Pembalesan Kedji/Bab 12
XI.
PASAR MALEM.
Ampat boelan berlaloe dari apa jang ditjeritaken dalem fatsal di sabelah atasan ini, hingga datenglah itoe waktoe, jang saban tahon ada digoenaken oleh orang-orang dari afdeeling Batawi boeat merajaken soeatoe karamean jang loear biasa.
Karamean itoe biasa diseboetken orang: hari raja pasar malem.
Bagi orang-orang jang hartawan, karamean itoe ada sabagi satoe pesta, tapi bagi si miskin sabaliknja ada seperti satoe seksahan.
Saban dateng waktoe pasar malem, jang paling teroetama misti dikerdjaken adalah memboewang oewang, kerna sasampenja di masa begitoe, samoea orang merasa ada poenja kawadjiban boeat bikin sedikit perobahan dalem roemah-tanggahnja.
Dalem tahon 2424 karamean itoe soeda djato samantara hari Saptoe dan Minggoe, dan apabilah kita masoek dalem soeatoe roemah besar di Angkee pada harian jang pertama, nistjaja kita nanti dapetken, jang di sitoe samoea orangnja kaliatan ada terang sekali aer moekanja.
Di pertengahan roemah itoe ada teratoer tiga medja dengen berentet di hadepannja satoe medja lebi tinggi, jang didjadiken tempat aboe toeroenan. Satoe prampoean toewa berdoedoek di satoe krosi hak-soe-ie sembari mengoenja siri.
Koetika itoe adalah kira-kira poekoel sabelas Matahari malaenkan rada-rada sadja pentjarken tjajanja ka moeka boemi.
Sasoeda doedoek kira-kira sapoeloe menit lamanja dengen sendirian, prampoean toewa itoe laloe berseroe :
„Kerdja apa si bolehnja sampe bedjam-djaman. Sekarang soeda tengari lempang, samentar lagi soeda maoe soreh,“
Tida soeatoe orang saoeti ia poenja treakan itoe, hingga lantaran merasa terlaloe djengkel laloe ia berbangkit dan berdjalan masoek ka dalem dengen gerak-gerakannja orang jang soeda djompo.
Sasampenja di dapoer sigrah ia berseroe lagi:
„Apa si jang dikerdjain sampe begini waktoe belon djoega habisan ?“
„Tanggoeng, nio, lagi sedikit lagi samoea soeda djadi habis.“
„Jang soeda mateng toh lantas bawah kaloear, djangan goea nongkrong-sanongkrong-nongkrongnja sampe djam-djaman."
„Mili, pergi ambil doelang dan bawah kaloear itoe nasi sama apa-apa jang soeda mateng.“
„Habis masi ada apa lagi si jang belon habis dikerdjaken ? Lekas-lekas toh, djangan kasi orang jang maoe makan toenggoe lama-lamahan. — Widjin, lekas pakean soeda, habis boleh pasang shio.“
„Masi djoega lama, pakean si brapa soesanja, samentaran djoega habis; kaloe soeda pakean, habis toenggoe lama-lama, nantinja djadi panas lagi.“
„Koerang adjar ini anak engga maoe denger kata,“ kata poelah prampoean toewa itoe, seraja kiserken sisiknja ka samping. „Soeda, loe sadja da jang toekar pakean lebi doeloe, Sioe-kioe.“
„Samentar sadja sama ko Hoei-djin sakalian. Mah engga laen maoe boeroe-boeroe sadja; kan masi lama; samsengnja djoega belon sediah.“
„Goea bilangin loe pada engga maoe toeroet, masa bodoh, samentar baba loe poelang, djangan, nanti loe terepot-terepot.“
Habis kata begitoe, orang toewa itoe pergi kaloear kombali. Hoei-djin laloe berkata pada adehnja:
„Samentar loe kapingin dibelihin apa, Sioe-kioe ? Goea si engga maoe apa apa: asal sadja dibelihin dompet sama aerlodji.“
„Nioe si sekarang engga bisa bilang apa-apa, tjoba nanti Nioe tanja tji Bong-loan, taoeh apa jang dia kapingin.“
„Ija, tjoba loe pergi tanja sama dia, kasian dia engga ada jang adjak pergi ka pasar," kata iboenja Hoèi-djin. „Samentar, kaloe loe pergi djalan-djalan, adjak dia sama-sama."
„Nanti Nioe pergi tanjain sama dia; djangan-djangan dia engga maoe, sebab tji Bong-loan orangnja memang begitoe.“
Kamoedian anak prampoean itoe lantas ambil djalan dari pintoe blakang, pergi ka kebon, samantara Hoei-djin dengen tida berkata soeatoe apa laloe berdjalan kaloear, seraja berpikir dalem hati :
„Memang kasian sekali si Bong-loan! Mahnja soeda mati, habis mah kwalonnja keh gitoean dan bapanja maen takoet sadja.“
„Eh, loe belon djoega bikin bresi badan ?" tanja ia poenja mah-toewa, tatkalah meliat tjoetjoenja masi loentang-lantoeng belon toekar pakean. „Toeroet si kanapa goea poenja moeloet, djangan bikin hati goea djadi melingker. Mentaran lagi loe poenja bapa nanti poelang, lantas sembajang, habis loe boleh pergi djalan-djalan, kan enak ?“
„Ija da, owee lantas toekar pakean, djangan mah maen ngomel sadja.“
„Anak koerang adjar, orang ngomong baek-baek boleh katanja ngomel. Loe engga maoe kasi goea boekah moeloet, apa goea soeda mati ?. . . . . . . . ..“
Tapi Hoei-djin tida maoe denger lebi pandjang njanjiannja ia poenja mah-toewa, jang banjakan ada begitoe-begitoe djoega. Laloe ia berlari-lari masoek ka dalem, pergi ka kamar mandi, goejoer njawaknja dengen bebrapa gajoeng aer, kamoedian lantas berpake pakean.
Betoel sadja tida sabrapa lama lagi Hoaij-wan poelang dari tokonja, dan koetika samoea barang-barang soeda teratoer di atas medja, laloe orang moelahi sembajang. Mah-toewanja Hoei-djin doedoek di soeatoe pinggiran, samantara moeloetnja ida brenti membilang ini atawa itoe.
Sasoeda habis pasang hio, Sioe-kioe laloe berkata pada ajahnja:
„Kapan kita pergi djalan-djalan ? — samentar lagi soeda soreh.“
„Kaloe tida oedjan, habis sembajang, habis makan nasi, baba nanti adjak Nioe pergi ka pasar,“ saoet Hoaij-wan dengen bersenjoem. „Tjoba bilang baba sekarang: apa si jang Nioe kapingin belih ?'
„Taoelah, Nioe sekarang belon bisa bilang ; tadi Nioe tanja tji Bong-loan ko dia engga maoe bilangin lagi."
„Eh, Nioe jang poenja diri si bolehnja tanja laen orang,“ kata lagi Hoaij-wan dengen tertawa. „Tji Bong-loan mana bisa taoe apa jang Nioe kapingin.“
„Boekan begitoe. Kaloe tji Bong-loan maoe bilangin, Nioe pikiran maoe belihin barangnja boeat dia, sebab dia tentoe engga pergi ka pasar.“
„Maoe belihin ?" tanja Hoaij-wan dengen bersenjoem, „mana Nioe poenja doeit ?“
„Kapan djalan-djalan sama-sama baba !“
Hoaij-wan dan iboenja bersenjoem denger anak prampoean itoe poenja bitjara. Iboenja Hoei-djin jang koetika itoe soeda habis pasang hio, laloe berkata :
„Kaloe samentar ka pasar, belih soeda sakalian apa jang perloe dipakeh."
Hoaij-wan manggoeti kapalanja.
Tatkalah soeda habis sembajang, laloe ia bersama iboe dan anak-anaknja doedoek bersantap, kamoedian laloe ia, Hoei-djin dan Sioe-kioe pergi djalan-djalan ka pasar malem, samantara Armili mengikoeti dari blakang.
„Nioe koewat djalan engga ?" tanja Hoaij-wan pada anaknja jang bontot. „Kaloe engga koewat kita boleh doedoek kahar.“
„Masa engga koewat ? Tahon doeloe djoega Nioe teroes djalan pergi poelang.“
Oleh kerna di itoe waktoe oedara ada mendoeng, djadi bapa dan anak itoe bisa letakin perdjalanannja dengen senang. Sioe-kioe tida brentinja mengobrol menanjaken ini-itoe pada ajahnja, samantara Hoei-djin tinggal diam sadja mengikoeti dari blakang.
Sasampenja di Kali-Besar, marika dapetken orang jang berdagang dan djalan moendar-mandir ada rameh sekali. Hoaij-wan adjak anaknja berdjalan di antara orang banjak teroes ka Asemka, dan di sitoe laloe ia masoek ka tempat orang djoewal barang klontong, jang boekah dagangannja ditengah djalan dengen diriken satoe goeboek, kamoedian laloe ia berkata pada Sioe-kioe:
„Tjoba liat-liat apa jang Nioe kapingin.“
Anak prampoean itoe tinggal berdiri memandang ka sana-sini, tapi Hoei-djin lantas sadja dekatin satoe koempoelan dompet, dan achirnja memilih satoe jang ia penoedjoe.
„Loe maoe itoe ?“ tanja Hoaij-wan.
„Owe,“ djawab anak lelaki itoe dengen pendek.
„Habis Nioe maoe apa ?“
„Samoeanja engga ada jang Nioe soeka.“
„Barang apa jang Nioe kapingin ?“
„Nioe kapingin anak-anakan jang bagoes sama piring-mangkok jang ketjil-ketjil; di sini engga ada itoe barang.“
„Itoe kita nanti tjari di laen tempat," kata lagi Hoaij-wan. „Habis loe maoe belih apa lagi, Hoei-djin ?“
„Aerlodji sama rantenja.“
„O, di sini ada,“ kata si pedagang.
„Tjoba kasi liat,“ kata Hoaij-wan.
Orang itoe boekah satoe lemari, kamoedian laloe kaloearken itoe doewa matjem barang jang di ingin oleh Hoei-djin.
„Soeka itoe ?“ tanja Hoaij-wan pada anaknja. Hoei-djin manggoeti sadja kapalanja dengen tida menelitiki lagi itoe barang-barang jang orang kasi liat padanja.
Hoaij-wan tanja harganja itoe horlodji sama rantenja dan dompet, kamoedian lantas bajar dengen tida menawar lagi. Sasoeda itoe laloe ia adjak anak anaknja berdjalan lebi djaoe.
Sasoeda berdjalan dengen plahan samantara lamanja, laloe, marika masoek ka satoe tempat orang berdagang jang ada djoewal matjem-matjem barang permaenan anak-anak, kamoedian laloe Hoaij-wan berkata:
„Tjoba Nioe pilih sekarang, anak-anakan matjem bagimana jang Nioe soeka.“
Sioe-kioe pilih ampat anak-anakan jang boleh dibilang ada pasangan satoe dengen laen; doewa lelaki, doewa prampoean; kamoedian laloe berkata:
„Mana piring-mangkoknja ? Ada krosi-krosian jang bagoes engga ?“
„Ada,“ saoet si pedagang, kamoedian lantas pertoendjoekin itoe barang-barang pada Sioe-kioe.
„Ija, ini bagoes; kasi doewa krosi sama doewa piring-mangkoknja,“ kata poelah itoe anak prampoean.
„Nioe satoe orang maoe sampe ampat anak-anakan ?“ tanja Hoaij-wan dengen bersenjoem. „Maoe boeat apa sampe begitoe banjak ?“
„Boekan boeat Nioe sendiri; satoe boeat Nioe, satoe boeat tji Bong-loan. Nioe saban hari memaen sama dia, habis kaloe dia engga ada poenja, mana boleh enak.“
Hoaij-wan bersenjoem denger anaknja poenja bitjara. Laloe ia menanja brapa harganja itoe sakalian barang-barang, dan sasoeda membajar oewangnja, laloe ia adjak anak-anaknja djalan ka sana-sini boeat belih segala barang kaperloean roemah tangga. Satelah itoe laloe ia balik berdjalan teroes ka Pintoe-Besar, dan memanggil kahar.
„Apa soeda maoe poelang sekarang?“ tanja Sioe-kioe.
„Ja, habis maoe kamana lagi?“ saoet Hoaij-wan.
„Belon djoega habis kita djalanin samoeanja ini pasar malem.“
„Besok masi ada, besok malem masi ada ; masi ada banjak tempo boeat kita djalan-djalan lagi," kata Hoaij-wan, jang sabetoelnja ada merasa kesal boeat berdjalan lebi lama sama anak-anak. „Sekarang kita poelang doeloe; samentara malem djoega kaloe mah maoe djalan-djalan kita boleh kaloear lagi.“
Sioe-kioe tida membanta lebi lama, kerna ia poen tatkalah denger ajahnja poenja bitjara, lantas kapingin lekas-lekas poelang ka roemah boeat kasi oendjoek itoe anak-anakan dan sabaginja pada Bong-loan.
Hoaij-wan bersama Hoei-djin dan Sioe-kioe doedoek di satoe kahar, samantara Armili ambil tempa di laen kahar bersama barang-barang belandjahan.
Sasampenja di roemah, Sioe-kioe lantas berlari-lari teroes ka blakang dengen membawah itoe sapasang anak-anakan jang baroe dibelihken oleh ajahnja, samantara Hoei-djin, sasoeda boekah pakean laloe doedoek di pertengahan sampe sakean lama, memeriksahi ia poenja dompet baroe dan horlodji, kamoedian laloe doedoek meloekis gambar.
Bong-loan kaliatannja ada amat girang koetika Sioe-kioe kasi ia itoe Sapasang anak-anakan, kamoedian kasi lagi krosi dan piring-mangkoknja. Laloe doewa anak prampoean itoe memaen dibawah poehoen mangga, samantara Sioe-kioe tjeritaken tida brentinja apa jang tadi ia telah dapet liat di pasar malem.
Plahan-plahan hari mendjadi soreh. Koetika lontjeng soeda mengoetaraken poekoel sapoeloe malem dan Sioe-kioe soeda tidoer dengen ditemanken oleh Armili, Hoaij-wan bersama istri dan iboenja pergi djalan-djalan kombali ka pasar malem dengen diikoeti oleh doewa boedjang prampoean sama satoe boedjang lelaki.
Hoei-djin tida maoe ikoet pergi, dan tatkalah samoga orang soeda brangkat djalan, ia poen lantas naek ka pembaringan rebahken diri.
Tapi anak itoe soeda tida bisa dapet poeles begitoe lekas seperti adehnja, kerna pikirannja di itoe waktoe adalah sedeng melajang ka sana-sini.
Pada bebrapa hari jang telah laloe, ia telah batja sampe tamatnja satoe tjerita Tionghoa jang beralamat: Djitohbwee, dan hatinja telah djadi begitoe katarik dengen hikajatnja Bwee Liang-giok dan Heng-goan siotjia, hingga tadi dengen toempahken antero pengrasahan hatinja ia soeda bikin satoe gambar jang meloekisken: Heng-goan, salagi ada berdoewa-doewa di atas ranggoen, soeda briken ia poenja toesoek konde pada Liang-giok boeat didjadiken satoe barang tanda mata. Dan sekarang, salagi ia rebahken diri di atas pembaringan, pikirannja laloe berkoempoel djadi satoe, menginget sasoeatoe bagian jang paling sedap dari itoe tjerita Djitohbwee, habis plahan-plahan ingetannja laloe melantjong ka laen tempat, dan boeat pangenan pada Bong-loan, kamoedian laloe ia berkata pada diri sendiri dengen soeara tida kadengeran njata:
„Bwee Liang-giok dapet soesa soeda katemoe sama Heng-goan. Goea sekarang nanti merasa senang sekali kaloe bisa terangkep sama Bong-loan jang tida brentinja trima seksahan dari mah kwalonnja.“
Habis kata begitoe Hoei-djin mengelah napas pandjang, dan sasoeda berdiam sakean lama laloe ia berpikir dalem hati:
„Tapi orang toewa samoeanja maoe lekas-lekas kawinin goea sama laen orang; tjilaka betoel kaloe sampe djadi begitoe.“
Laloe ia mengelah napas kombali, dan di saat itoe djoega lantas hilang sama sekali ia poenja napsoe boeat tidoer, ia berbangkit, berdjalan plahan-plahan ka blakang, boekah pintoe, dan teroes bertindak kadalem kebon.
Sakean lama ia berdiri dalem gelap-goelita di bawah poehoen mangga, kamoedian laloe ia berdjalan di antara pot-pot kembang jang ada di sitoe.
Hoei-djin oesap-oesap kapalanja, samantara matanja mengintjer ka roemahnja Bong-loan, sekali poen sabenarnja ia tida dapet liat laen dari gelap-goelita. Tapi koetika itoe, dengen koenjoeng-koenjoeng koepingnja dapet denger soeara orang sasenggoekan, hingga dengen mendadak hatinja djadi tergeter dengen pengrasahan takoet.
„Siapa itoe?“ tanja ia kamoedian, samantara kakinja telah bersediah boeat berlompat masoek kalem roemah.
Soeara sasenggoekan itoe lantas brenti, kamoedian terdenger satoe soeara sember mendjawab :
„Saia, Ko Hoei-djin.“
„Bong-loan ?“
„Ja."
Hatinja Hosajin lantas djadi berdebar-debar. Sasoeda berdiam samantara lamanja laloe ia menanja lagi:
„Apa loe jang menangis ?“
Bong-loan tida mendjawab.
„Kanapa loe maen gelap-gelapan di sini?" tanja poelah Hoei-djin, seraja djalan mengamperi.
„Saia katakoetan di dalem,“
„Kanapa ?“
„Entjim pergi ka pasar malem, saia ditinggal sendirian.“
Si Tima ka mana? Kanapa loe engga maoe panggil dia boeat temanin ?“
„Dia diadjak pergi sama entjim.“
„Kliwatan amat, sampe engga poenja pikiran begitoe," kata poelah Hoei-djin. „Kanapa loe engga maoe pergi ka roemah goea ? Kan loe boleh tidoer sama si Sioe-kioe ? Kaloe entjim loe poelang, biar dia tjari kalabakan ka sana-sini.“
„Tadi pintoenja terkoentji; saia maoe pergi tengok dari loear engga bisa, sebab entjim bawa koentjinja.“
„Kanapa loe engga maoe ketok ?“
„Saia engga brani, sebab saia kira enko Hoei-djin samoeanja soeda tidoer.“
Hoei-djin mengamperi lebi dekat pada Bong-loan, pegang tangannja itoe anak prampoean, kamoedian laloe berkata poelah:
„Ajo ka roemah goea. Loe boleh tidoer sama si Sioe-kioe.“
Bong-loan tarik tangannja dengen plahan, toetoepi moekanja, kamoedian laloe menangis tersedoeh-sedoeh.
„Loe menangis lagi, Bong-loan ? Kanapa ?“
Anak prampoean itoe tida menjaoet, dan teroes bersedoeh-sedoeh samingkin sedih, hingga sampe samantara lamanja Hoei-djin kapaksa tinggal meliati sadja.
Koetika meliat jang Bong-loan poenja sasenggoekan soeda djadi samingkin koerang, Hoei-djin laloe pegang lagi tangannja itoe anak prampoean, seraja berkata poelah: „Soedalah mari goea anterin loe sama si Sioe-kioe; kaloe loe poenja entjim tjarih samentar loe boleh poelang, kaloe engga, loe boleh tidoer teroes sama si Sioe-kioe.“
„Sabetoelnja sala takoet, ko Hoei-djin, tapi kaloe saia pergi ka roemah besar, bagimana ini pintoe blakang engga dikoentji ?“
„Koentji sadja dari loear,“ kata Hoei-djin, kamoedian lantas ia lakoeken sabagimana ia poenja kata. Sasoeda itoe laloe ia toentoen tangannja Bong-loan adjak poelang ka roemanja.
„Habis kaloe entjim mara sama saia bagimana, ko Hoei-djin ?" kata Bong-loan dengen soeara sember lantaran baroe habis menangis. ,Kaloe saia nginap sama si Sioe-kioe, tentoe besok saia kenah dipoekoel lagi.“
„Kaloe engga samentar loe poenja entjim poelang loe boleh lantas poelang; kaloe loe kapoelesan lah besok pagi. Djangan takoet, besok nanti goea jang anterin; kaloe dia maoe poekoel djoega, goea nanti pegang tangannja.“
Bong-loan kaliatannja masi moendoer-madjoe, tapi oleh kerna ia merasa amat takoet boeat tinggal sendirian dalem roemahnja, mendjadi achirnja ia toeroet djoega sabagimana adanja Hoei-djin poenja bitjara.
Hoei-djin adjak ia ka kamar blakang, dimana Sioe-kioe ada sedeng tidoer dengen ditemanken oleh Armili. „Si Sioe-kioe soeda poeles, habis ia nanti djadi mendoesin,“ kata Bong-loan.
„Engga,“ kata Hoei-djin, kamoedian laloe ia koetik-koetikin pada Armili, jang tidoer didepan randjang.
Boedjang itoe sigra djadi mendoesin, dan laloe berkata dengen soeara menggrijang:
„Na Sioe-kioe, maoe apa ?“
„Armili, tjoba loe adjak ini nona Bong-loan tidoer sama nona Sioe-kioe.“
„Ada apa bolehnja maoe tidoer di sini ?“
„Entjimnja tinggalin dia sendirian di roemah, habis dia katakoetan; tjoba loe adjak dia tidoer sama nona Sioe-kioe.“
„Kamari na Bong-loan,“ kata Armili, „plahan- plahan naeknja; nona Sioe-kioe soeda poeles.“
Dengen hati-hati Bong-loan naek ka randjang jang itoe boedjang prampoean oendjoekin padanja. Hoei-djin lantas kaloear kombali, pergi ka kamar depan, dan laloe rebahken poelah dirinja di atas pembaringan.
Tapi sakali ini poen ia tida lantas bisa dapet poeles. la goelak-goelik sampe bebrapa kali, kamoedian laloe berkata pada diri sendiri:
„Bong-loan, taoeh si bagimana loe poenja pikiran. Goea ini, biar bagimana djoega, engga nanti maoe menoeroet kaloe sampe maoe dikawinin sama laen orang. Goea merasa kaga tegah sekali liat loe dibikin begitoe sama loe poenja mah kwalon. Kaloe sampe loe bisa djadi goea poenja bini, biar bagimana djoega, goea engga nanti bikin loe djadi sedih dan kesal.“
Habis berkata begitoe, ia djadi inget kombali pada itoe tjerita Djitohbwee. la meramken matanja, dan lantas djoega ia merasa seperti ada dapet liat, bagimana Heng-goan soeda njataken tjintanja pada Liang-giok di atas ranggoen. Dengen begitoelah achirnja Hoei-djin poenja samanget samingkin lama djadi melajang samingkin djaoe sampe pengabisannja ia djato poeles.