— 370 —
sedikit dalem tjerita, dan intipi poetri itoe, salagi ia maoe berpisah dari Graaf Mattachich. Tatkalah itoe, poetri ada doedoek berhadep-hadepan dengen graaf katjintahannja dalem salah satoe hotel jang paling besar di Keulen.
„Sampe bertemoe kombali di Paris, sobatkoe,” kata Louise dengen berbisik. „Akoe misti poedji klakoeannja Sri Baginda baroe, jang soeda bri idjin padakoe, aken dateng di Brussel. Akoe sekarang berharep, nanti bisa bikin beres segala oeroesan kita. Perkerdjahan ini tida bisa diselesiken sadja dengen gampang, itoelah boleh dipastiken, tapi sabolehnja akoe nanti djaga, soepaja itoe setan bantal, lepehken segala apa jang ia dapet tida dengen djalan halal, ia tida boleh goenaken waktoe baek aken rampas kita poenja milik jang sah.”
„Tapi akoe minta kaoe, Louise, berlakoe dengen kasabaran! Dan toelis sedikit padakoe, begitoe lekas ada hal apa-apa, jang kita tida bisa doega sekarang.”
„Itoe tentoe sekali! Akoe amat kapingin taoe, apa dengen sabenarnja ia telah tjaboet hak anak-anaknja dalem hal poesaka, aken goenanja laen orang.”
„Akoe tida pertjaja ada begitoe roepa.”
