— 248 —
„Lagi sakali akoe membilang banjak trima kasi, atas apa jang kaoe telah berboeat pada permeisoeri. Kaoe soeda menoeloeng dan menghiboerken pada iboekoe dengen sagenap hati! Itoe akoe tida nanti loepa sampe di achirnja djaman!"
Dengen sedih sekali poetri berpisah pada toewan baron, jang sakeau lama telah tinggal satia mendjadi ia poenja sobat. Kerna ia tida di'idjinken tinggal lebi lama, aken liat lagi sakali iboenja poenja roepa.
Selang bebrapa hari permeisoeri dikoeboer. Aken tetapi, samantara orang lagi bikin sembajang dengen oepatjara dalem gredja St. Gudule, Sri Maha Radja Leopold II brangkat ka kota Paris.
XX.
Maski poen benar adanja permeisoeri poenja kata, Sri Maha Radja Leopold II poenja koeping tida begitoe bisa hargaken soeara jang merdoeh, toch tida boleh dibilang, ia tida poenja pengrasahan sama sekali bagi kaindahan. Kerna matanja soeka sekali meliat barang-barang jang bagoes. Satoe patoeng jang indah, atawa satoe pigoera jang bagoes, bisa sekali bikin baginda memandang dengen tida bosan.
