„kaloe kaoe ada perloe apa-apa lagi, kataken sadja padakoe. Sabolehnja akoe nanti berboeat goena membikin baek kaoe poenja ka'adahan.”
„Tapi ini sabetoelnja ada terlaloe banjak, Lucien, lebi dari apa jang akoe perloe.”
„Djangan kata begitoe. Kaoe toch taoe, itoe pembrian akoe kasi dengen satoeloes hati, Mathilde. Dengen soengoe — dan ia peloek lehernja si nona, samentara bibirnja menjioem orang poenja djidat — akoe belon pernah dapet rasa begitoe tjinta pada laen orang seperti pada kaoe. Akoe kira, jang, kaloe salamanja akoe ada bersama-sama kaoe, akoe nanti berobah djadi lebi baek. Kerna dari kaoe akoe dapet pengadjaran, bagimana klakoean lemah-lemboet, bisa loemerken logam jang paling pengabisan keras.”
„Tapi apa kaoe tida baek?”
„Hajo, djangan berlaga, Mathilde, kaoe poen taoe akoe poenja ka'adahan sampe di bagian jang haloes. Akoe poenja hati ada terlaloe kakoe, sabagi tjabang kering, jang lantas nanti djadi patah kaloe di'eloek. Pada saban kali akoe bertindak madjoe, akoe sanantiasa lebi doeloe inget aken diri sendiri. Akoe tida sedikit bisa toeroet kaoe
