Gaek Taruang Asam
Kalau diliek maso dahulu, sialah urang nan urangnyo, nan tacelak tampak jauah, nan tabirungoh tampak hampia, iyolah Datuak Mangkuto Sati, Angku Kapalo Sungai Talang, dalam nagari Koto Panjang, harimau campo Sungai Talang.
Jikok diliek Pangulu nantun, urang kayo sunduik basunduik, urang gadang kisa bakisa, rumah gadang sambilan ruang, salanjo kudo balari, sapakiak bundo mahimbau, baanjuang suok kida, baukia bamego-mego, kaluak bakaluak daun paku, kaja mangaja ula nago, baturab baayia ameh, babintang bacamin-camin, bantuak rumah gajah maharam, gonjongnyo rabuang mambacuik, janjangnyo kudo mandongkak, laman laweh batabek ikan, tapi bapaga pudiang ameh, salo manyalo batang pinang.
Rumah bacamin-camin ayia, lumbuang bararak di halaman, basawah bapiriang-piriang, baladang bapetak-petak, bakabun babidang-bidang, kalau diliek taranaknyo, banyak manaruah kabau jo bantiang, kayo babilang ka mano-mano.
Lorong kapado Pangulu nantun, pandai batutua bakato-kato, muluik manih bak tangguli, hati pahik bak ampadu, papek di lua runciang di dalam, dalam duo tangah tigo, mambagi gadang ka awak, kato nan pantang di jawab, alua batutua suko mandareh, suko
2
