— 19 —
„Djantoeng hati! Djantoeng hati! Hajo, liatlah padakoe! Akoe ini ada kaoe poenja iboe, orang jang paling tjinta padamoe!”
Aken tetapi, tida satoe soeara ada terdenger menjaoet atas itoe seroehan. Samoewa tinggal soenji sabagi ka'adahan didalem koeboer. Sedeng djoega poetra makota, tida sekali ada kaliatan bergerak : sa'antero toeboe dan anggotanja telah mendjadi kakoeh ... ia soeda mendjadi mait!
„Sri padoeka!”
Begitoe dengen sakoenjoeng-koenjoeng ada terdenger soearanja Barones de Meaublanc.
Tapi permeisoeri tida menjaoet, hanja tinggal awasi pada barones dengen mata jang menandaken hantjoernja hati.
„Sri padoeka, baginda menoenggoe kaoe poenja dateng dalem kamar di sablah ini.”
„Akoe kenal itoe kawadjiban!” berkata permeisoeri kamoedian dengen soeara didalem leher. „Apabilah radja panggil ... Djantoeng hati, slamat tinggal! Satoe perkara laen memaksa akoe berpisa padamoe . . . . .”
Satelah itoe laloe ia berbangkit, terbantoe oleh Barones de Meaublanc dan toewan doktor.
