— 1405 —
sakean lama, sampe bisa bertemoe satoe sama laen di ini hari; itoe boedi sasoenggoenja sanget besar, maka panteslah akoe mengatoerken trima kasi."
Seabisnja kata begitoe, itoe orang bangsawan bersama anaknja lantas berloetoet, tapi Sioe Tji boeroe-boeroe bangoenken seraja berkata: „Kenapatah Lo Ya djadi begitoe? Kaloe akoe trima Lo Ya serta Kongtjoe poenja kahormatan, Allah nanti koetoek bahoea akoe saorang jang tiada berboedi. Dirikoe soeda di toeloeng dari kasoesahan, Lo Ya dan Hoedjin soeda toendjang akoe poenja pengidoepan sakean lamanja, itoe sadja sampe tjoekoep boeat akoe oekir di dalem hati. Lo Ya poenja boedi ada begitoe besar, dirikoe boleh di perboeat sebagimana soeka, maka tjara begimana akoe brani trima Lo Ya dan Kongtjoe poenja kahormatan................"
Sedeng kata begitoe Djim Sioe Tji lantas menangis.
Boekan sadja Kioe Tjianswe, poen sekalian ponggawa jang hadlir dalem itoe roewangan satoe persatoe telah memoedji pada Sioe Tji itoe.
Atas prentanja Kioe Tjianswe, itoe pesta di landjoetken poela, di mana kombali itoe semoea orang doedoek bersantap dengen sapoeas hati. Ko Kong dan Song In doea-doea telah 'djadi poesing, kerna semoea orang jang hadlir sebagian telah membri slamet padanja.
