— 350 —
Kombali ternjata pada aer moekanja Durieux, satoe senjoem jang kedji, tapi mata si nona tida dapet meliat itoe, dan berkata lebi djaoe:
„Koetika kaoe masi djadi saorang miskin, dan kira jang ia loepaken padamoe, itoelah ada satoe waktoe sedap sekali bagi koe...."
„Pertjaja omongkoe, Mathilde! Sapoeloe kali akoe lebi soeka, kaloe kita bisa pertoendjoeki moeka pada orang banjak, terhoeboeng dengen tali kawinan jang sah. Tapi kaoe taoe, boekan, itoe nanti membikin lebi soesa sadja kita poenja ka'adahan? Kitaorang doewa-doewa tida mempoenja harta, dan berkerdja sababis tenaga, ho! itoe akoe kira tida nanti bisa menoeloeng sabrapa banjak....."
„Sajang sekali jang kaoe ada merasa begitoe !"
„Ah, mengapa? Sekalipoen memang benar akoe ada harep bernikah padanja, tapi akoe toch tida nanti djadi lebi koerang menjinta padamoe. Malahan djoega, akoe belon pernah dapet merasa soeka pada kaoe seperti sekarang ini, hingga kaloe maoe dibilang perkara sabenarnja, kaoelah ada nona, boeat siapa akoe soeka djadi korban
