— 1348 —
prenta, maka akoe lantas tarik poelang ini angkatan prang.”
„Kaloe begitoe tentoe djoega moesoe soeda dapet kisikan apa apa atawa brangkali soeda dapet taoe kita orang ada tempatken barisan di tenga djalanan,” kata Tjo Goanswe. „Tentoe djoega moesoe soeda goenaken laen djalan, hingga dengen begitoe dirinja djadi terloepoet dari tangkepan.”
„Oh, itoelah Goanswe djangan heran,” kata satoe ponggawa begal jang baroe menaloek, „orang jang menjerang kota Tjiang Hoa Koan jalah Pa Tauw Koensoe.”
„Kaloe begitoe kenapa?” menanja Tjo Goanswe.
„Itoe orang ada terkenal paling pande di antara bebrapa orang di goenoeng Yauw Taij,” saoet poela itoe orang, „ia sanget pande mendoega keada'an fihak moesoenja, atoer mengatoer tipoe djoega paling bisa, maka tiada oesa heran, kaloe dalem segala perkara orang selaloe mengandel atas itoe koensoe poenja pikiran.”
Tjo Goanswe laloe menanja poela laen-laen oeroesan tentang keada'an di atas goenoeng terseboet, jang mana telah di bri taoe dengen terang oleh itoe orang.
Itoe hari djoega lantas di kirim laporan ka kota radja. Lebi djaoe Tjo Goanswe lantas bikin pesta, oendang sekalian panglima prang doedoek bersantap dengen segala soeka hati.
