Mandanga kato nan bak kian, manjawab mandeh Si Saidi, "Lorong kapado mimpi rasian, indak dapek dipanggang bana, duo Tuhan pado kito, ibilih setan nan marupo. Kalau mukasuik anak ka tidua, baco fatihah qulhua'llah, indak tadayo kito dek setan,” katonyo mintuo Baheram, bakato sambia makan, sungguah baitu nan kato muluik, bakucak juo di dalam hati.
Lah sudah makan jo minum, hari nan alah barambang patang, patang kok bajawek sanjo, sanan bakato Siti Baheram, "Manolah mandeh janyo ambo, pulanglah ambo dahulu, alah lamo anak ditinggakan, antah manangih lah tu kini, anak nan sadang arek manyusu."
Manjawab mandeh lakinyo, "Disiko Anak bamalam, indak elok bajalan patang, ka kawan nan indak ado pulo, barisuak pagi sajo pulang, bamalam samalam nangko," katonyom intuo si Baheram, takuik malapeh bajalan surang, harialah barambang patang, sio sio bajalan surang.
Mandanga kato nan bak kian, manjawab Siti Baheram, "Lapeh juo ambo dek Mandeh, ambo bajalan kini nangko, manangih anak ditinggakan, mamintak susu tangah malam, hilang aka mandeh beko, jo apo anak diantokkan, ambo bajalan bacapek-capek."
Dek panek tangka batangka:
Dipatah indak tapatah
Bak mamantah batang sampia
Ditutuah-tutuah hanyo lai;
Ditagah indak tatagah
Bagaimanagah ayia hilia
Disuruah juo nan jadi.
Kununlah Siti Baheram, mukasuuk nan indak sampai, apo di agak indak jadi, sangajo manjapuik apak si Upiak, nan dicari indak basuo, nan dijapuik indak tabaok.
50
