— 93 —
doeka hati.
Ia maoe menjega niatnja radja, soepaja djangan taloek, hatinja tida brani. Sebab kaloe ia tjega begitoe dengen zonder mengasi satoe daja jang sampoerna, sama djoega Tebi soeka liat Siamlo binasa.
Tapi kaloe ia tida menjega, hatinja merasa piloe bila ini karadjahan sampe terdjato di tangannja laen orang.
Demikianlah hatinja permisoeri djadi bingoeng.
Sahabisnja beromong-omong, Siauw Hoei berdoea anaknja laloe masoek kombali ka dalem kraton, sedeng radja Siamlo tinggal doedoek dengen hati doeka.
Siauw Hoei prenta dajang-dajang bikin sadia makanan boeat menghiboer hatinnja radja jang lagi kesel. Tida lama radja masoek dan makanan poen telah sadia.
Doea laki istri itoe laloe doedoek makan minoem, tapi kadoekahan dan rasa takoet jang ada di hatinja Ma Say-tjin, tida djadi linjap lantaran makan minoem, malah boleh dikata, toeroennja makanan dan arak, tida begitoe ladjoe sabagimana kaloe hati dan pikiran lagi senang.
