PERINGETAN DARI TEMPO DOELOE.
kerdja keras dan ripoeh dalem kantorannja, itoe kakoerangan ia tida rasain, kerna dalem perdagangan ada banjak soeal jang menarik perhatiannja. Sambil bekerdja ia bisa dapet kagoembirahan, kagirangan, gontjangan jang mengedjoetken, dan banjak djoega kapoeasan. Tapi sekarang, sasoedah nja terpaksa moesti doedoek diam dalem pengasoan soepaja bisa pelihara kasehatannja jang banjak terganggoe, iapoenja ka'ada'an seperti satoe anak ketjil jang terrampas barang maenannja jang ia paling sajang, senang dan gemerin. Ia teroes-meneroes kenangin pada itoe pakerdja'an jang ia soedah toengkoelin sambil taro antero hati dan djiwa boeat lebih dari tigapoeloeh taon lamanja. Meliwatin tempo dengen doedoek mengaso teroes-meneroes ia tida betah, tapi boeat pegang lagi pakerdjaän seperti doeloe, malah boeat tjampoer dan pikirin sadja oeroesan dagang, ia tida sanggoep, kerna toeboehnja jang lemah tida mengidzinken. Maka sadari oendoerin diri Tham Tjay poenja aliran dari penghidoepan ada seperti mandek: saoepama aer soeloeran jang biasanja liwat dengen deres, mendadak terpempet djalannja atawa kena terbendoeng, hingga djadi moelek dan moedal tida karoean, melimpas ka kanan-kiri, tida ada lobang atawa djalan boeat mengalir lebih djaoe
Djikaloe maoe, biarpoen soedah toea dan berkenjakitan, Tham Tjay memang masih bisa dapet apa-apa boeat simpangin pikirannja, kerna ia poenja kamerdika'an dalem hal oewang dan namanja jang terkenal sabagi soedagar jang mampoeh, membikin banjak orang jang ingin djadi sobatnja, kerna „dimana ada goela disitoe moesti dateng banjak semoet.” Tapi Tham Tjay dari doeloe tida soeka deket pada orang-orang, biarpoen familienja sendiri, jang hendak rapet padanja
10
