Pembalesan Kedji/Bab 17
XVII
NASIBNJA SATOE BOEDJANG
JANG TJANTIK
Lontjeng berboenji satoe, mengoetaraken waktoe soeda liwat tengah malem, tapi lampoe-lampoe dalem satoe roemah di Djembatan Doewa masi mengentjlang.
Koetika itoe adalah doewa orang sedeng doedoek omong-omong di medja thee.
Dari roepanja marika itoe bisa ternjata, jang marika sedeng dihinggapi oleh soeatoe penjakit jang bernama doekah.
Tatkalah mendenger soearanja lontjeng, iaorang berdiam samantara lamanja, kamoedian jang satoe laloe berkata lagi:
„Memang, goea djoega djadi kliwat penasaran, tapi masa ja si Dian-hoei brani ngendon ka mari boeat maen padan?"
„Taroh lagi dia engga maen padan, tapi kita salamanja kalah kaloe berantem sama dia, dari itoe mengapa kita saban-saban maoe begitoe bodoh pergi anterin oewang?"
„Habis masa saban-saban ita misti brenti maen kaloe dia dateng; toh boeleh djadi orang katawain lagi."
„Lebi baek sama sekali djangan maen lagi. Loe misti inget, Kek-hoaij, loe doeloe soeda djadi tjilaka samoea lantaran maen. Itoe waktoe apa loe engga inget ? — goea djoega soeda toeroet-toeroetan dapet Soesa lantaran loe poenja perkara. Baeknja kita soeda bisa bertemoe sama si Hoaij-wan ! Kaloe engga ada dia jang toeloeng bikin pandjang lagi kita poenja beladoe, engga taoe sekarang kita soeda djadi apa taoeh !"
„Itoe si betoel, tapi dia djoega tentoe engga bisa djadi seperti sekarang kaloe boekan lantaran kita."
„Soeda, pendeknja moelain ini hari loe djangan kenal maen lagi.— Apa loe engga maoe poelang? — sekarang soeda liwat poekoel satoe."
„Ah, goea pikiran maoe nginap di sini sadja."
„Tapi goea pikiran maoe poelang; goea mabe liat ini anak-anak bagimana dia poenja lagoe."
Sambil bitjara demikian, orang itoe, jang sabenarnja boekan laen dari Kek-soen, laloe berbangkit, dan berdjalan kaloear seraja berkata:
„Toetoep pintoe. Ai, tjilaka betoel, begini waktoe goea tentoe engga bisa dapet kahar."
„Kan lebi baek soeroe boedjang pergi panggil kahar doeloe ?"
„Hala mantjan begitoe soeda kaboeroe pagi; sekarang soeda poekel satoe liwat; laen dari itoe goea poenja mata sekarang soeda amat mengantoek."
Kamoedian Kek-soen itoe lantas berdjalan pergi, menoedjoe ka Kampoeng Baroe, seraja menggrendeng:
„Kaloe goea misti djalan kaki teroes sampe poelang ka roemah, tida taoe sampe poekoel brapa goeaa baroe bisa rebah di randjang. Tempatnja begini sepi seperti oetanan; kaloe ada orang jang sakit hati sama goea, pendeknja ada gampang sekali kaloe dia maoe bikin goea djadi tjilaka."
Baroe sadja habis ia berkata begitoe, dengen koenjoeng-koenjoeng matanja dapet meliat terang-nja lentera kandaran jang sedeng djalan menda-tengin. Ia tjepatken tindakannja dan sapoeloe menit kamoedian Kek-soen itoe soeda bisa meroeng-koeat di dalem kahar.
„Pasar Ajam!" berseroe ia seraja sadakepin tangannja.
Kandaran itoe berdjalan dengen oengkoet-oengkoet, dan adalah kira-kira poekoel satoe satengah, koetika ia sampe di blakang roemahnja.
Sasoeda membajar oewang sewa pada koesir satjara lokar, laloe ia mengetok pintoe, bermoelah dengen plahan, tapi koetika ternjata belon djoega ada orang jang menjaoet, lantas ia moelahi meng-gedor samingkin keras.
„Ba Ban-tjoan?" tanja satoe soeara dari dalem. „Lekas boekah!" berseroe Kek-soen. „Apa ba Ban-tjoan belon poelang?"
„Belon; tapi taoehlah kaloe ia ketok pintoe depan."
„Lekas boekah, lekas!" berseroe poelah Kek-soen dengen soeara koerang sabar.
Sigra djoega pintoe terboekah dari dalem. Kek-soen lantas bertindak masoek, tapi sigra djoega ia merandak, dan bekata:
„Kanapa sampe begini waktoe ini lampoe belon dimati'in?"
„Ah, biasanja si kaloe maoe tidoer saia lantas mati'in, tapi ini hari tahon baroe nona pesan djangan mati'in teroes sampe pagi."
Sambil berkata demikinn boedjang itoe beresken pakeannja, jang soeda djadi kalang-kaboet lantaran soeda ngoetjal di pembaringan sakean lama.
Maski di itoe waktoe soeda ada amat sedjoek, traoeroeng Kek-soen poenja dara lantas berlompat-lompat, djalan dalem oerat-oeratnja, satelah ia dapet pandang sedikit lama pada itoe boedjang pram-poean jang sedeng ada dalem oewat-oewatan. Dalem sakedjap ia poenja rasa mengantoek lantas djadi boejar, dan sigra djoega ia soeda djadi binal dari kepala teroes ka kaki.
Tadi kakinja soeda bersediah boeat melangkahi pintoe jang teroes ka dalem, tepi dengen koenjoeng-koenjoeng lantas ia berbalik, ambil tempat di atas pembaringannja ia poenja boedjang, kamoedian laloe berkata dengen menjengir:
„Salaennja ba Ban-tjoan, ada siapa lagi jang be-lon poelang, Isa?"
„Engga ada lagi; ba Koei-tjoan tadi soeda poelang poekoel sapoeloe liwat."
„Nona pergi ka mana tadi?"
„Engga pergi ka mana-mana."
„Apa sekarang dia soeda tidoer?"
„Soeda dari tadi-tadi."
Sambil menjaoet begitoe Isa toendoekin kapalanja, kerna ia merasa tida sanggoep trima sorot matanja Kek-soen, jang ada ditoedjoeken padanja seperti lentara maling.
„Poekoel brapa tadi loe soeda tidoer?"
„Siang-siang," djawab Isa dengen maloe-maloe, kerna di itoe waktoe hatinja soeda dapet soeatoe pirasat, jang madjikannja ada berpikiran koerang baek padanja. Samantara ia berdiri di dekat pintoe jang menemboes kaloear, ia merasaken amat ki-koek, dan tida taoe bagimana ia misti berboeat.
Tapi klakoean itoe tida ada laen goenanja dari pada menggerakin samingkin keras napsoenja Kek-soen, jang koetika itoe lantas berkata:
„Mari, Isa."
„Boedjang prampoen itoe belon sampe mengangkat kakinja boeat mengamperi, Kek-soen soeda lantas berkata lagi:
„Mati'in itoe lampoe, Isa."
„Nona pesan tadi djangan dimati'in teroes sampe pagi."
„Lekas mati'in, goea jang soeroe."
Habis berkata begitoe Kek-soen rasaken dirinja tida berkwasa lagi boeat menahan djalannja ia poenja dara jang samingkin lama ada samingkin mengamoek sadja. Lantaran itoe, koetika ia liat Isa belon djoega bergerak boeat lakoeken ia poenja prenta, lantas ia berbangkit, pademken sendiri itoe lampoe-lampoe jang sedeng menjalah terang, kamoedian lantas mengamperi pada Isa, seraja berkata:
„Kaloe loe brani riboet, hati-hati, sedikitnja goea nanti kemplang sampe djadi pata loe poenja toelang."
„Saia takoet, ba; kaloe nona taoe saia nanti boleh djadi tjilaka."
„Mari!" kata Kek-soen dengen soeara memerenta, seraja seret tangannja Isa: „Loe traoesa takoet satoe apa."
„Nona tentoe nanti kemplang sama saia."
„Kaloe goea kata engga, tentoe engga, Isa, djangan loe bentahan."
Sambil berkata begitoe Kek-soen lantas goenaken ia poenja tenaga lelaki, dan sigralah djoega di sitoe soeda terdjadi soeatoe perkara melampiasken napsoe, jang biasa dinamaken orang: klakoe-annja binatang.
. . . . . . . . . . . . . . . . . . . .
Bebrapa menit kamoedian Kek-soen doedoek di tepi pembaringannja Isa. Kaloe di itoe waktoe api penerangan soeda dipasang kombali, nistjaja sasoeatoe orang nanti bisa lantas njataken, jang lelaki itoe tida ada merasa begitoe broentoeng sabagimana jang sabelonnja ada diharep olehnja. Laen dari itoe nanti ternjata djoega dari moekanja, jang di itoe saat ia ada dapet sedikit rasa menjesal, satoe sesalan jang tertjampoer mendjadi satoe dengen pengrasahan djemoe.
Satoe oedjar ada berkata: Sasoeda kenjang orang tida nanti berpikir sabagimana di waktoe lapar. Sari kabenarannja itoe bebrapa perkatahan, sekarang ini ada menimpah betoel-betoel atas lahir dan batinnja Kek-soen.
Oleh kerna waktoe itoe ada gelap goelita, djadi lahirnja lelaki itoe ada gampang sadja bisa tida mengoetaraken soeatoe apa di matanja Isa, tapi seroeannja ia poenja batin lantas djoega soeda melahirken satoe elahan napas.
Sasoeda berdiam samantara lamanja, laloe ajahnja Ban-tjoan itoe berkata dalem hati:
„Soenggoe-soenggoe tida njana sekali! koerang adjar betoel!"
Kamoedian laloe ia pegang tangannja Isa, dan menanja dengen soeara mengantjem:
„Mengakoe teroes-terang: apa saban malem loe soeka masoekin lelaki di sini bikin kotor goea poenja roemah?"
„Engga, masa ja saia brani berboeat begitoe!"
„Kaloe engga loe tentoe saban malem pergi maen gila di loear."
„Engga."
„Mengakoeh teroes-terang, Isa!"
„Biar mati, engga."
„Goea, loe engga boleh akalin; goea tanja baek-baek, kaloe loe mengakoeh, goea tentoe tida sabrapa mara, asal sadja loe djangan masoekin lelaki di sini bikin kotor goea poenja roemah."
„Habis kaloe kaga si, bagimana maoe disoeroe ngakoeh."
„Kaloe loe maoe kata engga, biar sampe loe bongkok djoega goea engga nanti bisa pertjaja. Apa loe kira goea ini anak ketjil ta bagimana?"
Isa tinggal berdiam sadja.
„Loe maoe mengakoeh engga?" tanja poelah Kek-soen dengen soeara plahan, tapi mengantjem. Isa tinggal tida oetjapken satoe perkatahan.
„Betoel loe engga maoe mengakoeh?" tanja lagi Kek-soen, jang soeda djadi samingkin sengit lantaran meliat boedjangnja tinggal membatoe.
„Itoe si," kata Isa, jang memangnja ada amat takoet pada Kek-soen dan di itoe waktoe telah djadi samingkin katakoetan lantaran meliat, jang madjikannja itoe moelahi djadi mara.
„Kenapa?" tanja ajahnja Ban-tjoan satjara orang mengedjer maling.
„Saia sabetoelnja engga maoe."
„Habis?"
„Ba Ban-tjoan si maen paksa sadja."
Mendenger boedjangnja poenja bitjara jang paling blakang, Kek-soen lantas djadi boengkam boeat landjoetken ia poenja kerdjahan mengompes, kerna dengen membri itoe djawaban poen boleh dibilang Isa soeda bikin tamat betoel-betoei dialatnja perpreksahan.
Sabenarnja, tadi djoega kaloe Kek-soen soeda goenaken berbagi-bagi antjeman, boekanlah ia soeda kaloearken itoe lantaran sasoenggoenja ada mara, tapi malaenken oleh kerna amat penasaran meliat Isa poenja klakoean tida maoe mengakoeh. Tegesnja Kek-soen telah berlakoe begitoe malaenken adalah lantaran sabagimana boentjinja satoe oedjar jang membilang: Soeatoe barang jang dianggap telah djadi kapoenjahan kita, tentoe sekali kita nanti, merasa amat penasaran dan saboleh-boleh maoe tjari taoe siapa pentjoerinja, kaloe satoe hari satoe malem barang itoe mendjadi hilang.