— 41 —
atoeran itoe ada bagoes.
"Baeklah, akoe senang sekali dengen ini atoeran jang Taydjin djalanken," kata itoe Hoe-ie kamoedian.
"Kaloe begitoe, baek akoe nanti panggil itoe panglima,“ kata Lie Kong jang lantas prenta orang oendang Ong Thiat-tiang.
Tida lama panglima itoe telah dateng. Ong Thiat-tiang itoe ada berbadan sedang, tingginja ada kira-kira toedjoe kaki, oesianja didoega baroe tigapoeloe taon. Tenaganja amat besar dan kadoea tangannja bisa angkat riboean kati.
Matanja maski besar, tapi mengoetaraken hati jang brani dan djoedjoer. Sikepnja keren dan pantes djadi orang paperangan.
Satelah sampe, ia laloe membri hormat pada itoe doea orang besar.
Hoe-ie satelah meliat padanja, lantas berkata:
"Sikapnja ada gaga perkasa, inilah ada orang jang pantes djadi panglima perang."
Lie Kong laloe kasi taoe tentang perniatannja pada ini orang kosen, ia kata: Keizer soeda tetepken poetoesannja pengadilan besar boewang kawan dorna ka loear kota, jaitoe Tjoa Keng, Tjoa Yoe, Ko Kioe dan Tong Koan diboewang ka kota Tamtjioe; sedeng Ong Hoe, Jo Tjian dan Nio Soe-seng bertiga diboewang ka kota Pitjioe.
