— 1078 —
tjoba Toewankoe prenta brapa ambtenaar menja- roe sebagi orang dagang pergi masoek ka sana, diam-diam seraken barang bingkisan pada Lu Sinsiang seraja minta ia poenja bantoean dalem kita poenja maksoed, dengen tjara begini hamba rasa Dji Taij Ong bisa dibawa poelang ka mari.”
Djoega Prins Ya Loet Sioe San toeroet njataken pikirannja seraja berkata: ,,Djika hamba dapet kabar, ini tempo Ko Teng Tjan ada dalem pemboeangan, maka di kota radja soeda tiada ada panglima prang jang diboeat takoet. Kita poenja angkatan prang soeda toedjoe taon teroes-meneroes jakin ilmoe prang, ramsoem dan alat sendjata poen tjoekoep. Nanti kaloe Hong Siok soeda ada di sini, Ong-Dji dan sekalian panglima pinpin pasoekan tentara pergi menjerang ka selatan.”
Pak An Ong njataken setoedjoe dan bri perkenan maksoednja Prins Sioe San. Demikianlah terdjadinja itoe permoefaketan dalem ini pesta, jang tiada lama poen ditoetoep kerna hari soeda djaoe malem.
Liwat lagi brapa hari, pada satoe hari Ang Hong Houw pergi di kraton Hap Keng Kiong tempatnja In Liong, di mana ini Permisoeri doedoek beromong omong lama sekali. Antara laen-laen ini Permisoeri bilang, ia niat nikaken Hap Keng Kiongtjoe sama sala satoe poetranja ambtenaar besar, hingga bikin orang jang ditawarken hal itoe djadi sanget bingoeng.
