Liauw Tjay.
249
Lantas Pwe Kioe Lo bersama Lauw Peng Gie bereboet menjahoet saling sahoetan, lantas Kiauw Taij Sioe mendjadi mara troes bentak: Kaoe djangan bereboet menjahoet, misti saorang bitjara sama kami dan angkaoe boleh kasi tahoe dari angkaoe poenja perkara pada kami, nanti kami boleh preksa.
Lantas Pwe Kioe Lo berkata: Saja poenja nama Pwe Kioe Lo ada poenja anak lelaki nama Pwe Tjeng, itoe waktoe saja ada minta Lauw Peng Gie poenja anak prampoean Lauw Hoei Nio, djoega Lauw Peng Gie dengan soeka hati trima saja poenja pandjeran: Sekarang dia poenja anak prampoean soedah beroemoer lima blas tahon itoe waktoe saja minta soepaja di bikin djodoan tetap djadi laki bini sama saja poenja anak, tapi Lauw Peng Gie tiada maoe kasi dia poenja anak prampoean dia bilang masi ketjil, sekarang Lauw Peng Gie djoeal dia poenja anak prampoean sama Soen Hian panggil masoek di dalem dia poenja roemah boeat kasi berdjodoan sama dia poenja anak prampoean, djadi Lauw Peng Gie bikin saja poenja maloe, saja minta lah Toa Lo Ja bikin patoet ini perkara. Sasoedahnja Pwe Kioe Lo habis bitjara, lantas Kiauw Taij Sioe soeroe opas kasi moendoer dan panggil Lauw Peng Gie, sasoedahnja Lauw Peng Gie menghadap di depannja Kiauw Taij Sioe lantas Kiauw Taij Sioe menanja: Angkaoe mengapa bikin djoesta sama Pwe Kioe Lo? Sekarang Pwe Kioe Lo tiada maoe trima jang angkaoe soedah bikin djoesta padanja.
Demikian djoega Lauw Peng Gie berkata: Saja bernama Lauw Peng Gie, saja ada poenja anak lelaki bernama Lauw Pok, saja ada bikin tetap Lauw Pok poenja perdjodoan dengan Soen Khoaij Hoe poenja anak prampoean nama Soen Tjoe Le Nio, betoel saja poenja anak prampoean ada bikin berdjoan dengan Pwe Kioe Lo poenja anak lelaki Pwe Tjeng itoe waktoe Pwe Kioe Lo maoe lamar saja poenja anak prampoean, saja belon sedia pakean boeat anak prampoean saja, maka saja minta tempo lebi doeloe, boeat kawinken saja poenja anak lelaki Lauw Pok, itoe waktoe Lauw Pok dapet sakit keras, dari itoe saja panggil saja poenja mantoe Soen Tjoe le Nio soepaja ia dateng djaga soewaminja, tiada doega Soen Khoaij Hoe soeroe dia poenja anak lelaki Soen Hian menjaroe djadi penganten prampoean, dan itoe Soen Hian djadi penganten prampoean saja tiada doega dia orang lelaki, lantas saja soeroe saja poenja anak prampoean Lauw Hoei Nio boeat temenin penganten baroe, tiada doega Soen Hian bikin resia sama saja poenja anak prampoean, saja tiada tahoe.
Lantas Pwe Kioe Lo berkata: Begimana kaoe tiada tahoe, kerna kaoe saorang toewa ada di dalem roemah, itoe kaoe poenja perkatahan djoesta kaoe kloearken di depan Toa Lo Ja
Lantas Kiauw Taij Sioe berkata: Saorang lelaki menjaroe djadi prampoean terlaloe heran itoe perkara. Sebetoel-betoelnja orang prampoean menjaroe djadi lelaki itoe ada lebi gampang, dari itoe kaoe poenja perkatahan semoeanja djoesta, djikaloe kaoe tiada maoe bilang dengan sebetoel-betoelnja, nanti kami kasi hoekoeman jang berat.
