Pembalesan Kedji/Bab 14
XIII.
1 TJHIAGWEE 2425.
Tjhiagwee tjee-it dari tahon 2425 adalah djato di hari Selasa, hingga boleh dibilang ada amat tida laloewasa bagi orang-orang jang berkerdja di toko Europa, kerna sasoeda di itoe satoe hari ia misti mengider mati-matian boeat membri selamat pada sanak-soedara dan sobat-sobat, pada hari esoknja marika soeda misti menggotot kombali boeat membanting toelang.
Orang-orang jang berkerdja pada bangsa Tionghoa, boleh díbilang di masa itoelah ada iaorang poenja waktoe jang paling broentoeng, kerna rata-rata iaorang ada dapet kamerdikahan ampat hari, salaennja orang-orang jang berkerdja di Pasar-Ajam atawa di laen-laen tempat sabagi itoe, jang malaenkan berdagang ketjil.
Tapi antara samoea adalah anak-anak taktjee jang paling senang, sebab saban-saban sampe di waktoe begitoe, rata-rata iaorang dapet hari merdikah satoe boelan lamanja. Dari 16 Tjapdjigwee marika soeda lepas peladjaran dan sampe 17 atawa 18 Tjhiagwee baroe tempat penggoeroean diboekah kombali.
Lantaran ada itoe kabiasahan mendjadi sampe sakean lamanja Hoei-djin saban hari boleh tinggal di roemah.
Tapi waktoe merdikah itoe soeda tida digoenaken olehnja seperti laen anak-anak, jang teroes-meneroes djalan loentang-lantoeng ka sana-sini. Ia meloekis gambar, batja berbagi-bagi boekoe tjerita atawa meliat Sioe-kioe memaen sama Bong-loan. Pendeknja, kaloe boekan kliwat kapaksa lantaran diadjaki oleh kawan-kawan sakola, Hoei-djin tida nanti pergi bergelandangan di loearan, kerna sadari bertetangga sama Bong-loan, adalah ia rasaken seperti roemahnja telah djadi lebi enak boeat ditinggalken antero hari.
Tjara demikian plahan-plahan satengah boelan soeda berlaloe, pasar malem soeda liwat, dan achirnja datenglah waktoe aken orang merajaken tahon baroe.
Pada harian Tjhiagwee tjee-it itoe, baroe sadja lontjeng mengoetaraken poekoel ampat pagi, Hoei-djin soeda bangoen dari tidoer. Laloe ia tjoetji moeka dan berpakeh pakehan, kamoedian lantas ia pergi ka pertengahan, dimana ia dapetken mahtoewanja sedeng oenggat-anggoet pasang hio didepan aboenja ia poenja leloehoer. Hoei-djin djoega lantas toeroet pasang hio, sasoedah itoe laloe membri selamat tahon baroe pada mah-toewanja, jang tatkalah meliat tjoetjoenja berloetoet, sigra membatja dowa, katanja:
„Ija, goea harep sadja loe djadi pandjang oemoer, bisa anter goea poenja hari toèwa. Dari ketjil goea rawatin, biarlah goea bisa toenggoe djoega sampe loe bisa ada poenja bini.“
Kamoedian Hoei-djin membri selamat djoega pada ia poenja bapa dan iboe, habis laloe ia ambil tempat di soeatoe krosi, doedoek menoenggoeken pada segala matjem djenis jang dateng membri selamat.
Dengen pegang itoe kerdjahan, haroeslah dibilang jang Hoei-djin ada mewadjibken dirinja boeat oeroes satoe perkara jang kaloet sekali, kerna tida koerang dari doewa tiga djam lamanja ia tida bisa dapet doedoek dengen senang, lantaran sabentar-bentar misti ladenin sadjoemblah besar orang jang treak-treak membri selamat tahon baroe.
Dengen plahan djam merajap, hingga achirnja lontjeng mengoetaraken poekoel toedjoe pagi. Koetika itoe Hoei-djin bisa dapet sedikit sempat, kerna samingkin matahari naek tinggi, samingkin djadi koerang itoe orang jang menggretjok boeat dapet presen.
Tida berselang sabrapa lama lagi Sioe-kioe kaloear mengamperi enkonja, seraja berkata:
„Apa soeda sodja mah ?“
„Soeda,“ djawab Hoei-djin dengen tertawa.
„Apa soeda sodja baba ?“
„Samoea soeda; pendeknja loe traoesa tanja-tanja lagi; orang goea dari tadi poekoel ampat soeda bangoen."
„Habis sekarang kita bagimana ?“
„Loe dipesan apa sama mah ?“
„Engga; dia tjoema kasi doeit tempo Nioe semba sama dia.“
„Tadi dia pesan goea soeroe adjak loc pergi ka roemah koekong. Gi lekas panggil si Mili, habis kita lantas boleh pergi.“
Sioe-kioe berlari-lari masoek ka dalem; tida berselang lama laloe ia kaloear bersama Armili, jang koetika itoe ada pakeh pakean baroe, kamoedian laloe doewa anak-anak itoe doedoek kreta pergi ka Patoewakan.
Tatkalah marika soeda poelang kombali ka roemahnja di Angkee, mah-toewanja laloe menanja, katanja :
„Apa loe katemoein samoea orang ?“
„Samoeanja, mah," djawab Hoei-djin, tjoema ipo Toet owee engga katemoein sebab ia masi tidoer.“
„Habis dari sitoe loe engga pergi ka Gang Motjoei ?“
„Pergi; enkoe lagi doedoek sendirian di thia; enkim lagi sakit.“
„Sakit apa ?“
„Itoe habis sembajang ia lantas dapet sakit panas.“
„Sama loe poenja ko di Patekwan loe pergi engga ?“
„Pergi; ko katanja samentar malem maoe dateng ka mari.“
„Habis dari sitoe loe teroes ka mana ?“
„Ka mana lagi ? Teroes poelang ka roemah.“
„Apa engga ada jang misti dipergihin lagi, ha ?“
„Siapa ? Tahon doeloe djoega tjoema sagitoe.“
„Apa goea maoe kata, Hoei-djin. . . . . . . . . . . . . .“
Belon habis orang toewa itoe bitjara, Bong-loan dateng dengen ambil djalan dari blakang roemah. Koetika itoe djoega Hoei-djin lantas maoe berlaloe boeat boekah pakean dalem kamarnja, tapi sabelon ja kaboeroe berlakoe begitoe djaoe, anak prampoean itoe, jang dengen tjepat menjembah pada iboenja Hoaij-wan, soeda lantas menjembah djoega padanja.
Hoei-djin djadi kamekmak, dan lantaran itoe djadi ia tida bisa berboeat laen dari manggoet-manggoet dengen klakoean amat kikoek, samantara mahtoewanja belon djoega maoe tamatken ia poenja batja dowa, boeat berkahken pada Bong-loan.
Koetika Hoei-djin soeda masoek dalem kamarnja, Bong-loan poen maoe balik lagi ka blakang, tapi orang-toewa itoe lantas panggil, katanja:
„Djangan pergi doeloe, mari !“
Kamoedian laloe ia kaloearken satoe boengkoesan mera dari dalem kantongnja dan kasi itoe pada Bong-loan.
Anak prampoean itoe berlakoe maloe-maloe boeat trima, tapi orang toewa itoe lantas sadja salesapken dalem tangannja, seraja berkata:
„Kaloe oewa jang kasi, apa djoega boleh trima.“
Samantara itoe Sioe-kioe dateng dengen berlari-lari. Tatkalah meliat tjoetjoe prampoeannja itoe, iboenja Hoaij-wan lantas menanja:
„Belon djoega sembah loe poenja enko dari tadi ?“
„Belon,“ djawab Sioe-kioe, kamoedian laloe seret tangannja Bong-loan, seraja berkata:
„Mari, tji Bong-loan, mari Nioe bilangin.“
„Eh, Sioe-kioe, boekan lantas loe pergi sembah loe poenja enko !“ berseroe mah-toewanja Hoei-djin. „Si Bong-loan jang teritoeng orang laen oeda sembah, masa loe jang namanja djadi adeh dan tinggal satoe roemah, belon djoega maoe katemoein, maoe toenggoe sampe kapan lagi ?“
Aken tetapi seroeannja itoe tida diambil perdoeli oleh Sioe-kioe, jang lantas soeda pergi lagi ka blakang bersama-sama Bong-loan.
Hoei-djin, jang di itoe waktoe sedeng ada boekah pakean dalem kamarnja, laloe berkata pada diri sendiri :
„Si Bong-loan si ada-ada sadja; engga karoean-roean kita la dia pergi semba, bikin orang djadi boeat seboet-seboetan.“
Sasoeda habis loetjoetken ia poenja kous, anak itoe laloe rebahken dirinja di atas pembaringan.
Hari itoe ada Tjhiagwee tjee-it dari tahon 2425. Dengen datengnja itoe hari pertama dari tahon baroe, Hoei-djin poenja oemoer bertambah djadi anam belas tahon, dan ampir berbareng dengen bertambahnja ia poenja oesia, anak itoe sekarang tambah ngalamin satoe perkara jang loear biasa.
Itoe satoe bah dari Bong-loan soeda bikin hatinja djadi tergeter dengen satoe pengrasahan jang ada amat soeker boeat diloekisken dengen pengaroenja pena. Boeat menoetoerken dengen perkatahan, malaenkan bisa dibilang: samantara datengnja hari tahon baroe soeda menambahken Hoei-djin poenja oemoer, sembahnja Bong-loan itoe soeda bikin bersemi samingkin besar ia poenja kataoehan tentang sarinja penghidoepan di doenia.
Salagi rebah di pembaringan, Hoei-djin poenja otak ada tergoebat-goebat dengen soeatoe pikiran, jang sekali poen sampe djadi binasa djiwa, tentoe sekali ia tida nanti ada poenja kagagahan, boeat tjeritaken itoe dengen teroes-terang pada orang banjak, ja, maski djoega pada iboenja sendiri.
Sasoeda teroembang-ambing begitoe sakean lama, laloe ia berkata dalem hati:
„Loe poenja mata, Bong-loan, bikin goea salama-lamanja engga bisa loepah. Goea liat loe salamanja seperti orang lagi maoe nangis. Loe tentoe salamanja sedih sadja.“
Habis berpikir begitoe, ia mengelah napas, dan sasoeda tjelentang dengen bengong samantara lamanja, laloe berkata pada diri sendiri dengen soeara ampir tida kadengeran:
„Baek goea kasi sama dia itoe gambar Henggoan siotjia di atas ranggoen, boeat mendjadi satoe pertandahan.“
Kamoedian laloe ia berbangkit, dan maoe ambil itoe loekisan, tapi koetika itoe djoega lantas ia berpikir lagi:
„Engga enak lagi kaloe goea maen kasi si Bong- loan sadja, habis si Sioe-kioe jang merinti-rinti minta dibikinin gambar, sampe sekarang goea belon djoega ladenin. Engga sama goea sekarang teeken lagi satoe gambar, habis kasi dia sa'rang satoe."
Begitoe lekas ia dapet itoe ingetan sigra ia kaloearken ia poenja perabot meloekis gambar, dan lantas doedoek meneeken dengen sadjadi-djadinja.
Satengah djam kamoedian Hoei-djin soeda selesi dengen ia poenja kerdjahan, dan laloe ia pergi di blakang, dimana betoel sadja ia dapetken Sioe-kioe dan Bong-loan sedeng asik boeat maen anak-anakan di bawah poehoen mangga.
„Do, bagoes betoel,“ kata ia, „pakeh badjoe baroe habis memaen di tanah. „Si Bong-loan salah-salah mentar boleh dipoekoel sama entjimnja.“
„Masa ja tahon baroe orang dipoekoel,“ kata Sioe-kioe. „Djangan dengerin moeloetnja ko Hoei-djin, tji Bong-loan; dia tjoema maoe takoet-takoetin sadja.“
„Siapa jang maoe goea kasi gambar ? tanja Hoei-djin, seraja oendjoekin ia poenja doewa teekenan.
„Mari kasi Nioe; dari doeloe djoega ko Hoei-djin soeda djandji'in, tapi sampe sekarang belon dikasi.“
Bong-loan tinggal mengawasken sadja pada Hoei-djin dengen tida oetjapken satoe perkatahan.
„Goea sekarang ada poenja doewa gambar, dari itoe loe satoe orang boleh dapet satoe; tapi siapa jang goea kasi ini gambar, dia misti simpan betoel-betoel; kaloe engga goea nanti marain sama dia.“
Sambil kata demikian, djedjaka itoe kasi satoe gambar pada adehnja, dan koetika maoe kasi gambar jang laen pada Bong-loan, laloe ia berkata poelah:
„Jang doeloe goea kasi apa masi ada?“
„Orang saia simpan si masa boleh ilang ka mana.“
„Ini gambar djoega loe misti djangan kedja hilang. Loe djoega misti inget, Sioe-kioe; kaloe loe kedja hilang, sampe kapan djoega goea engga nanti kasi gambar lagi, sebab teekennja boekan gampang.“
„Engga, Nioe nanti taroh di dalemtoe 'mboe,“ kata anak prampoean itoe. „Tapi bagimana tjeritanja ini gambar, ko Hoei-djin? Kasi taoe dong sama Nioe, spaja Nioe bisa kasi taoe sama 'mboe“
„Sananja doewa orang lagi perang: satoe laki, satoe proempan. Jang laki namanja Lo Tong, jang proempan To Louw kiongtjoe. To Louw kiongtjoe ada soekain sama Lo Tong, tapi Lo Tong ada kliwat mara sama dia, sebab To Louw kiongtjoe soeda bikin mati dia poenja adeh nama Lo Djin. Lo Tong lawan perang engga bisa menang, sampe oengabisannja dia kenah dilepasin popwee tali sama To Louw klongtjoe.“
Tatkalah habis denger katrangannja ia poenja enko, Sioe-kioe laloe menelitikin itoe gambar jang dikasi padanja. Bong-loan, jang sadari tadi ada berdiam sadja, laloe berkata:
„Ini gambar jang dikasi saia bagimana tjeritannja, ko Hoei-djin?“
„Itoe goea boleh dapet poengoet dari boekoe Dji-toh-bwee,“ djawab djedjaka itoe dengen soeara jang koerang lampias kaloearnja. „Tjeritanja Bwee Liang-giok djalan soesa, terloenta-loenta kasana-kamari, habis djadi boedjang sama Tan Djit-seng. Tan Djit-seng doeloenja ada angkat soedara sama bapanja. Blakangan Tan Djit-seng dapet taoe, jang Liang-giok sabenarnja ada anak dari ia poenja soedara angkat, lantas dia poengoet mantoe boeat dikawinin sama anaknja, Heng-goan siotjia. Betoel Liang-giok sama Heng-goan baroe bertoendangan, kansin lantas pakeh hati boesoek, kaloearin sengtji soereo Heng-goan pergi ka Hoankok boeat djadi bininja radja di itoe negri. Bwee Liang-giok ikoet anter; sasampenja di satoe tempat-ai, namanja ko goea soeda loepa lagi-Heng-goan adjak Liang-giok pasang hio di ranggoen jang tinggi, sama-sama taroh soempa engga maoe kawin sama orang laen. Di sitoe Heng-goan soeda kasi toesoekkondenja pada Liang-giok boeat djadi tanda. mata. . . . . . . . ."
„O, ini gambar dia berdoewa lagi pasang hio di ranggoen, ja, ko Hoei-djin?" tanja Bong-loan dengen moeka soenggoe-soenggoe.
Hoei-Djin malaenkan manggoet-manggoet sadja dengen klakoean koerang laloewasa, kamoedian laloe ia berkata lagi:
„Sekarang goea maoe pergi tidoer, samalem goea engga dapet tidoer kenjang."
Kamoedian lantas ia berlaloe, samantara Sioe-kioe dan Bong-loan kombali landjoetken permaenannja, seraja omong-omong menoeroet taoenja tentang tjeritanja itoe gambar-gambar jang baroe dikasi pada marika.