Pembalesannja Kawanan Liangsan/Bagian ka ampat/Penoetoep
SASOEDANJANAMPAK KASOESAHAN DATENG
KAGIRANGAN. — KAWANAN LIANGSAN BERKOEMPOEL KOMBALI.
(PENOETOEP)
Selang brapa hari kamoedian kapal itoe telah sampe di Kimgo, dan sabelonnja berangkat teroes ka Siamlo, Tja Tjin dengen sadereknja bersama-sama Sioe Taywi singga di itoe poelo; dari sini satue djoeroe kabar laloe pergi ka’ Siamlo boeat memori taoe pada Lie Tjhoen tentang datengnja itoe oetoesan Keizer.
Hoen-kang-liong lalce bikin persediahan boeat menjamboet. Liwat brapa hari kamoedian betoel sadja oetoesan itoe sampe, jang lantas disamboet oleh sakalian mantri-mantri dan Taywi batjaken boenjin a firmah jang seperti berikoet:
„Kami Song Ko-tjong, Keizer dari karadjahan Taysong jang bernasib djelek, dalem sawaktoe ada menampak kasoesahan besar, hingga bersama bebrapa mantri lari teloenta-loenta dengen dikedjer oleh pasoekan Kim jang tegoe, soeda tida ada harepan boeat bisa dapet toeloengan, jang itoe waktoe Doleh di-
bilang sadja: madjoe dan moendoer serba sala,
Beroentoenglah ada Keng dengen sakalian Tjiongwi Hohan, jang satelah denger kami dapet itoe kasoesahan, lantas dateng menoeloeng boeat oendoerken moesoe dan indarken kami dari kabintjanaän, hingga kami bisa poelang ka kota Lim-an dengen slamat.
Maka atas Keng poenja pertoeloengan dan djasa jang besar itoe, tida ada apa jang kami bisa anoegraken boeat membales. Maka bersama ini kami angkafsadja Hoen-kang-liong Lie Tjhoen djadi orang jang dipertoean di antero daerah Hay-pang, berkoeasa atas sakalian poelo-poelo, mantri-mantri dan rahajatnja, dengen mendjadi djoega Lam-tiauw poenja pelindoeng, dengen bergelar Siamlo Kok-ong.
Dengen besar pengherepan kami harep Keng dengen sakalian pahlawan jang memang terkenal Tionggi, oendjock kasetiahan itoe sampe di achirnja djaman,
| Tjauw-hin Goan-lian Taon katiga. | Tertanda kami: |
Sasoeda firman itoe dibatja abis, Lie Tjhoen dan sadereknja berseroeh: Banswe! Banbanswe !.
Kamoedian Sioe Taywi serahken boekoe kapangkatan, jang ada tertjatet nama- namanja sasoeatoe orang dengen ditetepken pangkatnja. Sebab nama-nama itoe ade terlaloe banjak, dengen pendek dibilang sadja, bahoewa semoea pangkatnja mantri-mantri civiel dan militair di Siamlo, dinaekin bebrapa lipat dari djabatannja jang doeloe Lie Tjhoen telah angkat.
Semoea ambtenaar mengoetjap trima kasi dan doedoek kombali ka tempatnja sendirt.
Kamoedian diadaken perdjamoean besar, dimana Kok-ong dengen sakalian ambtenaarnja doedoek makan minoem di kraton Kim-loan-tian, sedeng soldadoe-soldadoe poen dapet djoega bagian dalem itoe pesta. Pendoedoek di Siamlodan Kimgo djoega toeroet rajahken keangkatannja Lie Tjhoen sabagi Kok-ong beroentoen toedjoe hari lamanja.
Sasoeda semoea menjataken girangnja hati, Lie Tjhoen dan jang laen-laen njataken soekoernja pada Sioe Taywie, jang sadari doeloe ada banjak kalocarken tenaga bagi marika poenja kawan dan kaperloean-kaperloeannja Liang-san.
Taywi tjoba merendaken diri dengen membilang, kaloe dari daoeloe hari ia ada banjak berboeat apa-apa goena Song Kang dan kamoedian Sampe pada Lie Tjhoen, itoe poen ada dengen sapantesnja, sebab Hohan-hohan ini semoea ada orang- orang jang djoedjoer dan salaloe beringet pada karadjahan.
Sampe katoedjoe harinja baroe pesta itoe ditoetoep. Itoe waktoe Sioe Taywi minta permisi boeat balik kombali. Lie Tjhoen tjoba tahan lagi sedikit tempo, tapi sebab Taywi bilang tida bisa terlaloe lama, kerna ia ada dalem kawadjiban maka Lie Tjhoen prenta orang sadiaken barang-barang berharga sabagi bingkisan, jang ditrima oleh ini oetoesan dengen senang hati.
Satoe kapal perang lantas disediaken goena oetoesan itoe berangkat, dengen teranter oleh Bok Tjhoen dan Jo Lim.
Selang kira-kira saboelan lebi doea orang ini poelang kombali ka Siamlo dan membri taoe, bahoewa di kota Lim-an telah didiriken gredja Tay Siang Kok Si atas kahendaknja Beng-tay-houw, dan Boe Siong diminta djadi Kok-soe.
Pada besoknja pagi koetika doedoek berhimpoen pada Semoea mantri-mantrinja, Kok-ong berkata:
„Dengen bantoeannja sakalian Tjiongwi Hengte, maka kami dapet ini kabesaran, jang lebi doeloe sakali-kali tida ada dalem ingetan. Biarlah salandjoetnja kami harep mendapet teroes itoe bantoean, back dengen pikiran maoepoen dengen tenaga, soepaja kami jang memang koerang pengartian dan katjerdikan, tida djadi melanggar kawadjiban, jang Baginda Keizer telah pertjajaken.”
Itoe semoea mantri-mantri menjataken marika poerija setia, dan nanti bekerdja menoeroet masing-masing poenja. kawadjiban, boeat memperbaeki Siamlo dengen sakiternja, berikoet sakalian rahajatnja.
Dalem sapandjang waktoe jang berikoet, didiriken banjak gedong dan astana-astana boeat djadi tempat tinggalnja mantri-mantri, diriken kantoran dan sabaginja. Djoega lapangan boeat mengadjar baris, tangsi-tangsi dan dok tempat membetoelken kapal-kapal perang.
Tegesnja tida ada satoe apa jang diloepaken, hingga Siamlo djadi satoe negri jang rame dan bisa bikin perhoeboengan pada Kole dan laen laen negri, Sedeng pendoedoek dari Lioekioe, Anshia, Anlam dan laen-laen tempat, banjak jang dateng berniaga dan tinggal djadi rahajat Siamlo.
Meliat keadahan negri tamba hari bertamba rame, Kok ong diriken roema-roema sakola boeat anak-anaknja orang berpangkat dan orang particulier, sedeng Boen Hwan-tjiang diangkat djadi Inspecteur boeat mamareksa semoea roema pergoeroehan.
Boekan sadja di Siamlo, hanja di poelo-poelo Kimgo, Peksik, Tiauwhi dan Djingsoei, semoea diadakeh roema sakola, kantoor dagang dan kantoor pengadilan, sedeng pembesarnja tinggal tetep orang-orang jang doeloe, dengen djabatan jang ditetepken dari Keizer Ko-tjong.
Pada soeatoe hari sapoelangnja dari sidang mantri, Kong-soen Sin djalan-djalan ka goenoeng Tan-he-san; pemandangan alam di ini tempat ada bagoes sekali, sedeng di astananja ada satoe gredja toea dan di sakiter situe ada terdapet banjak daon-daon roempoet jang boleh digoenaken boeat obat.
Meliat keadahannja itoe goenoeng, Kong-soen Sin djadi soeka dan di Jaen paginja ia madjoeken permoehoenan pada Kok-ong boeat tinggal di Tan-he-san, aken merawat diri dan soetjiken pikitan sampe di hari toea.
„Soemoea kabesaran dan kasenangan jang kita orang dapetken sekarang,” kata Kok-ong: „ada mendapet Koksoe poenja bantoean, jang sateroesnja ada mengandel djoega Koksoe poenja tenaga; Mengapatah baroe sabentaran sadja, hendak tinggalken ini kadoedoekan?
Kong-soen Sin oetjapken lagi bebrapa perkatanan, njataken jang maksoednja ada begitoe sanget boeat bisa soetjiken diri. Ini perkatahan di samboeng oleh Tjoe Boe dan Oan Swi, jang minta Kok-ong djangan toelak.
Bermoela Kok-ong maoe tahan. dari masing masing poenja kadoedoekan, tapi sebab itoe tiga orang bilang: jang Tan-he-san toch adanja di Siamlo djoega dan sembarang waktoe kaloe perloe bisa katemoe, maka Kok-ong loeloesken djoega,
Sigra djoega itse gredja toea dibikin betoel dan Toewangannja dibesarken, dengen bikini banjak kamar-kamar boeat membatja, kamar makan, kamar tidoer dan kamar kitab; di kadoea baris kiri kanan diadaken paviljoen boeat doedoek-deedoek dan banjak lagi roema-roema ketjil goena marika poenja anak-anak moerid.
Kerna dikerdjaken dengen banjak orang, maka liwat brapa boelan gredja itoe telah rampoeng dan diperaboti dengen lengkap. Patoeng jang dipoedja jalah Sam-tjeng Seng-tjoe, di kiri kanannja ada berbaris 36 Thiantjiang; sedeng patoengnja Pak-kek Seng-te ditempatken di pertengahan Houwtian.
Di atas pintoe jang besar sebla loear diloekiesken merknja itoe gredja, jang diseboet „Tan He Kiong”, hoeroef itoe pake aer mas.
Mertjoe-mertjoe jang bertingkat toedjoe dan tiga, kebon-kebon boenga dan Sajoer, semoea ada.
Soepaja djadi lebi lengkap, di samping kiri dari Tan He Kiong ada didiriken satoe gredja ketjil jang dibri nama gredja Tjin-tiong-soe, dalem mana ada ditaro patoengnja Song Kong-beng dan Louw Tjoen-gie, dengen 74 patoengnja Hohan laen jang mendjadi soedara angkat.
Di sebla kanan ada poela satoe gredja ketjit jang diseboet Po-tek-soe, disini ditaroken patoengnja Ma Say-tjin, (radja Siamlo jang telah wafat), jang disembajangin pada satiap waktoe dengen ongkosnja negri.
Koetika gredja itoe soeda di-isiken perabot perabot jang perloe, Kok-ong dengen sakalian mantrinja pergi meliat, dan semoea pada memoedji tida abisnja. Itoe tiga orang alim jang sekarang tinggal di Tan He Kiong, oetjapken trima kasi pada Kok-ong.
Semoea orang jang memandang kabagoesannja itoe tempat, ada merasa senang, dan sampe sore baroe marika poelang kombali.
Laen paginja Jan Tjeng madjoe di hadepan Kok-ong dan tjeritaken tentang Im dan Yang.
„Boekan sadja bagi machloek jang berdjiwa, kaloe ada jang lelaki moesti ada jang prampoean, hanja sampe pada papoehoenan dan sabaginja benda di ini alam, moesti ada Im-yang baroelah djadi sampoerna,” kata Jan Tjeng jang lantas toetoerken pandjang lebar dalem ini oeroesan, jang boekan sadja teramat penting bagi kamanoesiaän, hanja pernikahan itoe ada termasoek dalem atoeran berbakti (Hauw), sebab zonder menikah orang tida bisa mendapet anak; djika tida mempoenjai toeroenan dianggap berdosa besar.
Lebi djaoe Jan Tieng toetoerken bagimana kamadjoeannja satoe negri ada bergantoeng djoega pada rahajatnja, kamoedian minta Kok-ong soeka ambil satoe permisoeri.
Kok-ong tjoema tertawa sadja, tapi tida bilang satoe apa.
Djoestroe itoe waktoe Pwe Soan dan Tja Tjin baroe dateng, maka Jan Tjeng kasi taoe apa jang baroesan ja telah tjeritaken. Ini doea mantri jang blakangan bilang bener begitoe, tapi Kong-ong lagi lagi djadi tertawa.
Kamoedian marika itoe pada moendoer, Kok-ong djoega masoek dalem kratonnja.
Ini tiga orang lantas adjak laen laen manitri berkoempoel di Sinsianghoe (gedong parlement) boeat membitjaraken oeroesan pegmisoeri, jang dianggap ada perloe bagi Kok-ong.
Salagi marika beroending pandjang pendek, AnTo-tjwan dapet inget bagimana doelue waktoe ia noempang di roemanja Boen Hwan-tjiang, jang menoeroet petangannja: Boen Siotjia ada mempoenjai redjeki besar boeat trima itoe kadoedoekan.
Djoega An To-tjwan tjeritaken bagimana gadis itoe poenja prilakoe, perangi dan boedi bahasa. Doeloe Boen Siotjia dapet sakit, tapi sabenernja itoe boekan laen dari menanti datengnja djodo jang baek; sebab kaloe Siotjia itoe tida sakit, boleh djadi ia telah manikah pada laen orang. Tapi sebab ia ada itoe redjeki besar, maka setan-setan djagain dan bikin nona itoe dapet sakit boeat menoenggoe sampe dateng djodonja.
Sasoedanja orang bitjara pandjang pendek, semoea njataken moelakat boeat desek pada Kok-ong soepaja lekas ambil permisoeri. Begitoelah pada esok paginja itoe semoea mantri-mantri, dengen dikapalaken oleh Tja Tjin, biyaken lagi itoe oetoesan. Kerna semoea Boen- boe Kwa-wan meminta begitoe dan poedjiken Boen Siotjia, maka Kok-ong tida bisa menampik.
Boen Hwan-tjiang djadi girang koetika Kok- ng soeka ambil anaknja boeat djadi permisoeri. Ini orang toea memang ada merasa tanggoeng boedi besar pada Lie Tjhoen, dan dalem hatinja memang ada niatan boeat serahken gadisnja boeat Hoen-kang-liong poenja perawat roema tangga, sabagi membales orang poenja kabaekan.
Tapi blakangan, waktoe liat Lie Tjhoen poenja kadoedoekan djadi begitoe tinggi, maka niatnja jtoe ia tida brani njataken. Sebab merasa deradjatnija tida satimpal; atawa salempang ada orang mendoega jang maksoednja berboeat begitoe boeat dapetken kabesaran atawa kasenangan, apapoela waktoe berpikir lebi djaoe, jang kaloe ditoelak boleh djadi maloe, maka itoe semoea niatan tinggal terpendam sadja dalem hati.
Sekarang njatalah niatnja telah terkaboel dengen sampoerna. Maski ia tida boeka soeara, sabagimana jang bermoela diniatin.
Kok-ong lantas atoer apa jang perloe boeat itoe ' perajahan kawin. Dalem kraton soeda disediaken dajang-dajang.
Hari kawin lantas dipili oleh mantri besar, dan koetika tanggal boelan jang ditetepken sampe, itoe perajahan lantas dibikin dengen oepatiara kabesaran, jang ramenja tida oesah dibilang lagi.
Boen Siotjia sekarang diseboet Boen-hoei Nionio, jang sasoenggoenja ada eilok sekali koetika dipakeken pakean kamanten. Semoea mantri besar dan ketjil dateng membri slamat dan makan minoem dengen soeka hati.
Pada katiga harinja Boen-hoei mengadep pada Kok-bo dengen djalanken kahormatan, jang disamboet oleh Kok-bo sabagimana patoetnja. Kamoedian Giok-tji Kiongtjoe dateng membri hormat, tapi Boen-hoei tida brani trima dan berkata:
„Ah, mengapatah Kiongtjoe moesti djalanken itoe kahormatan, inilah tida pantes sakali. Harep doedoek sadja zonder djalanken itoe peradatan besar.”
„Tjiap djalanken peradatan menoeroet tingkatan familie,” saoet Kiongtjoe sambil bersenjoem dan merasa senang jang Boen-hoei tida angkoe: „boekantah Hoema ada pernah kaponakan dari Kok-ong, dan Tjiap ada istrinja Hoema jang pernah moeda dan pantes sekali membri hormat pada jang pernah toea.”
Lantaran begitoe, Boen-hoei tida menampik Kamoedian Hoa dan Tjin Kiongdjin dateng katemoei dan satoe pada laen lantas membri hormat.
Blakangan Khouw Tay-so dan laen-laen orang prampoean istrinja mantri-mantri besar dan ketjil dateng di kraton, dimana diadaken perdjamoean boeat orang-orang prampoean.
Sedeng di fihak prampoean ada bersoeka-soeka dengen satoeroenja, Boen Hwan-tjiang jang sekarang diseboet Kok-tiang, dapet trima banjak kahormatan dari Boen-boe wa-wan.
Di ini fihak poen diadaken perdjamoean jang tida Kala ramenja seperti di dalem kraton, dimana iaorang makan minoem dengen sagala senang hati.
Koetika jang laen-laen telah boebar, Houw-jan Tjiak lantas berkata pada Boen Hwan-tjiang, bahoewa ia ada mempoenjai satoe perkatahan jang boeat dibitjaraken dan minta ini Kok-tiang poenja pikiran dan bantoean, boeat nanti kasi taoe pada Kok-ong.
"Oh, tentoe sekali,” kata Boen Kok-tiang: "apatah itoe ?”
Di sini Houw-jan Tjiak lantas kasi taoe, bagimana ia soeda poengoet Tijhie Seng boeat anak, tapi ‘sabenernja ia ada pikiran boeat poengoet mantoe, sebab Tjhie Seng itoe ada sebainja poenja anak.
"Oh, itoelah ada perkara baek,” kata Boen Hwan-tjiang dengen girang: "njatalah Tjiangkoen ada inget pada sobat lama, hingga ambil anaknja jang piatoe dan maoe kawinin pada anak sendiri, nilah bener ada pikiran moelia.”
Houw-jan Tjiak djadi soeka hati denger itoe perkatahan, maka ia lantas hatoerken trima kasi, kamoedian maoe berlaloe.
Tapi koenjoeng-koenjoeng Boen Hwan-tjiang dapet inget satoe apa, maka ia eee, sambil berkata:
„Tahan doeloe, Tjiangkoen, ada lagi satoeoeroesan jang hendak dibitjaraken, belon taoe soeka ditrima atawa tida.”
„Hal apatah?” tanja Houw-jan Tjiak.
„Djoega satoe oeroesan djodo.”
„Djodo? Djodo jang mana?”
„Djodonja Giok.”
Houw-jan Tjiak memandang dengen bengong.
Di sini Boen Hwan-tjiang toetoerken halnja Lu Siotjia, sabagimana jang pembatja tentoe masi inget, waktoe itoe gadis dapet soesa maoe dirampas pendjahat, telah ditoeloeng oleh Houw-jan Giok dan kamoedian dibawa ka Liangsan boeat semboeni samantara waktoe.— Kamoedian Boen Hwan-tjiang kata: itoe gadis maski piatoe, tapi toeroenan orang baek-baek dan ternama, laen dari itoe, beroentoeng bener kaloe Lu Siotjia bisa djadi istrinja Houw-jan Giok jang memang belon mempoenjai toendangan.
„Nah, bagimana?” tanja Hwan-tjiang kamoedian,
„Itoelah baek sekali,” saoet Houw-jan Tjiak dengen girang.
Kerna baek roepanja maoepoen riwajatnja itoe gadis jang Houw-jan Giok toeloengi, Houw-jan Tjiak sendiri soeda taoe, maka ini oeroesan djadi tida terlaloe soesa boeat dibitjaraken, sabagimana di atas pembatja telah liat, satoe kali dibitjaraken, lantas ditrima dan beres.
Kadoea fihak djadi amat girang dan lantas | berlaloe dengen membawa harepan baek.
Tapi sebab Lu Siotjia ada tinggal di kratonnja Kokbo, maka esoknja Boen Hwan-tjiang pergi mengadep pada Kokbo dan tieritaken apa jang kamarennja ia telah bitjara pada Houw-jan Tjiak. Kokbo satelah denger begitoe boekan sadja tida menoelak, hanja poedji jang pasangan itoe ada bagoes sekali.
Boen Hwan-tjiang djadi soeka hati dan berdjandji nanti kasi kabar pada Houw-jan Tjiak, bagimana Kokbo poen njata ada girang atas pernikahannja itoe sapasang merpati.
Kamoedian Kokbo prenta orang sediaken minoeman, dimana ia silaken Kok-tjiang doedoek minoem-minoem sambil poedji kalakoeannja Boen-hoei jang begitoe haloes dan tida berhati tinggi, hingga menerbitken rasa hormat di hatinja sasoeatoe orang.
Ini semoea, kata Kokbo lebi djaoe, njata ada dari Boen Hwan-tjiang poenja pengadjaran jang bagoes. Tapi ini Kok-tiang merendaken diri dan kata: lantaran kamiskinannja maka ia tida bisa membri peladjaran lengkap pada anak prampoeannja, harep Kok-bo toeloeng pimpin dan membri, peladjaran pada Boen-hoei boeat sagala atoeran dan adat istiadat dalem kraton, jang memang anaknja itoe koerang mengarti.
Sasoedanja minoen-minoem sedikit Boen Hwan- tjiang hatoerken trima kasi, kamoedian poelang ka roema sendiri, besoknja ia katemoe pada Houw-jan Tjiak dan tjeritaken jang itoe oeroesan telah dibitjaraken beres dan Kokbo djoega soeka membantoe.
Houw-jan Tjiak djadi girang dan hatoerken trima kasi atas Boen Hwan-tjiang poenja pertoeloengan.
Sigra djoega iaorang tjari hari jang baek boeat rajahken itoe perkawinan sedeng batang-barang jang perloe boeat itoe kariajaän, lantas disediaken. Itoe doea pasang merpati satelah masing-masing dapet taoe, pada siapa marika aken dirangkepken djodonja, djadi amat girang.
Tatkala itoe Song Tjeng lagi bitjara pada anaknja, dimana ia kata: Song An-peng soeda beroemoer dewasa dan pantes moesti beristri. Ini orang toea dapet liat gadisnja Siauw Soe-tiong dan ia rasa nona itoe ada pantes boeat djadi pasangannja Song An-peng.
Sabelonnja Song An-peng menjaoet, Houw-jan Tjiak dateng minta katemoe dan koetika soeda berhadepan, njatalah datengnja ini tetamoe boekan bermaksoed laen dari pada membitjaraken perdjodoannja Siauw Siotjia pada Song Tjeng poenja poetra.
Bagimana girang hatinja itoe orang toea, ini tida perloe ditoetoerken lagi.
„Djoestroe hal ini akoe lagi omongken pada anakkoe," kata Song Tjeng: „sedeng kita-orang belon ambil poetoesan, Tjiangkoen dateng boeat djadi orang perantaraän, — ah, itoelah kabetoelan amat!”
„Siauw Djian memang soeda lama ada itoe niatan,” kata Houw-jan Tjiak sambil berminoem: „maka waktoe ia denger akoe membitjaraken perkawinannja kadoea anakkoe, ia djoega lantas minta akoe djadi orang perantarahan boeat bitjaraken oeroesan tjoetjoe prampoeannija.”
„Soenggoe akoe merasa dapet kahormatan besar,“ kata Song Tieng dengen girang: „maka boeat ini, biarlah lantas ditetepken harinja kawin.”
Houw-jan Tjiak bilang baek dan nanti membri taoe ini hal pada Siauw Djian.
Apa jang ditoetoerken di atas ada terdjadi beroentoen-roentoen, betoel seperti diatoer. Kerna baroe sadja ini perkara beres, besoknja Kokbo prenta orang oendang Tja Sinsiang, Pwe Li-pouw Tee Tjong-tjeng dan Jan Siauwsoe, jang waktoe ampat mantri itoe dateng, Kokbo berkata:
,,Jan Siauwsoe, kaoe ada saorang pinter dan bisa doega apa jang bakal kadjadian. Sekarang tjobalah tebak apa maksoedkoe oendang kaoe berame dateng ka mari?”
,,Manatah Sin bisa membade apa jang terkandoeng dalem Kokbo poenja hati,“ kata Jan Tjeng sambil tertawa.
,,Tapi soedalah, boeat apa soesa-soesa tjari pikiran dan memoeter otak,“ kata Kokbo jang djoega djadi tertawa: ,,kerna Tjiap djoega boekan maoe maen bade-badean pada Keng berame, hanja maoe bilang sadja, jang semoea orang poenja oeroesan djodo soeda ditetepken, tapi Keng sendiri belon.”
Jan Tjeng tertawa dan oetjapken bebrapa perkatahan, jang katanja, ia belon ada pikir boeat itoe oeroesan.
,,Keng sendiri jang bergiat dan membitjaraken oeroesan Im-yang pada Kok-ong, — tapi Keng sendiri maoe bilang itoe perkara belon ada niat, bagimana boleh begitoe? kata Kokbo: ,,Lu Siotjia poenja djodo soeda ditetepken, maka dengen menikahnja Lu Siotjia, Louw Siotjia jang djoega ada di dalem kraton djadi kailangan temen, maka sekarang itoe gadis jang soeda trima Keng poenja pertoeloengan, haroes djadi Keng poenja pasangan. Apapoela menoeroet katanja Louw Andjin, Louw Hoangwe jang waktoe masi idoep soeda ada pikiran aken ambil Keng djadi mantoenja, dan inilah Louw Andjin sendiri jang tjeritaken padakoe.”
Jan Tjeng tida menjaoet sedeng laen-laen ambtenaar jang ada di sitoe, semoea njataken benernja Kokbo poenja perkatahan. Tee Tjong djoega ditanja oleh Kokbo, jang katanja: boekantah doeloe waktoe Siotjia berdoea iboenja ada dapet kasoesahan di Tay-beng-hoe, koetika itoe njonja bangsawan minta Tee Tjong poenja bantoean dalem ini perkara jang sekarang dibitjaraken, Tee Tjong telah briken djandjiannja.
Tee Tjong mengakoe bener ada berdjandji begitoe.
Jan Tjeng tjoba menampik dengen membri alesan bahoewa ia orang jang berderadjat renda, mana bisa djadi pasangannja Louw Siotjia, pada siapa daoeloe hari Jan Tjeng pernah bekerdja pada gadis itoe poenja ajah. Tapi ini alesan koerang tegoe dan oleh Kokbo telah ditelak.
Achirnja lantaran tida bisa berboeat laen, Jan Tjeng trima itoe.
Semoea orang-orang jang dioendang djadi girang dan soeka hati. Sedeng Kok-ong lantas prenta tjari hari baek boeat raiahken itoe perkawinan.
Pada hari jang ditetepken, ampat pasang ka- manten dari masing-masing poenja gedong sahabisnja pasang hio pada Allah ta Allah dan sodja aboe laloehoer, laloe pergi ka kraton mengadep pada Kok-ong dan djoega pada Kokbo, hingga dalem kraton djadi rame sekali.
Itoe pesta dirajahken rame sekali. Boekan sadja mantri-mantri, hanja soldadoe djoega ada toeroet bergirang-girang dalem marika poenja tangsi.
Sasoedanja perkawinan itoe dirajahken selesih, Kokbo silaken Kok-ong tinggal di kraton Siamlo, sedeng gedong Gwanswehoe jang djoega dibikinken astana dan seperti kraton, ditempatken oleh Kokbo. Tapi Lie Tjhoen tida maoe trima itoe, kerna ia kata: kaloe sampe ia moesti trima koernianja Kokbo, ada sabagi djoega ia merampas kabesaran dan kasenangan, hingga namanja nanti tertjela.
,,Mana boleh ditjela, "kata Kokbo: ,,ini poen ada dengen sapantesnja sadja. Sebab sekarang semoea oeroesan negri-dan laen-laen telah djadi beres, maka apa jang hendak diperboeat oleh Kok-ong, Lo-sin troesa tjampoer taoe lagi. Tapi kaloe Lo-sin masi berdiam teroes di astana, Kok-ong maoe kaloearken prenta-prenta djadi kikoek, hingga sagala oeroesan boleh mendjadi lambat.‘'
Koetika Kok-ong masi djoega maoe menampik, semoea mantri laloe benerken perkatahannja Kokbo jang begitoe adil dan djoedjoer. Dengen banjak soesa baroelah Kok-ong trima. djoega maoenja itoe iboesoeri. trinja jang hadlir, itoe waktoe Kong-soen Sin, Tjoe Boe dan Oan Swie poen ada dateng dalem pesta terseboet dan masing-masing angkat bitjara boeat njataken senangnja hati, kerna moesoe-moesoenja jang membikin marika terpetja-bela, soeda terbales lebi doeloe dari ini.
Demikianlah adanja itoe KAWANAN LIANGSAN, jang sekarang telah berkoempoel kombali djadi satoe pada semoea soedara-soedaranja jang lama dan baroe, katjoeali orang-orang jang telah meninggal lebi doeloe dari ini, bersama satoe lagi jaitoe Boe Siong, jang tida bisa dateng lantaran amat djaoe dari sini.
Begitoelah ada achirnja tjerita PEMBALESANNJA KAWANAN LIANG-SAN!
TAMAT.