— 1261 —
sabenarnja Hiante niatken jalah oeroesan panting, maka toeroet akoe poenja rasa baek tinggalken sadja dan Hiante brangkat lebi doeloe, sedeng akoe menjoesoel toch achirnja aken bertemoe lagi."
„Tiada, Siauwte poenja pikiran soeda tetep begitoe." saoet Song In. „Bermoela memang akoe ada niat berboeat begitoe, tapi sekarang pikirankoe soeda djadi laen, harep Hengtiang djangan menjega lagi begini atawa begitoe."
Boen Pa mengala napas, ia loeloesken sebagimana Song In poenja kahendak itoe.
Satelah sampe pada kabesokan harinja, kombali marika itoe dengen perpisa'an satoe sama laen dan pergi tjari poela itoe koeda. Tjo Boen Pa sendiri pergi ka djoeroesan sebla barat; tapi maski djoega ia soeda tjari di bebrapa tempat pertjoema sadja, hingga hatinja itoe orang moeda djadi semingkin kesel.
Achir-achir ia tjaboet pedangnja, toendjoek itoe ka atas langit seraja berkata: "Toean jang Maha moelia, Tetjoe Tjo Keng, dengen satoeloes hati sabenarnja hendak pergi ka kota radja aken toeroet dalem oedjian, tapi siapa taoe sesampenja disini Tetjoe poenja koeda ada jang tjoeri dan tiada ketaoean di mana adanja. Sekarang bila Thian dan sekalian melaekat merasa kasian, serta kasi perkenan boeat Tetjoe toeroet ambil bagian dalem
