Pembalesan Kedji/Bab 28
XXVIII.
ANAK DOERHAKA.
Lontjeng mengoetaraken poekoel doewa tengah malem. Dalem roemahnja Kek-soen di Tongkangan soeda ada soenji sekali. Samoea orang telah rebah di pembaringannja. Djoega Koei-tjoan, jang sadari poekoel delapan satengah soeda poelang dari roemahnja Boen-san, di itoe waktoe telah ada dalem poeles jang njenak. Kek-soen jang sakit poen soeda bisa dapet didenger ia poenja soera mengorok. Begitoe soenji kaadahannja dalem itoe roemah, hingga bilah ada soeara berkerisik sadja, nistjaja nanti bisa kadengeran dengen njata sekali.
Sabagimana biasanja Isa ada tidoer di satoe pembaringan jang pernahnja dekat dengen pintoe blakang. Boedjang itoe djoestroe sedeng enak mengorok dan boleh djadi djoega ia lagi ada da-lem impian jang sedap, koetika dengen koejoeng-koenjoeng pintoe ada terketok dengen sanget plahan.
Isa tida dapet denger itoe soeara, dan tinggal mengorok teroes dengen amat senang, tapi ketokan itoe lantas dioelangin sampe bebrapa kali, hingga boedjang itoe achirnja djadi mendoesin djoega dari mimpinja. Ia pasang koeping, kamoedian laloe menanja dengen soeara serak:
„Siapa?“
„Boekah, Isa,“ terdenger satoe soeara dari loear.
„Siapa lagi si?-kapan samoea soeda poelang.“ kata poelah boedjang itoe, jang tida lantas bisa dapet kenalkeh orang poenja soeara.
„Samoe orang soeda poelang, tapi goea maoe dateng; boekah, Isa!“
„Eh-eh siapa si?“
„Koerang adjar masa ja loe engga kenalin sama goea?“ terdenger sekarang itoe soeara dari loear jang dioetjapken sedikit keras.
„Apa ba Ban-tjoan?“
„Betoel, lekas boekah.“
Sekarang lantas terdenger soeara grendel jang dipoeter dan soeara slot jang dikiserken, kamoe-dian pintoe lantas terboekah.
„Maoe ada apa, ba Ban-tjoan?“ tanja Isa.
Anak moeda itoe tida lantas menjaoet, ia mengoentji kombali pintoe dari dalem, kamoedian lantas berdoedoek di orang poenja pembaringan.
„Sekarang soeda terlaloe malem, ba Ban-tjoan,“ kata poelah boedjang itoe, „nona soeda tidoer.“
„Goea dateng djoega boekan boeat bitjara sama dia.“
„Habis maoe bitjara sama siapa?-samoenja djoega soeda tidoer.“
„Goea maoe bitjara sama loe dan loe belon tidoer; jang laen-laen seoda tidoer itoe ada lebi baek lagi; tapi djangan tok loe bitjara koewat-koewat, Isa! Kaloe sampe ada jang bangoen nanti djadi engga oeroes.“
Belon sampe boedjang itoe sempat berkata soeatoe apa, Ban-tjoan soeda lantas memeloek sakentjang-kentjangnja seraja tjioemin orang poenja pipi kiri-kanan, kamoedian laloe ia berkata poelah:
„Goea sampe rasanja kangan kliwat sama loe, Isa!“
„Mana boleh djadi!“
„Soenggoe mati!“
Kamoedian Ban-tjoan lantas kaloearken kabiasa-hannja jang ia sering goenaken di roemah pelesi-ran, dan achirnja tardjadilah di sitoe satoe per-goelatan dalem pertjintahan antara boedjang dan madjikan, kerna adanja perhoeboengan jang doeloe mambikin Isa sekarang dengen tida kikoek-kikoek lagi lantas menoeroeti sadja sabagimana jang orang hendak berboeat pada dirinja.
Lima menit kamoedian doewa orang itoe soeda djadi dami kombali, dan Ban-tjoan laloe berkata:
„Apa loe maoe Isa, kaloe goea boeat goendik sama loe?-goea nanti sewain loe satoe roemah, di sitoe loe nanti djadi njonja, boekan djadi boe-djang seperti sekarang. Apa loe maoe?“
„Lah, ba Ban-tjoan memang soeka ngomong maen-maen sadja.“
„Boekan maen-maen, Isa; sabetoelnja samentar-mentar goea merasa kangan sadja sama loe, kaloe belon djoega goea sewain loe satoe roemah, sebab sampe sekarang goea salamanja masi kakoerangan doeit dowang....“
„Habis sekarang ko lantasnja boleh bitjara begitoe sama saia,“ kata Isa dengen poetoesken orang poe-nja omongan.
„Memang, sampe di ini djam djoega goea masi kakoerangan doeit sadja, tapi kaloe loe maoe, Isa, besok atawa noesa goea nanti bisa ada poenja ba-njak doeit, banjak engga boleh dibilang; itoe wak-toe tentoe goea nanti bisa sewain loe satoe roemah, dan loe nanti djadi goea poenja goendik; loe nanti djadi njonja di itoe roemah, boekan djadi boedjang seperti sekarang.“
„Boedjang itoe tinggal berdiam, ia ini tida mengarti betoel apa jang Ban-tjoan maoe maksoedken dengen ia poenja bitjara.
„Maoe engga, Isa?“ tanja anak moeda itoe.
„Maoe bagimana?“
„Kaloe loe maoe ada gampang sadja, ba besar kan sekarang lagi sakit?“
„Ja, soeda brapa hari dia engga pergi ka toko.“
„Itoe sebab kaloe loe maoe bantoein sama goea ada gampang sekali. Tjobalah loe bilang: maoe engga?“
„Bagimana?“
„Apa sekarang loe djoega jang soeka disoeroe masak obat?“
„Ja, saban hari saia jang disoeroe.“
„Nah, kaloe loe taroin ratjoen sadja di itoe obat, ba besar tentoe lantas nanti mendjadi mati; habis goea jang nanti djadi radjanja di ini roemah, goea nang djadi kajah. Itoe waktoe loe djangan salem-pang, Isa, djangan kata baroe sewain loe roemah, kasi loe djadi njonja besar, biar kendatinja mas-intan jang mahal-mahal djoega goea nanti mampoe pakehin sama loe."
Sambil kata begitoe Ban-tjoan tjoebit pahanja si boedjang.
Isa lantas rasaken dirinja seperti mengimpi tat-kalah dapet denger bitjaranja ia poenja madjikan, hingga barangkali djoega, ia tida dapet raseken sama sekali jang pahanja soeda dijtoebit. Kaloe di itoe tempat ada sedikit sadja sinarnja lampoe, nistjaja lantas bisa dinjataken, jang boedjang itoe soeda dijadi amat tertjengang, sebab omongan be-gitoe sama sekali ia tida brani doega nanti bisa kaloear dari moeloetnja Ban-tjoan.
Koetika itoe kekasihnja Soan-nio tida maoe ber-lambat lagi. Laloe ia tjetjar dengen ia poenja per-tanjahan, katanja: ,,Bagimana, Isa, apa engga bagoes sekali goea poenja akal?-dan ada amat gampang boeat di-djalanin?"
Boedjang itoe berdiam lagi samantara waktoe, kamoedian laloe ia berkata:
,,Djanganlah ngomong memaen begitoe, ba Ban-tjoan."
,,Eh-eh, loe katain goe ngomong memaen, Isa ! Engga, soenggoe mati goea ada bitjara dengen soenggoe. Loe maoe engga? Goea si bilang te-roes-terang sadja: kaloe loe maoe loe lantas bisa djadi njonja besar; kaloe engga maoe di blakang kali-kaloe goea soeda djadi radja disini-tentoe goea nanti lantas gebos sama loe, dan loe boleh teroes-teroesan djadi boedjang sadja."
Sakali ini boedjang itoe dapet kanjatahan, ba-hoewa ia poenja madjikan sasoenggoenja boekan ada ngomong dengen maen-maen. Laloe ia moe-lahi berpikir, tapi sigra djoega ia poenja napsoe jang djahat dapet alahken ia poenja soemangat jang baek.
Sabagi satoe manoesia, Isa djoega ada poenja satoe haloean jang tentoe, jaitoe: harepan boeat toentoet penghidoepan dengen senang. Itoe peng-rasahan sekarang ini ada dikobarken oleh Ban-tjoan: itoelah sebabnja kaloe boedjang itoe dale sakedjap sadja soeda bisa lantas djadi kalelap de-ngen ia poenja napsoe, dan satelh dapet kanjata-han jang sang madjikan ada bitjara dengen soeng-goe, laloe ia berkata:
,,Tapi kita nanti boleh djadi tjilaka."
,,Tjilaka bagimana?"
,,Masa ja orang engga nanti dapet taoe jang kita ratjoenin sama ba besar!"
,,Ah, djangan bitjarain perkara tjilaka; kaloe ba-kal djadi tjilaka goea djoega engga nanti maoe berboeat, tapi bitjarin perkara engga nanti djadi tjilaka: loe maoe engga bantoe djalanin goea poe-nja akal?"
,,Kaloe engga bakalan djadi tjilaka si saia engga takoet."
,,Nah, kaloe begitoe soeda djadi satoe katentoean; sekarang tinggal goea pikirin, pakeh akal bagimana paling baek soepaja djangan djadi katoean."
,,Itoe saia kira soesa sekali, sebab kaloe lantara makan obat ba besar sampe djadi mati tentoe ka-taoean saia jang ratjoenin, sebab obatnja saia jang masak dan tentoe orang engga nanti maoe pertjaja makan obat boleh djadi mati."
„Loe diam-diam, nanti goea jang tjari satoe akal.“
„Bagimana itoe akal?“
Ban-tjoan tinggal berdiam sampe sakean lama, kamoedian laloe ia berkata poelah:
„Kaloe kita pakeh ratjoen jang lantas dimakan boleh djadi lantas mati, orang tentoe nanti daper taoe kita jang ratjoenin; dari itoe kita misti tjari ratjoen, jang ini hari dimakan kira-kira lagi tiga hari baroe mati; kaloe begitoe orang nanti kira sinshe jang soeda salah djatoin obat. Tapi ratjoen apa jang kita misti pakeh, goea sekarang belon dapet taoe, nanti plahan-plahan goea serepin, doe-nia begini lebar masa ja engga ada orang jang taoe!“
Koetika itoe dengen koenjoeng-koenjoen Isa lantas dapet inget soeatoe apa. Laloe ia berkata:
„Engga sama begini da.“ „Bagimana?“
„Kan ba Ban-tjoan maoe tjari taoe perkara ra-tjoen jang engga lantas djadi mati? -spaka kita poenja perboeatan djadi engga kataoean?“
„Ja, apa loe taoe ratjoen jang begitoe?“ „Engga, tapi saia kenal satoe orang jang taoe.“
Dengan mendadakan Ban-tjoan lantas djadi girang sekali. Laloe ia bangkit berdoedoek, sigra mana-nja, katanja:
„Siapa? Dia kerdja apa?“
„Dia djadi doekoen.....“
„Siapa namanja?“
„Moengkir“
Ban-tjoan djadi tertawa denger itoe nama jang diseboetkan oleh Isa, dan laloe ia berkata:
„Moengkir, bagoes betoel: namanja sadja soeda menoedjoekin: kaloe sampe kadjadian apa-apa tentoe dia lantas moengkir, tapi itoe samoea engga djadi apa, asal sadja dia engga moengkir jang dia taoe ratjoen jang begitoe matjem. Dimana tinggal?“
„Di Koneng.“
„Dia ada sediah banjak matjem; sebab saia poe-nja roemah engga sabrapa djaoe dari dia poenja roemah, djadi saia bisa dapet taoe. Dia ada poe-nja ratjoen jang boleh lanjas mati, ada jang sampe doewa hari, ada jang sampe tiga hari baroe mati; ada djoega jang sampe saminggoe.“
„Nah, itoe kabetoelan sekali boeat kita; loe pergi tanja sadja ratjoen jang boeat tiga hari, itoe soeda sampe tjoekoep; tanja biar teges ratjoen apa na-manja, nanti goea jang pergi tjari.“
„Dia ada simpan sedia; bilangin tentoe dia eng-ga maoe; kaloe engga kenal baek djoega tentoe dia engga nanti kasi.“
„Tapi loe tentoe kenal baek sama dia, boekan?“
„Kalo saia jang minta tentoe dia nanti kasi, sebab saia kenal dia dari ketjil. Ja, sekarang saia inget: kaloe pakeh ratjoen jang dia poenja, biar bagimana djoega engga nanti bisa kataoean, sebab dibikinnja dari dadonanan; kaloe ditjampoerin di obat nanti djadi saroe betoel-betoel.“
„Engga, besok sadja loe pergi minta itoe ratjoen; brapa doeis misti kasi sama dia? Eh-i ka, kabe-toelan goea lagi engga poenja doeit lagi......“
„Engga, sekarang troesa doeit djoega boleh, asal sadja nantinja kasi dia biar banjakan. Itoe barang sabetoelnja boekan dia memang perloe boeat djie-wal. Pa Moengkir djadi doekoen djoega dia, sebab dia bisa bikin kontauw, -djadi kapal bangsat. djoega dia; kaloe ada orang jang dia sakit hati lantas dia pakeh akal boeat ratjoenin.“
„Do kaloe begitoe loe ada kenal orang jang bisa maen kongtauw! nanti salah-salah goea lago loea kongtauwin.“ „Masa ja, ba Ban-tjoan, djangan salempang.“
„Engga, goea djoega tjoema memaen sadja. Be-sok sadja loe pergi sama itoe doekoen Moengkir; boleh djandjiin kasi dia sampe saratoes, doew ratoes keh, kaloe dia engga maoe djoega sampe tiga ratoes keh.“
„Begitoenja si sala ngarti, tapi bagimana sala bisa dapet pergi; apa lagi sekarang ba besar lagi sakit.“
„Ban-tjoan berdiam sampe sakean lama, kamoe-dian laloe ia berkata dengen koenjoeng-koenjoeng:“
„Loe kan masi ada poenja mah?“
„Ada.“
„Loe bilang sadja mah loe ada dapet sakit pajah, habis loe minta permisi boeat tengoki samen-taran; masa engga dikasi si!“
„I ja, begitoe la baek.“
Kamoedian madjikan dan boedjang itoe ngomong-ngomong dalem laen perkara. Ban-tjoan sanantiasa goenaken ia poenja lida boeat bikin Isa djadi samingkin brani sadja berboeat kadjahatan.
Koetika lontjeng mengoetaraken poekoel ampat pagi, kekasihnja Soan-nio itoe lantas berlaloe. Pin-toe blakang lantas dikoentji poelah dengen amat hati-hati, kamoedian Isa berlaga tidoerin lagi, sedeng sekarang sabenarnja ia tida bisa meramken mata dengen senang lantaran berbagi-bagi pikiran dateng mengoelak dalem otaknja.
Tida satoe orang ada jang taoe itoe perkara.
⁂
Berselang tiga hari dari terjdai itoe persarika-tan hianat antara Isa dan Ban-tjoan, Kek-soen poenja sakit djadi berlipat sapoeloe kali lebi berat, kerna ratjoennja pa Moengkir soeda berkedja se-djak doewa hari lamanja.
Sinshe soeda dipanggil ganti-berganti, tapi toeh samoea ada merasa kawalahan; tida satoe obat bisa toeroen dalem peroetnja Kek-soen poenja penjakit.
Di itoe waktoe jang soeker adalah njonja Kek-soen jang merasa paling djengkel sendiri. Ia se-perti dapet pirasat jang soeaminja poenja sakit misti bercahir dengen masoek ka lobang koeboer; lantara itoe ia djadi loepahken samoea permoesoean jang tadinja ada terpendam dalem ia poenja hati, kerna sekali poen peranginja njonja itoe ada amat kasar, tapi sabagi prampoean jang mendjadi orang poenja istri, ia belon djadi roesak sama se-kali. Itoe reroentoek jang masi boleh dibilang kabaekannja satoe prampoean, sekarang ini ada berkoempoel djadi satoe dalem hatinja njonja itoe, dan itoe pengrasahan jang soeatoe waktoe sang soeami nanti meninggalken padnja, lantas djoega djadi pegang pengaroe lebi besar atas ia poenja pikiran dari itoe ingetan sakit hati, jang Kek-soean soeda timboelken lantaran penghidoepannja seperti satoe soeami.
Djoega Kek-soean di itoe hari terseboet ada merasa jang adjainja sigra aken sampe, dan sabagi-mana biasanja orang jang maoe brangkat mati, poean ia poenja hati plahan-plahan djadi berobah samingkin lemas. Ia meloepahken Ban-tjoan poenja perboeatan di hati Tjengbeng, dan sekarang ia djadi merasa jang ia ada berlakoe terlaloe bengis pada anaknja itoe.
Plahan-plahan matahari ada toeroen ka Koelon. Kek-soen poenja penjakit sanantiasa ada bertambah djadi samingkin berat sadja. Di waktoe malem ia ampir tida brentinja kaloearken berbagi-bagi soeara merinti; jang membikin piloe hatinja sasoeatoe orang jang mendenger.
Koetika hari soeda djadi siang kombali, orang jang sakit itoe merasa tida sanggoep tahan lebi lama ia poenja pengrasahan hati, jang sanantiasa ada menindes samingkin keras sadja ia poenja soe-mangat. Ia measa kapingin beoteli doeloe ia poe-nja klakoean jang amat kakoe pada Ban-tjoan, sa-belon ia menoetoep mata. Laloe ia panggil Kek-hoay, jang memang saban pagi ada dateng menengokin, lebi dekat ka pembaringan, dan laloe berkata pada soedaranja itoe:
„Toeloengin goea panggil si Ban-tjoan; apa loe taoe dimana dia ada sekarang? Soeroe orang tjari sampe dapet dan adjak ka mari.“
Boeat loeloesken itoe kainginan, orang lantas berlakoe sabrapa bisa, tapi adalah siasi sadja. Tida satoe orang ada taoe terang bagimana doe-doeknja itoe perkara antara Kek-soen, Ban-tjoan dan Soan-nio. Njonja Kek-soen malaenken taoe rada-rada sadja, tida taoe dimana Soan-nio ada tinggal dan tida mendoegah sama sekali jang sang anak kamoedian soeda tanggap bekas goela-goela dari bapanja itoe; Kek-soean sendiri tinggal toetoep moeloet boeat itoe perkara. Orang kasak-koesoek di loear kamar sakit, kamoedian satoe orang disoeroe tjari lagi ka laen tempat, tapi toch samoea tida berhasil.
Tapi taroh lagi orang tjari Ban-tjoan di roemahnja Soan-nio, djoega tentoe orang tida nanti bisa dapetken padnja itoe, kerna sadari hari masi pagi sekali anak moeda itoe soeda pergi kaloear. Ia taoe jang di itoe hari bapanja bakal brangkat ka acherat, dan dengen pengrasahan hati seperti dioebar-oebar setan ia merasa tida betah tinggal diam di dalem roemah. Dengen saorang diri ia ambil djalanan kak Tandjoeng dengen tida taoe maoe teroes ka mana.
Kaloe di itoe hari orang broentoeng dapet tjari padanja, dan anak moeda itoe achirnja dibawa mengadep pada orang jang maoe brangkat mati, dengen hadepken randjang mait dari ajahnja, jang itoe waktoe ada beringet baek bagi ia poenja diri, itoe kekasih dari Soan-nio boleh djadi sampe sa-oemoer hidoepnja nanti merasa njesal lantaran soeda bikin itoe pembalesan amat kedji dan salan-djoetnja nanti bisa merasa kapok boeat toeroetin lagi andjoerannja ia poenja napsoe iblis. Tapi tidalah broentoeng bisa kadjadian sampe begitoe djaoe!
Kira-kira poekoel doewa lohor Kek-soen tari napasnja jang pengabisan dengen tida dapet bertemoe moeka lebi doeloe pada Ban-tjoan, jang itoe waktoe sedeng ada loentang-lantoeng di djalanan Tandjoeng. Djadi njatalah jang anak moeda itoe soeda didjelemahken di doenia dengen mempoenja batin amat djahanam dan Alah soeda tida adaken waktoe boeat ia djadi satoe manoesia sabagimana jang ada dimaksoedkan dengen itoe perkatahan!
Pada waktoe Kek-soean poenja soemangat brangkat ka acherat, Hoey-wan djoestroe sedeng doedoek hadepken medja toelis di kantornja, tapi tidalah ia djadi terlaloe terkedjoet koetika Kek-hoay sampehken itoe kabar djelek padanja, kerna sedjak bebrapa hari jang paling blakang, ia djoega soeda dapet kanjatahan bahoewa Kek-soen poenja sakit ada soesa dapet toeloengan.
Doewa hari kamoedian, sasoeda maitnja Kek-soen tersimpan rapi di dalem peti, Ban-tjoan dateng me-ngoendjoengin roemah orang toewanja. Di depan orang banjak, ia berlaga bodoh, dan bikin tingkahnja seperti ia baroe dapet taoe itoe perkara, tapi tatkalah ia dapet tempo boeat ada berdoewa-doewa sama Isa, anak moeda itoe laloe berkata:
„Bagimana?-apa tida ada satoe orang jang sangkah sama kita?“
„Engga, samoea orang kira sawadjarnja,“ djawabnja itoe boedjang prampoean.
„Kaloe liat begini betoel boleh dipoedji sekali pa Moengkir poenja obat penjirap; djangan takoet, goea nanti kasi dia paling sedikit doea ratoes.“
„Baba ka mana sampe sekarang baroe ka mari?“
„Ah, goea rasanja sangsi-sangsi; ini hari djoega kaloe goea engga paksain, tentoe goea engga da-teng. Tapi sekarang perkara soeda djadi begini apanja jang ditakoetin lagi?“
„Lagi maoe toetoep mata ba besar soeda soeroe tjarihin sama baba; dia kliwat kapingin katemoe.“
„Ah, itoe perkara ketjil; jang paling besar loe taoe apa? Tadi goea soeda tjari taoe dan dapet denger, jang moelahi sekarang goea jang bakal djadi radja di ini roemah. Pendeknja loe djangan takoet da, Isa; engga; goea nanti sewain loe satoe roemah, goea nanti kasi loe berpakean biar rebo, engga kalah sama laen-laen orang; pendeknja loe nanti djadi goea poenja goendik jang paling di sajang! Tapi eh-eh, kanap sampe sekarang loe masi belon maoe ketawa djoega-soenggoe bikin goea djadi heran. Hajo do ketawa goea liat-jang maniiiiiis sekali.“
Maoe atawa tida boedjang itoe misti tertawa, mendenger madjikannja poenja bitjara. Kamoedian Ban-tjoan poen lantas tertawa seperti ia ada dalem perdjamoean jang senang, dan seraja tjoebit pa-hanja Isa ia berkata lagi:
„Loe sekarang troesa kesal-kesal lagi, manis!“ Njatalah jang anak moeda itoe soeda meloepah-ken betoel-betoel jang dirinja masi djadi orang. O, manoesia, manoesia!