— 1201 —
kau djangan toeroet tjampoer orang lelaki poenja oeroesan! Prempoean taoe makan, taoe pake, laen tiada!”
Sambil kata begitoe Bauw Hian berontak dan dengen keras ia tolak dadanja Tjhia Si hingga djato kadjengkang, tempo bangoen, kombali ia liat swawinja soeda lari djaoe.
Ini njonja tiada bisa berboeat apa-apa lagi, tapi hatinja ada merasa sanget koerang senang atas perboeatannja Bauw Dji Hoa' jang ingin bisa poeasken hati tapi boekan bekerdja sendiri hanja soeroe laen orang jang tiada berhoeboeng apa-apa.
Lebi doeloe Bauw Hian pergi ka pasar, ia bli doea botol arak dan boea-boea. Di tenga djalan diam-diam itoe arak ia tjampoerken boeboek ratjoen, jang ia dapet bli di pasar tadi djoega,
Tiada berselang lama kamoedia ia soeda sampe di praoe, di mana ia dapetken Hok Tjoen dan Lo Keng lagi menoenggoe ia poenja dateng dengen tiada sabar. Itoe doea orang tentoe sadja djadi sanget girang tempo liat Bauw Hian soeda balik kombali dan ada membawa apa-apa.
„Begimana, apa kau soeda bertemoe pada Naij-Naij di sana?” menanja Hok Tjoen. „Apa ia bilang pada kau?”
„Wah, Ko Naij-Naij merasa sanget girang koetika akoe kasi taoe Siangkong poenja perniagaän dapet kemadjoean bagoes, ini ia kirimken arak dan boea-boea boeat Siangkong."
