Pembalesan Kedji/Bab 18
XVIII.
SI DJAMBROET.
Di harian Tjhiagwee tjeedji, pagi-pagi Boen-san soeda bangoen dari tidoer. Sasoeda ngoelet bebrapa kali laloe ia boekah pakean, dan goejoer awaknja di tjimtjhe, samantara piaraannja berkoetet-koetetan di dapoer boeat boeat matengin barang makanan baroe dan panasin barang-barang bekas sembajang-
Habis mandi Boen-san laloe doedoek bersantap, sasoeda telan doewa tiga soewap nasi sama babi tjin, ia berkata pada piaraannja, jang di itoe waktoe sedeng brangkat boekah pakean boeat mandi:
„Inget, Djambroet, ini hari loe misti moelain atoer loe poenja kerdjahan. Samentar soreh goea kapingin denger bagimana kabarnja."
Mendenger babanja kata begitoe, Djambroet oeroengin memboekah badjoe. Laloe ia ambil tempat di soeatoe krosi dekat medja makan, kamoedian laloe ia berkata, sasoeda lebi doeloe poewasken ngoewapnja;
„Perkara begini memang kita engga boleh ajal-ajalan; samentar habis beresin roemah saia nati pergi tengok-tengok sama dia; tapi saia engga tentoein ini perkara nanti bisa djadi."
„Goea engga kata loe misti bikin beres ini hari djoega; kaloe engga bisa ini hari la liat besok; pendeknja loe jang doeloe bekas mendjoget tentoe ada lebi mangarti, tida perloe goea adjarin lagi." „Do, ko lantasnja ngaroet-ngaroet begitoe,"
„Boekan, goea maoe kata loe tentoe lebi bisa taoein hatinja orang prampoean, sebab loe sendiri soeda ngalamin banjak matjam-matjem perkara."
Dengen tida oetjapken soeatoe perkatahan Djambroet berbangkit dari tempatnja berdoedoek, boekah pakeannja, kamoedian lantas toeroen mandi.
Tida berselang lama Boen-san soeda habis dahar, dan sembari keboet-keboet topinja laloe ia berkata:
„Inget, Djambroet, nanti djangan loe pergi maentop lagi, bikin ini perkara jang paling perloe djadi terlantar."
Kamoedian lantas ia berdjalan kaloear, rapetin pintoe, dan pergi ka tempat kerdjanja.
Djadi tinggallah Djambroet sendirian. Sasoedan habis bersantap laloe ia ini doedoek-doedoek di baleh jang ada di depan roemahnja. Sembari mengoenja siri ia berkata dalem hati:
„Memang djoega boleh dipertjaja jang si Bok-hiang soeda adjak maen mata sama dia, orang prampoean boleh dikatain soeda djadi gila kaloe sampe tida bisa merasa soeka sama lelaki seperti si Koei-tjoan, orangnja adja ada begitoe tjakap, belon doeitnja. Tjoema sadja bagimana ada jang paling baek goea lepas perkatahan, itoe betoel-betoel goea pikirin ada kliwat soesa, Masa dateng-dateng goea lantas adjar-adjarin biar dia trima katjintahannja si Koei-tjoan!"
Habis berpikir begitoe, belon sampe ia poeter lagi oeloe-hatinja boeat dapetin satoe akal jang bagoes, dengen koenjoeng-koenjoeng ia dapet liat Bok-hiang boekah djendelah.
„Ah, biarlah goea toeroetin sadja bagimana gelagatnja jang baek."
Sambil berkata demikian pada diri sendiri dengen soeara menggrendeng, piaraannja Boen-san itoe lantas berbangkit dan pergi njebrang.
Meliat Djambroet mengamperi padanja, Bok-hiang lantas memboekah pintoe, kamoedian laloe berkata:
„Gini hari ko soeda sempat doedoek di loear."
„Saia si dari tadi-tadi djoega soeda baresan," kata Djambroet, „malahan saia maoe tania, nona kanapa sampe gini waktoe baroe boekah pintoe?"
„Orang samalem saia engga dapet tidoer."
„Kanapa? Apa na besar belon djoega enakan?"
„Ini pagi kaliatannja enakan, tapi samalem dia merinti teroes-teroesan, bikin saia engga bisa tidoer, betoel dia si soeroein sadja saia tidoer; tapi mana saia bisa tegah boeat tinggal!"
„Sekarang soeda bangoen belon?"
„Dari tadi pagi-pagi dia soeda bangoen, habis tjoetji moeka apa, saia soeroe rebain sadja di ran-djang, sebab takoetin lantaran berkoewat-koewat dia nanti djadi kamboe lagi."
„Saia djoega samalem sampe poekoel brapa taoeh baroe tidoer; sampe sekarang mata rasanja masi sepat-sepat, sebab tadi soeda kapaksa misti ba-ngoen pagi-pagi, misti masak, sebab saia poenja bab misti pergi kerdja."
„Djangan mara, ja, bi Djambroet, doedoek sadja di sini, saia misti lantas njalain api boeat masak obat, sebab neh soeda doewa hari engga makan obat."
„Do, kanapa orang sakit engga makan obat?"
„Taoelah nah bolehnja kabanjakan tjerewet; katanja engga baeklah tjee-it makan obat." Sambil kata begitoe, Bok-hiang berdjalan masoek. Djambroet memboentoeti dari blakang seraja berkata:
„Mari saia bantoein; kasianan kadoewat-kadoewet sendirian sadja. Sekarang na besar jang sa-kit, masi ada na Bok-hiang jang kerdja, habis sa'andenja na Bok-hiang jang sakit bagimana? Mangkanja saia kata lekas-lekas dapet djodo; ka-loe soeda ada poenja laki, kan enak ada jang sa-ling hantoe."
„Bisa adja ni bi Djambroet godain orang."
Sambil kata begitoe ada ternjata dari moekanja, jang gadis itoe ada merasa maloe. Djambroet jang memang ada poenja mata tadjem, laloe berkata dalem hati:
„Dia poenja maloe ka mana maoenja? Apa ka kanan apa ka kiri?"
Kamoedian prampoean itoe bitjara pada Bok-hiang dengen soeara soenggoe:
„Orang ngomong jang sabetolnja katanja digodain. Apa nona sampe toewa tah engga nanti kawin? Sekarang empoeng na besar masi ada, saia bantoe dowain biarlah moeda-moeda'an lekas ketemoe djodo, soepaja na besar bisa ngalamin ada poenja mantoe."
Bok-hiang tida lagi ambil perdoeli sama bitjaraannja Djambroet. Laloe ia toewang arang di hang-lo, dan maoe moelahi njalahin api, tapi Koei-tjoan poenja oetoesan gelap lantas termalang-malang, seraja berkata:
„Nona kaloe maoe mandi, pergi mandi soeda, mari saia jang masakin obat."
„Kaloe soedi toeloengin la banjak trima kasi," kata Bok-hiang sembari mesem. „Tapinja masak obat misti mengarti; kaloe aernja soeda mandidi, djangan dikipas teroes; katanja mentak engga baek kaloe masak obat diobor apinja."
„Do, troesa djoega diadjari saja taoe; apa si saia baroe dibranakin kemaren?"
„Boekan diadjarin, tapi bilangin, sebab saia denger banjak orang kata begitoe."
Sambil berkata Bok-hiang pergi ambil obat di dalem kamar, kamoedian kasiken itoe pada Djam-broet.
Samantara piara'annja Boen-san itoe matengin sang obat, si gadis laloe boekah pakean, dan toe-roem mandi.
Salagi Bok-hiang bikin kering awaknja dan brang-kat maoe berpakehan kombali, Djambroet laloe berkata:
„Habis nona soeda makan nasi ini pagi?"
„Belon, kapan baroe djoega habis mandi."
„Habis ada nasinja engga?"
„Ada bekas samalem."
„Do, bekas samalem toh soeda njam."
„La saia si makan gampangan, bi Djambroet, asal ada nasi sama ketjap djoega djadi, boekannja keh laen orang koedoe banjak trjerewet."
„Saia djoega kaloe nasinja baroe mateng, biar makan sama garem sadja djoega engga tjerewet, tjoema kaloe nasinja soeda njam, itoe saia rasain engga enak."
„Apa bi Djambroet soeda makan pagi."
„Soeda dari satadian, makan da, nona."
Bok-hiang laloe kaloearken bebrapa barang bekas sembajang dari lemari, kamoedian laloe doedoek bersantap dengen tjepat. Samantara itoe Djam-broet menaker obat, seraja berkata:
„Mateng toedjoe ja, na Bok-hiang?"
„Ja."
„Kaloe begitoe ini obat soeda mateng."
„Taroh sadja di atas dapoer, bi Djambroet," kata Bok-hiang, dan tida sabrapa lama lagi lantas ia bangoen tjoetji piring bekas ia makan.
Kamoedian, sasoeda simpan kombali segala barang makanan di lemari, laloe ia bawa obat itoe jang soeda ma-teng ka dalem kamar, kasi iboenja minoem.
Samantara itoe Djamboet pergi boekah pintoe blakang, dan tinggal djongkok di sitoe sampe sakean lama. Sasoeda habis oeroesin iboenja, Bok-hiang dateng padanja dengen membawa tiker, seraja berkata:
„Djangan djongkok sadja, bi Djambroet."
Piara'annja Boen-san itoe lantas gelar itoe tiker, samantara si gadis pegi ambil ia poenja pendjaitan.
„Do, radjin amat, harian tahon baroe mendjait djoega."
„Boekannja begitoe, bi Djambroet, iseng-iseng adja boeat toengkoelin soepaja djangan ngantoek."
„Kaloe begitoe saia djoega maoe ambil pendjaitan, ah!"
Sambil berkata Djambroet lantas pergi poelang. Sembari berdjalan ia berkata dalem hati:
„Kaloe goea engga moelain sekarang, maoe toeng-goe sampe kapan lagi."
Tatkalah balik lagi dengen membawa bakoel pendjaitan, salagi masi ada di tenga-tengah gang, piara'annja Boen-san itoe soeda berkata dengen tertawa:
„Kaloe maoe ditoeroetin si engga laen saban hari maentop adja jang dikerdjain. Pagi-pagi soeda ada jang ngoendang, mending-mending kita me-nang adja keh, boleh djoega."
„Sttt! sttt! plahan-plahan, bi Djambroet," kata Bok-hiang, „neh mengkali soeda poeles, biar dia dapet tidoer abis makan obat."
„Ja, saia bolehnja kaloepa'an lagi," kata Djam-broet. „Djangan mara na Bok-hiang, saia sabetoelnja engga sengadja.“
„Do, masa si mara, saia tjoema bilangin sadja, kata gadis itoe seraja mengiser boeat kasi pram-poean itoe berdoedoek.
Djambroet poen lantas moelahi mendjait, tap belon sampe lima menit lamanja, laloe ia soedai mengoewap, jang kaliatan seperti tida ada achir-nja, hingga iapoenja mata djadi mengembang aer.
„Gini hari masi ngantoek, bi Djambroet?“ kata Bok-hiang dengen tertawa.
„Orang kata samalem saia tidoer sampe laat," djawab prampoean itoe, seraja koetjak-koetjak matanja.
„Poekoel brapa si baroe tidoer?"
„Toehlah, samalem sampe tongtong doewa b-las ba Koei-tjoan belon poelang. Taoeh apa sa-dja jang diomongin engga abis-abis, bikin saia sampe engga bisa poeles. Kamaren malemnja djoega begitoe: dari poekoel sambilan dia dateng sampe kira-kira poekoel satoe baroe di poelang." Sambil kata begitoe, Djambroet toedjoeken betoel-betoel matanja pada Bok-hiang. Gadis itoe tida berkata soeatoe apa lagi. Ia toendoek mendjait, tapi dari roepanja bisa ternjata, jang ia ada merasa koerang laloewasa mendenger itoe nama Koei-tjoan dioetjapken.
Meliat itoe, piara'annja Boen-san lantas berkata dalem hati dengen bersoerak:
„Sekarang kaloe goea bisa belok-belokin perka-tahan, tentoe sekali ini nona manis lantas kenah kadjebak."
Sasoeda berdiam samantara lamanja, Bok-hiang laloe berkata:
„Eh, bi Djambroet, apa neh boleh makan koewe-koewe, engga aha?"
„Koewe-koewe si masa kanapa, tapi lebi baek djangan kasi jang terlaloe njelap-njelap, sebab itoe bisa timboelin nak."
Bok-hiang tinggal berdiam lagi sakean lama, hingga Djambroet djadi kapaksa berkata poelah:
„Ini bebrapa malem boleh banjak sadja orang jang dateng ngobrol di roemah saia: kaloe engga dia tentoe dia; apa na Bok-hiang engga dapet denger? Tapi masa ja!-kadang-kadang riboet sampe seperti orang mengklai."
„Mending sempat dengerin segala begitoen, orang kata samalem saia sampe rasanja kliwat kesel liatin neh menggelisa adja."
„Lagi samalem si memang tjoema ba Koei-tjoan sendirian jang tingal sampe laat, tapi kamaren malemnja rameh-rameh pada dateng maen kokman."
„Wah, kamaren malemnja saia lebi bingoeng lagi; kapan bi Djambroet dateng nengokin. Itoe tempo betoel boekan maen-maen saia poenja kesal."
„Itoe dia, di sini riboetin orang sakit, poelang-poelang di roemah orang lagi riboetin maen kok-man bersoerak-soerak seperti amoek. Ba Koei-tjoan jang boekah; saia jang boekan poenja doeit, sampe rasanja ngeras, liatin dia maen rogo kan-tong adja, tapi dia boleh enak-enakan tertawa engga brenti-brenti."
Mendenger orang bitjara begitoe, Bok-hiang tida samboengin lagi ia poenja omongan, dan tinggal toendoek mendjadit seperti tida ambil per-doeli soeatoe apa.
Djambroet djoega berdiam sampe samantara lamanja, tapi sigra djoega ia ini berkata poelah:
„Itoe ba Koei-tjoan bolehnja bisa betoel ngobrol; sampe satoe hari dia bertjokol, belon taoe saia dapetin dia diam barang samakanan siri keh. Nona kaloe dikawinin sama dia soenggoe boleh dibilang sedengnja betoel: nona pendiaman, dia soeka ngobrol, djadi katemoe timpalannja."
„Ni bi Djambroet ada-ada sadja godain orang," kata Bok-hiang, samantara moekanja dengen koenjoeng-koenjoeng lantas berobah djadi mera.„Eh-eh, apa salah saia poenja omongan?“ kata poelah piaraannja Boen-san sembari tertawa. „Kaloe nona soeda pendiaman. habis dapet laki jang pendiaman lagi, ko nona poenja roemah lantas boleh djadi seperti roemah kosong."
„Oeda diam, bi Djambroet, kaloe engga, tjoba kaloe saia engga tjoebit."
„Djangan begitoelah, garang engga karoeanan! Nona-nona samoenja memang begitoe: kaloe belon kawin berlaga pilon begini-begitoe, kaloe soeda apa poenja laki, samoea sobat andeh jang lama lantas diboewang ka samping. Saia dari sekarang maoe djandji sadja teroes-terang sama nona, dja-ngan nantinja engga maoe kenal lagi sama si Djambroet."
Dari moekanja ada kentara sekali, jang Bok-hiang ada djadi kamaloean lantaran digodah begitoe. Laloe ia tjoebit pada Djambroet, kamoedian lantas berbangkit pergi minoem aer. Koetika balik kom-bali mengamperi pendjaitannja, laloe ia berkata;
„Soedalah bi Djambroet, engga baek kan me-maen begitoe!"
„Orang ngomong barang jang sabetoelnja si dikatain memaen! Saia poenja mata soeda banjak liat nona-nona: masi prawannja baek, soeka tjam-poeran sama sobat-andeh; barang soeda kawin, poelang ka roemah sendiri pengrasahan roepanja seperti orang engga betah."
„Bisa adja; mana si ada orang jang poelang ka roemahnja boleh engga betah?" kata Bok-hiang, samantara ia tinggal teroes toendoek mendjait.
„Non jang salamanja engga taoe pergi ka mana-mana, bisa taoe djoega engga segala perkara di loearan." kata poelah Djambroet dengen moeka soenggoe. „Boeat nona sendiri si ja saia pertjaja engga nanti begitoe. Biar nona soeda doedoek kreta koeda besar-besar djoega tentoe nona nati maoe kenal djoega sama si Djambroet jang tadi soeda masakin obat. . . . . . . . ."
Sembari bitjara begitoe, piaraanja Boen-san mengitjer betoel-betoel pada parasnja Bok-hiang, jang dalem itoe samantara waktoe soeda djadi berobah bebrapa kali.
Tapi gadis itoe tinggal berdiam sadja, hingga Djambroet, jang tida maoe siasiaken tempo, lan-tas berkata lagi:
„Betoel ja, nona?-kaloe nonag di blakang kali dapet laki jang ada poenja koeda-kreta besar-besar djangan nanti berlaga engga kenal sama si Djam-broet."
Bok-hiang merasa kewalahan mendenger itoe godahan. Sasoeda berdiam sabentaran laloe ia berkata:
„Soedalah bi Djambroet; djangan memaen segala engga karoeanan. Kaloe engga maoe diam djoega djangan nanti salah dari saia, kaloe saia sengit-sengitan iloet bi Djambroet poenja paha moeda."
„Do, kapan si orang ngomongin perkara jang baek lantasnja boleh djadi mara-mara. Apa saia poenja salah, kaloe saia harepin soepaja nona bi-sa dapet laki jang ada poenja koeda-kreta besar-besar? Apa salamanja sadja nona maoe djadi prawan sampe bongkotan? Kan orang satoe kali misti kawin? Apa baeknja seperti sekagan? Nona malaenkan tinggal berdoewa-doewa sama na besar. Kaloe satoe hari satoe malem sakit seperti sekarang, djangan kata maoe konde, djong-kok tjoetji tangan djoega lantas djadi engga poe-nja sempat: engga ada orang jang panggilin sin-she, engga ada orang jang belihin obat. . . . . . . ."
„Soeda bi Djambroet, saia engga maoe denger lagi segala omongan begitoe," kata Bok-hiang, seraja toetoep koepingnja dengen kadoewa tangan.
Meliat demikian, piaraanja Boen-san maen gan-da tertawa sadja, dan baroe sadja si gadis pegang kombali djaroemnja, sigra djoega ia berkata poelah:
„Kaloe saia poenja liatan si nona tentoe bakal dapet laki orang jang kajah besar; kaloe engga ini tahon, laen tahon soeda engga boleh salah. . ."
„Soeda bi Djambroet, soedalah djangan memaen sadja godahin orang," kata Bok-hiang dengen memoetoesken orang poenja omongan, „Bawa pendjaitan boekannja mendjait, teroesnja boleh obrolin segala perkara jang engga karoean."
„Ai nona masi djoega maoe katain saia memaen?" kata Djambroet dengen moeka soenggoe.
„Biar mati nah, saia engga ada niatan boeat godahin!"
„Kaloe engga maoe godahin kanapa dari satadi-an engga djoega maoe brenti omongin segala perkara begitoean?"
„Na toe, soeka engga pertjaja orang poenja moeloet! Soeda katelandjoeran begini saia djadi maoe bitjara sadja dengen teroes-terang."
Bok-hiang awasken Djambroet dengen moeka njata ada merasa heran. Koetika itoe piaraannja Boen-san tida menonggoe sampe si gadis kaloearken perkatahan. Dengen bales mengintjer orang poenja paras, laloe ia berkata lagi:
„Apa nona taoe ba Koei-tjoan?"
Seperti kenah tersamber kilat Bok-hiang lantas toendoekin kapalanja. Ia poenja moeka lantas berobah djadi merah, samantara tida satoe perka-tahan ada kaloear dari moeloetnja.
„Ba Koei-tjoan itoe sekarang lagi kabingoengan seperti orang kehilangan boentoet. Samentar-mentar tida brentinja dia seboet nona poenja na-ma! dia maoe soereo orang toewanja lantas lamar sama nona. Berkali-kai dia soeda tanja saia dan saia poenja baba, apa taksiran bisa dapet engga kaloe ia minta sama nona."
Bok-hiang djadi kaliatan seperti orang kapoe-toesan daja tatkalah dapet denger itoe bitjara.„Tjoba liat sadja kaloe nona engga pertjaja saia poenja omongan. Saia brani tanggoeng: kaloe na besar soeka kasi, nona nanti djadi mantoenja orang kajah besar, sebab ba Koei-tjoan poenja bapa. . . ."
Di itoe saat jang amat penting, dengen koenjoeng-koenjoeng Bok-hiang dipanggil oleh iboenja, hingga maoe atawa tida Djambroet kapaksa toenda doeloe ia poenja pantjing.
Ia doedoek mendjait sembari oekit berbagi-bagi akal dalem otaknja. Sakena lama soeda berselang, dan achirnja lontjeng mengoetaraken poekoel doewa belas tengahari, tapi Bok-hiang masi tinggal ripoe djoega melajanin pretanja ia poenja iboe jang sakit. Lantaran itoe Djambroet djadi merasa lebi baek poelang doeloe ka roemahnja.
Ia berpamitan pada si gadis dan iboenja, kamoedian berdjalan kaloear, serajah berkata dalem hati:
„Haloe diliat begini djalannja ia engga ada sabrapa soesa boeat goea pantjing betoel-betoel sama dia. Lelakon kasatoe ampir habis goea djalanin. Sekarang tingal lelakon jang kadoea dan katiga, itoe si engga sabrapa soesanja didjalanin kaloe lebi doeloe soeda ada djembatannja. Taoehlah! — goea kapinginnja si dalem ini hari bisa dapet katentoannja dalem ini oereosan."