lantas misti kenal harganja, bilah orang dapet denger kabar jang membrita, bahoewa gebar pembaringan poenja rendah sadja, ada berharga lebi dari saratoes riboe frank.
Di loearan, di mana-mana poen baginda ada terkenal seperti orang amat himat. Tapi bagi orang jang taoe betoel hikajat itoe astana Balincourt, siapatah jang nanti brani tinggal tetap dengen perkatahannja, atas baginda poenja klakoean?
Sabaliknja dari laen fihak, tida koerang djoemblahnja orang jang brani memastiken, bahoewa baginda ada meranting sendiri, poehoen-poehoen di tamannja dan ia poenja topi roempoet, sampe lama baroe ditoekar dengen jang baroe.
Satoe kali barones maoe tjobah toekar topi, jang baginda masi soeka pakeh, dengen jang baroe, tapi perboeatan ini boekan djadi dapet gandjaran. Baginda bertangas, dan dengen tida mengarti atas orang poenja baek hati, ia lantas menjomel kalang-kaboet. Dan hatinja jang panas baroe dapet dipademken, koetika si djantoeng hati kasi tjerita, itoe topi baroe telah dibelih ampir dengen saperapat harga.
Pada waktoe moesin dingin, baginda paling soeka memakeh kopiah, jang biasanja
