— 569 —
Baginda kaliatannja amat girang, tapi keenjoeng-koenjoeng djadi terkedjoet koetika dapet liat boeninja itoe sairan jang ada di atas tembok.
Sakean lama baginda mengawasi dan kamoedian berkata:
„Siapatah jang toelis ini sair?”
Lie Tjhoen kasi taoe, bahoewa kamaren ada dateng saorang sakti jang dipanggil Djin Sin Ong, sair ini telah ditoelis olehnja. Tapi sebab tida ada saorang jang bisa artiken boenjinja, maka sair itoe ditaro sadja di itoe tembok.
„Tosoe itoe bilang djoega,” kata poela Lie Tjhoen: „bahoewa di ini poelo nanti kadatengan satoe tetamoe agoeng jang moelia; maski perkatahan itoe ada koerang terang, tapi sekarang dengen datengnja Sri Baginda, sagala apa jang tadinja gelap djadi terang sendiri. Njatalah bener perkatahannja itoe orang berilmoe.”
Baginda manggoet-manggoet, tapi tida berkata soeatoe apa.
„Baginda tentoe bisa artiken boenjinja itoe ampat baris sairan,” kata Lie Tjhoen dan mantri-mantri jang laen: ,sebab dengen meliat itoe, kaliatannja baginda djadi terharoe atawa terkenang apa-apa.”
„Boekannja begitoe,” saoet Baginda Song Ko-tjong: „kami mengelah napas, kerna menginget jang doeloe hari poen ada satoe Tosoe telah toelis
