dalem ia laloe kasi taoe pada itoe thabib, bahoewa datengnja Titjioe boekan berhoeboeng dengen perkaranja An To-tjwan, hanja ada perkara jang lebi besar dan soeker dari sabagimana jang marika telah doega.
„He, perkara apatah ?" tanja sthabib dengen kaget. Apapoela liat moekanja Tee Tjong ada begitoe koesoet: „ada terdjadi perkara apatah?"
„Dateng firman dari baginda," saoet Tee Tjong. Kamoedian ia tjeritaken bagimana Tong Koan telah poedjiken dirinja ka hadepan baginda boeat diangkat kombali ka dalem djabantannja jang lama aken membantoe dalem paperangan jang bakal dimaloemken pada negri Liauw.
Satoe persatoe ditjeritaken terang, maka sambil gojang kapala An To-tjwan berkata:
„Njatalah bener-bener Allah tida idjinken kaoe berdiam sadja di tempat jang senang, hingga mendadak boleh ada perkara begini roepa."
„Abis apa sekarang akoe maesti bikin?" menanja Tee Tjong, seperti orang jang tida mempoenja pikiran sendiri.
„Kaloe begitoe." kata To-tjwan jang sasoedanja berpikir sakoetika lama: „tida bisa ditoelak lagi. sebab oendangan ini ada dateng dari Sri Makota, pada siapa kita-orang haroes menaro indah. Kerna roepa-roepanja Allah soeda takdirken begitoe, dimana kaoe moesti menempoehkombali ka dalem kalangan jang soeker, ia apa-boleh-boeat, moesti ditrima djoega, kerna tida ada djalan boeat menampik."
Tee Tjong tinggal berdiam, hatinja amat kesel. Tapi dengen An To-tjwan poenja hiboeran, achir-achir pendita itoe berkata:
„Kaloe kaoe bilang kegitoe, baeklah besok akoe nanti mengadep pada Titjioe dan kasi taoe jang akoe ada sadia bocat berangkat."
Itoe malem Tee Tjong adjak sobat itoe makan minoem aembri tjerita-tjerita Dimana An To-tjwan hiboerken padanja. dengen membilang: kaloe Tee Tjong berangkat besok pagi sabelonnja ini sobat mengadep pada Titjioe, ia nanti berangkat ka Tenghoesan, dan harep sadja dalem ini berpisahan bisa lekas bertemoe kombali.
Banjak lagi laen-laen tjerita jang diomongken pada itoe malem, dan sahabisnja minoem, masing-masing lantas masoek ka kamar sendiri.
Esoknja pagi An To-tjwan membri slamat tinggal dan kaloewar dari itoe gredja dengen teranter oleh Tee Tjong sasampenja di bawah goenoeng baroelah kadoea sobat ini berpisa, dan waktoe An To-tjwan menoedjoe ka goenoeng Tenghoensan, Tee Tjong balik kombali ka gredja tempat kadiamannja.
Pada malemuja dari itoe hari Tee Tjong bikin sadia ia poenja barang-barang, dan esoknjo ia pergi ka kantoor Titjioe, aken membri taoe, bahoewa ia telah bersadia boeat berangkat.
Titjioe djadi amat girang dan poedji jang Tee Tjong ada saorang satia pada negri. Dengen kalakoean hormat ia menghiboerken dengen roepa-roepa perkatahan dan sadiaken djoega makanan dan minoeman boeat membri slamat djalan.
Esoknja pagi Tee Tjong lantas berangkat djalan
Biasanja satoe Thotongtjhie kaloe ka mana-mana moesti ada mempoenjai pengikoet, kerna itoe pangkat poen ada besar. Tapi. sebab Sinheng Thaypo Tee Tjong ada mempoenjai kapandean berdjalan tjepet, jang dalem satoe hari bisa melaloei delapanratoes li djaoenja,, maka pengikoet-pengikoet tentoe tida bisa toeroet djalan begitoe, hingga ia djadi tida bawa satoe pengiring.
Sasoedanja membri, slamat berpisa pada Titjioe Tee Tjong laloe berdandan sabagimana doeloe hari. Sasampenja di loear kota ia lantas kaloearken wasiat Kak Ma, jang dengen sabentaran sadja ia soeda berlaloe dari bilangan Swatang dengen ambil djalan di sapandjang goenoeng dan tida brapa hari kamoedian soeda sampe di kota Thaybenghoe.
Di sini ia tjari satoe roema penginepan boeat bermalem.
Esoknja baroe ia pergi ka kantoornja Tong Koan dengen serahken satoe kaartjis pada pengawal pintoe.
Djoebit jang itoe waktoe lagi berdoedoek, satelah dapet taoe jang Tee Tjong telah sampe dan sekarang ada menoenggoe di loear roema, dengen tergoepoe-goepoe laloe prenta Kipaykoa pergi samboet aken disilaken masoek.
Tee Tjong ikoet itoe Kipay, dan waktoe katemoe pada itoe pembesar di bawa prenta siapa ia bakal bekerdja, Tee Tjong laloe djalanken kahormatan sabagimana pantes jang disamboet oleh Tong Djoebit dan disilaken doedoek.
Dengen roepa girang dan perkatahan-perkatahan manis Djoebit menghiboer pada ini orang gaga.
Tee Tjong tjoema oetjapken sadja perkatahan jang merenda.
„Kaoe poenja kapandean dan kagagahan soeda lama ada mendjadi kenang-kenangan hatikoe,“ kata Tong Djoebit sambil tertawa: „sekarang djoestroe ada tempo jang penting maka, dengen perkenanja Sri Baginda, akoe sigra prenta orang dateng mengoendang boeat kaoe pangkoe kombali djabatanmoe jang lama dalem ini angkatan perang.“
„Atas Djoebit poenja katjintahan dan penghargaän jang besar atas dirikoe, lebi doeloe haroes dihatoerken banjak trima kasi,“ kata Tee Tjong: „tapi soeda lama Pinto kaloear dari roema aken semboeniken diri di gredja, dengen harepan bisa dapet tempat mengaso boeat hari-hari jang berikoet. Berhoeboeng dengen tambanja oemoer, jang samingkin lama ada djadi samingkin toea, maka kagagahan jang doeloe poen ampir djadi abis sama sekali. Dan sekarang, dengen pangkoe kombali ini djabatan Thotongtjhie, Pinto koeatir tida nanti sanggoep lakoeken kawadjiban sabagimana moesti, hingga djadi sia-sia Djoebit poenja kapertjajahan.“
Tong Djoebit tertawa bergelak-gelak dan kata, kendati oesia soeda toea poen tida djadi apa. Betoel dalem ini angkatan perang Tee Tjong memangkoe djabatan, „Thotongtjhie, tapi maksoednja boekan maoe soeroe kaloear perang, hanja djadi toekang pembawa soerat sadja.
„Kerna akoe taoe jang kaoe ada mempoenjai kapandean gaib, jang laen orang tida ada poenja,“ kata poela itoe pembesar: „maka akoe pekerdjaken itoe bagian, soepaja dengen kaoe poenja kasaktiaa, kita poenja perhoeboengan pada laen-laen kota bisa dilakoeken dengen katjepetan loear biasa.“
Tee Tjong memanggoet dan kata, boeat itoe ia nanti lakoeken betoel. Tjoema sadja ia minta Tong Koan soeka berdjandji, begitoe paperangan soeda brenti, soepaja dirinja diperkenanken boeat balik kombali ka tempat kadiaman sendiri, kerna hatinja poen soeda berniat tetep boeat oendoerken diri dan tida ingin aken menerima djabatan apa-apa.
„Oh, itoelah ada satoe permintahan jang pantes,“ kata Tong Djoebit sambil tertawa: „boekan sadja itoe permintahan tida bisa ditampik, hanja boeat kaoe poenja djasa, akoe nanti kasi taoe pada Sri Baginda, soepaja itoe gredja tempat dimana kaoe soetjiken diri, diperbaeki dengen sapantesnja atas ongkosnja negri.“
Tee Tjong mengoetjap banjak trima kasi, kamoedian moendoer dari hadepannja itoe pembesar.
Sabelonja Tee Tjong dateng, pada brapa hari jang laloe Tong Djoebit soeda preta satoe oetoesan pergi membawa soerat ka negri Kimkok, dan orang jang diangkat mendjadi oetoesan itoe poen boekan laen dari Tio Liang-sih djoega.
Boenjinja soerat itoe ada begini: „Keizer dari Songtiauw merawatken pada radja di negri Kimkok.
Bahoewa, boeat mampenoehken perdjandjian jang dibikin pada baroe ini, adalah aken bersatoe hati boeat kirim angkatan perang aken membri hoekoeman pada jang berdosa.
Bahoewa, sadari perdjandjian itoe dibikin, Djoebit Tong Koan telah bersiap satjoekoepnja dengen angkatan perang jang tegoe, aken menjerang pada negri Liauw; maka boeat itoe, diharep dapet satoe kapastian dari berangkatnja pasoekan Kimkok, soepaja sama-sama bisa membri hoekoeman pada jang berdosa itoe.
Demikianlah ada boenjinja itoe soerat jang dibawa oleh Tio Liang-sih. Dan tida lama oetoesan itoe telah sampe dan mengadep pada radja di negri terseboet.
Radja Kimkok satelah membatja abis boenjinja itoe soerat, laloe berkata:
„Kimkok djoega poenja pasoekan soeda bersadia aken menjerang dari Pingte, Sionglim, Tjikouw dan Pokgouw, samantara angkatan perang Taysong haroes menggentjet dari Pekko, soepaja moesoe djadi terdjepit.“
Tio Liang-sih memanggoet, kamoedian balik kombali ka Tiongkok dan sampeken perkatahannja Radja Kimkok pada Baginda Song, jang denger itoe djadi amat girang. Lebi djaoe baginda poedji kasebetannja Tio Liang-sih, jang dikata semoea oeroesan soeda mendjadi beres, adalah kerna ini mantri poenja pikiran dan daja. oepajaja. Dan djasa ini boekannja ketjil.
Liang-sih djadi girang denger itoe poedjian. Tapi mantri-mantri satia. jang kala pengaroe dan tida satoedjoe dengen itoe persariketan pada jang djaoe memoekoel jang deket, tinggal berdiam sadja.
Kamoedian baginda prenta Liang-sih lekas berangkat ka tempatnja Tong Djoebit, soepaja pasoekan jang ada di sana bisa lantas disiapken menjerang moesoe, sabagimana jang soeda didjandji pada kawan sariketnja.
Tio Liang-sih memanggoet dan lantas berlaloe. sedeng baginda sahabisnja kata begitoe, oleh kerna itoe hari tida ada permoesjawaratan apa-apa, lantas moendoer dari kraton, sedeng laen-laen mantri poen pada boebar.
Tapi lantaran merasa iseng, baginda lantas pergi ka astana Tjengpo Lokkiong, tempatnja Lim Leng-so Tjindjin, boeat denger orang soetji itoe membatja kitab soetji. Dan waktoe Sri Makota sampe, kabetoelan itoe Tjindjin tetiron lagi moelai membatja, jang antara laen-laen baginda dapet denger begini:
. . . . . . . . langit ada mempoenjai sembilan sorga, jang satoe antaranja diseboet Tjengyoesin dan ada jang paling tinggi.
„Gioktjeng Siangtee poenja poetra soeloeng jang mamerenta sabagi radja di saloeroeh langit Selatan, ada bergelar Tiangseng Thayteekoen, dan jang mendjoengdjoeng firmannja Allah, telah toeroen ka doenia aken mendjelema djadi kita-orang poenja Sri Djoengdjoengan, jaitoe Sri Djoengdjoengan jang sekarang ini.
„Boeat membantoe beresken oeroesan doenia, sabagi kaki tangannja Sri Baginda, Toehan Jang Maha Koeasa telah toeroenken djoega Dewa-dewa Tjongwan Siangpek, jang mendjelema djadii Thaysoe Tjoa Keng, Boen Hwa-li djadi Ong Hoe dan bintang-bintang Djihoeitjhe djadi Djoebit Tong Koan, samantara Lauw Koei-hoe ada berasal dari Dewa Kioehoa Gioktjin.
„Dengen begitoe, pamerentahan nanti djadi beres dan negri bertamba mahmoer, hingga prikeamanan djadi santausa.“
Waktoe pembatjahan itoe dibikin, Lim Seng-so poera-poera tida liat baginda dateng, hanja membatja teroes itoe kitab jang dikarang dan ditoelis sendirinja, hingga baginda djadi amat girang satelah denger boenjinja itoe, dan pertjaja dengen sagenep hati apa jang dikata.
Maka dengen tida maoe kataoean orang, Sri Makota laloe balik kombali ka kraton sendiri, sedeng itoe orang soetji kaparat, masi teroes berpoera-poera tida liat, tapi hatinja merasa girang jang akalnja berdjalan dengen baek.
Soenggoe katjiwa bener, satoe Keizer bisa dikelaboein dengen akal jang begini kasar dan tengik. Tapi baginda tida merasa itoe, hanja dengen penoeh kagirangan lantas prenta orang sadiaken banjak barang-barang berharga boeat dihadiaken pada itoe Tjindjin.
Tatkala itoe Kwee Keng jang memang ada mendjadi moeridnja Lim Leng-so, sekarang ada berdiam di roemanja ini goeroe negri, Ja, begitoe pangkat jang Lim Leng-ŝo pangkoe. Bersama-sama Kwe Keng, ada berdiam djoega Ong Tiauw-ien.
Bagimana Kwee Keng boleh ada di sini? Itoelah soeda terdjadi, pada sasoedanja pitenah familie Hwa dengen maksoed jang tida berhasil, Kwee Keng laloe perg ka kota Radja bersama-sama itoe Swanwie, dan dengen pertoeloengannja Swanwie itoe poenja ajah, jang ada mendjadi kawannja Tjoa Keng, marika berdiam teroes di sini.
Kamoedian, boeat teroesken peladjarannja lebi djaoe, Kwee Keng tinggal teroes di roemanja itee goeroe bersama-sama Ong Tiauw-ien, jang djoega ada pertjaja Lim Leng-so satoe Tjindjin jang sakti.
Tapi, sebab itoe Koksoe memang boekan orang jang sakti dan tida mempoenjai kapandean apa-apa salaennja mengobrol, maka doea orang itoe setiap hari tida berboeat laen dari pada pasang omong pandjang pendek makan minoem dengen senang hati aken meliat tempo, pelahan-pelahan badannja Kwee Keng jang koeroes mendjadi gemoek, sebab amat senang.
Pada soeatoe hari, lagi doea moeridnja Lim Leng-so itoe makan minoem, Kwee Keng djadi terkenang pada Hwa Kiongdjin dan Tjin Kiongdjin, jang sabalonna dapet, soeda kabɔeroe linjap tida kataoean.
„Ah, kaloe akoe taoe bakal bagitoe, masa akoe kasi hati," kata Kwee Keng sambil mengelah napas dan gojanng-gojang kapala: " tentoelah akoe tida maoe boedjoek-boedjoek lagi dengen aloes dan sabar, hanja akoe perkosa sadja."
„Ah, soedalah, pekara jang soeda liwat, boeat apatah dipikiri lagi," kata Ong Tiauw-ien dengen soeara menghiboer: „orang prampoean toch tida koerang jang tjakep, maoe jang lebi tjantik poen, masaja tida ada?"
„He, he, bener-bener akoe penasaran sekali," kata Kwee Keng: lantaran, boeat dapetin dia boekannja gampang, banjak tipoe daja telah dikaloearken, tapi masatah sasoedanja dapet sabelonnja bisa tjioem-tjioem atjan soeda terlepas lagi. ―Tjoba pikir, apa tida membikin pah-toh hwa-djiat ?“ Ong Tiauw-ien tjoema bersenjoem sadja. Kenar ia poenja batin tida ada begitoe boeroek seperti ini kawan hingga tida boeat pikiran perkara jang soeda.
Dengen meliat djoemblanja orang-orang jang berada di sakiternja Baginda Song, soenggoe haroes dibilang: jang radja ini ada tertoetoep dengen hawa apes. Mantri-mantri satia jang arif bidjaksana, panglima perang jang pande dan gaga perkasa, tida bisa dapet tempat dalem diwan karadjahan, dan apa jang ada sekarang jalah sagala dorna, kaoem kaparat dan orang-orang jang tramempoenjai satoe goena.
Tapi baginda masi belon taoe itoe semoea, hanja pertjaja dengen sagenepnja, hati bahoewa dirinja ada terider dengen orang-orang pande.
Soeggoe katjiwa bener!