— 1203 —
Setenga djam kamoedian, sablonnja ia orang oendoer dari itoe tempat, mendadak Hok Tjoen lantaran peroetnja begitoe sakit, hingga ia berdjengit-djengit sembari meraba-raba bagian peroetnja.
„Lo Keng, tjoba kau toeloeng tjaboetken akoe poenja oerat blakang...... adoe..... adoe...., eh...... eh, kenapa peroetkoe djadi begini sakit!" kata Hok Tjoen sambil meratap dan ia kaliatan djadi semingkin paja.
„Peroetkoe djoega rasanja seperti diremes-re-mes!" kata Lo Keng jang berlakoe djoega seperti Hok Tjoen. „Heran betoel, 'doe.... 'doe..... mati....."
„Monjet! siapa prenta kau memaen!" treak Hok Tjoen. „Hajo......."
Hok Tjoen tjoema bisa berkata sampe di sitoe sadja, dengen berbareng ia dan Lo Keng lantas djato dari atas krosi ka papan praoe.
Ratjoen jang di goenaken dalem itoe perboeatan kedji njatalah telah bekerdja begitoe keras, hingga korbannja tiada bisa tahan lebi lama lagi.
Beroelang oelang itoe doea orang koeatken maoe bangoen, tapi pertjoema sadja; maoe bertreak tiada bisa, kerna moeloetnja seperti kakoe dan soeker kaloearken swara. Tiada lama matanja djadi, mendelik dan napasnja mengeros-ngeros.
