Pembalesan Kedji/Bab 29
XXIX
BARANGKALI MASI ADA ALAH.....
Sekarang kita misti melangkah lebi pesat dalem kita poenja tjerita. Marilah pembatja ikoet kita meliwati hari dengan tjepat sekali, aken sampe dalem waktoe tiga tahon kamoedian sasoeda ter-djadi perkara itoe perkara jang ditoetoerken dalem fatsal di atas ini.
Di ini fatsal maoe adjak pembatja pergi tengokin kita poenja sobat-sobat lama: Hoei-jin dan Bong-loan. Boeat taoe apa-apa dari marika, kira rasa ada paling baek kaloe kita pergokin sa-lagi iaorang doedoek dalem kebon dengen berdoewa-doewa. Tapi lebi doeloe kita misti langkahi lagi bebrapa boelan, kerna perkara itoe poen ada ter-djadi pada 15 Tjapgwee 2428
Malem jang terdapet dari hari terseboet ada in-dah sekali. Boelan poernama pentjarken sinarnja ka moeka boemi.
Sabagimana kita telah seboatkan di atas, adalah di itoe malem jang Hoeidjin dan Bong-loan ada di kebon dengen berdoewa-doewa. Marika doedoek di sapotong batoe tjina jang ada di bawah poehoen mangga.
Sio-kioe soeda ada poelas di pembaringannja, kerna itoe waktoe poen soeda ada poekoel sabelas.
„Bong-loan.....“ kata Hoei-djin sabagi peng-landjoet dari bitjaranja, jang ia soeda poetoesken sakean lama lantaran kaenakan memandang boelan.
Nona itoe, jang sekarang soeda djadi satoe gadis, tinggal berdiam, kerna ia merasa tida bisa dapet perkatahan boeat timpalken satoe tegoran jang dibikin tjara begitoe roepa.
„Bong-loan,“ kata poelah djedjak kita,“ sekarang soeda Tjapgwee tjapgoh.“
Sekali ini poen gadis itoe tida bisa menjaoeti.
„Engga lama lagi taon baroe, Bong-loan; goea poenja oemoer djadi doewa poeloe, loe djadi anam-belas; engga lama lagi Shiegwee; kita....“
Hoe-djin poetoesken bitjaranja, dan mengawasken si nona sampe sakean lama, kamoedian laloe ia berkata lagi dengen soera doekah:
„Kanapa sadari tadi loe kaliatannja engga soeka ngomong, Bong-loan?“
„Engga apa-apa, kapan saia ngomong!“
„Apa loe soeda ngantoek?“
„Ah, belon.“
„Engga kanapa sadari tadi loe keh orang oga-ogahan ngomong? Loe kanapa?- apa entjim loe apa-apain lagi sama loe?“
Sambil berkata demikian, Hoei-djin mengisar doedoek lebi dekat pada si nona, dan sabelon Bong-loan bisa boekah moeloet soeatoe apa boeat djawab pertanjahannja, ia soeda lantas berkata poelah:
„Soedalah sabarain sadja sama dia; engga sabrapa lama lagi tok loe bakalan soeda engga ada di sitoe. Maoe apa loe kesal-kesal; djangan la-denin sama dia, biar dia beset moeloetnja me-noeroet dia poenja soeka; orang namanja proem-pan gila ini!“
„Engga, ko Hoei-djin, entjim sekarang baek se-kali sama saia.“
„Kaloe begitoe lebi baek lagi, dari itoe apanja lagi jang loe maoe kesalin? Goea poenja senang sekarang rasanja engga habis dibilang....“
„Saia engga kesal, ko Hoei-djin,“ kata Bong-loan dengen memoetoesken orang poenja bitjara.
„Memang mistjinja begitoe; kaloe masi maoe kesal-kesal, betoel loe djadi bikin goea engga senang. Maoe djoega lagi tiga boelan doeloe, kaloe loe maoe kesal; itoe waktoe goea rasanja sampe kapingin mati, tapi loe si mengakali engga pikiran apa-apa, Bong-loan.“
„Do apa ko Hoei-djin taoe bagimana saia poenja hati di itoe waktoe?“
„Bagimana?-bilangin tok sama goea.“
„Soesa dibilang, ko Hoei-djin; saia si tjoema trima oentoeng sadja.“
„Nah sekarang kataoean dia poenja bohong ni Loe taoe djoega engga itoe perkara.“
„Mana boleh engga taoe; apa si saia engga poenja koeping?“
„Dari mana loe bisa dapet taoe? Goea sama sekali belon taoe omong apa-apa sama loe; samoea goea tjoema taoe sendiri sadja.“
„Betoel, ko Hoe-djin, masa ja saia ngebohong! Si Mili kasak-koesoek sama entjim, saia dapet denger.“
„Apa dia kata?“
Kombali Bong-loang berdiam, kerna nona itoe merasa tida ada poenja kakoewatan boeat oelangin dengan teroes-terang. Hoei-djin poen tida memaksa. Ia oesap-oesap kapalanja si non, kamoedian laloe berkata poelah:
„Loe taoe bagimana, Bong-loan?-goea rasanja sampe kapingin mati; masa mah goea maoe pergi lamarin anaknja tjek Ek-tiong!.....“
Bitjara sampe di sitoe anak maoeda itoe berdiam sabentaran.
„Sampe brapa hari goea engga pergi ka toko; goea engga kaloear-loear dari kamar; goea poenja hati engga karoeanan, rasanja kapingin oring-oeringan sadja. Habis si Mili dateng pantjian-pan-tjing goea poenja hati; itoe waktoe lantas goea rasa engga bisa tahan lebi lama lagi! goea bilang teroes-terang jang goea engga maoe kaloe dikawinin sama lain orang....“
Kombali Hoe-djin berdiam samantara lamanja.
„Baeknja orang maoe dengerin djoega goea poe-nja moeloet; kaloe engga tentoe loe sekarang tida bisa dapet liat lagi sama goea.“
Sampe di sitoe anak moeda itoe doewa-doewa tinggal berdiam sampe sakean lama. Lapat-lapat ada kadengeran soeranja lontjeng jang mengoetaraken poekoel doewa belas. Hoei-djin pegan bahoe-tangannja Bong-loan, dan mengoesoet-ngoesoet dengen klakoen amat menjajang. Masing-masing rasaken dirinja seperti ada dalem mengimpi.
Koenjoeng-koenjoeng djedjaka kita berkata:
„Apa loe taoe denger tjeritanja Bwee Liang-gioh, Bong-loan?“
„Belon.“
„Bwee Liang-giok ada anaknja satoe orang berpangkat jang bapanja dikaniaja sampe mati. Dia djalan terloenta-loenta : bermoelah djadi boedjang kebon dai Tan Djit-seng, blakangan dikasi ber-toendagan sama Tan Heng-goan siotjia, Tan Djit-seng poenja anak. Habis kansin kaniaja lagi, soeroe Heng-goan pergi kawin sama radja dari negri Tartar. Waktoe maoe berpisa, Heng-goan ada kasi dia satoe toesoek konde boeat tanda-mata — gambarnja kapan goea soeda kasi sama loe tempo dia berdoewa ada di atas ranggoean: Itoe tandam-mata blakangan kenah ditjolong sama satoe boedjang. Itoe waktoe Bwee Liang-giok dapet sakit kliwat pajah lantara tida brentinja inget sama Heng-goan slotjia......“
Bitjara sampe di sitoe, Hoe-djin berdiam poelah sebentaran.
„Habis bagimana?“ tanja Bong-loang.
„Engga, goea tjoema maoe bilangin sama loe: tempo goea poenja hati engga karoeanan rasanja, inget sama loe, pantesnja ada sama betoel seperti tempo Bwee Liang-giok dapet sakit ampir maoe mati.“
„Tapi sekarang ko Hoei-djin tok djangan kesal-kesal lagi.“
„Engga, Bong-loan, sekarang goea poenja hati ada senang sekali; tjoema kaloe sampe brapa hari goea engga dapet katemoe sama loe rasanja engga enak djoega, tapi engga apa; goea sekarang tjoe-ma harepin lekas-lekas djadi Shiegwee.“
Kombali doewa anak moeda itoe beridam sampe sakean lama. Boelan pentjarken sinarnja begitoe djerni ka moeka boemi, hingga kaadahannja itoe doewa merpati jang doedoek di bawah bajangan poehoen, adalah mirip seperti dewa dan dewi jang baroe toeroen dari kajangan.
Kamoedian, sembari oesap-oesap kapalanja la poenja nona, Hoei-djin berkata dengen soera bisik-bisik:
„Bong-loan, jang goea inget tjoema doewa kali goea taoe tjioem loe poenja djidat; boleh-engga, Bon-loan, sekarang lagi satoe kali......“
Dengen tida menoenggoe sampe orang habis bitjara, si nona laloe lepas ia poenja kapal di poendak toendagannja jang kiri. Di waktoe itoe adalah se-perti Hoei-djin tida bisa oetjapken perkatahan lagi boeat landjoeti ia poenja omongan. Dengen hati sanget tergerak laloe ia memeloek, dan sekarang boekan sadja ia menjloem Bong-loan poenja djidat, tapi djoega pada gadis itoe poenja pipi kiri-kanan.
Belon sampe Hoei-djin bisa melepasken ia poenja nona dari peloekan, sakoenjoeng-koenjoeng terde-nger soera orang berseroe:
„Bong-loan! Bong-loan!“
Dengen sanget terkedjoet gadis itoe lantas djadi tersedar dari mimpinja jang sedap, dan laloe berkata:
„Tjiaka, ko Hoei-djin, entjim sekarang lagi kaok-kaokin sama saia.“
Samantara lamanja kaliatan seperti djedjaka itoe tida bisa ambil poetoesan, tapi kamodiean sigra djoega ia berkata:
„Djangan takoet, Bong-loan, hajo, goea sendiri anteri loe poelang.“
Sambil bitjara begitoe Hoi-djin berbangkit, dan laloe pimpin tangannja si nona, jang koetika itoe kalitannja ada merasa sarebah tida enak.
Koetika itoe djoega pintoe lantas terboekah dari dalem, dan satoe orang prampoean lantas bertindak kaloear, jang di terangnja boelan sigra bisa dikenalken: ia itoe adalah entjimnja Bong-loan.
Si nona lantas lepasken tangannja dari Hoei-djin poenja pimpinan, dan tinggal berdiri di tengah kebon dengen tida taoe apa misti berboeat lebi djaoe.
Njonja moeda itoe laloe mengamperi, dan sigra djoega ia dapet kenalken pada djedjaka kita.
„Sampe begini malem belon tidoer, ba Hoei-djin?“ tanja ia kamoedian.
Anak moeda itoe tinggal berdiam, kerna ia merasa tida bisa dapet perkatahan boeat djawab itoe pertanjahan.
Njonja moeda itoe poen tida mendeser lebi djaoe, tapi laloe berkata:
„Sekarang soeda ampir poekoel satoe, ba Hoei-djin; entjim boekannja maoe katain, tapi tjoema maoe bilangin sadja: engga pantes begini malem tinggal di kebon berdoewa-doewa, kaloe sampe orang dapet liat; betoel soeda djadi toendangan, tapi taoeinlah orang poenja moeloet di loearan. Entjim mendoesin makan aer, liat si Bong-loan engga ada boekan maen entjim poenja hati djadi terkesiap; sekarang paling baek pergi tidoer; hawanja begini dingin, nanti boleh djadi dapet sakit.“
Bitjara itoe, sekali poen ada dilakoeken dengen soera manis, toch bagi Hoei-djin dan Bong-loan ada seperti satoe potong kajoe asem jang memoekoel moekanja. Samantara lamanja djedjaka kita kapoetoesan daja, kamoedian poen dengen goegoep-goegoep ia malaenkan bisa berkata:
„Boekannja begitoe, tjim, owee engga bisa tidoer, habis djalan-djalan di kebon katemoe sama si Bong-loan, djadi kitaorang ngomong-ngomong sa-mentaran......“
Njonja moeda itoe tida berkata soeatoe apa lagi, tapi dari moekanja, Hoei-djin bisa dapet liat njata sekali jang ia ada bersenjoem.
Anak moeda kita mengarti baek sekali apa jang sabenarnja ada terpendem dalem senjoem itoe, tapi toch ia paksaken djoega dirinja boeat berkata lagi:
„Si Bong-loan engga salah apa-apa, tjim......“
Dari tingkahnja keliatan seperti njonja moeda itoe tida dapet denger itoe bitjara, kerna sigra djoega ia berkata:
„Hajo da, Bong-loan, kita poelang.“
Sekali poen dengen amat kikoek traoeroeng gadis itoe soeda bertindak djoega djalan lebi doeloe, ka-moedian iboe tirinja laloe memboentoeti dari blakang, sasoeda lebi doeloe berkata lagi pada Hoei-djin: „Tidoer da.“
Tapi djedjaka kita masi belon djoega bisa merasa senang, dan laloe berkata dengen soeara koerang lamplas kaloearnja:
„Djangan poekoel si Bong-loan, tjim; betoel dia engga ada salah apa-apa; boleh pertjaja owee poenja moeloet.“
Sakali ia njonja moeda itoe djadi tertawa bergelak-gelak, kamoedian laloe mendjawab, katanja:
„Doila katakoetan dipoekoel sadja toendangannja; masa ja entjim begitoe gila; djangan salempang, ba Hoei-djin, gi da tidoer.“
Sambil bitjara begitoe sigra ia masoek ka dalem roemahnja, dan mengoentji pintoe, kerna Bong-loan poen lebi doeloe soeda pergi mengamperi pembaringannja.
Hoei-djin pergi pasang koeping sampe sakean lama, dan koetika tida dapet denger riboet-riboet baroe ia sendiri djoega lantas berdjalan poelang, seraja berkata pada diri sendiri:
„Sial betoel la ini malem.“