Pembalesannja Kawanan Liangsan/Bagian ka ampat/Bab 12
XII
SELAGI KAPAL-KAPAL MENOEDJOE KA
KIMGO, KATEMOE ORANG KATE
DI NEGRI SIAMLO ADA
PERKARA GAIB.
Dalem hari-hari jang berikoet pelajaran ada baek. Tapi pada hari ka anam di waktoe malem, laoetan ada kaliatan gelap, di langit tida ada sabidji bintang, sedeng angin ada menioep amat kentjang.
Sebab itoe waktoe ada di tenga laoetan besardan djangkar tida bisa toeloeng brentiken kapal, djadi pelajaran itoe menoeroeti sadja ladjoenja angin.
Pada hari esok, waktoe meliat padoman, baroelah hatinja djoeroe moedi djadi terkedjoet, kerna sekarang kapal-kapal njata boekan menoedjoe ka Kimgo, hanja ka Djitpoen poenja poelo Satmouw, soeatoe tempat di mana ada banjak laskar kate jang djahat dan soeka merampok.
Itoe bangsa satelah liat di lacetan ada banjak kapal-kapal, lantas sadja toeroenken sampan-sampan jang djoemblanja ada kira-kira limaratoes boea, sedeng orang-orangnja semoea pada bersendjata golok dan pedang dateng memboeroe ka itoe kapal jang sekarang telah masoek ka dalem djebakannja.
Ini bangsa kate jang djahat memang soeda sengadja pasang rante-rante besi di dalem aer dengen maksoed boeat djebak kapal-kapal jang liwat. Dan koetika kapal-kapal jang terdjebak itoe terbelit, lantas sadja itoe bangsa dateng memboeroe. Tapi semoea Hohan jang ada di kapal lantas menjerang dengen sengit dan menabas kalang kaboet.
Maski soeda banjak kawan-kawannja jang binasa, toeh si kawanan kate jang tida poenja takoet, masi sadja memboeroe teroes, hingga Leng Tjin djadi kawalahan dan lantas prenta orang pasang meriam. Tapi sebab orang jang maoe ditembak itoe terlaloe deket, maka pelornja tida mengenaken apa-apa.
Jan Tjeng jang liat begitoe lantas prenta orang-orang di kapal koetoengin pipa-pipa besi, jang sabentaran sadja barang itoe telah sedia kira-kira doearatoes batang. Sekarang ini orang pande goenaken itoe pipa sebagi senapan, jaitoe di oedjoengnja dimasoeki obat dengen lelotjok, seperti senapan koeno, kemoedian disoeloet soemboenja hingga mendjedoer.
Koetika liat apinja itoe sendjata jang sekali mendjedoer membinasaken banjak kawannja, baroelah itoe orang-orang kate moelai djeri. Sabagian besar dari itoe kawanan telah binasa, tapi sabagian jang masi idoep lantas moendoer sembari pasang kombali rante-rante di sebla loear djebakan. Sedeng kawan jang laen lantas beberken koelit kerbo jang dibikin sabagi lajar boeat mendjaga itoe pahaja dari obat pasang.
Lie Eng jang liat itoe pertempoeran bakal berdjalan tida bisa soeda, lantas prenta orang kapalnja boeat tjari bangsa kate itoe poenja djoeroe bahasa, kerna hendak diadjak bitjara jang patoet dan tida maoe bertempoer dengen zonder ada alesan pantes.
Selang tida lama, orang jang disoeroe itoe telah dateng dengen satoe sampan, dimana ada doedoek djoeroe bahasanja itoe bangsa. Menoeroet sapandjang katerangan jang djoeroe bahasanja itoe briken: kaloe ini bangsa kate soeda lakoeken ini penjerangan, sakedar boeat dapetken sadja persen, laen tida.
Lie Eng tida pertjaja, kaloe tjoema mengharep orang poenja persen, dibikin penjerangan begini roepa. Sebab siapatah jang nanti maoe membriken persen dengen senang, kaloe dirinja diserang dan dirampok. Tapi itoe djoeroe bahasa bilang: begitoelah memang adatnja ini bangsa.
Atas pertanjahan lebi djaoe, baroe kataoean, bahoewa itoe djoeroe bahasa ada saorang berasal dari Tjiangtjioe.
Mendenger begitoe Lie Eng lantas prenta orangnja kasiken limaratoes goeloeng soetra dan kaenpanas boeat dibagi-bagi; sedeng delapan goeloeng soetra dengen kaen panas boeat itoe djoeroe bahasa sendiri.
Djoeroe bahasanja si kate satelah trima itoe pembrian, lantas mengoetjap trima kasi dan berlaloe.
Selang tida brapa lama, sasoeda barang-barang itoe terbagi rata oleh semoea bangsa kate, itoe kawanan djahat lantas boeka rante-rante jang terpasang dan kasi kapal itoe kaloear, dan sedikit poen tida mendendam hati atas kamatiannja ia poenja bangsa.
Kong-soen Sin jang dari satadi meliat kalakoeannja itoe bangsa, sambil mengelah naepes laloe berkata:
„Liatlah, Jantaran kapingin dapet sagoeloeng kaen atawa soetra, marika sampe loepaken djiwanja sendiri, Djika liat orang poenja karakoesan begini roepa, bener- bener hatikoe mendjadi dingin. Kerna boekantah semoea Hengte jang ini hari sampe di sini, djoega ingin dapetken kasenangan dan kakajahan ?"
Jang laen tinggal diam, eons Boen Hwantjiang sendiri jang berkata: „Ja, doenia-memang penoeh dengen kasoekeran dan kaboesoekan, jang boekan sadja satiap taon, hari, boelan atawa waktoe, malah saban saät tida mengasi tempo boeat orang berdiam. Manoesia baroes bisa imbangin keadahannja, begitoelah baroe tida terdjeroemoes dalem bahaja."
Kong-soen Sin benerken itoe omongan dan oetjapken lagi bebrapa perkatahan.
Itoe waktoe kapal soeda berlajar kombali.
Sigra djoega kapal itoe telah sampe di satoe poelo, jang satelah ditjari taoe, njatalah poelo itoe ada bernama poelo Djingsoei atawa Tjengsoei.
Semoea kapal lantas dikasi brenti boeat berlaloe dan sakalian Hohan laloe berkoempoel dimana iaorang laloe bikin perdjamoean dengan senang-senang hati.
Boeat djadi temennja arak, Lie Eng lantas panggil sala satoe dari rahajatnja boeat disoeroe naek ka darat aken tjari daging. dagingnja binatang oetan. Tapi itoe liauwlo membri taoe: boeat samperin daratan masi ada doea li djaoenja dari tempat ini kapal brenti; di sebla pinggiran aernja tjetek dan kapal besar tentoe tida bisa masoek.
Wie Siauw-tjhit jang denger begitoe, lantas berkata: biarlah ia sadja jang nanti hamperi daratan dengen bernang, boeat apa goenaken kapal kaloe moesti soesa-soesa. Tapi Lie Eng jang ada lebi pandjang pikiran, lantas menjega, katanja:
,,Ah, boeat apatah, kaloe lantaran maoe tjari ikan atawa daging, kita-orang moes i djadi beriboetan. Apa Hengtang sakalian tida inget, bagimana doeloe Song Kong-beng di Sim-yang-lauw, jang di waktoe minoem lantaran kapingin dapet ikan, achirnja Ouw Soan-hong moesti djadi riboet pada Thio Soen? Nah apa bedanja dengen sekarang, keadahannja poelo Tjingsoei kita-orang belon taoe dengen betoel, maka baek Wie Hiante djangan pergi, kerna akoe koeatir itoe bisa menerbitken kaonaran."
Kaloe Twako bilang begitoe, apa-boleh-boeat," saoet Wie Siauw-tjhit.
Laen-laen Hohan benerken bitjaranja itoe Twako, kerna besok poen pelajaran ini bakal sampe ka Kimgo, dimana iaorang bisa dapetken sagala roepa makanan jang lesat-lesat, maka boeat ini satoe malem, biarlah perdjamoean dibikin sadja seada-adanja.
Apa jang terdjadi dengen ini Hohan-hohan, biarlah kita tinggalken doeloe dan sekarang kita liat laen bagian jang djoega ada perloe boeat ditoetoerken.
Sadari Hwa Hong-tjoen mendjadi Hoema di negri Siamlokok, keadahan itoe tempat djadi aman dan santausa, kerna maskipoen Ma Kok-tjoe jang djadi radja di itoe poelo ada sanget lembek dan koerang pengartian dalem oeroesan pamerentahan, djoega tida mempoenjai banjak ambtenaar jang tjakep, toeh selama itoe poelo Siamlo tida terganggoe.
Inilah ada dari lantaran Hwa Hoema poenja kapandean, jang salama tinggal di sini telah pegang kendali pamerentahan dengen adil, hingga rahaja djadi senang.
Pada soeatoe hari di waktoe Tjengbeng, Ma Kok-tjoe dengen permisoerinja dan Hoema beserta Kiongtjoe ada berkoempoel di taman sambil makan minoem dengen senang, apapoela itoe waktoe boenga-boenga jang megar telah siarken baoenja jang sedap.
Sasoedanja minoem brapa tjangkir arak, radja Siamlo berkata:
„Sadari menerima peninggalannja orang toea, tida brentinja kami berdaja boeat kamadjoeannja ini poelo, jang memang berasal dari peninggalannja kita-orang poenja laloehoer. Kendati letaknja Siamlo ada di loear laoetan, toeh kami merasa senang dan beroentoeng. Tjoema jang masi koerang jalah: mantri jang bidjaksana dan panglima-panglima jang gaga boeat mendjaga wates negri." "Tapi sekarang toeh prikeamanan ada santausa?" kata permisoerinja.
,,Betoel begitoe," kata Ma Kok- tjoe:,,tapi doeapoeloe ampat poelo taloekan poenja radja-radja, ada terbitken rasa koeatir dalem hatikoe, jang satoe kali marika nanti berontak. Betoel dalem taon-taon jang berikoet marika salaloe kirim oepeti dengen betoel, toeh kakoealiran itoe tida mendjadi koerang. Tapi beroentoeng Allah telah koerniaken kita-orang satoe Hoema jang bidjaksana, jang boleh diandelin dalem oeroesan pamerentahan dan Siamlo poenja pamoer djadi tamba bertjahaja, maka kami bisalah tidoer dengen njenjak. Apapoela Lie Taijijiangkoen ada bertempat di Kimgo, hingga kita poenja kadoedoekan djadi lebi santausa dan negri-negri diloearan tida begitoe brani bertingka. Maka dalem waktoe jang santausa begini, kami pikir ka goenoeng Tan-he-san aken sembajang di koeboeran dan sakalian pesiar boeat menjenangken hati, belon taoe apa pikiran kami ini bisa disatoedjoe atawa tida?"
,,Itoelah tida ada halangan," kata Hoema:,,kerna maksoed itoe poen baek sekali."
Denger Hoema Hwa, Hong-tjoen kata begitoe, radja djadi amat girang dan soeka hati. Begitoelah sasoedanja berdami, dimana Kokbo, Kiongtjoe dan Hoema aken mengikoet, radja lantas prenta ambtenaarnja bikin persediahan. Sedeng pada ambtenaar Kim-thian-kam baginda soeroe tjari hari jang baek. Ambtenaar itoe trima prenta, jang kamoedian membri taoe, bahoewa tanggal tiga ada hari jang baek boeat baginda kaloear.
Sigra djoega hari jang dipili itoe telah sampe, maka Hoema bersama Kiong To Sinsiang dan laen-laen ambtenaar pada mengikoet, radja Siamlo poenja kreta teriring oleh soldadoe Gilimkoen, dan di blakang ada soldadoe jang menggotong barang-barang boeat sembajang.
Dalem itoe sepandjang djalan radja dan permisoerinja, begitoe pada Kiongtjoe, ada merasa senang meliat kabagoesannja pemandangan alam.
Sasoedanja berdjalan sakean lama, ponggawe jang berdjalan di depan melapoer, bahoewa sekarar.g perdjalanan telah sampe di Ban-sioe san. Maka kreta laloe dibrentiken dan radja Siamlo bersama-sama permisoerinja dan Kiongtjoe laloe toeroen dari kreta masoek di roewangan Hiangtian, sedeng barang-barang boeat sembajang laloe diatoer di atas medja, dimana persembajangan laloe dimoelai.
Sasoeda persembajangan selesih, kertas perak dan laen-laen barang jang boeat dibakar, lantas dikoempoelken di lataran dan dibakar. Tapi apinja itoe kertas gintjoa menjala besar dan terpoeter-poeter ka atas, dan angin jang kentjang soeda bikin api itoe mendjilat, hingga mengenaken pakeannja baginda, jang djadi berlobang besar.
Radja Siamlo lantas balik kombali ka paseban Hiang-thian dan toekar itoe badjoe Liongpouw jang kena api, kamoedian barang-barang bekas sembajang lantas didahar bersama-sama semoea ambtenaar, begitoe poen soldadoe-soldadoe jang mengikoet, semoea dapet bagian.
Marika itoe pada makan minoem dengen senang hati.
Sasoedanja pada makan minoem, barang-barang perabotan laloe dibenain dan radja prenta berangkat ka lan-he-san.
Tan-he-san ada sala satoe goenoeng di bilangan Siamlo, jang besarnja kira-kira saratoes paal, dengen ada soember-soember jang mengalaearken aer djerni. Mempoenjai banjak gowa dan bebrapa gredja jang ada didiami orang-orang berilmoe. Dalem moesin semi, teroes meneroes tiga hoelan lamanja tida ada brentinja orang jang dateng mengoendjoengi.
Koetika radja Siamlo sampe, orang-orang particulier jang sadari itoe moesin ada berdiam di itoe tempat, lantas pada berlaloe dan bawa marika poenja barang-barang jang perloe. Radja jang dapet taoe itoe keadahan, lantas kaloearken prenta: bahoewa marika boleh tinggal sadja sebagimana biasa dan troesa pergi. Mendenger itoe kabar, pelantjong-pelantjong jang lagi maoe menjingkir djadi amat girang dan bersoerak rioeh.
Kok-tjoe dengen permisoeri dan Kiongtjoe pada djalan-djalan dan naek ka atas boekit sambil memandang ka sana sini. Pemandangan di itoe tempat ada bagoes sekali, teroetama kaloe orang memandang ka bawah, dimana kaliatan soeloeran-soeloeran ada sabagi oeler perak jang berlegot-legot.
Kamoedian marika itoe berdjalan kombali sambil mametik boenga-boenga jang memang banjak di itoe tempat. Sampe achirnja iaorang sampe di gowa Leng-liong-kauw-tong, dan di sitoe ada kaliatan satoe Tosoe jang lagi doedoek di atas roempoet.
Orang itoe ada memake satoe toedoeng dari daon bamboe jang berpinggiran lebar. Maski pakean jang menoetoepi badannja tida brapa bagoes, toeh parasnja kaliatan bersi. la berdoedoek sambil toempangken kaki dan mengawasi datengnja radja dari kadjaoean.
Koetika baginda Siamlo sampe di itoe tempat, sedikit poen Tosoe itoe tida bergerak, hingga Lwekam jang liat begitoe, lantas membentak: ,,He, kaoe ini betoel tida taoe adat sekali! Apa kaoe tida liat bahoewa baginda lagi mendatengi, maka kaoe tida maoe berbangkit aken membri hormat!"
Dengen roepa seperti orang jang tida kenal pada radja, maka sasoeda dibentak begitoe baroelah Tosoe itoe bangoen dan berkata:
Trimalah hamba poenja kahormatan."
Sambil oetjapken itoe perkatahan ia angkat kadoea tangannja.
Baginda jang liat kalakoeannja orang itoe, sedi-
Pembalesan Kawanan Liangsan.22
„S apatah adanja kaoe ini dan tinggal di mana ?" ,,Hamba tida mempoenjai nama, djoega tida taoe dateng dari mana," saoetnja orang itoe dengen roepa ogah-ogahan.
,He, itoelah tida boleh diadi," kata baginda: ,,masatah orang tida taoe siapa namanja dan tida taoe djoega dari mana ia telah dateng."
,Tapi toeh dengen sabenernja ada begitoe, baginda."
,,Kaloe begitoe, kaoe ini memang bertempat di sini, brangkali?"
,,Boekan, hamba ini orang pengoembara'an, jang berdjalan koelilingan dengen tida taoe ka mana jang maoe dipergiken dan ditoedjoe. Hamba-berpoeter-poeter di salebar doenia dan kaloe tjape lantas mengaso dengen zonder tjari taoe lagi di mana tempat jang hamba brenti."
„Dengen maksoed apatah?"
Tida bermaksoed apa-apa, toeankoe."
Radja Siamlo pandang orang itoe sekoetika lama. Bermoela radja maoe anggap jang orang itoe brangkali berotak miring. Tapi kaloe diliat parasnja jang bersi, njatalah ia tida edan. Atas pertanjahannja baginda lebi djaoe, orang itoe toetoerken: bahoewa pengoembara'annja di koeliling doenia tida bermaksoed apa-apa, hanja lantaran ogah berdiam sadja di roema jang moesti menanggoeng kawadjiban ini atawa itoe, djadi ia berdjalan sadja sateroes-teroesnja.
,,Apa kaoe tida ingin beroleh pangkat?" tanja baginda kamoedian.
,,Pangkat?" mengoelangken orang itoe sambil gojang-gojang kapala:,,boeat apatah pangkat kamoeliahan dan kabesaran, jang tida lebi seperti barang pindjeman? Sedeng kekajahan ada bersifat boesoek, dimana boeat dapetken itoe, orang djadi moesti lakoeken sagala penipoehan, penganiajahan, pemboenoehan dan laen-laen poela pakerdjahan jang amat menjoloki mata."
Baginda manggoet-manggoet, kamoedian tanja: apa bener Tjoet-ke-djin itoe tida bisa mati, tida hisa toea dan sabaginja.
Atas ini pertanjahan, Tosoe itoe djawab:
,,Oh, itoe semoea djoesta belakah. Ada idoep, tentoe ada mati. Ada bener, tentoe ada sala. Begitoe poen ada bagoes, ada djelek, dan semoea machloek, benda dan sagala djenis, ada timpalannja."
„Apa bener kaloe Sinsian bisa tinggal idoep salama-lamanja? Pada siang hari bisa melajang-lajang di oedara dan pesiar di koeliling tempat-tempat jang santausa, seperti di bilangan Tatkek?" ,,Ah, itoelah tida bisa dibilang. Tapi sedikitnja hamba bisa kasi taoe pada baginda, bahoewa orang-orang jang tida temaha, soeka dengen kasaderhanaän, bersi dan moelia, satitik pengidoepan ada tjoekoep boeat tahan lamahan. Tapi bagi orang jang mempoenjai Sifat-sifat sabaliknja, dalem pengidoepannja tentoe ada sabagi koepoe-koepoe atawa salaron jang menghamperi api. Sabagi si moeka koening poenja Kie Tam, dan menoenggang kerbo idjo poenja Lie Lo-tjoe, jang berkoelilingan poenja Nabi Khong Hoe-tjoe, tiga-tiganja ada orang pengoembaraän. Akoe liat baginda ada orang jang beroentoeng, hingga bisa doedoeki tachta karadjahan dengen Sagala apa ada serbah tjoekoep. Makan enak, pake bagoes, tapi itoe tjoema kaliatan senang di lahir sadja, sedeng hati ada bergontjang-gontjang sadja. Dan boeat linjapken itoe kakoeatiran atawa kakotoran jang ada di dalem sanoebari, tida ada laen dialan dari pada djadi orang pengoembaraän.“
Lebi djaoe ini Tosoe toetoerken tentang perdjalanannja orang Tjoet-ke-djin, jang ada banjak lebi senang dari pada Mamegang pangkat atawa doedoek di atas tachta karadjahan, hingga membikin hatinja baginda Siamlo merasa katarik. Sasoeda penoetoeran itoe Sampe di achirnja, radja lantas menjataken soeka toeroet pergi ngoembara. Tapi boeat sekarang tida bisa, kerna Prins masi ketjil dan tida bisa diserahken boeat mengoeroes pamerentahan. Kamoedian baginda njataken maksoednja, jaitoe: boeat sekarang hendak didiriken satoe gredja boeat djadi tempatnja ini Tosoe berdiam dan menoenggoe sampe sapoeloe taon ka blakang, djika kadoedoekannja soeda bisa diserahken pada Poetra Makota, radja soeka toeroet padanja.
Tosoe itoe tertawa sambil gojang-gojang kapala.
„Kenapa kaoe tertawa?” tanja baginda.
„Boeat menoenggoe sampe begitoe lama, itoelah soesa sekali,” saoet orang pertapaän ini: „djika baginda sasoenggoenja ada satoedjoe dengen hamba poenja perkatahan, pada Hwa Hoema toch boleh diserahken itoe kadoedoekan, kerna Hoema ada saorang pande, setia dan bidjaksana. Atawa kaloe tida begitoe, Sitjoe boleh serahken di bawah penilikannja Hwa Hoema.“
„Sapoeloe taon toch sabrapa lama, dan boeat salama itoe kami nanti diriken gredja jang bagoes boeat djadi kaoe poenja tempat berdiam.“
„Itoelah tida bisa, baginda. Djika menoenggoe sampe poeloean taon, dikoeatir bahaja jang bakal menghamperi tida bisa disingkiri lagi.”
„Bahaja apatah jang bakal dateng?”
Itoe Tosoe tida menjaoet, hanja rogo dari sakoenja satoe batoe itam jang matjemnja boender dan besarnja ada kira-kira tiga duim, jang sasoedanja dikaloearken, laloe digosok-gosok dengen tangannja, hingga batoe itoe kaliatan mengkilap. Radja mengawasken dengen heran. „Apa itoe?” tanja baginda.
„Dari sini baginda bisa meliat segala apa jang bakal terdjadi,” saoet itoe orang pertapaän. „Tjobalah baginda liat, kaloe tida pertjaja.”
Radja samboeti itoe batoe dan kamoedian mengawasken dengen teliti, jang pelahan-pelahan lantas ada kaliatan apa-apa.
Bermoela batoe itoe tjoema kaliatan itam mengkilap, kamoedian berbajang goenoeng-goenoeng, tana tegalan, sawa, kali dan achirnja ada terliat astana-astana indah, jang diperaboti dengen lengkap. Djadi dalem itoe batoe ada beroepa doenia.
Di atas satoe roempoet idjo, ada kaliatan saorang jang memake kopia Tjhiong-thian-koan rebah di tana.
Radja mengawasken itoe dengen kagoem.
Sabelon baginda kata soeatoe apa, Sinsiang Kiong To laloe menghamperi lebi deket, tapi laen-laen orang tida ada satoe jang meliat apa-apa, maka dengen goesar Sinsiang itoe berkata:
„Djoengdjoengankoe ada mendjadi orang jang dipertoean dalem ini negri, maka djanganlah dengeri bitjaranja ini orang, jang sasoeatoe omongannja ada menjata en hendak menggontjangken hati. Maka baeklah toeankoe prenta orang lantas bawa ini Tosoe ka dalem kota dan serahken ia di tangannja hakim pengadilan, sebab ia soeda brani omong jang tida karoean.” „Akoe ada berdosa apatah ?” kata itoe Tosoe, sabelonnja baginda kaloearken satoe perkatahan: „akoe maoe diserahken di tangannja pengadilan, hahaha!. . . itoelah tjoema-tjoema. Tapi sabaliknja akoe koeatir Sinsiang sendiri jang bakal terdjato di tangannja hakim.”
Sahabisnja berkata, kombali Tosoe itoe tertawa kombali.
Sinsiang Kiong To denger penjaoetannja itoe orang pengoembaraän, djadi bertamba-tamba sengit dan goesar. Dan salagi ini mantri besar bereboet omong dan hendak prenta orang tangkep, radja Siamlo lantas berkata:
„Kaloe Keng tida moefakat, soeda, tapi boeat apa kita toentoet padanja ka pengadilan.”
„Sebab ia begitoe brani djoestaken pada baginda,” saoet Kiong To: „sedeng sasoeatoe perkatahannja ada menggontjangken hati.”
„Akoe toch bitjara barang jang sabenernja,” saoet itoe Tosoe. Kamoedian radja poen bilang, di dalem itoe batoe bener ada kaliatan apa-apa, jang boleh djadi ambtenaarnja ini tida dapet meliat.
„Sekarang akoe maoe toelis ampat baris perkatahan,” kata itoe Tosoe pada baginda, dan tida maoe ladenin pada Kiong To:„harep toeankoe soeka taro perhatian biar betoel.”
„Baeklah,”kata radja, jang lantas prenta orang-orangnja sediaken perabot toelis, jang sigra djoega barang itoe telah sedia. Tosoe itoe lantas mamegang pena dan toelis ampat baris sairan, jang boenjinja seperti berikoet:
„Kakoeasahan jang besar, satoe tempo toch bisa mendjadi poena,
Begitoelah datengnja aer pasang, djadi menerbitken bintjana,
Boeroeng Helang nanti dateng, aken mengantjem dalem astana,
Orang alim membangoenken pikirannja baginda jang bidjaksana.”
Sahabisnja toelis itoe, dengen tida kaloearken satoe perkatahan Tosoe itoe lantas berbangkit dari tempatnja doedoek dan toeroen dari atas boekit. Baginda tida mengarti apa maksoednja itoe sairan. Tapi tida oeroeng dalem hatinja merasa tida enak dan bingoeng. Lebi poela kaloe inget itoe bajangan-bajangan jang ada di dalem batoe dan itoe orang jang rebah di atas roempoet.
Hoema Hwa Hong-tjoen jang dibertaoeken ini perkara, lantas dateng menghamperi dan boedjoeki pada baginda, soepaja ini djoengdjoengan djangan dengeri bitjaranja itoe orang pengoembara'an. Kerna siapa taoe kaloe Tosoe itoe ada orang jang tida beres pikiran.
„Djoega tentang mati dan idoep, senang atawa soesa,” kata itoe Hoema: „semoea ada dengen kahendaknja Allah Jang Maha Koeasa dan soeda di takdirken lebi doeloe, maka boeat apatah baginda pikirin boeat itoe sagala oeroesan, jang boleh dioepamaken sadja omongan kosong.”
Kokbo poen jang denger itoe perkara, lantas bantoe menghiboeri dengen berbagi-bagi perkatahan, jaitoe: djika baginda bisa berlakoe adil dan dermawan, troesa koeatir jang dalem negri djadi bergojang; apapoela sekarang keadahan dalem negri ada aman dan santausa, dari manatah datengnja itoe bintjana. Maka apa jang Hoema bilang, itoelah ada bener sekali.
Kamoedian ambtenaar-ambtenaarnja lantas adjak poelang kombali. Baginda tida membanta, hanja toeroet balik ka kraton.
Tapi sasampenja di kraton, Ma Kok-tjoe masi terkenang dengen itoe pengliatan dan pendengeran, teroetama di waktoe sembajang, salagi bakar kertas badjoe Liongpouwnja terdjilat api, hingga djadi angoes.
„Itoelah boekan satoe alamat bagoes,” kata Ma Kok-tjoe dalem hati: „apa tida boleh djadi bahoewa angoesnja itoe badjoe, ada mendjadi alamat aken terbitnja bintjana?”
Lantaran ini, radja djadi tida senang dan saban-saban berpikir tentang itoe semoea kadjadian. Lebi djaoe ia inget: bahoewa itoe bajangan jang keliatan di dalem batoe, ada mirip seperti astana-astana dalem karadjahan Siamlo, dan itoe orang jang pake kopia Tjhiong-thian-koan rebah di atas roempoet, ada mirip seperti dirinja sendiri. Apa tida boleh djadi bahoewa itoe sabagi pengoendjoekan bagi dirinja.
Djoega ia inget tentang boenjinja itoe sairan, jang antara laen-laen ada bilang: aer besar nanti menerbitken bintjana. Dan ini satoe baris perkatahan ada mengenaken betoel pada keadahannja ini negri, jang letaknja di tepi laoet.
Sasoedanja berpikir sakoetika lama, achirnja radja tida bisa aken tinggal diam sadja dengen tida njataken rasa hatinja pada permisoeri dan Kiongtjoe.
Tapi Kiongtjoe dan Kokbo lantas menghiboer dengen berbagi-bagi perkatahan, katanja djangan terlaloe dipertjaja sagala Tosoe.
Ma Kok-tjoe maski poen ada satoe radja jang baek, tapi hatinja amat lembek dan gampang menoeroet sagala omongan. Begitoelah sasoedanja dibedjoek, ingetan-ingetan itoe bisa djoega terloepa dari hatinja.
Selang brapa hari kamoedian, pada soeatoe pagi salagi radja bikin permoesjawaratan dalem sidang n antri, boeat membitjaraken oeroesan negri, ambtenaar jang djaga pintoe dateng melapoer, bahoewa dari poelo Pek-sik ada dateng warta jang loear biasa. Orang soeroehan itoe lantas masoek dan serahken warta jang dibawa, jaitoe: di tepi laoet dari itoe poelo sekarang ada kaloear satoe binatang adjaib jang matjemnja seperti srigala, boeloenja berwarna mera sepah dan kapalanja kaloear tandoek. Binatang ini amat djahat dan tida taoe dari mana datengnja.
Pendoedoek itoe tempat djadi katakoetan, lantaran binatang itoe soeka terkem pada menoesia dan bebrapa toekang tangkep ikan soeda djadi korbannja itoe sesatoan adjaib.
Banjak orang telah berdaja boeat tangkep, tapi sia-sia sadja.
Pada soeatoe hari salagi orang merasa kebingoengan dengen kaloearnja itoe matjem beboeronan jang djahat, mendadak langit ada gelap dan toeroen oedjan besar jang teranter dengen goentoer dan kilat. Berbareng itoe, dari oedara ada djato saekor oeler itam jang sanget besar dan matjemnja seperti naga.
Ini oeler telah djato ka dalem itoe laoet, jang kamoedian lantas berklai pada itoe binatang adjaib.
Blakangan ternjata itoe beboeronan jang djahat telah binasa lantaran digigit oleh itoe oeler itam jang besar. Kamoedian itoe oeler jang sasoedanja membinasaken itoe sesatoan, lantas terbang kombali ka oedara dan linjap, dengen tinggalken maitnja itoe korban. Rahajat jang bertempat di itoe tepi laoet, lantaran merasa gemes pada itoe binatang jang soeda makan marika poenja soeami, anak atawa laen-laen familie, lantas potong-potong maitnja. Dagingnja beboeroenan jang mati itoe berwarna poeti, rasanja poen lesat. Tapi sebab ini ada soeatoe perkara jang langkah, maka pembesar di itoe poelo tida brani tinggal diam dengen zonder melapoer pada baginda.
Mendenger ini lapoeran, radja djadi kaget sekali. Pada mantri-mantrinja laloe ditanja: alamat apatah adanja begitoe? Tapi tida satoe mantri jang mengarti tentang alamat dari itoe kadjadian gaib, maka dengen amat doeka baginda laloe masoek ka dalem kraton dan tjeritaken ini perkara pada permisoeri.
Kokbo jang denger itoe warta, lantas berkata: kaloe sesataon jang djahat itoe soeda binasa, itoelah tentoe ada satoe alamat baek bagi negri, maka boeat apa dipikiri lebi djaoe. Hanja sekarang ada lebi baek kaloe baginda oeroes sadja pamerentahan dengen adil dan, atoer pendjagahan-pendjagahan jang perloe di wates-wates negri.
Ini advies ditoeroet, maka esoknja radja laloe kaloearken itoe prenta.
. . . . . . . . . . . . . . . . . . . . . . . . . . . . . . . . . . . . .
Sedeng radja jang sapoelangnja dari Ban-sioe- san, memikiri perkatahannja itoe Tosoe dan kamoedian atoer pendjagahan, berhoeboeng dengen itoe lapoer jang baroe ini, adalah Sinsiang Kiong To, sedeng asik goenaken pikirannja jang doerhaka, boeat rampas negri Siamlo poenja kadoedoekan.
Ini mantri besar memang soeda lama ada niatan jang koerang baek. Soeda lama ia ada menggenggam maksoed boeat mendoerhaka dan rampas karadjahan, djoega ada pikiran boeat poenjai dirinja Prinses Giok-tji. Tapi kaloe niatnja itoe sakean lama belon diboektiken, kerna doeloe masi ada Thoan Giauw jang gaga dan djoedjoer, jang salaloe bela mati pada radjanja. Tapi, apa tjilaka sasoeda itoe orang jang dimaloein tida ada di doenia, mendadak radja Siamlo dapet Hwa Hong-tjoen, saorang moeda jang begitoe pande, gaga dan setia, hingga maksoed itoe djadi tinggal sadja satoe niatan jang tida bisa diboektiken.
Tapi, berhoeboeng itoe kadjadian-kadjadian jang liwat bebrapa hari, kombali ini mantri doerhaka timboel niatannja jang djahat. Djika memikir jang di Djing-gie, Pek sik dan Tiauw-hie, semoea pembesar jang mengoeroes itoe poelo-poelo taloekan ada orang kapertjajahannja, maka niat jang hendak dilakoeken, ia rasa tida sabrapa soesa.
Begitoelah salagi ia niat prenta itoe tiga pembesar di poelo-poelo terseboet geraken tentara boeat poekoel Kimgo, pengawal pintoe dateng membri taoe, bahoewa di loear ada dateng satoe Ho-siang jang minta bertemoe. Kiong To poenja pikiran, kaloe Kimgo lagi terserang, Lie Tjhoen tentoe tida bisa membri pertoeloengan pada Hwa Hong-tjoen, kaloe ia dengen kawan kawannja lakoeken penghianatan. Maka dalem waktoe jang kaloet begitoe, pastilah tida sabrapa soesa ia reboet tachtanja Kok-tjoe dan boenoe Hoema, boeat sakalian rampas Giok-tji Kiongtjoe.
Tida lama kamoedian Hesiang itoe telah sampe di hadepannja sambil membri hormat. Parasnja ini iman boleh membikin orang jang tida biasa bertjampoeran djadi takoet, sebab moekanja begitoe itam legam sabagi pantat koeali; piara berewok pendek, tapi warnanja koening dan kasar, di koepingnja pake giwang dan tangannja berboeloe, sedeng moeloetnja ada kaloear tjaling pandjang.
Meliat roepanja jang begitoe dj ahat, bisa didoega Hosiang ini ada sabangsa siloeman jang biasa menerbitken hoeroe hara.
Kiong To lantas membales hormat dan silaken doedoek, sambil menanjaken orang poenja nama dan tempat tinggal, dan maksoed kadatengannja.
Hosiang itoe menjaoet: bahoewa ia ada berasal dari Sehoan, orang banjak gelarken dirinja Sat Tauw-to dan datengnja ka mari boekan laen dari hendak membantoe maksoednja Kiong To boeat rampas karadjahan, kerna ia poen soeda taoe apa jang dimaksoed oleh ini mantri besar. Mendenger itoe penjaoetan, Kiong To djadi terkedjoet jang tertjampoer girang. Tapi toch ia tida lantas njataken itoe dengen sabenernja, hanja tjoba menjangkal sambil berkata:
„Itoelah ada doegahan jang tida betoel kerna akoe toch ada mendjadi Sinsiang, jang tjoema di sebla bawah satoe tingkat dari kadoedoekannja baginda radja, kakoeasahan ada besar dan kasenangan poen sampe tjoekoep, maka maoe apatah lagi?”
Mendenger perkatahannja Kiong To, itoe Hosiang lantas angkat tangannja menoendjoek ka langit, sedeng jang kiri toendjoek ka boemi sambil tertawa bergelak-gelak, hingga Kiong To mengawasi dengen heran.
„Mengapatah Sinsiang moesti bersangkal ?” kata Sat Tauw-to pada sasoedanja brenti tertawa: „dari sorotnja mata, Pinto bisa taoe apa jang terkandoeng di dalem hati, djoega Pinto taoe apa jang baroesan Sinsiang pikiri.”
Kerna liat Kiong To masi berdiam sadja, Sat Tauw-to lantas njataken teroes terang apa jang ada di hatinja itoe mantri doerhaka, satelah dioendjoek begitoe djitoe, Kiong To lantas pimpin Hosiang itoe masoek ka taman blakang, pada sasoedanja manggoet-manggoet aken mengakoe atas benernja itoe perkatahan.
„Sekarang soehoe soeda taoe apa jang terkandoeng dalem hatikoe,” kata Kiong To, pada sasoedanja marika itoe berdoedoek: „harep Soehoe soeka toeloeng membri pimpinan, dan boeat per- toeloengan mana, lebi doeloe dihatoerken banjak trima kasi.”
Sat Tauw-to berdjandji nanti membantoe dengen sagenepnja tenaga, hingga Kiong To djadi amat girang dan lanlas prenta orangnja sediaken barang-barang makanan, beserta arak jang baek. Tapi lebi doeloe ia tanja: apa ini Hosiang ada dahar djoega barang berdjiwa, seperti ikan atawa daging.
„Pinto soeka makan daging kambing moeda bersama arak jang anget,” djawabnja: „Sinsiang boleh prenta orang sediaken itoe, tida aken mendjadi sala.”
Tida lama barang jang diminta itoe telah sedia, maka Kiong To lantas silaken tetamoenja doedoek minoem, dengen ditemeni olehnja.
Sambil makan iaorang bitjaraken roepa-roepa perkara, atas pertanjahannja Kiong To, ilmoe apa jang Hosiang ini ada mempoenjai, Sat Tauwto bilang: ia ada dapet barang wasiat kapoenjahannja Hoedtjouw dan Thiansin ampoenja peladjaran, seperti panggil angin dan oedjan, pindaken goenoeng atawa laoetan, bikin taloek sagala iblis dan moesnaken manoesia dalem tempo sakedjeb. Pendeknja roepa-roepa ilmoe ia ada mengarti dan paham.
Mendenger itoe perkatahan, Kiong To djadi amat girang dan lantas minta Sat Tauw-to tinggal sadja dalem roemanja, soepaja sama-sama bisa berichtiar boeat bangoenken pakerdjahan besar.
Permoehoenan ini sigra djoega lantas diloeloesken dengen senang hati, kerna katanja: dari Se-hoan кa mari, memang boeat membantoe ini Sinsiang sampeken maksoednja.
Sahabisnja berkata, Sat Tauw-to alias Hoan Tjeng lantas kaloearken dari Houwlonja saroepa Tan, jang katanja: ada amat moestadjeb boeat menambaken tenaga badan dan tenaga otak, laen dari begitoe, ini pil boleh digoenaken boeat plesiran aken menambaken kanimatannja orang-orang lelaki dan prampoean.
Boeat memboektiken kamandjoerannja, ia silaken Kiong To tjoba pake ini malem. Kamoedian marika makan minoem lagi dan sampe sore baroe brenti.
Esoknja pagi, sasoedanja bangoen dari tidoer, Kiong Sinsiang lantas dateng mengadep di hadepannja Hoan Tjeng, boeat menjataken rasa soekoer dan trima kasinja, bahoewa pil itoe bener teramat mandjoer.
Begitoelah moelai dari itoe hari Sat Tauw-to djadi tinggal di roemanja ini mantri jang mempoenjai niatan doerhaka, boeat menoenggoe sampe datengnja tempo jang baek aken berhianat. Pada radja Siamlo tida sekali dimasoeki lapoeran, maka radja djadi tida taoe jang dalem itoe negri ada bahaja.