— 54 —
„Hamba brani pastiken, kaloe radja dari Kimkok soeda batja toeankoe poenja soerat itoe, hatinja djadi amat girang dan sigra djoega satoe angkatan perang jang tegoe lantas disiapken,“ kata Liang-sih sabagi penoetoepnja.
Mendenger itoe peroendingan, Baginda djadi amat girang dan membriken poedjian besar.
„Oh, kaloe sampe ini maksoed jang besar bisa berhasil,“ kata Baginda: „kami tentoe tida loepa membri gandjaran besar pada keng.“
„Trima kasi boeat toeankoe poenja boedi katjintahan.
„Sekarang lebi doeloe kami angkat keng dalem djabatan Pisoeseng,“ kata Baginda, „kami harep keng tida soengkan boeat menjataken sagala pikiran jang dirasa berfaedah aken goenanja negri.“
Berbareng itoe, Baginda laloe kaloearken firma, dimana Lie Liang-sih boleh toekar nama kaoemnja, jang terakoeh oleh Baginda sabagi familie. Dan ini keangkatan membikin Liang-sih merasa dirinja djadi lebi tinggi sadepa, maka ia lantas djatoken diri di hadepan Baginda sambil mengoetjap banjak-banjak trima kasi, sedeng kapalanja tida brentinja memangoet-manggoet.
Begitoelah moelai itoe hari Lie Liang-sih boleh seboet dan toelis namanja Tio Liang-sih, dengen pegang djabatan sabagi secretaris particulier
