Bajalan Sutan Sari Alam, batungkek jo rantiang batuang, bajalan maningkih-ningkih, sarupo urang dek puru, Kalasun mairiangkan di balakang, dituruikkan labuah nan panjang, lah hampia tibo hanyo lai, tibo di rumah Siti Kalasun.
Alah tibo di ateh rumah, hari malam lampu tapasang, sumbahyang Sutan Sari Alam, kain sumbahyang usang bana, diambiak kain dek Kalasun kain palakat nan agak baru, dituka kain Sari Alam, sudah sumbahyang makan nasi.
Kan iyo Sutan Sari Alam, tidak batutua jo barundiang, rintang mancari pikiran saeloknyo, sanan bakato Siti Kalasun, “Barisuak hari sabtu, pasa rami di gaduang, di gaduang Bukittinggi, elok kito pai ka pasa, dibali pakaian nan baru, sarato tarompah agak sapasang, pakaian Tuan buruak bana.”
Kan iyo Siti Kalasun, inyo sudah manjua sikua kabau, “Sananglah tuan Sari Alam, kabau lai ambo jua, sasen balun usak pitihnyo.”
Manjawab Sutan Sari Alam, “Ambo manuruik kato Adiak, elok pagi kito ka pasa, nak lakeh babaliak pulang, indak guno lamo di pakan.”
Kan iyo samalam nantun, tampak galak si Kalasun, baminyak muko kasukoan, laruik malam mangkonyo lalok.
Duo kali ayam bakukuak, cukuik katigo hari siang, murai bakicau ateh kayu, jagolah Sutan Sari Alam, sudah mandi inyo sumbahyang, sudah sumbahyang pulang ka rumah.
Samantaro itu Siti Kalasun, dilatakkan katan jo goreng pisang, minum kopi kaduonyo, sadang duduak bapandangan, sarupo urang baru kawin, lah basiap-siap handak ka pakan, lah duduak pulo baduo di ateh bendi, bendi ka gaduang Bukittinggi.
Dihiliakan labuah nan panjang, lah banyak urang kampuang nan maliek, banyak mambandiang mancameeh, lah runciang
94
