— 53 —
Kimkok tida toelak kita poenja kainginan?“
„Oh, itoelah ada gampang sekali.“ kata Lie Liang-sih: „dari sini toeankoe prenta satoe mantri jang pande bitjara pergi ka itoe negri dengen membawa barang-barang sabagi bingkisan, dengen satoe soerat dalem mana toeankoe boleh seboet, Tiongkok dan Kimkok sadari doeloe boekan sadja ada djadi tetangga negri, malah belon pernah bertjidra, dan itoelah ada djadi soeatoe tanda, jang kadoea negri ini bersobat rapet.“
„Kimkok dan Tiongkok haroes dibilang ada sabagi bibir dan gigi,“ kata poela itoe ambtenaar dengen pikiran lebi loewas: „maka pantes sekali kaloe di waktoe ada apa-apa, satoe pada laen soeka saling menoeloeng. Boekan seperti negri Liauwkok jang salaloe maoe angkat kapala dan tjari pertjidrahan sadja. Maka dalem ini persariketan toeankoe minta Kimkok soeka angkat sendjata boeat labrak pada Liauwkok jang memang ada mendjadi bekas moesoenja, sedeng dari sini kita nanti membantoe. Dan kaloe Liauwkok poenja negri soeda djadi binasa, boekan sadja ini doea negri djadi bersobat rapet, tapi djoega sateroenja tida bakal poesing lagi sama oeroesan perang. Dan pada negri Kimkok toeankoe boleh kasi satoe djandjian jang menjenangken, jaitoe, kasiken sabagian dari tana-tananja jang kita-orang telah dapet.“
