64
LIAUW TJAY.
Sedari Ong Kioe Seng pasang doepa itoe, maka itoe prampoean siloeman tiap-tiap ia tidoer ia berasa badannja kekedoetan, oleh sebab itoe, maka itoe prampoean siloeman dari tempat tidoernja pergi di kamarnja Ong Kioe Seng, serta itoe prampoean siloeman lihat di depan kamar ada terpasang doepa jang wangi, begitoe djoega in lantas ambil itoe doepa dan ia lantas boeang di loear kamar sembari ia menanja sama Ong Kioe Seng: Kong Tjoe atoer begini siapa jang adjar?
Lantas Ong Kioe Seng berkata: Djikaloe orang di roemah ada sakit misti pertjaja sama doekoen boeat mintain itoe penjakit soepaja hilang, boekannja saja poenja maoe sendiri, ini doekoen poenja adjaran boeat soeroe pasang ini doepa saban malem, nona kenapa mendjadi mara.
Serta itoe prampoean siloeman dengar Ong Kioe Seng poenja perkataan begitoe, maka ia lantas kloear dari sitoe dengan koerang senang hatinja. Tempo ia (si prampoean siloeman) soedah masoek di dalem kamarnja sendiri lantas ia tarik napas sembari berkata: Ong Kong Tjoe dia poenja redjeki masi besar, kita soedah sala keniaja itoe Tang He Soe, djadi Tang He Soe ada di achirat menoenggoeh sama kita poenja tjilaka, memang kita doeloe hari ada djoega berdjodoan, maka ini hari bisa ketemoe sama Tang He Soe, tjoemah kita pesen Ong Kong Tjoe djangan lah bikin roesak saja poenja koelit. Sasoedahnja ia habis berkata-kata begitoe, samantara itoe djoega ia mendjadi mati balik ka atsalnja djadi rase.
Tempo Ong Kioe Seng lihat dia poenja istri tiada kloear-kloear dari dalem kamar, maka Ong Kioe Seng djadi tjoeriga hati dan ia lantas boeka itoe kamar di mana ia dapet lihat ada saekor rase soedah mati di atas randjangnja. Tatkala itoe ia lantas panggil tetangganja akan kasi lihat itoe bangke rase, serta tetangganja Ong Kioe Seng lihat itoe bangke rase lantas itoe orang ambil dan ia lantas keset koelitnja itoe rase, dan troes di djemoer bikin kering.
Lantaran itoe, maka Ong Kioe Seng lantas djadi sakit dan di waktoe malem Ong Kioe Seng tidoer ia mengimpi lihat saekor rase dateng berkata: Saja dapet poetoesan dari achirat, bilang Tang Kong Tjoe temaha libat prampoean jang tjakap sahari-hari adjak plesir sampe dia mati, boekannja saja poenja sala. Sekarang saja poenja koelit, ada di mana? Kendatinja saja mati djoega saja maoe minta koembali saja poenja koelit, djikaloe Ong Kong Tjoe tiada maoe bajar tentoe Ong Kong Tjoe poenja sakit tiada bisa baek, saban malem saja dateng goda.
Serta Ong Kioe Seng dengar itoe saekor rase poenja bitjara, ia mendjadi kaget dan troes mendoesin, sasoedahnja Ong Kioe Seng bangoen dari tidoernja ia lantas djalan kloear pergi sama tetangganja boeat tanja dari itoe koelit rase ada di mana, begitoe djoega dia poenja tetangga bilang tiada tahoe soedah hilang kamana barangkali andjing soedah makan. Kerna itoe koelit rase soedah hilang tiada bisa dapet koembali, maka Ong Kioe Seng djadi boeat pikiran, lantaran itoe ia poenja sakit djadi semingkin keras dan troes ia mendjadi mati.
