248
Liauw Tjay.
Apa bila Pwe Kioe Lo dengar itoe perkatahan, ia mendjadi mara sembari berkata; Lauw Tjin Khe djoega poenja sala boekannja lain orang, itoe waktoe saja minta siang-siang di bikin djadi itoe perkara kawin, Tjin Khe tiada maoe toeroet saja poenja permintahan, maka ini hari Tjin Khe seperti orang jang bodo maka dapet ini perkara jang membikin Tjin Khe poenja maloe.
Begitoe djoega Lauw Peng Gie mendjadi mara sembari berkata: Sekarang Tjin Khe bikin saja poenja maloe, apa djoega Tjin Khe poenja maoe saja toeroet.
Serta Pwe Kioe Lo dengar perkatahan itoe hingga ia djadi semingkin mara, lantas ia tolak Lauw Peng Gie hingga ia djatoh di tanah, maka dari itoe dia orang berdoea lantas djadi beklai saling poekoel dan saling maki. Itoe waktoe Lauw Pok bersama iboenja dengar di loear ada soeara orang riboet, troes Lauw Pok dan iboenja itoe kloear di mana ia dapet lihat Pwe Kioe Lo lagi beklai sama dia poenja bapa Lauw Peng Gie, begitoe djoega Lauw Pok lantas pisaken sembari menanja: Sekarang ini perkara soedah kedjadian maoe begimana?
Apa bila Pwe Kioe Lo dengar pertanjahannja Lauw Pok itoe, hingga ia djadi maloe, begitoe djoega ia lantas djalan kloear poelang ka roemahnja.
Sasoedanja Pwe Kioe Lo berdjalan pergi, lantas Lauw Peng Gie soeroe orang toelis rekes soerat permoehoenan akan mendakwa di hadepan hakim dari Soen Khoaij Hoe poenja perboeatan jang dia soedah bikin djoesta dari perkara kawinan ia itoe dia poenja anak prampoean di toekar sama dia poenja anak lelaki menjaroe djadi penganten prampoean serta bikin roesak Lauw Hoei Nio poenja badan. Sasoedanja itoe rekes di bikin lantas Lauw Peag Gie bawa pergi di kantornja Kiauw Taij Sioe.
Adapoen di tjeritaken Kiauw Taij Sioe ia lah atsal orang di kota Koan See, saorang jang pinter memereksa segala perkara, dari itoe Kiauw Taij Sioe djoega tjinta pada dia poenja anak negri di dalem itoe kota, maka apa djoega anak negri poenja perkara Kiauw Taij Sioe preksa tiada taboe sala.
Itoe waktoe Lauw Peng Gie sampe di depan kantornja Kiauw Taij Sioe di sitoe Lauw Peng Gie ketemoe pada Pwe Kioe Lo, serta Pwe Kioe Lo ketemoe pada Lauw Peng Gie, lantas Pwe Kio Lo maki padanja hingga dia orang berdoea djadi riboet di depan kantornja Kiauw Taij Sioe itoe, serta Kiauw Taij Sioe dapet dengar, lantas ia prenta opasnja soeroe tangkap itoe Pwe Kioe Lo dan Lauw Peng Gie, bawa di hadepnja, maka itoe opas sigra ia tangkep Pwe Kioe Lo dan Lauw Peng Gie itoe troes di bawa menghadap di depannja Kiauw Taij Sioe, di sitoe kadoea orang itoe lantas berloetoet. Demikian djoega Kiauw Taij Sioe menanja: Angkaoe doea orang ada perkara apa bikin riboet di depan kami poenja kantor dengan angkaoe saling poekoel dan saling maki?
