ado pikiran nan talinteh, satantangan dari si Ranti, diliek rupo dipandangi, lah patuik inyo dibari bakawan, ka suami si Gadih Ranti, batapo di pikiran di Pakiah, siapo patuik kito ambiak, atau bakonyo nan di subarang, cubolah pandang dek Pakiah, elok batali samo awak.”
Manjawab Pakiah Sutan, “Lorong kapado nan Tuan katokan, alun ado urang nan tampak, nan patuik jadi junjuangan si Ranti.”
Sanan bakato pulo si Fatimah, mandeh kanduang Gadih Ranti, “Jikok ado kato sapakat, kok Haji Amin kito ambiak, urang kayo sunduik basunduik, manuruik kaba kato urang, inyo bacarai jo bininyo, kini bininyo tingga baduo, kok itu baa kito ambiak.”
Manjawab Datuak Batuah, “Lorong kapado Haji Amin, saketek ambo tak suko, urang kayo babini banyak, anak kito gadih ketek, dicarikan urang tuo, mantang-mantang inyo urang kayo, dijua anak kapadonyo, elok nan lain kito cari, pandang anak pandang minantu,” katonyo Datuak Batuah.
“Nak duo carian ambo, kok si Katik kito ambiak, inyo urang bujang alun babini, pandai mamakai tiok hari, roman rancak mandeh pun kayo,” katonyo mandeh si Ranti.
Menjawab pulo Datuak Batuah, “Itu pantang ambo bana, urang manjo ibu jo bapak, ka sawah ka ladang indak pandai, bujang pagurau tiok hari, rintang bamain alang-alang, suko bagurau samo gadang, indak pandai mancari pitih.”
Sanan bakato Pakiah Sutan, bapak kanduang si Ranti, “Manuruik carian ambo, kok si Saman kito ambiak, anak dek mandeh Rawani, bapaknyo Angku Kali di Subarang, inyo manggaleh di Padang.
Manuruik kato urang, lapeh mangaji di Parabek, samaso inyo ka Padang, tidak ado pokok dari rumah, pancarian di ujuang jari, tiok bulan ado bakirim, balanjo mandeh jo adiaknyo.
Tambahan pulo paja nantun, lai sumbahyang jo mangaji, laku
16
