— 116 —
Koetika itoe pintoe hek di kebon lantas berboenji, dan iaorang berdoewa laloe bertindak masoek, samantara kelamboe pintoe dikisar ka samping.
„Ha, ia soeda dapet liat pada kita,” kata baginda dengen tertawa.
„Betoel kaoe bikin akoe merasa broentoeng sekali! Sakean lama akoe ada menoenggoe kaoe dateng," saoet satoe soeara jang lemah lemboet.
Kamoedian Clémence dateng menjamboet. Iaorang roepanja ada sanget bergirang di hati, sabagimana ada ternjata di masing-masing poenja moeka jang berseri-seri.
Samoea rasa kwatir lantas hilang dari pikiran baginda, tida beda seperti mega mendoeng tersapoeh oleh angin jang santer. Soenggoe tida salah orang poenja kata, bahoewa soeara prampoean jang ditjinta, bisa sekali bikin kalelap ingetan.
Anggoer laloe ditoewang, kamoedian lantas marika minoem sampe kering, dan teroes sembari minoem iaorang bitjara dalem matjem-matjem perkara boeat menjenangken hati.
⁂
