PERINGETAN DARI TEMPO DOELOE.
sebabnja itoe pamoeda kekasihnja dengen mendadak perloe pake itoe oewang, dan lantaran apa ia bakal masoek dalem boewi kapan tida bisa adaken f 500 di ini malem. Sian Nio jang berpikiran saderhana boleh djadi ada mengira, Tham Tjay kejia teriibet dalem perkara oetang beroetang, boeat mana saorang jang disita, kapan tida bisa membajar, bisa di-gyzel. Ia tida taoe Tham Ijay ada tersangkoet dalem oeroesan meroesak kapertjaja'an pada tauwkeenja dan lakoeken djoega pentjoerian. Dalem kabingoengannja itoe gadis loepa oesoet poko perkara dan malah tida tanja sama siapa Tham Tjay moesti bajar itoe oewang. Dan ini pamoeda jang tjerdik poen dengen sengadja tida maoe toetoerin sampe terang doedoeknja antero hal, hanja tinggal antapin itoe kekasih beräda dalem doega'an keliroe, bahoea ajahnja ada djadi sebab dari itoe katjilaka'an jang lagi mengantjem pada dirinja, jang dengen begitoe djadi dapet lebih banjak sympathie lagi dari si gadis jang di itoe sa'at pandang ia sabagi korban dari sang ajah poenja lantjang dan gegabah. Maka dengen diam-diam Tham Tjay merasa girang soedah bisa sesatken pada Sian Nio, hingga sabaliknja dari dipandang djelek sabagi penipoe atawa pegawe jang tida setia, malah di itoe sa'at ia dianggep sabagi satoe pamoeda baek jang bakal mendjadi korban.
Tapi Tham Tjay jang tjerdik ada sampe mengarti, begitoe lekas Seng Lie balik dan toetoerken kadjadian jang bener pada anak prampoeannja itoe, anggepan Sian Nio tentang dirinja bakal lantes berobah. Maka di itoe sa'at ia moelai pikirin akal boeat tjegah itoe kekasih dapet taoe doedoeknja hal jang betoel, dan djangan maoe pertjaja djikaloe ajahnja kataken Tham Tjay ada
38
