Pembalesan Kedji/Bab 26
XXVI
BAN-TJOAN DAN SOAN-NIO.
Sekarang marilah pembatja ikoet kita pergi te-ngokin pada nona Soan, jang kita soeda tinggal-ken satengah djalan tatkalah ia kenah dipergokin mentah-mentah oleh Kek-soen dalem ia poenja perhoeboengan sama Ban-tjoan.
Di itoe hari Tjengbeng, koetika sang anak soe-da melariken diri. Kek-soen soeda lantas djato pangsan, lantaran napsoe amara jang bertimboen terlaloe besar; koetika ia soeda djadi sedar kom-bali, lantas djoega ia pindahken nekatnja pada Soan-nio dan Djamea; meliat itoe gelagat jang koerang baek, boedjang itoe poen soeda lantas melariken diri, hingga malaenken tinggal si nona saorang jang misti djadi boelan-boelan dari kape-lan dan tendangannja si soeami jang soeda me-rasaken dirinja terlaloe tjilaka, dan sadari itoe waktoe Kek-soen tida lagi mengoendjoengin ia poenja goela-goela.
Pembatja soeda saksiken, jang sapoelangnja dari roemah Soan-nio, itoe ajah jang terampas katjin-tahannja soeda berlakoe lagi nekat-nekatan pada sang anak, dan oleh kerna sang iboe soeda me-ngadoeh biroe, achirnja telah dapet djoega bagian jang heibat dari itoe bandot toewa jang sedeng kalap.
Moelahi dari itoe hari roemahnja sang bapa djadi tertoetoep boeat Ban-tjoan, kerna Kek-soen merasa tida bisa kasi ampoen atas perboetannja ia poenja anak, jang menoeroet ia poenja penga-dilan dalem hati, soeda lakoeken satoe perkerdja-han jang terlaloe doerhaka.
Kaloe tjoema begitoe sadja masi belon sabrapa, tapi laen dari itoe Kek-soen soeda tjaboet djoega ia poenja tanggoengan, hingga Ban-tjoan tida bisa dapet pegang lebi lama lagi ia poenja kerdjahan kassier.
Djadi anak soeloeng itoe misti loentang-lantoeng sadja dengen tida ada poenja kerdjahan. Ia dioe-sir dari roemah orang-toewanja, laloe ia tinggal bersama-sama Soan-nio di Gang Togee. Ia tida bisa dapet trima gadji lagi pada saban boelan, laloe ia minta toeloengan iboenja: di wakto Kek-soen tida ada, ia masoek dengen ambil djalan dari pintoe blakang ka dalem itoe roemah, dimana sa-betoelnja ia tida boleh indjak satoe kaki lagi, dan saban-saban ia kaloear kombali dengen bawa oe-wang genggeman. Tjara begitoe djadi Ban-tjoan soeda bisa liwatken hari dengen traoesa nampak satoe waktoe jang kliwat soesa; ia djadi bisa toentoet penghidoepan bersama Soan nio dengen membajar gaddi teroes pada Djamea dan traoesa tebalin moeka boeat baja oewang sewah dengen djandji.
Tiga hari berselang dari apa jang ditjerita-ken dalem fatsal di sabelah atas ini. Ban-tjoan doedoek santap tengahari sama ia poenja goela-goeala jang boleh dapet dirampas, samantara Dja-mea ada berbenah dengen giat sekali.
Satjara njonja besar, sahabis makan, Soan-nio tinggalken sadja segala apa terletak di atas medja, samantara ia sendiri, sasoeda tjoetji tangan dan moeloet, lantas masoek ka dalam kamar, rebahken diri di atas pembaringan. Sebagi katarik besi bra-ni Ban-tjoan poen sigra toeroet berboeat begitoe.
„Sekarang goea salamanja bisa ada sama-sama loe,“ kata si nona. „Jang kita kerdjain engga laen dari tidoer bangoen........“
„Nah sekarang goea harep loe djangan nanti djadi kabosanan sama goea,“ kata Ban-tjoan de-ngan memoetoesken orang poenja omongan.
„Tjoema sajang beriboe sajang,“ kata poelah Soan-nio jang meneroesken bitjaranja, „jang kita sekarang ampir salamanja ada kasesakan sadja sama oewang; kaloe engga begitoe soenggoe eng-ga boleh diseboet lagi besar brapa kita poenja senang. Kaloe kajah si kadanan, asal tjoekoep sadja kita boeat pakeh onkost saban hari; djangan seperti sekarang loe saban-saban misti grembe-ngin loe poenja mah; kaloe loe poenja mah eng-ga kasi adja, kita boleh djadi tjilaka.“
Ban-tjoan berdiam sabentaran, kamoedian laloe berkata:
„Kadjadian sampe begini soesa sabetoelnja sa-moea ada loe jang poenja salah. Tjoba itoe hari loe engga tahan goea poelang tentoe engga be-gini djadinja. Kita enak-enakan boleh maen ko-medi di blakangnja si towa-bangka; kaloe dia mati goea nanti ganti'in djadi radja; itoe waktoe soeda troesa ditjeritaken lagi bagimana enaknja. Tapi sekarang samoea djadi engga oeroes; engga salah kaloe maoe dikata: sebab saketek bikin per-kara jang besar djadi berarakan; ja, memang djoe-ga tjoema saketek salahnja, sebab kaloe itoe hari loe engga tahan sadja goea poelang, tentoe engga djadi sampe bagini.“
„Djadi pendeknja loe maoe salahin sama goea ini?“
„Ah, boekan begitoe.“
Eh, kaloe loe maoe salahin sama goea bilang sadja teroes-terang! Betoel, Ban-tjoan, goea si engga pegangin loe poenja kaki; kaloe sekarang loe maoe goeling sama goea ia menoeroet loe poenja soeka sadja. Loe kira goea kapingin djadi begini? Goea poenja entjim djoega seka-rang engga maoe kenal lagi sama goea, tapi djadinja boekan goea sakit hati sama loe, tapi goea saktia hati sama dia, sebab dia jang mata doeitan, engga karoean-roean dia boleh serain goea sama segala bebongkot jang soeda dekat ke lobang; habis loe dateng-dateng maoe salahin sama goea lagi?“
„Boekan begitoe, Soan.“
„Mana boleh boekan begitoe; kaloe engga tok loe engga misti seboet-seboet lagi itoe perkara! kaloe goea si kata sabetoelnja loe poenja bapa djoega jang kliwatan. Dia engga maoe kenal lagi sama goea, itoe si soeda engga bisa dikata apa-apa, tapi loe jang namanja anak tok engga patoet dia sampe begitoe tegah; dia oesir sama loe, dia bikin sampe loe brenti kerdja, itoe sama djoega dia maoe bikin loe djadi mati.“
„Habis apa loe kira goea engga sakit hati sama dia?“
„Loe sakit hati itoe memang soeda mistinja.“
„Nah kaloe loe taoein lebi baek; kaloe boleh goea sekarang pengrasahan maoe bikin di djadi tjilaka. Kamaren goea poelang ka roemah dia lagi sakit, soeda brapa hari dia engga pergi ka tokk; ah, kaloe boleh goea lebi soeka dia lekasan mam-poes, toewa-bangka jang begitoe!“
„Hala djangan loe omong dowang; nanti kaloe dia soeda mampoes engga oeroengan loe nanti na-ngis menggeroeng-gereong: namanja bapa sama anak, biar bagimana sakit hati djoega engga sa-brapa; orang kata djoega apa: masa aer di kali bisa djadi kering? Kaloe sama goea ma betoel: sekarang djoega kaloe goea mati, loe tentoe tjoema kadjengkelan lantaran misti kaloear doeit boeat belih peti.“
„Nah toe kaloe goea kata apa-apa loe soeka engga pertjaja; soenggoe mati goea lebi soeka dia lekas mampoes; boekan goea nanti nangis, tapi goea nanti tertawa engga brentinja, sebab sedi-kitnja goea nanti dapet bagian djoega dari dia poenja harta. Apa loe masi engga maoe pertjaja djoega?“
Mendenger kekasihnja kata begitoe, dengen mendadak satoe ingetan djahata lantas terbit dalem hatinja si nona. Ia tinggal diam sampe sakean lama, kamoedian ia berbangkit, melongok di djen-delah kamar, seraja berseroe"
„Djamea!“
„Loe maoe aoa?“ tanja Batjoan.
„Engga.“
Koetika boedjang jang dipanggil soeda dateng, Soan-nio lantas menanja:
„Apa loe taoe dimana tempat belih kaen poeti boeat koetang?“
„Taoe ma soeda karoennja adja.“
Si nona boekah ia poenja lemari pakean, kasi oewang lima roepiah pada Djamea, kamoedian laloe ia berkata:
„Belih gi boeat tiga koetang; kaennja jang ha-loes, ngarti?“
„Baek,“ saoet si boedjang, kamoedian lantas berdjalan pergi.
Soan-nio rebahken lagi dirinja di atas pembaringan, sasoeda lebi doeloe mengoentji pintoe kamar. Ia tinggal berdiam lagi samantara lamanja, ka-moedian laloe ia berkata pada Ban-tjoan dengen bisik-bisik:
„Sabetoelnja kaloe si toewa-bangka mampoes, loe tentoe nanti dapet bagian dari ia poenja harta, dan kita berdoewa nanti bisa hidoep senang.“
„Memang, mangkanja djoega bagimana loe boleh kata goea nanti nangis menggeroeng-geroeng kaloe sampe dia djadi mati?“
„Sttt! djangan bitjara begitoe brisik. Goea se-karang maoe bilang sama loe: kaloe betoel loe lebi soeka dia mati ada amat gampang; loe ratjoenin sadja sama dia; begitoe djadi kita troesa toenggoe-toenggoe lagi.“
Ban-tjoan mengawasken pada Soan-nio dengen mata menjalah, kerna bitjaranja nona itoe ada kadengeran di koepingnja seperti satoe boenjian jang merdoeh.
Sadari mendjelemahnja di doenia, anak moeda itoe memang soeda djadi satoe djahanam. Tabiat bapanja jang amat koetoekan dan batin iboenja jang sanget kasar, samoean ada bertimboen djadi satoe dalam dirinja. Pengrasahan haloes ia tida kenal, kerna boekan sadja dara jang mengalir da-lem toeboenja memang soeda ada amat boeroek, tapi djoega sadari ketjil ia belon pernah dapet liat satoe toeladan jang baek. Katjan memang tida memboewang ia poenja landjaran, tapi lebi djelek lagi kaloe katjang itoe dapet tanah jang berpe-njakitan. Nah, seperti itoe bibit katjang jang boe-roek, tertanem di tanah jang djelek, begitoelah Ban-tjoan ada djadi manoesia jang djalanken peng-hidoepan di doenia!
Koetika dapet denger kekasihnja poenja bitjara, sigra djoega ia poenja batin jang koetoekan dapet alahken ia poenja pengrasahan manoesia. Perkara begitoe lebi doeloe belon pernah di'inget olehnja, tapi oleh kerna sekarang ada jang kasi inget, lan-las djoega hatinja djadi berdebar-debar sabagi ka-adahannja orang jang sedeng aoes dengen mendadak dapet katemoe satoe soembar jang djernih. Saba-gimana soeda dibilang di atas, anak moeda itoe lantas mengawasken pada Soan-nio dengen mata menjalah, kamoedian laloe ia berkata:
„Ratjoenin memang enak, tapi kaloe sampe ka-taoehan kita berdoewa boleh djadi tjilaka: boekan djadi dapet harta, tapi djadi dapet borgolan.“
„Sttt!“ djangan bitjara begitoe koewat," kata Soan-nio jang masi merasa kekasihnja ada mengo-mong terlaloe berisik „Begini: ia sekarang lagi sakit, kaloe kita tjampoein itoe rajoen di obatnja, siapa djoega si jang nanti bisa dapet taoe? Tjoema sadja: loe maoe apa engga? Dari si kita hidoep begini poenja soesa, kaloe goea pikir lebi baek kita kerdjain soeda satoe kali pembalesan, sebab loe sampe djadi begini memang djoega lantaran itoe toewa-bangka jang terlaloe kliwatan; bagimana loe poenja pikiran?“
„Goea djoega memang merasa kliwat gemas sama dia, apa lagi sekarang, kaloe dia mati goea bisa dapet oewang, kanapa djoega goea misti engga maoe berboeat? Tapi lebi doeloe kita misti da-petin satoe akal jang bagoes spaja djangan sampe kita sendiri nanti djadi tjilaka.“
„Perkara akal engga nanti kakoerangan, asal sadja kita maoe pikiran, tapi lebi doeloe loe misti djandji dong sama goea, jang loe engga nanti ka-win lagi sama anak prawan; kaloe sampe begitoe, betoel goea maoe bilang loe poenja hati engga baek.“
„Perkara begitoenja si loe troesa salempang, tapi sekarang perkara jang boeat kita djalanin masi ada terlaloe soesa. Di roemah goea ada satoe boedjang prampoen jang goea soeda baekin; kaloe goea djandji nanti maoe piara teroes sama dia, boleh djadi dia nanti maoe sakongkol sama kita.“
„Nah toe belon apa-apanja loe soeda ngomong maoe madoe sama goea.“
„Boekan begitoe; habis kaloe engga bagimana? Bilang tok, sebab goea engga bisa dapet laen akal jang lebi baek lagi.“ Soan-nio berdiam sampe sakean lama, kamoedian laloe ia berkata lagi:
„Ja, begitoe ia begitoe tapi bagimana loe maoe adjak sakongkol sama dia? Apa dia jang soeka masakin obat kaloe di roemah loe ada orang sakit?“
„Biasanja memang disoeroe dia.“
„Kaloe begitoe gampang; loe boleh djandjiin djoega kasi oewang banjak-banjak sama dia spaia dia djangan sangsi-sangsi lagi.“
„Ah, perkaranja begitoenja si loe taoe beresnja sadja, tapi ratjoen apa kita misti pakeh jang ada paling baek?“
Koetika itoe laloe dibikin pertimbangan boelak-balik oleh itoe doewa kekasih: marika saling ganti pikiran dalem mengoekir berbagi-bagi akal dan damiken djoega barang apa ada jang paling baek boeat binasaken djiwanja Kek-soen, soepaja dja-ngan sampe djadi terlaloe kentara.
Samantara itoe Djamea poelang dengen memba-wa kaen poeti jang dibelih, tapi Soan-nio trima sadja oewang kombalinja dengen tida menanjaken melit-melit lagi, kerna ia poenja pikiran poen sedeng tergoebat dengen laen perkara.
O, manoesia, manoesia!