— 53 —
keadahan Piankeng djadi sembarang waktoe bisa tergojang.
„Maka inilah tida boleh sekali-kali dibriken tana Samtin.
„Djoega boeat membri itoe sadjoembla harta jang telah didjandjiken boeat perdamian, menoeroet hamba poenja pengliatan ada amat soeker, Maski djoega dikoempoel dari mana sini, toeh harta jang begitoe besar tida nanti bisa dapet dikoempoel. Atawa sekali poen dapet, ada menjoesaken pada rahajat dan negri.
„Tentang angkatan perang Kim jang dateng kamari, kakoeatannja tjoema sapoeloe laksa. Tapi hamba berdoea Tiauw Peng-tiong ada mempoenjai tigapoeloe laksa soldadoe, sedeng di dalem ini kota ada toedjoe laksa balatentara. Djadi kaloe itoe semoea dirangkep, boekan kita poenja pasoekan ada lebi tegoe berlipat ganda?
„Na, lantaran begitoe, mengapatah kita moesti toeroet itoe perdamian, hanja tida boleh tida kita lawan dan kasi hadjaran jang keras, soepaja laen kali itoe bangsa tida koerang adjar dengen brani liat tida mata ka djoeroesan Selatan.”
Mendenger ini panglima toea poenja perkatahan, jang mirip sabagai peroendingan, baginda djadi amat girang, maka itoe waktoe djoega baginda laloe koerniaken djabatan panglima besar.
Tjiong Soe-touw mengoetjap banjak trima kasi,
