Pembalesan Kedji/Bab 25

Dari Wikisumber bahasa Indonesia, perpustakaan bebas

XXV.

BOEWAHNJA PERTJINTAHAN.

Lima boelan berselang dari apa jang ditjeritaken dalem fatsal di sabelah atas ini. Matahari soeda lama silam ka Barat, satoe kaadahan jang membikin Kampoeng Opak djadi begitoe sepi, hingga ampir tida ada orang jang meliwat.

Koetika itoe adalah Phegwee tjapsah. Boelan ada pentjarken sinarnja jang djerni ka moeka boemi.

Oleh kerna Boen-san sekarang soeda djadi kita poenja kenalan lama, biarlah dengen tida memboewang tempo di laen tempat lagi, kita lantas pergi koendjoengin ia poenja roemah, kerna di sitoe poen soeda terdjadi satoe perkara jang penting pada hari terseboet.

Nona Bok Hiang kombali ada dalem kamarnja si Djambroet bersama ia poenja kekasih jang pem-batja soeda kenal.

Lontjeng mengoetaraken poekoel satoe tengah malem. Kaadahan dalem itoe roemah soeda djadi amat soenji, hingga sekali poen segala omongan jang dilakoeken oleh itoe doewa katjinatahan salaloe ada dengen bisik-bisik, tida loepoet soeara kasak-koesoek itoe soeda bisa dapet didenger djoega dari loear kamar.

„Loe taoe sekarang, Koei-tjoan, boeat goea tjoema katinggalan doewa djalan sadja: Kaloe loe tegah tentoelah goea nanti mati, kaloe loe inget oe poenja perdjandjian, lekasan soeroe loe poenja mah dateng lamar, sopenja kita bisa lekas kawin.“

„Omong betoel-betoel, Bok-hiang, goea kira loe tjoema takoetin sadja sama goea. Dari mana loe bisa dapet taoe itoe perkara?“

„Loe traoesa perdoeli goea dapet taoe dari mana, tapi goea taoe terang engga boleh djadi salah. Bermoelah goea djoega engga begitoe pertjaja, dan kirain memangnja sadja laat sedikit, tapi sampe sekarang soeda berdjalan doewa boelan satengah, mana boleh djadi salah lagi!“

„Soeda doewa boelan satengah, loe kata?“

Bok-hiang manggoeti kapalanja sembari toendoek.

„Goea tadinja kira baroe-baroe ini sadja, tapi kanapa sampe begitoe lama loe baroe kasi taoe sama goea?“

„Loe kata goea baroe kasi taoe sekarang?“

„Ja.“

„Kaloe begitoe betoel loe tjoema maoe boeat maen-maen sadja sama goea. Apa loe engga inget itoe satoe malem goea soeda kasi taoe sama loe?—itoe malem tempo goea engga maoe loe adjakin ka mari!“

Koei-tjoan berdiam sabentaran, kamoedian laloe ia berkata:

„Betoel itoe malem loe ada kata begitoe, tapi goea kira loe maen-maen sadja boeat tampik goea poenja permintahan.“ „Sekarang baroe goea dapet taoe terang jang loe tjoema maoe boeat maen-maen sadja sama goea, kaloe engga tentoe loe engga begitoe, sebab ini perkara boekannja perkara jang boleh diboeat permaenan.“

Koei-tjoan berdiam lagi sampe sakean, lama, kamoedian laloe ia berkata dengen tarik moeka masgoel:

„Sekarang goea pikir tjoema ada doewa ada djalan: Makan obat boeat loengsoerin itoe anak atawa....“

„1 ja, memang enak sadja loe poenja omong,“ kata Bok-hiang dengen memoetoesken kekasihnja poenja bitjara. „Loengsoerin, memang enak sadja loe poenja kata, jang rasain tok boekannja loe, lagi apa loe kira engga boleh djadi kataoehan djoega sama goea poenja mah, kaloe sampe goea djadi djato sakit.... ah, soedahlah! goea tjoema kapingin taoe loe poenja pikiran ini sakali sadja, kaloe soeda katahoehan begitoe, ja soeda, habis perkaranja!“

Habis berkata demikian nona itoe lantas menangis sasenggoekan.

Koei-tjoan merasa amat djengkel meliat klakoeannja ia poenja kekasih. Sabagi satoe perboetan boeat menghiboerken, ia malaenkan bisa oesoet-oesoet kapalanja si nona, sembari katanja:

„Diam da, Bok-hiang!“

Sasoeda poewas menangis, achirnja si nona ang-kat ia poenja kapala, dan dengen mata mengoetara-ken sakit hati laloe ia berkata:

„Kaloe soeda kataoehan loe poenja pikiran tjoema begitoe sadja, soedalah!-goea sekarang maoe poelang sadja.“

Sambil kata begitoe laloe ia berbangkit dan maoe mengamperi pintoe.

Koei-tjoan lantas menjegah dengen terbirit-birit, seraja katanja:

„Toenggoe doeloe, Bok-hiang, djangan maen mara sadja, goea masi ada poenja laen omongan lagi.“

„Soedalah! goea sekarang soeda taoe habis loe poenja hati, engga goena banjak bitjara lagi.“

„Eh-eh, boekan sadja, goea masi ada poenja laen akal.“

Bok-hiang berpaling, dan mengintjer sakean lama matanja ia poenja kekasih, kamoedian laloe ia ber-doedoek lagi di tepi randjang, seraja berkata:

„Loe ada poenja omongan apa lagi?-boleh lekas sadja kasi goea denger.“

Koei-tjoan mendehem bebrapa kali, dan berkata:

„Sabenarnja kaloe loe maoe djadi goea poenja bini kawin, biar bagimana djoega loe misti makan obat boeat loengsoerin, Bok-hiang.“

„Kaloe loe boelak-balik maoe bitjarain perkara begitoe sadja, goea soeda kata dari tadi, lebih baek loe kasi goea poelang, goea engga kapinginan de-nger lagi loe poenja omongan.“

„Nah toe loe soeka maoe maen mara sadja, de-nger doeloe tok goea poenja bitjara. Tjoba loe pikir: goea poenja enko sampe sekarang belon kawin, bagimana boleh lantasnja goea jang dika-winin? Kaloe maen toenggoe poenja toenggoe tentoe nanti djadi terlaloe laat sama loe poenja diri, dari itoe maka goea kata loe misti makan obat boeat loengsoerin.“

„Kapan loe kata loe poenja enko soeda dioesir sama loe poenja bapa, lantaran dia soeda maen gila sama loe poenja bapa poenja bini moeda, ha-bin bagimana sekarang loe maoe kata misti toeng-goe dia kawin lebi doeloe? Ini samoea ada omo-ngan jang engga boleh djadi, goea taoelah soeda: loe tjoema maoe boeat permaenan sama goea.“

Koei-tjoan gigit bibirnja, kamoedian laloe berkata lagi:

„Taroh lagi goea poenja mah lantas sama loe, engga oeroengan soeda djadi terlaloe laat. Tjoba loe pikir sadja: Sekarang loe kata soeda doewa boelan satengah. Masa lantas lamar lantas kawin, tentoe engga bisa djadi, matjan begitoe soeda djadi terlaloe laat. Kaloe habis kawin tiga atawa ampat boelan lantas dapet anak, apa orang nanti kata?“

Omongan itoe adalah seperli satoe pisa amat tadjem jang menikam hatinja si nona. Dengen mendadak moekanja lantas berobah, dan mengoe-taraken aer moekanja orang jang poetoes harepan. Sakali ini ia tida menangis, tapi memandang pada Koei-tjoan dengen mata sanget membentji, kamoe-dian laloe ia berkata:

„Kaloe begitoe soedalah! Biar sekarang goea poelang sadja. Goea rasanja menjesal sekali lan-taran soeda begitoe gampang maoe dengerin loe poenja moeloet: Goea tadinja kira betoel loe boe-kan tjoema maoe boeat permeanan sadja sama goea, tapi sekarang apa maoe dikata?“

Kombali nona itoe berbangkit dan lantas maoe djalan kaloear, tapi djoega di ini kali Koei-tjoan sigra menjegah padanja, dan berkata:

„Djangan mara-marah doeloe ia, Bok-hiang, belon djoega habis loe denger goea poenja omongan.“

„Apa goenanja loe bitjara lagi banjak-banjak-goea poenja latjoer tok soeda tentoe engga nanti bisa katoeloengan.“

„Engga, goea ada satoe akal jang bagoes sekali, tjoba toh loe dengerin doeloe sabentaran!“

Dengen oga-ogahan Bok-hiang berdoedoek kombali, dan mengawasken pada Koeitkoan seraja membri tanda jang djedjaka itoe misti lantas bitjara sadja.

Anak moeda itoe mendehem lagi bebrapa kali, kamoedian laloe berkata:

„Kaloe goea pikir engga sama loe kasi taoe sadja ini perkara teroes-terang sama loe poenja mah....“

„Ah, soedahlah! Kaloe loe tjoema maoe bitjara begitoe sadja lebi baek goea lantas poelang,“ kata Bok-hiang: dengen poetoesken orang poenja omo-ngan. „Sekarang soeda liwat poekoei satoe, soedalah, Koei-tjoan!“

„Eh-eh, toenggoe doeloe tok denger goea poe-nja bitjara sampe abis,“ kata poelah djedjaka itoe sembari menjegah kekasihnja boeat brangkat pergi.

„Tjoba loe pikir plahan-plahan: Mana lebi baek loe kasi taoe sadja ini perkara sama loe poenja mah, dia tentoe engga nanti riboet-riboet di loearan, sebab dia sendiri djoega boleh djadi dapet maloe......“

„Habis kaloe soeda begitoe loe maoe bagimana lagi?“ tanja si nona dengen koerang sabar.

„Goea djoega nanti tebalin moeka boeat menga-dep sama loe poenja mah. Pertjaja, Bok-hiang, biar kendatinja goea soeda kawin djoega engga nanti goea siasia sama loe, masa goea tegah ting-gal loe satengah djalan?“

Tatkalah mendenger bitjaranja ia poenja kekasih jang paling blakang, si nona rasaken dadanja telah mendjadi sesak dengen mendadak. Ia gigit bibir-nja boeat menahan hatinja jang kenah ditikam, ka-moedian laloe ia djatoken dirinja di atas pembari-ngan, seraja menangis tersedoeh-sedoeh.

Koei-tjoan, jang merasa kapoetoesan akal boeat bri hiboeran pada katjintahannja, sakali ini malaenkan bisa tinggal berdoedoek sadja dengen mengelah napas. Anak moeda itoe djadi sanget berdoekah, kerna dari tadinja ia soeda tida bisa dapet doegah lebi doeloe, jang Bok-hiang bakal ada begitoe soesa dihiboerkan, ia soeda kira sadja jang satoe gadis miskin seperti adanja ia poenja keka-sih, dengen gampang sadja nanti maoe trima nasibnja diri, tapi sekarang njatalah itoe sangkahan poeti achirnja soeda meroepaken satoe kadjadian jang itam.

Sasoeda koetjoerken aer matanja, sakali ini poen Bok-hiang lantas angkat kapalanja. Ia awasken pada Koei-tjoan dengen mata kabentjian, kamoe-dian laloe berkata dengen soeara tetap:

„Apa boleh boeat! sekarang goea poenja salah lantaran soeda engga bisa dapet taoe lebi doeloe jang loe ini sabetoelnja ada satoe lelaki berhati binatang. Tjoema soenggoe goea engga bisa pertjaja, kaloe satoe lelaki jang seperti loe poenja matjem nanti bisa hidoep dengen selamat.“

Sambil berkata begitoe si nona lantas berbangkit, dan bertindak mengamperi pintoe. Koei-tjoan kombali maoe menjegah, tapi sakali ini tangannja itoe dje-djaka lantas diemposken dengen amat sengit, diser-taken lagi dengen bebrapa perkatahan mengoetoek.

Lantaran tersoeroeng oleh sait hati, dengen tjepat sekali si nona soeda berdjalan sampe di pintoe loear, kamoedian lantas melangkahi djalan besar dengen tida kwatir lagi jang orang nanti dapet liat padanja. Koei-tjoan, dengen tida taoe apa misti berboeat, soeda memboentoeti dari blakang, tapi sasampehnja di roemah sendiri sigra djoega Bok-hiang mengoentjiken pintoe padanja dengen tida berkata soeatoe apa lagi.

Seperti orang kasima djedjaka itoe tinggal berdiri samantara lamanja, kamoedian ia rasaken ada orang menepok poendaknja dari blakang. Ia ber-paling dengen sedikit terkedjoet, tapi sigra djoega ia dapet kanjatahan, bahoewa ia sekarang ada berhadepan sama Boen-san.

„Loe maoe apa?“ tanja djedjaka itoe kamoedian dengen soeara boeram.

„Loe djadi orang betoel-betoel kliwat kedjem kaloe goea liat.“

„Apa sebab loe boleh kata begitoe?“

„Soeda loe traoesa banjak omong lagi; goea soeda denger samoe loe poenja bitjara sama si Bok-hiang.“

„Kaloe loe soeda taoe lebi baek lagi, kanapa loe boleh katain goea kedjem? Loe liat sendiri: samoea boeakan goea poenja salah, boekan goea jang maoe siasia ia satengah djalan.“

„Kaloe loe soereo sadja mah loe dateng lamar padanja kan beres-beres! Masa kanapa?-memangnja toh loea jang soeda bikin roesak padanja.“

„Loe gila! dari tadinja loe djoega taoe: goea memang boekan niatan maoe boeat bini kawin sama dia. Kaloe goea kawin tentoe goea maoe anak prawan, masa goea begitoe bodoh maoe ka-win sama dia?“

„Baek, tapi kaloe sampe dia mati in diri apa loe kira ini perkara engga boleh djadi tjilaka?“

Mendenger itoe gertakan, Koei-tjoan tinggal diam sampe sekean lama, tapi kamoedian sigra djoega ia mendjawab, katanja:

„Kaloe boekan loe jang siarin tjerita, siap jang bisa dapet taoe ini perkara? Engga ada satoe orang taoe goea poenja oeroesan sama si Bok-hiang.“

„Ja, loe kata begitoe, tapi kaloe dia sendiri sa-soedanja habis makan ratjoen sepertinja, lagi maoe mati lantas kasi taoe sama orang lantaran merasa sakit hati sama loe?-apa orang enggal nanti dapet taoe djoega ini perkara?“

„Dia bilang boleh bilang, habis goea kaloe eng-ga maoe ngakoeh orang boleh apain? Dia kata begitoe, goea kata engga.“

Habis bitjara begitoe Koei-tjoan berdiam lagi sabentaran, kamoedian laloe ia berkata poelah:

„Soedalah, Boen-san, goea sekarang maoe poe-lang sebab soeda terlaloe malem.“ Boean-san poen tida menjegah temannja itoe ber-djalan pergi, tapi kamoedian laloe ia berkata pa-da diri sendiri:

„Sekarang boleh dibilang goea ada dapet wak-toe baek betoel-betoel; kaloe goea engga maoe bekoek sama dia maoe toenggoe sampe kapan lagi?“