Pembalesannja Kawanan Liangsan/Bagian ka ampat/Bab 13

←

Pembalesannja Kawanan Liangsan oleh Tong Th. Fuctriorider
Bab 13

→

XIII
HOAN TJENG OENDJOEK ILMOENJA. HOA HOEMA PERGI DI KIMGO MEMBRI SLAMAT HARI LAHIR.

Pada soeatoe hari sahabisnja minoem-minoem, Sat Tauw-to lantas adjak Kiong To ka taman boenga, dimana ia tjoba kasi liat ilmoenja jang belon pernah dipertoendjoeken. Sembari membatja dowa, Hoan Tjeng itoe menjebar katjang, jang tida lama kamoedian lantas djadi beriboe-riboe soldadoe setan.

Kiong To jang menjaksiken itoe, djadi amat girang. Kapertjajahannja pada Hoan Tjeng djadi berlipat ganda, maka ia rasa tida soesa boeat sampeken itoe maksoed doerhaka, kaloe ada mempoenjai orang jang begini sakti.

Sahabisnja itoe Hoan Tjeng lantas batja dowa, jang tida lama kamoedian kadengeran soeara angin menderoe-deroe, hingga batoe dan pasir pada terbang dan oedara poen kaliatan gelap. Sabelonnja ilmoe panggil oedjan d boektiken, Kiong To kata: baek ini ilmoe disimpen sadja, kerna sabegini poen ada sampe tjoekoep.

Hoan Tjeng toeroet itoe permintahan dan kadoea orang itoe balik ko.mbali ka paseban tempat dimana baroesan iaorang minoem-minoem. Kiong To njataken kagirangan hatinja, janh soeda bisa dapet bantoeannja ini orang berilmoe.

„Tapi, soepaja maksoed ini djadi lebi gampang lagi dilakoekan, ada lebi baek kaloe Hoa Hoema bersama Kok-tjoe dan Lie Tjhoen dikasi laloe lebi doeloe dari ini doenia.“ kata Kiong To.

„Siapatah adanja itoe Lie Tjhoen?“ tanja Sat Tauw-to.

Kiong To lantas tjeritaken satoe persatoe halnja itoe orang gaga jang sekarang ada di poelo Kimgo, sebab kaloe maksoednja ini kataoean, pastilah Hoen Kang Liong tida nanti tinggal diam, kerna Lie Tjhoen dan Hoa Hoema satoe pada laen ada terkena sanak. Tapi sabelon gerakan dimoelai, lebi baek itoe orang gaga jang boleh mendjadi halangan, dibinasakan sadja.

Dengen begitoe marika bisa bergerak dengen zonder dapet sangkoetan

Hoan Tjeng njataken satoedjoe, kamoedian berkata:

„Boeat binasaken Lie Tjhoen, itoelah tida sabrapa soesa. Seandenja ia tida binasa poen, Sinsiang poenja maksoed masa boleh djadi terhalang, sebab tjahaja moekamoe soeda mengoendjoek ada saorang jang besar redjeki.“

Denger itoe perkatahan, Kiong To djadi amat girang, kamoedian minta diliat djoega anak istrinja poenja roman.

Menoeroet papreksahannja ini iman, Kiong Hoedjin sasoenggoenja ada mempoenjai redjeki besar boeat bisa mendjadi iboe negri, sedeng anak-anaknja tjoema mempoenjai paras jang sabiasa sadja. Katjoeali anak jang prampoean, jang kaliatan ada lebi baek dan boeat djodonja, haroes ditjari saorang jang berpengartian.

Sasoeda anak istrinja Kiong To masoek kombali ka dalem, permoefakatan boeat binasaken Lie Tjhoen, Hoa Hong-tjoen dan Ma Kok-tjoe, lantas dimoelai. Pada ini Hosiang ia tanja, dengen djalan bagimana orang-orang itoe maoe dianiaja djiwanja.

,.Itoe gampang sekali," saoet Sat Tauw-to:,,sekarang sediakenlah satoe kamar kosong, dalem mana taroken tiga boneka kajoe jang masing-masing ditoelisken hari kalahirannja, dan peroetnja itoe boneka ditoesoeki djaroem pentol, soepaja Pinto boleh panggil aloesnja."

Besarnja itoe boneka, pandjangnja dan laen-laen poela jang perloe, semoea diterangken soepaja orang jang membikin tida djadi sala. Kiong To toeroet ini adjaran dengen girang, sebab menoeroet katanja Hoan Tjeng, di dalem toedjoe hari marika itoe bisa lantas djadi mait.

Koenjoeng koenjoeng Kiong To djadi bingoeng, kema ia poen tida taoe tentang Lie Tjhoen poenja hari kalahiran, katjoeali Kok-tjoe dan Hong-tjoen.

,,Tapi maski bagimana djoega, akoe toeh perloe moesti katahoei," kata itoe mantri doerdjana:,,sebab ia bisa mendjadi satoe halangan boeat akoe poenja kaberoentoengan dan kasenangan, maka tida boleh tida, aken prenta saorang jang tjerdik pergi ka Kimgo boeat tjari taoe sampe dapet."

Tapi, seperti djoega jang maksoed djahat ini ada dapet bantoeannja iblis, apa maoe sabelon orang jang diprenta itoe pergi ka Kimgo, waktoe mengadep pada radja Kiong To denger Hoa Hoema minta permisi pada radja Siamlo, jang di boelan Gogwe soepaja ia dikasi idjin boeat mengoendjoengi Kimgo.

,,Ada kaperloean apatalı Keng pergi ka itoe poelo?" tanja baginda.

,,Sebab di itoe boelan tanggal lima, djoestroe ada djato Lie Pehpe ampoenja hari taon," djawab Hoema:,,kerna soeda lama hamba tida pergi ka itoe poelo, tambahan pada hari taonnja itoe hamba pikir hendak sakalian membri slamet."

,,Oh, kaloe begitoe, baek sekali," kata Ma Koktjoe, jang djoega lantas njataken, kaloe Hoema maoe pergi, dari sini maoe dikirim barang-barang anteran dengen pengoetjapan slamat, soepaja metbikin tamba kekal tali perhoeboengan. Hoa Hoema me nanggoet sambil moendoer dan lantas sediaken itoe barang-barang anterannja radja Siamlo, jang boeat disampeken pada Lie Tjhoen; sedeng Kiong To jang dapet taoe itoe, djadi amat girang dan lantas boeroe-boeroe poelang kasi taoe pada Hoan Tjeng, tentang hari lahirnja Hoen-kang-liong jang ia dapet taoe baroesan.

Sat Tauw-to lantas toelis itoe tanggal boelan dan tempel di oeloehatinja boneka jang diperoepamaken Lie Tjhoen, dan derekin itoe di kadoea boneka laen jang memang telah sedia. Sasoeda itoe semoea persediahan beres, Hoan Tjeng lantas moelai bikin sembajangan.

Dalem itoe kamar jang kaliatannja amat serem, Sat Tauw-to batja dowanja sambil kipratken aer di ampat pendjoeroe, jang saban-saban kedengeran ia seboet namanja Lie Tjhoen, Mak Kok-tjoe dan Hoa Hong tjoen, kamoedian dengen pedang pendek ia menoendjoek ka djoeroesan tempat tinggalnja itoe tiga orang jang maoe diteloeh.

Sekarang biarlah kita tinggalken doeloe sabentaran pada itoe iman jang djahat, dan mari hat Hoa Hoema jang sadari kamaren telah sedia-sedia itoe barang bingkisan.

Sasoedanja membri slamat tinggal pada radja dan permisoeri, Hong-tjoen lantas adjak Ko Tieng dan Lie Hoen, itoe doea penggawe perang Kimgo jang salama Hoa Hong-tjoen dipoengoet mantoe, ada tinggal di ini negri boeat melindoengi.

Katiga orang itoe laloe toeroen di praoe, angin jang bagoes dan baek soeda membikin djalannja itoe kandaran aer seperti terbang, jang tida lama kamoedian telah sampe di Kimgo dingen slamat.

Lie Tjhoen, poenja orang djaga-djaga jang dapet taoe kadatengannja Hoa Hoema, lantas boeroe-boeroe pergi membri kabar, hingga Hoen-kang-liong djadi amat girang dan prenta bebrapa penggawenja pergi ka soengei aken samboet.

Tida lama kamoedian Hoa Hong-tjoen dengen kadoea penggawenja lantas naek ka darat dengen membawa itoe barang-barang bingkisan, jang diserahken pada Lie Tjhoen sambil berkata: ,,Atas Pehoe poenja hari taon, sabenernja Kok- tjoe sendiri ada niat boeat dateng membri slamat. Tapi lantaran ada banjak oeroesan, maka dikirim sadja satoe Taykam sabagi oetoesan boeat menggantiken dirinja. Djoega ada dikirim sedikit bing- kisan, harep Pehoe soeka trima dengen senang hati."

Lie Tjhoen oetjapken banjak trima kasi dan barang anteran itoe lantas dipreksa, jang ada terdiri dari bebrapa roepà moestika kaloearan negri Siamlo, satoe antaranja ada badjoe jang tersoelam oeler naga, dengen tertaboer moestika-moestika, hingga Lie Tjhoen djadi girang dan soeka hati.

Kamoedian Hoa Hong-tjoen katemoeken laen-laen Pehoe dan Siokhoenja, jang lantas menanjaken satoe pada laen ampoenja kawarasan, sabagimana biasanja orang jang soeda lama tida bertemoe.

Tida brapa hari kamoedian datenglah dari Thoan-yang, jaitoe boelan kalima tanggal lima harinja. Sedari kamaren roewangan astana soeda dihiasken daon-daon dan digantoengin teng, di tenga paseban ada ditaro satoe medja sembajang. Sadari pagi roepa-roepa tetaboean telah diboenjiken, maka Hoen-kang-liong dengen berpakean Kimpauw Giok-twa lantas pasang hio pada Allah ta Allah, bersoedjoet pada langit dan boemi, jang soeda membri berkah dan kaberoentoengan. Sasoedanja itoe baroe trima pembrian slamatnja Gak Ho, Hoei Po, Ko Tjeng, Lie Hoen, Tek Seng, Tong Wie dan Tong Beng, Hoa Hong-tjoen dan Taykamnja Siam-lokok sabagi wakilnja Ma Kok-tjoe.

Masing-masing membri slamat pandjang oemoer, jang oleh Hoen-kang-liong dihatoerken trima kasi. Kamoedian baroe laen-laen penggawe jang di sebla bawahan, baek bagian civiel atawa militair.

Djoega kapala-kapala prang dari angkatan laoet dan darat, dateng membri slamat atas namanja sakalian tentara, hingga roewangan astana itoe sampe djadi penoeh.

Sasoeda dioetjapken trima kasi pada orang-orang jang terseboet blakangan, Hoen-kang-liong poenja djoeroe penjamboet tetamoe lantas silaken doedoek minoem thee, sedeng semoea tentara pada dapet persen.

Itoe waktoe dalem kapal perang jang besar diatoer medja perdjamoean, sasoedanja doedoek-doedoek masing-masing lantas toeroen praoe aken merajah ken pesta Thoanyang sambil makan minoem dengen soeka hati.

Sapoeloe praoe jang berkapala naga, jang saban praoe bisa moeat anampoeloe soldadoe, soeda menoenggoe dan masing-masing pegang penggajoe boeat berlomba. Di tenga-tenga praoe itoe ada jang poekoel tamboer dan gembreng, satelah dibri tanda, lima pasang praoe naga itoe lantas bergerak, jang satoe maoe lombaken jang laen sambil bersoerak-soerak, hingga aer soengei djadi berombak besar lantaran kena gontjangnja praoe-praoe jang lagi berlomba itoe.

Di sapandjang pinggiran kali ada penoeh dengen pendoedoek poelo Kimgo, lelaki dan prampoean, ketjil besar, toea moeda, sampe pada anak-anak sekali poen dateng menonton dengen girang. Kerna ini poen ada perajahan jang pertama kali marika liat, sabelon Hoen-kang-liong doedoek mamerenta di ini poelo, pesta begini tida ada.

Dari kapal perang poen saban-saban kadengeran soearanja tampik soerak jang amat rioeh. Kerna di sitoe Lie Tjhoen dengen satoeroe soedara-soedara angkatnja lagi doedoek makan minoem dengen soeka hati. Moesik jang diboenjiken ada kadengeran amat merdoe.

Sasoeda matahari toeroen ka Barat, baroelah pesta itoe brenti dan masing-masing laloe balik kombali. Begitoelah dalem itoe bebrapa hari Hoa Hong-tjoen tinggal di Kimgo dengen tida sekali dapet taoe apa jang terdjadi di Siamlo.

Itoe waktoe Ma Kok-tjoe jang diteloe soeda moelai dapet sakit, hingga Kiong To jang denger kabar, djadi amat girang. Tapi katoedjoe harinja itoe penjakit djadi semboeh sendiri, sedeng Sitjoe jang tida apa-apa, mendadak djadi pangsan dan waktoe dipreksa, djiwanja telah linjap, hingga radja dan permisoeri djadi menangis tida brentinja.

Kiong To jang dapet taoe kamatiannja itoe Prins, lantas kasi taoe pada Hoan Tjeng tentang itoe kadjadian, dan Hosiang jang denger begitoe, lantas berkata:

Kaloe begitoe adjalnja Kok-tjoe boekan mati diteloeh, baek goenaken sadja laen akal jang lebi gampang. Ini ada waktoe jang bagoes, maka djanganlah kasi liwat dengen pertjoema.

„Akal apa?" tanja Kiong To.

Sat Tauw-to laloe bisiki pelahan-pelahan, akal bagimana moesti dilakoeken boeat binasaken Kok-tjoe. Lebi djaoe Hosiang ini kata, ia ada mempoenjai tiga soedara angkat di poelo Hongbouw, jaitoe: Khik Ping, Khik Tjioe dan Khik Koen, maka lekaslah soeroe orang bawa soerat oendang padanja boeat membantoe.

Kiong To lantas toeroet perkatahannja ini iman dengen girang. Sasoeda toelis soerat ia laloe kasiken pada Hoan Tjeng boeat diboeboehi tanda tangan, kamoedian soeroe orang kapertjajahannja bawa itoe.

Sasoeda orang itoe berlaloe, ia kata: kenapa Kok-tjoe tida djadi binasa, tapi itoe Prins jang tida diteloe, mendjadi mati. Hoan Tjeng lantas terangken: inilah soeda terdjadi lantaran Sitjoe poenja apes.

„Apa Soehoe rasa Lie Tjhoen dan Hoema jang sekarang ada di Kimgo, telah binasa?"

„Ah! . . . . . . boeat itoe doea orang troesa Sinsiang koeatir," saoetnja: „kerna maski marika tida mati, toeh achirnja bakal binasa djoega di tangannja itoe tiga orang jang sekarang lagi dipanggil."

Mengapa Soehoe bilang begitoe? Apa marika djoega tida mempan diteloeh, sabagimana Kok-tjoe?"

„Ja, sabenernja Pinto loepa, bahoewa orang-orang jang sedeng djaja, ada soesa boeat diambil djiwanja dengen tjara begitoe. Tapi hal ini biarlah kita liat sadja lebi djaoe, troesa terlaloe dipikiri. Sebab tiga soedara Khik ada sampe gaga boeat binasaken siapa djoega."

Kiong To jang dengen sagenepnja hati ada pertjaja kasaktiannja Sat Tauw-to, djadi girang dan lantas prenta orangnja potong kambing moeda, boeat disoegoeken pada ini imam.

Sambil makan minoem Hoan Tjeng tjeritaken sagala ilmoenja. Tapi kaloe diliat itoe pakerdjahan menangkep orang poenja aloes, soeda djadi gagal, pastilah sabagian besar omongan itoe kosong belaka, sebab orang jang sasoenggoenja sakti, tentoe tida kaloearken omongan terlaloe besar.

Tapi Kiong To jang memang maoe andeli ini Hosiang, pertjaja sadja apa jang dibilang.

Lebi djaoe Hoan Tjeng kata: bosok boleh diboeka itoe perdjamoean jang baroesan ia telah bisiki, dengen alesan boeat menghiboeri Kok-tjoe poenja kadoekahan. la brani pastiken jang radja nanti trima itoe oendangan dengen zonder tjoeriga. Djika Kok-tjoe soeda dateng, boeat abisken djiwanja, itoelah ada ia poenja tanggoengan.

Kiong To djadi girang dan itoe hari djoega ia lantas kasi taoe pada sakalian kambrat-kambratnja, bagimana moesti berlakoe di hari esok.

.

Pada soeatoe hari Gak Ho menjataken pikirannja pada Hoen-kang-liong, bahoewa menoeroet pengliatannja, Kiong To boekan ada satoe mantri jang toeloes hati; berhoeboeng datengnja Hoema ka Kimgo, ia koeatir itoe mantri jang di Siamlo ada mempoenjai kakoeasahan besar, nanti terbitken perkara onar, kaloe Hoa Hong-tjoen tinggal lebi lama di ini tempat.

Lantaran itoe, Gak Ho rasa ada lebi baek kaloe Hoa Hoema dititahken balik sadja ka tempatnja, soepaja kaloe ada apa-apa, Kok-tjoe ada jang lindoengi.

Njatalah doegahannja ini orang pande ada bener sekali. Tapi soeda telaat, sebab sabelonnja Hong-tjoen poelang, itoe iman soeda lakoeken pakerdjahan doerhaka bersama-sama itoe mantri penghianat.

Lie Tjhoen toeroet adviesnja Gak Ho dan lantas bertaoeken ini pada Hoema, jang itoe hari memang ada niatan boeat minta permisi boeat poelang, maka satelah dibilangi begitoe, lantas sadja ia membri slamat tinggal dan balik kombali bersama sama Ko Tjeng dan Lie Hoen.

Begitoelah kapalnja lantas belajar, tapi antara Kimgo dan Siamlo, boekan ada perdjalanan jang boleh disampeken dalem tempo satoe hari. Maka salagi Hoa Hoema ada dalem perdjalanan, Kiong To — sabagimana di sebla atas kita telah liat, soeda moelai lakoeken kadjahatannja.

Beroentoeng Hoa Hong-tjoen dan Lie Tjhoen ada orang-orang jang besar redjeki dan bintangnja masi terang, maka ilmoenja Sat Tauw-to boeatbinasaken djiwanja itoe doea orang, tida memakan.

Sekarang biarlah kita tinggalken kombali kapalnja Hoema jang lagi belajar dan mari balik kombali ka Siamlo aken liat daja qepaja kadoea jang itoe Hosiang adjarken pada si mantri penghianat.