— 570 —
Satoe sair jang boenjinja samatjem ini; njatalah toelisan ini telah ditoelis oleh itoe Tosoe jang doeloe djoega.”
Kamoedian baginda tanja: di mana tempatnjaitoe Tosoe. Koetika dikasi taoe, bahoewa itoe orang pertapahan soeda berlaloe sahabis mengoendjoeki kasaktiannja jang gaib, ini Keizer djadi mengelah napas dan berkata:
„Kaloe begitoe kami tida berdjodo boeat katemoe padanja, maka sasoedanja ia taoe apa jang bakal terdjadi, ia telah pergi sabelonnja kati dateng. Ah, kaloe ini waktoe kami bisa katemoe lagi padanja, kami tentoe tanjaken bagimana keadahan kami poenja diri boeat di hari jang mendatengi.”
Lie Tjhoen dan laen-laen mantri tjoba hiboeri baginda jang lagi berdoeka, katanja: bahaja heibat soeda liwat, maka boeat jang mendatengi tentoe tinggal slamatnja. Kamoedian Lie Tjhoen minta Song Ko-tjong soeka dateng djoega ka Siamlo nanti sahabisnja taon baroe dianteri poelang.
Ko-tjong Hongte tida ada kaberatan boeat trima itoe oendangen, kerna balik sekarang djoega ka kota Lim-an, tida apa goenanja, tambahan ini waktoe keadahan negri lagi sedeng kaloet, maka biarlah ia senang-senangken hati aken meliwati tempo di poelo-poelo jang belon pernah dikoendjoengi.
